பிளாக் கோல்டு – விமர்சனம்
நடிப்பு: வெற்றி, பிரியாலயா, லிவிங்ஸ்டன், துளசி, அபிராமி வெங்கடாசலம், ஏ.வெங்கடேஷ், ராமர், அருள் டி சங்கர், நிழல்கள் ரவி, சபிதா ராய் மற்றும் சிலர்
எழுத்து & இயக்கம்: தீரன் அருண்குமார்
ஒளிப்பதிவு: சந்தோஷ் குமார் வீராசாமி
படத்தொகுப்பு: தினேஷ் குமார்
இசை: கவாஸ்கர் அவினாஷ்
நடனம்: ரிச்சி ரிச்சர்டுசன்
ஸ்டண்ட்: ‘மெட்ரோ’ மகேஷ்
தயாரிப்பு வடிவமைப்பு: சி.எஸ்.பாலச்சந்தர்
இணை தயாரிப்பு: மானஷ்வானி
தயாரிப்பு: ‘எம்எம் ஸ்டூடியோஸ்’ எம்.மூர்த்தி
பத்திரிகை தொடர்பு: சதீஷ் (எய்ம்), சிவா
‘பிளாக் கோல்டு’ என்ற சொல்லுக்கு ‘கருப்புத் தங்கம்’ என்பது பொருள். சர்வதேச சந்தையில், முதலில் மிளகையும், பின்னர் நிலக்கரியையும், அதன்பிறகு கச்சா எண்ணெயையும் குறிக்க ‘கருப்புத் தங்கம்’ என்ற சொல்லை பெருவணிகர்கள் பயன்படுத்தினார்கள். ஆனால் இந்த திரைப்படத்தைப் பொறுத்தவரை, மனிதத் தலைமுடியைத் தான் ‘கருப்புத் தங்கம்’ என்று குறிப்பிடுகிறார்கள். அந்த அளவுக்கு உலகச்சந்தையில் மிக அதிக லாபம் தரும் தொழிலாக மனிதத் தலைமுடி வணிகம் விளங்குகிறது…
சாமியை வேண்டிக்கொண்டு, தலைமுடியை நீளமாய் வளர்த்து, கோயிலுக்குப் போய் மொட்டையடித்து, தலைமுடியை காணிக்கையாகச் செலுத்துவது நமது இந்தியப் பண்பாட்டில் ஊறிக்கிடக்கும் பாரம்பரிய பழக்கம். முன்பெல்லாம் திருப்பதி போன்ற – பக்தர்கள் பெருமளவில் கூடும் – பெரிய கோயில்களில் இவ்விதம் டன் கணக்கில் சேரும் முடியை குப்பையாகக் கருதி தீவைத்து எரித்து சாம்பலாக்கி விடுவார்கள். ஆனால் கடந்த நூற்றாண்டின் பிற்பாதியில் அமெரிக்கா, ஐரோப்பா, ஆசிய நாடுகளில் அழகுக் கலையுணர்வு அதிகரித்ததன் விளைவாக விதவிதமான ‘விக்’குகள் (Wigs) செய்வதற்கும், இயற்கையான தலைமுடியை செயற்கையாக நீளமாகவும், அடர்த்தியாகவும் காட்டிக்கொள்வதற்கான ‘ஹேர் எக்ஸ்டன்ஷன்ஸ்’ (Hair Extensions) தயாரிப்பதற்கும் தலைமுடியின் தேவை அதிகரித்ததால், இந்திய தலைமுடிக்கு சர்வதேச சந்தையில் பெரும் கிராக்கி ஏற்பட்டு, பணம் கொழிக்கும் தொழிலாக மனிதத் தலைமுடி வணிகம் மாறிவிட்டது…
’தங்கம் கடத்தல், போதை மருந்து கடத்தல், நட்சத்திர ஆமை கடத்தல் போன்றவையெல்லாம் சர்வசாதாரணமாக நிகழும் நம் மண்ணில், கோடிக்கணக்கான ரூபாய் மதிப்புள்ள தலைமுடி கடத்தல் நிகழ்ந்தால் எப்படியிருக்கும் என்று இயக்குநர் தீரன் அருண்குமார் புதுமையாக – புது ரூட்டில் – சிந்தித்ததன் விளைவாகப் பிறந்தது தான் ‘பிளாக் கோல்டு’ என்ற இந்த 122 நிமிட சஸ்பென்ஸ் – ஆக்ஷன் – க்ரைம் த்ரில்லர் திரைப்படம்!
