சிக்மா – விமர்சனம்

நடிப்பு: சந்தீப் கிஷன், ஃபரியா அப்துல்லா, ராஜு சுந்தரம், சம்பத் ராஜ், ஷிவ் பண்டிட், அன்புதாசன், யோக் ஜேபி, ஷீலா ராஜ்குமார், மகாலட்சுமி சுதர்சனன், கமலேஷ் ஜெகன், கிரண் கொண்டா, நாகசாய் மற்றும் சிலர்

எழுத்து & இயக்கம்: ஜேசன் சஞ்சய்

கூடுதல் திரைக்கதை: கலீல் ராஜா, சஞ்சீவ் எஸ், அஜய் அசோக்

ஒளிப்பதிவு: கிருஷ்ணன் வசந்த்

படத்தொகுப்பு: பிரவீன் கே.எல்

இசை: தமன் எஸ்

பாடல் வரிகள்: விவேக் & சூப்பர் சுப்பு

கலை இயக்கம்: பெஞ்சமின் எம்

ஸ்டண்ட் இயக்கம்: வெங்கட் & சில்வா

தயாரிப்பு: ‘லைகா புரொடக்ஷன்ஸ்’ ஏ.சுபாஸ்கரன்

லைகா புரொடக்ஷன்ஸ் ஹெட்: ஜி.கே.எம்.தமிழ்குமரன்

பத்திரிகை தொடர்பு: சுரேஷ் சந்திரா, அப்துல் நாசர் (டி ஒன்) & வம்சி சேகர்

முன்னாள் நட்சத்திர நடிகரும், இந்நாள் தமிழக முதலமைச்சருமான ஜோசப் விஜய்யின் மகன் ஜேசன் சஞ்சய் இயக்குநராக அறிமுகமாகும் திரைப்படம் என்பதால் ‘சிக்மா’ படத்துக்கு ரசிகர்கள், விமர்சகர்கள் மற்றும் திரைத்துறையினர் மத்தியில் மிகுந்த எதிர்பார்ப்பு ஏற்பட்டுள்ளது. தற்போது திரைக்கு வந்திருக்கும் இத்திரைப்படம் அந்த எதிர்பார்ப்பை பூர்த்தி செய்கிறதா? எப்படி இருக்கிறது ‘சிக்மா’? பார்க்கலாம்…

’Sigma’ அல்லது ‘Sigma Male’ என்பது, சமூகத்தின் பொதுவான விதிமுறைகளைப் பின்பற்றாமல், எந்தக் குழுவின் ஆதரவும் இல்லாமல், தனித்து நின்று வெற்றி பெறும் ஒரு சுதந்திரமான, சுயேச்சையான ஆண்மகனைக் குறிப்பிட பயன்படுகிறது. அப்படிப்பட்ட ஓர் ஆண்மகனை – நாயகனை – பற்றிய கதை இது என்ற பொருளில் இப்படத்துக்கு ‘சிக்மா’ என்று பெயர் சூட்டியிருக்கிறார் அறிமுக இயக்குநர் ஜேசன் சஞ்சய்.

இப்படத்தின் முதன்மை வில்லனான வீரய்யா ரெட்டி (சம்பத் ராஜ்), தடை செய்யப்பட்ட போதைப் பொருள் கடத்தல் மற்றும் விற்றல் போன்ற சட்ட விரோத தொழில்கள் மூலம் தனக்குக் கிடைத்த ரூ.1000 கோடியை, வெளிநாட்டிலுள்ள ஒரு கண்டெயினருக்குள் இருக்கும் ரகசிய லாக்கரில் மறைத்து வைத்திருக்கிறார். அந்த லாக்கரைத் திறக்க இரண்டு சாவிகள் உள்ளன. ஒரு சாவியை தன்னுடன் வைத்துக்கொள்ளும் வீரய்யா ரெட்டி, மற்றொரு சாவியை, தனது தொழிலை மேலும் அபிவிருத்தி செய்ய ஐடியா கொடுத்த எழிலிடம் (கிரண் கொண்டா) தருகிறார். இந்தக் காட்சியுடன் ‘சிக்மா’ திரைப்படம் தொடங்குகிறது.

