சீன் – விமர்சனம்
நடிப்பு: சூர்யா, நஸ்ரியா நஜிம், நஸ்லென், ஆனந்தராஜ், லால், ராஜ் பிரியன், சுரேஷ் மதியழகன், கஜராஜ், டோவினோ தாமஸ், ஜோதிகா (சிறப்புத் தோற்றம்) மற்றும் சிலர்
எழுத்து & இயக்கம்: ஜித்து மாதவன்
வசனம்: திராவிட் செல்வம்
ஒளிப்பதிவு: வினீத் அகஸ்டியன்
படத்தொகுப்பு: அஜ்மல் சாபு
இசை: சுஷின் ஷ்யாம்
ஸ்டண்ட்: சேத்தன் டி’சோசா
கலை இயக்கம்: ஏ.ராஜேஷ்
தயாரிப்பு: ‘2டி எண்டர்டெயின்மெண்ட் & ழகரம் ஸ்டூடியோஸ்’ சூர்யா, ஜோதிகா மற்றும் ஜெயஸ்ரீ தாமோதரன்
பத்திரிகை தொடர்பு: சதீஷ்குமார் (S2)
நடிகர் சூர்யாவுக்கு 2026ஆம் ஆண்டு வாழ்நாள் முழுவதும் மறக்க முடியாத மகிழ்ச்சியான ஆண்டாக இருக்கும் என்பது நிச்சயம். காரணம், இந்த ஆண்டு அவரது மூன்று திரைப்படங்கள் வெளியாகி, ரசிகர்களை குதூகலமாகக் கொண்டாட வைத்து, அவருக்கு வெற்றிக்கனிகளை பரிசாக அளித்திருக்கின்றன. மே மாதம் ‘கருப்பு’, ஆகஸ்டு மாதம் ‘விஸ்வநாத் அண்ட் சன்ஸ்’ ஆகிய இரண்டு திரைப்படங்கள் அடுத்தடுத்து வெளியாகி, பாக்ஸ் ஆபீசில் வெற்றி பெற்றதைத் தொடர்ந்து, தீபாவளியை முன்னிட்டு இன்று (நவம்பர் 6ஆம் தேதி) அவரது ‘சீன்’ திரைப்படம் வெளியாகி, ரசிகர்கள் அலை மோத, அரங்கு நிறைந்த காட்சிகளாக ஓடிக்கொண்டிருக்கிறது. இவ்விதம் ‘ஹாட்ரிக்’ அடித்திருக்கும் சூர்யாவின் ‘சீன்’ படம் பற்றி இங்கே பார்ப்போம்…
சென்னையில், ஒரே பாணியில் நடைபெறும் தொடர் கொலைகள் பற்றி புலனாய்வு செய்து, விக்டர் (டோவினோ தாமஸ்) தான் ’சைக்கோ’ கொலையாளி என்று முடிவு செய்து, அவரை கைது செய்து சிறையில் அடைக்கிறார் திறமையும், அறிவுக் கூர்மையும் மிக்க காவல் துணை கண்காணிப்பாளர் (டி.எஸ்.பி) இன்பராஜ் (சூர்யா).
என்றாலும், அதே பாணியிலான கொலைகள் அதன்பிறகும் தொடர்கின்றன. இப்பிரச்சனையைத் தீர்க்க முடியாமல் தவிக்கும் காவல் உயர் அதிகாரி ஸ்டீபன் (லால்), இவ்வழக்கைப் புலனாய்வு செய்யும் பொறுப்பை டி.எஸ்.பி இன்பராஜிடமே ஒப்படைக்க நினைக்கிறார். ஆனால் இன்பராஜோ ராஜினாமா கடிதம் அனுப்பி அதிர்ச்சி அளிக்கிறார்.
