டைட்டானிக் – காதலும் கவுந்துபோகும்: விமர்சனம்

நடிப்பு: கலையரசன், கயல் ஆனந்தி, காளி வெங்கட், ஆஷ்னா சவேரி, ராகவ் விஜய், ‘ஜாங்கிரி’ மதுமிதா, சேத்தன், தேவதர்ஷினி, காயத்ரி (சிறப்புத் தோற்றம்), இயக்குநர் பாலாஜி மோகன் (சிறப்புத் தோற்றம்) மற்றும் சிலர்

எழுத்து & இயக்கம்: எம்.ஜானகிராமன்

ஒளிப்பதிவு: பல்லு

படத்தொகுப்பு: ராதாகிருஷ்ணன் தனபால், இக்னேஷியஸ் அஸ்வின்

இசை: நிவாஸ் கே பிரசன்னா

கலை இயக்கம்: எஸ்.ராம்பிரசாத்

தயாரிப்பு: ‘திருக்குமரன் எண்டர்டெயின்மெண்ட்’ சி.வி.குமார்

பத்திரிகை தொடர்பு: நிகில் முருகன்

சென்னையில் ஐ.டி நிறுவனம் ஒன்றில் பணியாற்றுபவர் சந்துரு (ராகவ் விஜய்). இரவு பெங்களூருவில் திருமண வரவேற்பு, விடிந்தால் திருமணம் என்ற நிலையில், மிகவும் தாமதமாக ரயில் நிலையத்துக்குப் புறப்படுகிறார் மணமகனான சந்துரு. “தன்னோட கல்யாணத்துக்கு இவ்வளவு லேட்டா கிளம்பிப் போற முதல் ஆள் நீயாத் தான் இருப்பே” என்று சந்துருவை கலாய்க்கும் அவரது மேனேஜர் ரகுபதி (சேத்தன்), சந்துருவை ரயில் நிலையத்தில் இறக்கிவிடுவதாக சொல்லி, தன் காரில் ஏற்றிக்கொள்கிறார். காரில் போகும்போது, தனக்கும் தனது அலுவலக சகாவான ஸ்ருதிக்கும் (ஆஷ்னா சவேரி) இருந்த காதல் பிரேக்-அப் ஆன விவகாரம், தன் திருமணத்தை பாதிக்குமா என்று அச்சத்துடன் வினவுகிறார் சந்துரு. ‘அப்படியெல்லாம் ஒன்றும் நடக்காது” என்று ஆறுதல் சொல்லி, தேற்றி, அவரை ரயில் நிலையத்தில் இறக்கிவிடுகிறார் மேனேஜர் ரகுபதி.

ரயில் பெட்டிக்குள் சூர்யா (கலையரசன்), பூமிநாதன் (காளி வெங்கட்) ஆகிய இருவரையும் சக பயணிகளாகச் சந்திக்கிறார் சந்துரு. அருகருகே அமர்ந்து பயணிக்கும் இந்த மூவரும் பரஸ்பரம் தங்களை அறிமுகம் செய்துகொண்டு, தங்களைப் பற்றிய விவரங்களைப் பகிர்ந்து கொள்கிறார்கள். இந்த பகிர்தல் தத்தமது காதல் வாழ்க்கை பற்றிய பகிர்தலாகவும் மாறுகிறது…

பூமிநாதன் தன் பள்ளிப் பருவத்தில், காவேரி (கயல் ஆனந்தி) என்ற சக மாணவியை ஒருதலையாகக் காதலித்திருக்கிறார். அது தெரிந்தும் தெரியாதது போல் சகஜமாகப் பழகி வந்திருக்கிறார் காவேரி. அவரது அப்பாவுக்கு வேறு ஊருக்கு பணியிட மாறுதல் வந்த சூழலில், பூமிநாதன் தன் காதலை வெளிப்படுத்த, “நான் அந்த நோக்கத்தில் பழகவில்லை” என்று காவேரி ஒரே போடாகப் போட்டு, பூமிநாதனின் இதயத்தை நொறுக்கிவிட்டு, வெளியூருக்கு குடிபெயர்ந்து சென்றுவிட்டார்.

அந்த காதல் தோல்வியில் சிறிது காலம் துவண்டுகிடந்த பூமிநாதன், பின்னர் தன் அப்பா கைகாட்டிய கிருஷ்ணவேணி (ஜாங்கிரி மதுமிதா) என்ற பெண்ணை மணந்து கொண்டார். தன் மனைவியிடம் எதையும் மறைக்கக் கூடாது என்ற வெள்ளந்தியான நினைப்பில், காவேரியுடனான தனது பள்ளிப்பருவ காதலைச் சொல்ல, அதை கெட்டியாகப் பிடித்துக்கொண்ட மனைவி கிருஷ்ணவேணி, சந்தர்ப்பம் கிடைக்கும் போதெல்லாம் ஏளனமாக அதை சொல்லிக்காட்டி, பூமிநாதனை நோகடிக்க ஆரம்பித்து விடுகிறார். இது தொடர்பான சச்சரவு ஒருநாள் எல்லை மீறிப் போய்விட, கிருஷ்ணவேணி கோபித்துக்கொண்டு தன் பிறந்த வீட்டுக்குச் சென்றுவிட்டார். அவரை தாஜா பண்ணி அழைத்து வருவதற்காகத் தான் இப்போது ரயிலில் பெங்களூரு சென்று கொண்டிருப்பதாகச் சொல்கிறார் பூமிநாதன்.