நடுத்தர குடும்பத்தைச் சேர்ந்த நாயகன் செல்வா (வெற்றி) பிரபல கார் விற்பனை நிலையத்தில் தலைமை மெக்கானிக்காகப் பணிபுரிகிறார். அவரது அப்பா மாரிமுத்து (லிவிங்ஸ்டன்). அவர் தலைமுடி வணிகத்தில் பெரும்புள்ளியாக இருக்கும் ‘தங்கம் எக்ஸ்போர்ட்ஸ்’ நிறுவன முதலாளி தங்கதுரையிடம் (ஏ.வெங்கடேஷ்), மிகவும் நம்பிக்கைக்குரிய, நாணயமான வேன் டிரைவராக பணியாற்றுகிறார்.
தங்கதுரைக்கும், கடத்தல் பொருட்களை கைமாற்றிவிடும் தொழில் செய்யும் பெரும்புள்ளியான நைனா ராஜாவுக்கும் (அருள் டி சங்கர்) இடையே பகையும், போட்டியும் இருந்து வருகிறது.
இந்நிலையில், தங்கதுரை, 5 கோடி ரூபாய் மதிப்புள்ள தலைமுடியை, டிரைவர் மாரிமுத்துவின் வேனில் ஏற்றி அனுப்பி வைக்கிறார். ஆனால் வழியிலேயே, வேனுடன் டிரைவர் மாரிமுத்து காணாமல் போகிறார். அவர் வேனிலிருந்த ரூ.5 கோடி சரக்குக்கு ஆசைப்பட்டு, தனக்கு துரோகமிழைத்து, தலைமறைவாகிவிட்டார் என்று எண்ணி பதறும் தங்கதுரை, இது குறித்து போலீஸ் இன்ஸ்பெக்டர் ரெஜினாவிடம் (அபிராமி வெங்கடாச்சலம்) டிரைவர் மாரிமுத்துவுக்கு எதிராக புகார் கொடுக்கிறார்.
ஆனால், தன் அப்பா மாரிமுத்துவின் நேர்மை, நாணயம் ஆகிய நற்குணங்களை நன்கு அறிந்த அவரது மகன் செல்வா, முதலாளி தங்கதுரைக்கு கனவிலும் அவர் துரோகம் நினைக்க மாட்டார் என்றும், வேன் மற்றும் அதிலுள்ள சரக்கோடு சேர்த்து அவர் மர்ம நபர்களால் கடத்தப்பட்டிருக்க வேண்டும் என்றும் நம்புகிறார்.
இதனால் அப்பாவைத் தேடி கண்டுபிடித்து அவரை மீட்கவும், அவர் மீது சுமத்தப்பட்டிருக்கும் களங்கத்தைத் துடைத்தெறியவும் களம் இறங்குகிறார் மகன் செல்வா.
அவரது தீவிரமான, இடைவிடாத தேடுதலில் அப்பா மாரிமுத்து கிடைத்தாரா? அவரைக் கடத்திய மர்ம நபர்கள் யார்? அவர்களது பின்னணி என்ன? அவர்களை செல்வா எப்படி கண்டுபிடித்தார்? இறுதியில் அவர்களுக்குக் கிடைத்த தண்டனை என்ன? என்பன போன்ற கேள்விகளுக்கு சஸ்பென்ஸ் – ஆக்ஷன் – க்ரைம் த்ரில்லர் பாணியில் சுவாரஸ்யமாகவும், விறுவிறுப்பாகவும் விடை அளிக்கிறது ‘பிளாக் கோல்டு’ திரைப்படத்தின் மீதிக்கதை.

நாயகனாக, கார் தலைமை மெக்கானிக் செல்வாவாக வெற்றி நடித்திருக்கிறார். ஒரு படத்தில் வெற்றி நடிக்கிறார் என்றாலே அந்த படம் புதுமையான, அழுத்தமான கதையம்சம் கொண்டதாக நிச்சயம் இருக்கும் என்று கண்ணை மூடிக்கொண்டு நம்பலாம். இந்த படமும் அதற்கு விதிவிலக்கு அல்ல. கதையையும், தன்னுடைய கதாபாத்திரத்தையும் நன்கு உள்வாங்கி, அதற்கு ஏற்ற சீரியஸான நடிப்பை பொருத்தமாக அவர் வெளிப்படுத்தியிருக்கிறார்.