தனது ராஜினாமாவுக்கு என்ன காரணம் என்பது குறித்து தன்னுடைய ராஜினாமா கடிதத்திலோ, வெளியிலோ சொல்லாமல் ரகசியம் காக்கிறார் இன்பராஜ். எனினும், சமீபகாலமாக அவரது கண்பார்வை மங்கி வருகிறது என்பதையும், தற்போது 90 சதவிகிதம் பார்வையை அவர் இழந்து விட்டார் என்பதையும், அதனால் அவர் பணியைத் தொடர விரும்பாமல் ராஜினாமா செய்கிறார் என்பதையும் பார்வையாளர்களுக்குச் சொல்லி, அவர்களை நிமிர்ந்து உட்கார வைக்கிறார் இயக்குநர்.
இதனிடையே, ”இன்பராஜ் உண்மையான ’சைக்கோ’ கொலையாளியை வெளியே சுதந்திரமாக நடமாட விட்டுவிட்டு, விக்டர் என்ற அப்பாவியைப் பிடித்து சிறையில் அடைத்திருக்கிறார்” என்ற பேச்சு காவல் துறைக்கு உள்ளும் புறமும் எழுகிறது. தன் மீது சுமத்தப்படும் இந்த களங்கத்தைத் துடைத்தெறிய எண்ணுகிறார் இன்பராஜ். இதனால், பணியிலிருந்து விலகிய பிறகும், தற்போது நடைபெறும் ’விக்டர் பாணி’யிலான தொடர் கொலைகள் குறித்து, தனிப்பட்ட முறையில் புலன் விசாரணை செய்து கொலையாளியை கண்டுபிடிக்க முடிவெடுக்கிறார்.
பார்வையை இழந்து, பணியிலிருந்து விலகிய முன்னாள் காவல் துணை கண்காணிப்பாளர் இன்பராஜ் இதை எப்படி சாதிக்கிறார்? காவல் துறையில் பணியாற்றி ஓய்வு பெற்ற – மறதிநோய் உள்ள – தனது அப்பா ஹிருதயராஜ் (ஆனந்தராஜ்), குடிநோயாளியாக இருக்கும் தனது அம்மா, வலிப்பு நோய் உள்ள தனது உதவியாளரும் காதலியுமான மாயா (நஸ்ரியா நஜிம்), மாயாவின் போதைப்பொருள் நுகரும் பழக்கமுள்ள அப்பா மனோகர் (கஜராஜ்), காவல் துறையில் தனக்குக் கீழ் பணியாற்றிய காவலர்களான சிபி (ராஜ் பிரியன்), வினோத் (சுரேஷ் மதியழகன்) ஆகியோரின் பூரண ஒத்துழைப்புடன், ’கண்பார்வை இல்லை’ என்ற தனது பலவீனத்தைக் கடந்து எப்படி புலனாய்வைத் தீவிரப்படுத்துகிறார்? காவல்துறையை திசை திருப்புவதற்காக சைக்கோ கொலையாளி விக்டரின் பாணியைப் பின்பற்றி கொலைகள் செய்யும் ‘தொழில்முறை’ கொலையாளியான ஈஸ்வரனையும் ( நஸ்லென்), அவரது கூட்டாளிகளான ஒரு ஆட்டோ டிரைவர், ஒரு பெட்டிக்கடை பெண்மணி ஆகியோரையும் எப்படி சாதுர்யமாக நெருங்கி வளைத்துப் பிடிக்கிறார்? என்பன போன்ற கேள்விகளுக்கு அதிரடி ஆக்ஷனும், காமெடியும் கலந்து பரபரப்பாகவும், விறுவிறுப்பாகவும் விடை அளிக்கிறது ‘சீன்’ திரைப்படத்தின் மீதிக்கதை.