அடுத்து, சூர்யா தன் கல்லூரிக்கால காதல் பற்றி சொல்லுகிறார். பள்ளியில் பூமிநாதனால் காதலிக்கப்பட்ட காவேரி தான் தன் கல்லூரிக்கால காதலி என்பது சூர்யாவுக்கும் தெரியாது. கதை கேட்டுக்கொண்டிருக்கும் பூமிநாதன், சந்துரு ஆகியோருக்கும் தெரியாது. சூர்யா விவரிக்கிறார்…

கல்லூரிக் காலத்தில் சூர்யாவும், அவரது சக மாணவியான காவேரியும் காதலர்களாக இருக்கிறார்கள். காவேரி நிறைய ஆண் நண்பர்களோடு பழகுவது, சூர்யா ஆண்மேலாதிக்கச் சிந்தனையுடன் பேசுவது போன்ற காரணங்களால் காதலர்கள் இருவருக்கும் இடையில் அடிக்கடி சண்டை – சச்சரவு வருகிறது. இறுதியில், தன் சகோதரிகளுக்கு திருமணம் செய்து வைத்துவிட்டு நாம் திருமணம் செய்துகொள்வோம் என்று சூர்யா சொல்ல, நாம் முதலில் திருமணம் செய்துகொண்டு, உன் சகோதரிகளுக்கு நாம் இருவரும் சேர்ந்து திருமணம் செய்து வைப்போம் என்று காவேரி சொல்ல, வார்த்தைகள் தடித்து, கைகள் பரஸ்பரம் கன்னம் வரை நீண்டு, காதல் பிரேக்-அப்பில் முடிகிறது. இப்போது தன் சகோதரிகளுக்கெல்லாம் திருமணம் முடிந்து விட்டது என்று சொல்லும் சூர்யா, பெங்களூருவில் இருக்கும் காவேரியைச் சந்தித்து, அவரிடம் ‘சாரி’ சொல்லி காதலைப் புதுப்பிப்பதற்காக போய்க் கொண்டிருப்பதாக தன் காதல் கதையை முடிக்கிறார்.

சந்துரு தன் பங்குக்கு தன் அலுவலக சகா ஸ்ருதியுடனான காதல் பற்றியும், இருவருக்கும் இடையில் நிறைய முரண்கள், கருத்து வேறுபாடுகள் ஏற்பட்டதை அடுத்து ‘பிரேக்-அப்’ சொல்லி பிரிந்து விட்டது பற்றியும், இப்போது தனது குடும்பத்தார் பார்த்து பேசி வைத்திருக்கும் பெண்ணை மணக்க பெங்களூரு செல்வதாகவும் கூறுகிறார்.

இப்படி மூவரும், ’கவுந்துபோன’ தங்கள் காதல் பற்றி பேசி முடிக்க, பெங்களூரும் வந்துவிடுகிறது. ”இவ்வளவு நெருங்கிப் பழகி விட்டோம். அப்படியே இரவு நடக்கும் என் திருமண வரவேற்பில் நீங்களும் கலந்து கொண்டால் எனக்கு மகிழ்ச்சியாக இருக்கும்” என்று சந்துரு அழைக்க, சூர்யாவும், பூமிநாதனும் அதை ஏற்றுக்கொள்கிறார்கள்.

சந்துருவின் திருமண வரவேற்பில் மணப்பெண்ணைப் பார்க்கும் பூமிநாதனும், சூர்யாவும் அதிர்ச்சி அடைகிறார்கள். அதுபோல், பூமி நாதனையும், சூர்யாவையும் பார்க்கும் மணப்பெண்ணும் அதிர்ச்சி அடைகிறார். காரணம், மணப்பெண் வேறு யாருமல்ல, பள்ளிப் பருவத்தில் பூமிநாதனாலும், கல்லூரிக் காலத்தில் சூர்யாவாலும் காதலிக்கப்பட்ட காவேரி தான் சந்துருவின் வருங்கால மனைவி!

மறுபுறம், தனது முன்னாள் காதலி ஸ்ருதி இந்த திருமண வரவேற்புக்கு வந்திருப்பதைப் பார்த்து, மணமகன் சந்துரு அதிர்ச்சி அடைகிறார். ஸ்ருதி என்ன குழப்பம் ஏற்படுத்தக் காத்திருக்கிறாரோ என்று கலங்குகிறார்.

