சத்தியவான் சாவித்திரி – விமர்சனம்
நடிப்பு: கீர்த்தி சுரேஷ், மிஷ்கின், சாருகேஷ், பாலசரவணன், ஷில்பா மஞ்சுநாத், பிரிகிடா சாகா, ஜி.எம்.குமார், மதுசூதனன், ஆர்.சுந்தர்ராஜன், மாலா பார்வதி, தீபா சங்கர், ஏ.வெங்கடேஷ், ’ராஜா ராணி’ பாண்டியன் மற்றும் சிலர்
எழுத்து & இயக்கம்: பிரவீன் எஸ் விஜய்
ஒளிப்பதிவு: அருள் வின்சென்ட்
படத்தொகுப்பு: பிரசன்னா ஜிகே
இசை: சாம் சிஎஸ்
கலை இயக்கம்: பிரேம் கருந்தமலை & ஏ.எம்.ஆனந்தராஜ்
இணைத் தயாரிப்பு: எஸ். வைஷ்ணவி விவேக்சந்தர்
தயாரிப்பு: ’டிரம்ஸ்டிக்ஸ் புரொடக்ஷன்ஸ்’ வெடிக்காரன்பட்டி எஸ் சக்திவேல் & ஜீ ஸ்டூடியோஸ்
பத்திரிகை தொடர்பு: எய்ம் சதீஷ், சிவா
கோயம்புத்தூரைச் சேர்ந்தவர் சாவித்திரி (கீர்த்தி சுரேஷ்). அங்குள்ள சட்டக் கல்லூரியில் சட்டம் பயின்று முடித்திருப்பவர். புகழுடன் திகழும் பிரபல மூத்த வழக்கறிஞர் ஒருவரிடம் ஜூனியர் வழக்கறிஞராக சேர்ந்து, தொழில் கற்றுக்கொண்டு, பின்னர் தனியாக தொழில் செய்து, தானும் பிரசித்தி பெற்ற வழக்கறிஞராகத் திகழ வேண்டும் என்பது அவரது லட்சியம்.
வெளியூரிலிருந்து சென்னைக்கு வந்து, கையை ஊன்றி கர்ணம் போட்டு, அங்கு ஐ.டி கம்பெனி ஒன்றின் உரிமையாளர் ஆகியிருப்பவர் தீபக் (சாருகேஷ்). அவரும் அவரது பெற்றோரும் கோயம்புத்தூருக்கு வந்து சாவித்திரியைப் பெண் பார்க்கிறார்கள். ”திருமணத்துக்குப் பின் பெண் வேலைக்குப் போகக் கூடாது; வீட்டோடு ஹவுஸ் ஒய்ஃபாக இருக்க வேண்டும்” என்ற ஒன்றுதான் தீபக்கின் அம்மாவுடைய நிபந்தனை.
பெரிய வழக்கறிஞராக வேண்டும் என்ற கனவுடன் இருக்கும் சாவித்திரிக்கு இப்போதைக்கு திருமணம் செய்து கொள்வதில் விருப்பம் இல்லை. எனவே தீபக்கை தனியாக சந்தித்து, அவரிடம் தன் லட்சியத்தைத் தெரிவிக்கிறார். தன் லட்சியம் நிறைவேறுவதற்கு முன் திருமணம் செய்து கொள்வதாக இல்லை என்கிறார். அதற்காக, சினிமாவில் வருகிற மாதிரி, என் பெற்றோரிடம் போய் என்னைப் பிடிக்கவில்லை என்று சொல்லுங்கள் என்று சொல்ல மாட்டேன். அப்படி நீங்கள் சொன்னால், அடுத்து என்னைப் பெண் பார்க்க என் அப்பா வேறு பையனை அழைத்து வந்துவிடுவார். ஆகவே, பெண்ணை எனக்குப் பிடித்திருக்கிறது; கல்யாணத்தை ஒரு ஆறு மாதம் கழித்து வைத்துக் கொள்ளலாம் என்று சொல்லுங்கள். அந்த ஆறு மாதத்தில் ஏதாவதொரு காரணத்தைக் கண்டுபிடித்து, திருமண ஏற்பாட்டை நிறுத்திவிடலாம்” என்கிறார் சாவித்திரி. ஆனால் தீபக்கோ, “பெண்ணை எனக்குப் பிடித்திருக்கிறது. உடனே திருமணத்தை வைத்துக் கொள்ளலாம்” என்று தன் பெற்றோர் மற்றும் சாவித்திரியின் பெற்றோர் முன்னிலையில் ஒரே போடாகப் போட, சாவித்திரி அதிர்ச்சி அடைகிறார்.