இக்கதையின் நாயகனாக, காவல் துணை கண்காணிப்பாளர் இன்பராஜாக சூர்யா நடித்திருக்கிறார். ‘காக்க காக்க’, ‘சிங்கம்’ போன்ற படங்களில் நடித்திருக்கும் அவருக்கு காவல்துறை அதிகாரி வேடம் புதியது இல்லை; என்றாலும், கண்பார்வையை இழந்த நிலையில், மிகவும் சிக்கலான, உயிருக்கு ஆபத்தான தொடர்கொலை வழக்கை அவர் புலன் விசாரணை செய்வது என்ற ஐடியா புத்தம் புதியது. சவால்கள் நிறைந்தது. படு சுவாரஸ்யமானது. இக்கதாபாத்திரத்துக்குள் தன்னை கச்சிதமாகப் பொருத்திக்கொண்டு, மிகவும் இயல்பாக நடித்து, பின்னி பெடலெடுத்திருக்கிறார் சூர்யா. அவரது ரசிகர்களுக்கு மட்டுமல்ல, அனைத்துத் தரப்பினருக்கும் பிடிக்கும் விதமாக காமெடியையும் அதிரடி ஆக்ஷனையும் கலந்து அற்புதமாக நடிப்பில் வெளிப்படுத்தி, அசத்தியிருக்கிறார். அவரது நடிப்பு வாழ்க்கையில் இப்படம் எப்போதும் நினைவுகூரத் தக்க மற்றுமொரு மாஸ்டர் பீஸ். வாழ்த்துகள் சூர்யா!
வில்லனாக, ‘சைக்கோ’ கொலையாளி விக்டர் பாணியைப் பின்பற்றி சாமர்த்தியமாக கொலைகள் செய்யும் ‘தொழில்முறை’ கொலையாளி ஈஸ்வரனாக நஸ்லென் நடித்திருக்கிறார். மலையாளப் படவுலகில் முன்னணி இளம் நாயகர்களில் ஒருவராகத் திகழும் இவர், இப்படத்தின் மூலம் தமிழ்ப்படவுலகில் வலுவாக அடியெடுத்து வைத்திருக்கிறார். சாதாரண ‘ஜென்ஸீ’ இளைஞனைப் போன்ற தோற்றத்தை வைத்துக்கொண்டு, எந்நேரமும் குச்சிமிட்டாய் சப்பிக்கொண்டு, இவர் அமைதியாக, புத்திசாலித்தனமாக செய்கிற நூற்றுக்கும் மேற்பட்ட கொடூரக் கொலைகளும், அக்கொலைகளை நிகழ்த்திய பிறகு இவர் போடுகிற குத்தாட்டங்களும் அட்டகாசம்.
நாயகியாக, இன்பராஜின் உதவியாளராக வந்து, பின்னர் அவரது காதலியாக மாறும் மாயாவாக நஸ்ரியா நஜிம் நடித்திருக்கிறார். நீண்ட இடைவெளிக்குப் பிறகு இப்படம் மூலம் தமிழ் படவுலகுக்கு மறுபிரவேசம் செய்திருக்கும் இவர், தன் பாத்திர வடிவமைப்புக்குப் பொருத்தமான நடிப்பை குறையின்றி நிறைவாக வெளிப்படுத்தியிருக்கிறார். இவருக்கும், சூர்யாவுக்கும் இடையிலான கெமிஸ்ட்ரியும், நகைச்சுவை தெறிப்புகளும் பிரமாதம். ரவுடிகள் இருக்கும் இடம் தெரியாமல் அவர்களின் அருகில் சூர்யா காற்றில் கை கால்களை வீசிக்கொண்டிருக்க, நஸ்ரியா களமிறங்கி அந்த ரவுடிகளை துவம்சம் செய்யும் காட்சி ரசனைக்குரியது.