அதன்பின் என்ன நடந்தது? எத்தகைய திருப்பங்கள் ஏற்பட்டன? தன் காதலி காவேரியைப் பார்க்க பெங்களூரு வந்த சூர்யா, அவரை சந்துருவின் வருங்கால மனைவியாகப் பார்த்த பிறகு என்ன முடிவெடுத்தார்? சந்துருவின் திருமணத்தை நிறுத்தும் முடிவுடன் வந்திருக்கும் அவரது முன்னாள் காதலி ஸ்ருதி, நினைத்ததைச் சாதித்தாரா? இறுதியில் சந்துரு யாரை மணந்தார்? என்பன போன்ற கேள்விகளுக்கு காமெடியாகவும் சுவாரஸ்யமாகவும் விடை அளிக்கிறது ‘டைட்டானிக்’ திரைப்படத்தின் மீதிக்கதை.

சூர்யாவாக வரும் கலையரசன், பூமிநாதனாக வரும் காளி வெங்கட், சந்துருவாக வரும் ராகவ் விஜய் ஆகிய ரயில் சினேகிதர்கள் மூவரும் மிகவும் இயல்பாக நடித்திருக்கிறார்கள். தத்தமது காதல் கதையைச் சொல்லும்போது, காதலுடனும், நகைச்சுவையுடனும் அவர்கள் விவரிப்பது ரசிக்கும்படியாக இருக்கிறது.

காவேரியாக வரும் கயல் ஆனந்தி, ஸ்ருதியாக வரும் ஆஷ்னா சவேரி, கிருஷ்ணவேணியாக வரும் ஜாங்கிரி மதுமிதா ஆகியோர் தங்களது கதாபாத்திர வடிவமைப்புக்கு ஏற்ற யதார்த்தமான நடிப்பை வெளிப்படுத்தியிருக்கிறார்கள்.

ஐ.டி கம்பெனி மேனேஜர் ரகுபதியாக வரும் சேத்தன், அவரது மனைவியாக வரும் தேவதர்ஷினி, சிறப்புத் தோற்றத்தில் வரும் காயத்ரி, இயக்குநர் பாலாஜி மோகன் உள்ளிட்டோர் திரையில் குறைவான நேரமே வந்தாலும் நிறைவான பங்களிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் எம்.ஜானகிராமன். பூமிநாதனின் பள்ளிப்பருவ காதல், சூர்யாவின் கல்லூரிக்கால காதல், சந்துருவின் அலுவலகக் காதல் ஆகிய மூன்று வித்தியாசமான காதல்களை மையமாக வைத்து கதை எழுதி, போரடிக்காத வகையில் மூன்று காதல்களையும் இணைத்து திருப்பங்களுடன் திரைக்கதை அமைத்து, கலகலப்பான நகைச்சுவை வசனங்களை சேர்த்து, சுமார் ஒண்ணே முக்கால் மணி நேர திரைப்படத்தை சுவாரஸ்யமாகவும், விறுவிறுப்பாகவும் நகர்த்திச் சென்றுள்ளார் இயக்குநர். சில காட்சிகள் சேரனின் ’ஆட்டோகிராப்’ படத்தை நினைவூட்டினாலும், ரசிப்பதற்கு அது இடையூறாக இல்லை. 2017ஆம் ஆண்டு படப்பிடிப்பு முடிக்கப்பட்டு, 2020-ல் இசை வெளியீட்டு விழா நடத்தப்பட்ட இந்த படம், அப்போதே ரிலீஸாகியிருந்தால் மிகப் பெரிய வெற்றியைப் பெற்றிருக்கும் என்பது நிச்சயம்.

நிவாஸ் கே.பிரசன்னா இசையில் பாடல்கள் அனைத்தும் கேட்கும் ரகம். இவற்றில் “ங்கொக்கா மக்கா” பாடல் ஏற்கெனவே ஹிட். பின்னணி இசை திரைக்கதைக்குப் பொருத்தமாக பயணிக்கிறது.

ஒளிப்பதிவாளர் பல்லுவின் கேமரா, காட்சிகளை வண்ணமயமாகப் படமாக்கியிருக்கிறது.

தனித்தனியான மூன்று கதைகளை சாமர்த்தியமாகத் தொகுத்திருக்கும் படத்தொகுப்பாளர்கள் ராதாகிருஷ்ணன் தனபால், இக்னேஷியஸ் அஸ்வின் ஆகியோரின் பணி பாராட்டுக்குரியது.

‘டைட்டானிக் – காதலும் கவுந்துபோகும்’: கலகலப்பான காதல் படம்; பார்த்து ரசிக்கலாம்!

ரேட்டிங்: 3.75/5