ஒன் மேன் – விமர்சனம்

நடிப்பு: அனைத்து கதாபாத்திரங்களிலும் சங்ககிரி ராஜ்குமார்

தொழில்நுட்பம்: அனைத்துத் துறைகளையும் ஒற்றை நபராகக் கையாண்டது சங்ககிரி ராஜ்குமார்

பத்திரிகை தொடர்பு: நிகில் முருகன்

ஒரு புதுமுக இயக்குநராக, தயாரிப்பாளராக ’வெங்காயம்’ படத்தில் அறிமுகமாகி தமிழ்த் திரையுலகைத் திரும்பிப் பார்க்க வைத்த சங்ககிரி ராஜ்குமார், அந்தப் படம் எடுத்த அனுபவங்களையே இன்னொரு படமாக்கி ’பயாஸ்கோப்’ என்ற பெயரில் கொடுத்தார். இப்போது இந்தப் புதுமைகளுக்கெல்லாம் சிகரம் வைத்தது போல இன்னொரு புதுமையை இந்த ’ஒன் மேன்’ படத்தில் செய்து சாதனை படைத்திருக்கிறார்.

ஒரு படம் உருவாக எத்தனை தொழில்நுட்ப, மற்றும் படைப்பு, நடிப்புக் கலைஞர்கள் தேவையோ அவை எல்லாவற்றையும் தனி ஒரு மனிதராக நின்று அந்தந்த விஷயங்களை கற்றுக் கொண்டு பல வருடங்கள் முயன்று இந்தப் படத்தை தனி ஒரு நபராக உருவாக்கி இருக்கிறார்.

கதை என்னவென்றால், நான்கு சாதனை மனிதர்கள் தங்களுக்கான விருதுகளைப் பெற ஒரு காரில் பயணம் செய்கிறார்கள். அந்த நான்கு பேர் மட்டுமல்லாது அந்த காரை ஓட்டி வருபவரும் சங்ககிரி ராஜ்குமார்தான். வழியில் ஒரு காட்டுக்குள் செல்ல நேரிட, அங்கே சந்திக்கும் ஒரு விஞ்ஞானி மூலம் இந்த உலகத்தை 10 நாட்களுக்கு தங்களுடைய சொந்த உலகமாக மாற்றும் முயற்சியில் நால்வரும் ஈடுபடுகிறார்கள். அதன் முடிவு என்ன ஆனது என்பதுதான் கதை.

வெவ்வேறு விதமான பாத்திரங்களுக்கு வெவ்வேறு ஒப்பனைகள் போட்டுக் கொள்வதுடன் அதற்கான காட்சிகளையும் தானே கேமராவை இயக்கி, அந்த கேமராவின் முன்னே தானே சென்று நடித்து, பிறகு அதை எடிட் செய்து, டப்பிங் பேசி, கிராஃபிக் வேலைகள் செய்து, பின்னணி இசை கோர்த்து… என்று ஏகப்பட்ட வேலைகளை சங்ககிரி ராஜ்குமார் ஒருவரே பார்த்திருப்பது பிரமிக்க வைக்கிறது.

அதிலும் ஹைலைட்டாக ஒரு காட்சியில் ஒரு மன்னர் பதவியேற்பு விழாவுக்கு வந்திருக்கும் நூற்றுக்கணக்கானவர்கள், மற்றும் ஒரு சினிமா தியேட்டரில் படம் பார்க்கும் அத்தனை பார்வையாளர்கள், இந்த பிரச்சனையை துப்பறிய போலீஸ் வரும்போது கூடும் ஊர் மக்கள் என்று மூன்று காட்சிகளில் அத்தனை பாத்திரங்களிலும் சங்க்கிரி ராஜ்குமாரே தோன்றி இருப்பது பிரமிக்க வைக்கிறது.

அதற்கு அவருக்கு கிராபிக்ஸ் பெருமளவில் உதவியிருக்கிறது என்றாலும் அந்த கிராபிக்ஸையும் தானே பயின்று அந்த முயற்சியைப் படத்துக்கு கொண்டு வந்திருப்பதும் ஆகச் சிறப்பு.

அத்தனை கேரக்டர்களிலும் ஒருவரே வந்தால் எவ்வளவு நேரம் படத்தை பார்க்க முடியும் என்கிற அங்கலய்ப்பு தேவையில்லாதது. அதற்காகத் தான் கார் சேஸிங், விமானத்தில் சண்டை, ஆபத்தான ஸ்டண்ட் காட்சிகள் என்று ஏகப்பட்ட ஆக்சன் ஐட்டங்களையும் உள்ளே வைத்திருக்கிறார் ராஜ்குமார்.

உலகத்திலேயே யாரும் செய்திராத முயற்சி இது என்ற அளவில் ராஜ்குமாரின் முயற்சியை தலையில் தூக்கி வைத்துக் கொண்டாடலாம்.

படத்துக்குள் அங்கங்கே படப்பிடிப்பு குறித்து நமக்கு எழும் சந்தேகங்களை தீர்க்கும் விதமாக படத்தின் இறுதியில் அவற்றையெல்லாம் எப்படி படம் ஆக்கினார் என்பதை காட்டும்போது ஆச்சரியமாக இருக்கிறது.

சங்ககிரி ராஜ்குமாரின் இந்த சாதனை, உலக அரங்கில் வேறு எவரும் நினைத்துக் கூட பார்க்க முடியாது.

’ஒன் மேன்’ – ஒற்றைத் தமிழன் சங்ககிரி ராஜ்குமார் உலகையே பிரமிக்கச் செய்திருக்கும் சாதனைப் படம்; அனைவரும் திரையரங்கில் பார்த்து கொண்டாடுங்கள்!

ரேட்டிங்: 4.5/5