மறுபுறம், நாயகன் குருவின் (சந்தீப் கிஷன்) தந்தை ஒரு கோடி ரூபாய்க்கு மேல் கடன் வாங்கி விரயம் செய்துவிட்டு, இறந்துபோனார். அந்த கடன் குருவின் தலையில் விழுகிறது. அமரராகிவிட்ட தனது அம்மா (ஷீலா ராஜ்குமார்) நினைவாக அவரது பிரைவேட் நூலகத்தையும், தனது சொந்த முயற்சியில் தொடங்கியுள்ள யூடியூப் சேனலையும் மிகுந்த சிரமத்துடன் நடத்தி வரும் குரு, எப்படியாவது தந்தையின் கடனை அடைத்துவிட வேண்டும் என்று முயற்சிகள் செய்கிறார். இந்த முயற்சிகள் பலன் அளிக்காததால், அவரது பிரைவேட் நூலகம் இருக்கும் சொந்த இடம் பறிபோகும் ஆபத்து ஏற்படுகிறது.

என்ன செய்வது என்று தெரியாமல் தவிக்கும் குரு, துரிதமாக பெரிய அளவில் பணம் ஈட்டும் எண்ணத்தில், பிரபல திரையரங்கின் அடித்தளத்தில் வின்செண்ட் (ஷிவ் பண்டிட்) ரகசியமாக நடத்தும் ‘கேசினோ’வுக்குச் சென்று சூதாட்டம் ஆடுகிறார். முதலில் வெற்றி பெறுவதுபோல் செல்லும் ஆட்டம் இறுதியில் தோல்வியில் முடிய, அவர் தன்னிடம் இருந்த மொத்தப் பணத்தையும் இழந்து விடுகிறார். ஏமாற்றப்பட்டு, வெளியேற்றப்படுகிறார்.

இந்நிலையில், ’கேசினோ’வின் உரிமையாளர் வின்செண்ட், தடை செய்யப்பட்ட போதைப் பொருளை சட்டவிரோதமாக புழக்கத்தில் விடும் வீடியோ காட்சிகள் அடங்கிய பென்டிரைவ் குருவுக்கு எதிர்பாராத விதமாக கிடைக்கிறது. இதை வைத்து வின்செண்ட்டை மிரட்டி பணம் பறிக்க நினைக்கிறார் குரு.

மேலும், எழில் என்பவரிடம் வில்லன் வீரய்யா ரெட்டி கொடுத்த, ரூ.1000 கோடி உள்ள ரகசிய லாக்கரின் சாவியும் அந்த பென்டிரைவ் மூலம் குருவிடம் மாட்டிக்கொள்ள, அதை குருவிடமிருந்து பறிக்க நினைக்கிறது வில்லன் வகையறா.

இதன்பின் என்ன நடந்தது? சந்தீப் கிஷன் பென்டிரைவ் மற்றும் லாக்கர் சாவியைப் பயன்படுத்தி, பணத்தை அள்ளி கடனை அடைத்துவிட்டு பெரும் செல்வந்தர் ஆனாரா? அல்லது அவரிடமிருந்த பென்டிரைவ் மற்றும் லாக்கர் சாவியை வில்லன் கும்பல் வெற்றிகரமாக கைப்பற்றியதா? என்பன போன்ற கேள்விகளுக்கு அதிரடி ஆக்ஷன் மற்றும் திருப்பங்களுடன் விடை அளிக்கிறது ‘சிக்மா’ திரைப்படத்தின் மீதிக்கதை.

கதையின் நாயகன் குருவாக சந்தீப் கிஷன் நடித்திருக்கிறார். தந்தையால் ஏற்பட்ட பெரிய கடன்சுமையுடன் பிரைவேட் நூலகம் மற்றும் யூடியூப் நடத்தும் கதாபாத்திரத்திரத்தில் மிகவும் இயல்பான நடிப்பை வெளிப்படுத்தி இருக்கிறார். அதே நேரத்தில் வில்லன் வகையறாக்களுடன் மோதும் காட்சிகளில் அனல் பறக்கும் ஆக்ரோஷத்தைக் காட்டியிருக்கிறார்.

