வில்லன்களோடு முதியவர்கள் மோதும் புதுமையான படம் ‘நரை’

கே7 ஸ்டுடியோஸ் சார்பில் பி.கேசவன் தயாரிக்கும் புதிய படம் ‘நரை’. இப்படத்துக்கு கதை, திரைக்கதை, வசனம் எழுதி இயக்குகிறார் விவி.

இப்படம் தொடர்பாக இயக்குனர் விவி கூறியதாவது:

வெவ்வேறு காரணங்களுக்காக குடும்பத்தினரால் ஒதுக்கப்பட்ட ஏழு முதியவர்கள், ஆதரவற்றோர் இல்லத்தில் வாழ்ந்து வருகிறார்கள். அங்கே மகிழ்ச்சியாக கழிந்துகொண்டிருக்கும் இவர்களது வாழ்க்கையை ஒரு அதிர்ச்சியான சம்பவம் தலைகீழாக மாற்றிப் போடுகிறது.

அந்த சம்பவத்திற்கும், இந்த முதியவர்களுக்கும் என்ன தொடர்பு? அந்த சம்பவம் யாரால் நிகழ்த்தப்படுகிறது?, அவர்களை இந்த முதியவர்கள் என்ன செய்தார்கள்? என்பதை திடுக்கிட வைக்கும் திருப்பங்களுடனும், முடிச்சுகள் நிறைந்த திரைக்கதையுடனும் விறுவிறுப்பாக சொல்லியிருக்கிறோம்.

தமிழ் சினிமா ரசிகர்களுக்கு நன்கு பரிச்சயமான சங்கிலி முருகன், சந்தானபாரதி, “ஜூனியர்” பாலையா, நளினிகாந்த், ஞானவேல், அழகு, விஜய் கிருஷ்ணராஜ், மகாநதி சங்கர், துரை சுதாகர், பெருமாள் காசி மற்றும் அனுப் ஆகியோர் நடித்திருப்பது இப்படத்தின் முக்கியமான அம்சம்.

இவர்களுடன் ரோஹித் என்னும் புதுமுக நாயகனும், லீமா மற்றும் ஈதன் ஆகிய இரண்டு கதாநாயகிகளும் நடித்திருக்கிறார்கள்.

இந்த படத்தின் ஒளிப்பதிவாளர் சினு சித்தார்த், சமீபத்தில் கண் சிமிட்டல் மூலம் வைரலான பிரியா வாரியர் நடித்துள்ள “ஒரு அடார் லவ்” படத்தின் ஒளிப்பதிவாளர் என்பது குறிப்பிடத்தக்கது.

வழக்கமாக இளம் கதாநயகர்கள் வில்லன்களிடம் மோதுவதையே பார்த்துப் பழகிப்போன தமிழ் ரசிகர்களுக்கு, வயதான முதியவர்கள் வில்லன்களிடம் மோதுவது நிச்சயம் புதுமையான அனுபவமாக இருக்கும். அதே சமயத்தில் நெஞ்சை நெகிழ வைக்கும் உருக்கமான காட்சிகளுடன் இத்திரைப்படம் உருவாகியுள்ளது.

இவ்வாறு அவர் கூறினார்.

ஒளிப்பதிவு – சினு சித்தார்த்

இசை – அனிருத் விஜய்

படத்தொகுப்பு – அச்சு விஜயன்

பாடல்கள் – பிரகா, மொபின்

நடனம் – பி.சந்தோஷ்

சண்டை பயிற்சி – “டேஞ்சர்” மணி

இணை தயாரிப்பு – டாக்டர் ஹேமா சரவணன்

ஊடகத்தொடர்பு – குமரேசன்