வேறு வழியில்லாமல், மிகுந்த மனவருத்தத்துடன் தீபக்கை மணந்து, சென்னைக்கு குடிபெயர்கிறார் சாவித்திரி. கணவனும், மனைவியும் ஒரே வீட்டில் வாழ்ந்தாலும், பேச்சுவார்த்தையோ, தாம்பத்திய உறவோ இல்லாமல் தனித்தனி படுக்கையறைகளில் பொழுதைக் கழிக்கிறார்கள். ஒரு கட்டத்தில், “உன் விருப்பப்படி ஒரு சீனியர் வழக்கறிஞரிடம் ஜூனியராக சேர்ந்து பணியாற்று” என்று தன் அம்மாவின் நிபந்தனையை மீறி தீபக் அனுமதி கொடுக்க, மனம் மகிழும் சாவித்திரி, கணவனுடன் சமரசம் ஆகிறார்.
சட்டக்கல்லூரியில் சாவித்திரிக்கு சீனியராக இருந்தவர் (பாலசரவணன்) தற்போது சென்னையில், ஒரு வழக்கில்கூட தோல்வி அடையாத பிரபல சீனியர் வழக்கறிஞரான மார்க்கண்டேயனிடம் (மிஷ்கின்) ஜூனியராக பணிபுரிகிறார். அவரது பரிந்துரையின் பேரில் மார்க்கண்டேயனிடம் ஜூனியராக சேர்ந்து வேலை பார்க்க ஆரம்பிக்கிறார் சாவித்திரி.
இந்நிலையில், உடல்நலமின்றி உயிருக்கு ஆபத்தான நிலையில் அரசு மருத்துவமனைக்குக் கொண்டுவரப்பட்ட கைக்குழந்தை ஒன்று ஆக்சிஜன் சிலிண்டர் பற்றாக்குறை காரணமாக இறந்துவிடுகிறது. இதற்கு ஆக்சிஜன் சிலிண்டர் கொள்முதலில் நடைபெற்ற ஊழல் தான் காரணம் என்று குற்றம் சாட்டப்பட்டு, அரசு மருத்துவமனையின் டீன் (’ராஜா ராணி’ பாண்டியன்) கைது செய்யப்பட்டு, சிறையில் அடைக்கப்படுகிறார். இந்த வழக்கில் டீனுக்கு எதிராக மார்க்கண்டேயன் ஆஜராகி வாதாடுகிறார். ஆனால், டீன் குற்றமற்றவர் என்று யூகிக்கும் சாவித்திரி இது குறித்து மார்க்கண்டேயனிடம் பேசுகிறார். மார்க்கண்டேயனோ, ”எனக்கு நீதி முக்கியம் இல்லை. நான் எந்த தரப்புக்கு ஆஜராகிறேனோ, அந்த தரப்புக்கு வெற்றியைப் பெற்றுத் தருவது தான் முக்கியம்” என்று அகந்தையுடன் கூறுகிறார். இதை ஏற்காத சாவித்திரி, மார்க்கண்டேயனை விட்டு விலகி, இந்த வழக்கில் நீதி கிடைக்க வேண்டும் என்பதற்காக டீன் சார்பில் ஆஜராகி, மார்க்கண்டேயனுக்கு எதிராக வாதாடி, வெற்றியும் பெற்றுவிடுகிறார்.

இதுவரை தான் ஆஜரான எந்த வழக்கிலும் தோல்வியே கண்டிராத மார்க்கண்டேயன், தன்னிடம் ஜூனியராக இருந்தவரிடம் முதன்முதலாக தோற்றுப்போனார் என்பது அவருக்கு மிகுந்த மனக்காயத்தை ஏற்படுகிறது. அடிபட்ட புலியாக உறுமுகிறார் மார்க்கண்டேயன்.
இந்நிலையில், கனடா நாட்டுப் பெண் வெரோனிகா (ஷில்பா மஞ்சுநாத்) சென்னையில் உள்ள அடுக்குமாடி குடியிருப்பு ஒன்றில் படுகொலை செய்யப்படுகிறார். அவருடைய சடலம், சாவித்திரியின் கணவரான தீபக்கின் கார் டிக்கியில் கண்டெடுக்கப்படுகிறது. தீபக் கைது செய்யப்படுகிறார்.
இக்கொலைச் சம்பவம் நடந்தபோது தீபக் தன்னுடன் படுக்கையில் இருந்தார் என்பதால், அவர் குற்றமற்றவர் என்று நிரூபித்து அவருக்கு விடுதலை பெற்றுத்தர அவர் சார்பில் ஆஜராகிறார் சாவித்திரி. ஆனால், முன்பு சாவித்திரி அளித்த தோல்வியால் மனக்காயம் அடைந்திருக்கும் மார்க்கண்டேயன், பழிவாங்கும் வெறியுடன் தீபக்குக்கு எதிராக ஆஜராகிறார்.
