ராம் அண்ட் லீலா – விமர்சனம்

நடிப்பு: ரியோ, வர்த்திகா, சேத்தன், முனிஷ்காந்த், காத்தாடி ராமமூர்த்தி, சுவாமிநாதன், மாளவிகா அவினாஷ், தீபா வெங்கட், மாகாபா ஆனந்த், சுதன்குமார், பாலாஜி தியாகராஜன் தயாளன், தாஃபியா அபு, கவின் ஜிடி மற்றும் பலர்

எழுத்து & இயக்கம்: ராமச்சந்திரன் கண்ணன்

கிரியேட்டிவ் தயாரிப்பாளர்: சஞ்சய் விஜயராகவன்

ஒளிப்பதிவு: மல்லிகார்ஜுன்

படத்தொகுப்பு: ஒய்.என்.சி.சிவா

இசை: அங்கித் மேனன்

நடனம்: அபி & சால்ஸ்

தயாரிப்பு: டிரைடெண்ட் ஆர்ட்ஸ் & ஏவா எண்டெர்டெயின்மெண்ட்

தயாரிப்பாளர்கள்: ஆர் ரவீந்திரன், சுதர்ஸன்

பத்திரிகை தொடர்பு: சதீஷ் குமார், எஸ் 2 மீடியா

தொடர் காதல் தோல்விகள் மற்றும் பெண் பார்க்கும் படலங்களின் தோல்விகளால் திருமணம் செய்துகொள்ள ஒரு பெண்ணும் அமையாமல் மனச் சோர்வில் தவிக்கும் நாயகன் ரகுராம் (ரியோ), ஒரு ரயில் பயணத்தின்போது நாயகி லீலாவை (வர்த்திகா) சந்திக்கிறார். முதல் பார்வையிலேயே ஏற்படும் ஈர்ப்பும், இருவருக்கும் இடையே மலரும் காதலும், அவர்களின் வாழ்க்கையை வண்ணமயமாக மாற்றுகிறது. காதல் தீவிரமடையும் வேளையில், ரகுராமிடம் லீலா ஒரு வித்தியாசமான நிபந்தனை விதிக்கிறார். மாலை 6 மணிக்கு மேல் தன்னை சந்திக்கக் கூடாது, பேசக் கூடாது என்பதே அது.

இந்த வினோதமான விதிக்குப் பின்னால் இருக்கும் மர்ம முடிச்சுகள் என்ன? லீலாவின் கடந்த காலப் பின்னணி என்ன? ரகுராம் இந்த மர்ம முடிச்சுகளை உடைத்து, சிக்கல்களைத் தீர்த்து, காதலில் வென்றாரா? என்பன போன்ற கேள்விகளுக்கு காதல் மற்றும் காமெடி கலந்து புதுமையான அம்சங்களுடன் விடை அளிக்கிறது ‘ராம் அண்ட் லீலா’ திரைப்படத்தின் மீதிக்கதை.

கதையின் நாயகன் ரகுராமாக ரியோ நடித்திருக்கிறார். அவருக்குப் பொருத்தமான கதாபாத்திரம். அப்பாவியான முகபாவம் மற்றும் உடல்மொழி மூலமும், இயல்பான நகைச்சுவை மூலமும் தனது கதாபாத்திரத்துக்குத் திறம்பட உயிர் கொடுத்துள்ளார் ரியோ. படத்தின் ஆரம்பம் முதல் முடிவு வரை தனது கலகலப்பான ஜாலியான நடிப்பு மூலம் படம் எங்கும் தொய்வடையாமல் பார்த்துக்கொள்கிறார்.

நாயகி லீலாவாக வர்த்திகா அறிமுகமாகியுள்ளார். பார்வைக்கு அழகாக இருக்கிறார். அருமையாக நடிக்கவும் செய்திருக்கிறார். கதாபாத்திரத்துக்கு ஏற்ற தேர்வு. காதல் காட்சிகள் மற்றும் உணர்ச்சிமயமான காட்சிகளில் அசத்தலாக நடித்து, அனைவரது கவனத்தையும் ஈர்க்கிறார்.

சேத்தன், முனிஷ்காந்த், காத்தாடி ராமமூர்த்தி, சுவாமிநாதன், மாளவிகா அவினாஷ், தீபா வெங்கட், மாகாபா ஆனந்த், சுதன்குமார், பாலாஜி தியாகராஜன் தயாளன், தாஃபியா அபு, கவின் ஜிடி உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாகக் கொடுத்திருக்கிறார்கள்.

இப்படத்தை எழுதி இயக்கியிருக்கிறார் இயக்குநர் ராமச்சந்திரன் கண்ணன். ”காலை 6 மணி முதல் மாலை 6 மணி வரை அழகிய பெண்ணாகவும், மாலை 6 மணி முதல் மறுநாள் காலை 6 மணி வரை ஆணாகவும் இருக்கும் ஒரு வினோதமான நபரின் உண்மை நிலை தெரியாமல், அவரை கதாநாயகன் காதலித்தால் என்ன ஆகும்?” என்பது தான் இப்படத்தின் ஒருவரிக் கதை. இதே கதை அம்சத்துடன் ‘டபுள் ஆக்குபன்சி’ என்ற தமிழ்ப்படம், நடிகை குஷ்பு தயாரிப்பில், அஸ்வின் கந்தசாமி இயக்கத்தில் சுமார் இரண்டு மாதங்களுக்கு முன் (12, ஜூன், 2026 அன்று) திரைக்கு வந்தது குறிப்பிடத்தக்கது. ‘டபுள் ஆக்குபன்சி’ மற்றும் ‘ராம் அண்ட் லீலா’ ஆகிய இரண்டு படங்களின் கதைக்கருவில் மட்டுமல்ல, ட்ரீட்மெண்ட்டிலும் நிறைய ஒற்றுமைகள் இருப்பதைப் பார்க்கும்போது, இந்த இரண்டு படங்களின் இயக்குநர்களும் ஒரே வெளிநாட்டுப் படத்தைப் பார்த்து ’நாட்’டை உருவியிருக்கிறார்கள் என்பது புலனாகிறது. எனினும், ‘டபுள் ஆக்குபன்சி’யைப் பார்த்தவர்கள் கூட ரசிக்கும்படியாக ‘ராம் அண்ட் லீலா’ படத்தை சில புதிய உத்திகளுடன் இயக்குநர் ராமச்சந்திரன் கண்ணன் இயக்கியிருப்பது பாராட்டுக்குரியது.

இசையமைப்பாளர் அங்கித் மேனனின் பாடலிசையும், பின்னணி இசையும் மனதைக் கொள்ளை கொள்கின்றன.

ஒளிப்பதிவாளர் மல்லிகார்ஜுன் தனது காமிரா மூலம் காட்சிகளை நேர்த்தியாகப் படம் பிடித்து, பார்வையாளர்களைக் கவர்ந்திருக்கிறார்.

படத்தொகுப்பாளர் ஒய்.என்.சி.சிவாவின் ஷார்ப் கட்டிங், படத்தின் விறுவிறுப்புக்கு உறுதுணையாக இருந்துள்ளன.

‘ராம் அண்ட் லீலா’ – புதுமையான கதை முடிச்சை விரும்பும் இளம் ‘ஜென் – ஸீ’ தலைமுறையினருக்கு நிச்சயம் பிடிக்கும்; பார்த்து மகிழலாம்!

ரேட்டிங்: 3/5