நாயகியாக, ரேடியோ ஜாக்கியாக, சாம் என்ற கதாபாத்திரத்தில் ஃபரியா அப்துல்லா நடித்திருக்கிறார். அவரது கதாபாத்திரத்துக்கு கதையில் பெரிய அளவில் முக்கியத்துவம் இல்லாததால், கொடுத்த வேலையை குறைவின்றி நிறைவாக செய்திருக்கிறார்.

போதைப் பொருள் கடத்தல் மற்றும் விற்றல் தொழில் செய்து ரூ.1000 கோடியை பதுக்கி வைத்திருக்கும் வீரய்யா ரெட்டியாக வரும் சம்பத் ராஜ், சூதாட்ட கிளப்பான ‘கேசினோ’ நடத்தி, போதை மருந்தைப் புழக்கத்துக்கு விடும் வின்செண்ட்டாக வரும் ஷிவ் பண்டிட், கொலையாளியாக வரும் யோக் ஜேபி, சாரங்கியாக வரும் மகாலட்சுமி சுதர்சனன், எழிலாக வரும் கிரண் கொண்டா உட்பட படத்தில் ஏகப்பட்ட வில்லன்கள். இவர்கள் ஒவ்வொருவரும் கதையில் திருப்பங்களை ஏற்படுத்தும் ”கெட்டவர்” கதாபாத்திரத்தை சிறப்பாக செய்திருக்கிறார்கள்.

மருத்துவர் நீலாக வரும் ராஜு சுந்தரம் அவ்வப்போது நம்மை சிரிக்க வைக்கிறார். அதுபோல் கவிதா கணேஷாக வரும் அன்புதாசனும் தன் பங்குக்கு காமெடி பண்ணியிருக்கிறார்.

நாயகன் குருவின் அம்மாவாக ஷீலா ராஜ்குமார் படத்தில் சிறிது நேரமே வந்தாலும் பார்வையாளர்களின் இதயங்களில் இடம் பிடித்துவிடுகிறார்.

இப்படத்தை எழுதி இயக்கியிருக்கிறார் அறிமுக இயக்குநர் ஜேசன் சஞ்சய். அறிமுக இயக்குநர் போல் தடுமாற்றம் எதுவும் இல்லாமல், ஏற்கெனவே ஓரிரு படங்களை இயக்கிய அனுபவம் உள்ளவர் போல் இப்படத்தை சிறப்பாக இயக்கியிருக்கிறார். பண நெருக்கடியில் இருக்கும் ஓர் இளைஞனின் கைக்கு கோடிக்கணக்கில் பணம் வரும் வாய்ப்பு வந்தால், அதைப் பெற அவன் என்னவெல்லாம் செய்வான் என்பதை கதைக்கருவாக எடுத்துக்கொண்டு, அதிரடி ஆக்ஷன் கலந்து திரைக்கதை அமைத்து, விறுவிறுப்பாக படத்தை நகர்த்திச் சென்றுள்ளார் இயக்குநர். கதை – திரைக்கதை மற்றும் மேக்கிங்கில் புதுமைகளை நுழைத்து அழுத்தம் சேர்த்திருந்தால் படத்தை இன்னும் கூடுதலாக ரசித்திருக்கலாம்.

சிறந்த தொழில்நுட்பக் கலைஞர்களை இணைத்துக் கொண்டது படத்துக்கு பெரிய பலம். இப்படம் நேர்த்தியாக வர அவர்கள் உண்மையாக உழைத்திருப்பது பாராட்டுக்கு உரியது.

‘சிக்மா’ – ஜேசன் சஞ்சய் அறிமுக இயக்குநர் என்பதால், சில குறைகள் இருந்தாலும் அவற்றை அடுத்தடுத்த படங்களில் சரி செய்துகொள்வார் என்ற நம்பிக்கையில் குறைகளை பெரிதுபடுத்தாமல் அவரை உள்ளன்புடன் வரவேற்போம்! திரையரங்குக்குச் சென்று இப்படத்தைக் கண்டு களிப்போம்!

ரேட்டிங்: 3.5/5