இந்த வழக்கில் அந்த வழக்கறிஞர்கள் இருவரும் எடுத்து வைத்த வாதங்கள் என்ன? இறுதியில் வெற்றி பெற்றது சாவித்திரியா? அல்லது மார்க்கண்டேயனா? சிறையில் அடைக்கப்பட்டுள்ள தீபக் விடுதலை ஆனாரா, இல்லையா? என்பன போன்ற கேள்விகளுக்கு விறுவிறுப்பாக விடை அளிக்கிறது ‘சத்தியவான் சாவித்திரி’ திரைப்படத்தின் மீதிக்கதை.
’கணவன் சத்தியவானை உயிருடன் மீட்க எமனுடனே போராடி வென்றார் சாவித்திரி’ என்கிறது பண்டைய புராணக் கதை, ’தற்காலத்தில் கணவர் தீபக்கை சிறையிலிருந்து மீட்க, தனது சீனியரான வழக்கறிஞர் மார்க்கண்டேயனுக்கு எதிராக வாதாடி வெற்றி பெறுகிறாரா ஜூனியர் வழக்கறிஞர் சாவித்திரி” என்ற கேள்வியைக் கதைக்கருவாக எடுத்துக்கொண்டு, ’கோர்ட் டிராமா’ ஜானரில் திரைக்கதை அமைத்து, கூர்மையான வசனங்கள் எழுதி, பண்டைய புராணக் கதைக்கு முற்றிலும் மாறான பரபரப்பான கிளைமாக்ஸை படைத்து, போரடிக்காமல் படத்தை சுவாரஸ்யமாக நகர்த்திச் சென்று, வியக்க வைத்திருக்கிறார் அறிமுக இயக்குநர் பிரவீன் எஸ் விஜய். பார்வையாளர்களைக் கட்டிப்போட்டு பிரமாதமாக கதை சொல்லும் சாமர்த்தியம் இயக்குநருக்கு நிறையவே இருக்கிறது. வாழ்த்துகள் இயக்குநர் பிரவீன் எஸ் விஜய்!
நாயகியாக, சட்டம் பயின்ற சாவித்திரியாக கீர்த்தி சுரேஷ் நடித்திருக்கிறார். பெரிய வழக்கறிஞராக வேண்டும் என்ற கனவுடன் அறிமுகமாவது முதல் தனது குருநாதரான சீனியரையே எதிர்த்து திறமையாக வாதாடுவது வரை நடிப்பில் பின்னி பெடலெடுத்திருக்கிறார். வழக்கத்துக்கு மாறான வித்தியாசமான கிளைமாக்ஸில் அப்ளாஸ் வாங்குகிறார்.
பிரபல சீனியர் வழக்கறிஞர் மார்க்கண்டேயனாக மிஷ்கின் நடித்திருக்கிறார். தனது வழக்கமான பாணியில், குனிந்த தலையுடன் அங்குமிங்கும் நடந்து, தனது கணீர் குரலில் ஏற்ற இறக்கங்களுடன் வசனம் பேசி, தனது வில்லத்தனமான கதாபாத்திரத்துக்கு நூறு சதவிகிதம் நியாயம் செய்திருக்கிறார்.
நாயகி சாவித்திரியின் கணவர் தீபக்காக சாருகேஷ் நடித்திருக்கிறார். கொடுத்த வேலையை குறைவின்றி நிறைவாக செய்திருக்கிறார்.
சாவித்திரியின் சகாவாக வரும் பாலசரவணன் ஆங்காங்கே காமெடி வசனங்களைத் தூவி ரசிக்க வைத்திருக்கிறார்.
ஷில்பா மஞ்சுநாத், பிரிகிடா சாகா, ஜி.எம்.குமார், மதுசூதனன், ஆர்.சுந்தர்ராஜன், மாலா பார்வதி, தீபா சங்கர், ஏ.வெங்கடேஷ், ’ராஜா ராணி’ பாண்டியன் உள்ளிட்ட நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.
சாம் சி.எஸ்ஸின் பின்னணி இசை, அருள் வின்செண்டின் ஒளிப்பதிவு, பிரசன்னா ஜிகே-வின் படத்தொகுப்பு உள்ளிட்ட தரமான தொழில்நுட்பங்கள் படத்துக்கு பலம்.
‘சத்தியவான் சாவித்திரி’ – குடும்பத்துடன் கண்டு களிக்கலாம்!
ரேட்டிங்: 3.7/5