சூர்யாவின் அப்பாவாக, மறதி நோய் உள்ள ஹிருதயராஜாக வரும் ஆனந்தராஜ், அவரது மனைவியாக வரும் குடிநோயாளிப் பெண்மணி, தனது ராஜினாமாவை ஏற்கச் செய்ய வேண்டும் என்பதற்காக விதிகளை மீறி சூர்யா செய்யும் அழிச்சாட்டியங்களைப் பொருத்துக்கொண்டு அவரை தாஜா செய்யும் காவல்துறை உயர் அதிகாரி ஸ்டீபனாக வரும் லால், சூர்யா மேற்கொள்ளும் புலனாய்வுக்கு உற்ற துணையாக இருக்கும் காவலர்கள் சிபி மற்றும் வினோத் ஆக வரும் ராஜ் பிரியன், சுரேஷ் மதியழகன் ஆகியோர், ’சைக்கோ’ கொலையாளி விக்டராக படத்தில் சிறிது நேரமே வந்தாலும் கலக்கியிருக்கும் டோவினோ தாமஸ், நஸ்ரியாவின் அப்பா மனோகராக வரும் கஜராஜ், ‘தொழில்முறை’ கொலையாளி ஈஸ்வரனின் கூட்டாளிகளாக ஆட்டோ டிரைவர் பாத்திரத்தில் வரும் நடிகர், பெட்டிக்கடை பெண்மணியாக வரும் நடிகை, ஒரு காட்சியில் சிறப்புத் தோற்றத்தில் ஜோதிகாவாகவே வரும் ஜோதிகா உள்ளிட்டோர் தத்தமது கதாபாத்திரத்துக்குத் தேவையான நடிப்பை சிறப்பாக வழங்கி, படத்துக்கு பலம் சேர்த்திருக்கிறார்கள்.
இப்படத்தை எழுதி இயக்கியிருக்கிறார் இயக்குநர் ஜித்து மாதவன். ‘ரோமாஞ்சம்’, ‘ஆவேஷம்’ ஆகிய வெற்றிப்படங்களைத் தொடர்ந்து அவர் இயக்கியிருக்கும் இந்த ‘சீன்’ படத்திலும் தனித்தன்மை கொண்ட வித்தியாசமான கதாபாத்திரங்கள், நகைச்சுவைக்குப் பஞ்சம் இல்லாத டார்க் ஹியூமர், எந்த இடத்திலும் யூகிக்க முடியாத திருப்பங்கள், சுவாரஸ்யமான காட்சியமைப்பு போன்ற ரசனைக்குரிய அவரது டிரேட்மார்க் அம்சங்கள் நிறைந்திருக்கின்றன. சீரியஸான தொடர் கொலைகள் பற்றிய கதையை முழுக்க முழுக்க அதே சீரியஸுடன் நகர்த்தாமல், ஆங்காங்கே இயல்பான காமெடியைப் புகுத்தி, ஜாலியாக நகர்த்தியிருப்பது பாராட்டுக்குரியது. மேலும், கண்பார்வை இழந்த நடுத்தர வயது நாயகனையும், ‘ஜென்ஸீ’ தலைமுறையைச் சேர்ந்த சாதுர்யமான இளம் வில்லனையும் எதிரெதிர் துருவங்களாக நிறுத்தி, இயக்குநர் ஆடியிருக்கும் ‘ஆடுபுலி ஆட்டம்’ ரசிக்கத் தக்க விறுவிறுப்பை அள்ளிக் கொடுத்திருக்கிறது. பாராட்டுகள் இயக்குநர் ஜித்து மாதவன்!
சுஷின் ஷ்யாமின் இசை, வினீத் அகஸ்டியனின் ஒளிப்பதிவு, அஜ்மல் சாபுவின் படத்தொகுப்பு, சேத்தன் டி’சோசாவின் ஸ்டண்ட் அமைப்பு, ஏ.ராஜேஷின் கலை இயக்கம் உள்ளிட்ட நேர்த்தியான, தரமான தொழில்நுட்பங்கள் சூர்யா மற்றும் இயக்குநர் ஜித்து மாதவன் ஆகியோரின் வெற்றிக்கு உறுதுணையாக இருந்துள்ளன.
‘சீன்’ – புத்தம்புது கதை முடிச்சு, வித்தியாசமான கதாபாத்திரங்கள், ரசனைக்குரிய நடிப்பு, சிரித்து மகிழத் தக்க டார்க் ஹியூமர் போன்ற இப்படத்தின் சிறப்பு அம்சங்கள், சூர்யாவின் ’ஹாட்ரிக்’ வெற்றியை சாத்தியப்படுத்தி உள்ளன.
ரேட்டிங்: 4/5