நாயகனின் அப்பாவாக, வேன் டிரைவர் மாரிமுத்துவாக லிவிங்ஸ்டன். நல்லவராக, மிகவும் அமைதியானவராக, பாசமுள்ள தந்தையாக நடித்திருக்கிறார். அவருக்கு ஏற்படும் முடிவு எதிர்பாராதது. அதிர்ச்சி தரக் கூடியது.
அவரது மனைவியாக துளசி நடித்திருக்கிறார். முதலாளி தங்கதுரையிடம், “நீங்க தொலைச்சது கிடைச்சிடுச்சு; நாங்க தொலைச்சது..” என்று கண்ணீருடன் அவர் கேட்கும் கேள்வியில் கல்மனமும் கரைந்துவிடும்.
தங்கம் எக்ஸ்போர்ட்ஸ் முதலாளி தங்கதுரையாக வரும் ஏ.வெங்கடேஷும், கடத்தல் பேர்வழி நைனா ராஜாவாக வரும் அருள் டி.சங்கரும் பயங்கரமாக போட்டி போடுகிறார்கள் – கதையில் மட்டுமல்ல, நடிப்பிலும் தான்.
இரக்கமற்ற கொடூர வில்லன்களாக வரும் கராத்தே வெங்கடேசன், ஜப்பான் குமார் உள்ளிட்ட ‘நால்வர் கும்பல்’ வில்லத்தனத்தில் மிரட்டியிருக்கிறார்கள்.
நாயகனின் காதலி ரேணுவாக பிரியாலயா நடித்திருக்கிறார். அவருடைய கேரக்டர் நேரடியாக மெயின் பிளாட்டோடு சம்பந்தப்படவில்லை; என்ற போதிலும் கொடுத்த வேலையை குறைவின்றி நிறைவாக செய்திருக்கிறார்.
போலீஸ் இன்ஸ்பெக்டர் ரெஜினாவாக வரும் அபிராமி வெங்கடாசலம், நாயகனின் சித்தப்பாவாக வரும் ராமர், லாரி உரிமையாளர்கள் சங்கத் தலைவராக வரும் நிழல்கள் ரவி உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.
இப்படத்தை எழுதி இயக்கியிருக்கிறார் இயக்குநர் தீரன் அருண்குமார். தமிழ் சினிமாவில் இதுவரை பேசப்படாத மனிதத் தலைமுடி வணிகம் என்னும் புத்தம் புது கருப்பொருளை கையிலெடுத்து, அதனுள் கடத்தல் என்னும் சமாச்சாரத்தை உட்புகுத்தி திரைக்கதை அமைத்து, போரடிக்காமல் படத்தை விறுவிறுப்பாக நகர்த்திச் சென்றிருக்கும் இயக்குநர் பாராட்டுக்கு உரியவர். வேனோடு சேர்த்து டிரைவர் மாரிமுத்துவை யார் கடத்தியிருப்பார்கள் என்ற கேள்வியை இயக்குநர் தக்க வைத்ததன் மூலம் இப்படத்துக்கு மெருகூட்டியிருக்கிறார். திரைக்கதையில் கொஞ்சம் புதுமைகள் சேர்க்க மெனக்கெட்டிருந்தால் படத்தை இன்னும் கூடுதலாக ரசித்திருக்கலாம்.
கவாஸ்கர் அவினாஷின் தரமான பின்னணி இயையும், சந்தோஷ்குமார் வீராசாமியின் நேர்த்தியான ஒளிப்பதிவும், ‘மெட்ரோ’ மகேஷின் மிரட்டலான ஸ்டண்ட் வடிவமைப்பும் படத்துக்கு பலம்.
’பிளாக் கோல்டு’ – சஸ்பென்ஸ் ஆக்ஷன் க்ரைம் த்ரில்லர் விரும்பிகளுக்கு நிச்சயம் பிடிக்கும்! யு/ஏ சான்றிதழ் பெற்ற படம் என்பதால், அதற்குரிய வயதுடைய நண்பர்களோடும், குடும்பத்தினரோடும் பார்த்து, ரசித்து, மகிழலாம்!
ரேட்டிங்: 3.75/5
