பத்தா – விமர்சனம்

நடிப்பு: விஜய் சேதுபதி, லிஜோமோல் ஜோஸ், மாஸ்டர் சாய் பிரித்வி ராஜ், சஹஸ்ரா, அர்ஜுன் சிதம்பரம், ஹரி கிருஷ்ணன், சாந்தி பாலச்சந்தர், விஷ்ணு கோவிந்த், பாலமுருகன் மற்றும் சிலர்

எழுத்து & இயக்கம்: பாலாஜி தரணிதரன்

ஒளிப்பதிவு: செல்வகுமார் எஸ்.கே

படத்தொகுப்பு: ஆர்.கலைவாணன்

இசை: சாய் அபயங்கர்

பாடல் வரிகள்: கார்த்திக் நேத்தா, கே.கே.நகர் கானா ஜீவா, தமிழ்

கலை இயக்கம்: கண்ணன்.எஸ்

சண்டை பயிற்சி: ஸ்டன் சிவா, யு.பிருத்வி, கெவின் குமார்

நடன அமைப்பு: ராஜு சுந்தரம்

தயாரிப்பு வடிவமைப்பு: டி.முத்துராஜ்

இணை தயாரிப்பாளர்: அஷ்வின் முருகன்

தயாரிப்பு: ஸ்டார் ஸ்டுடியோ18, ஏ ஃபார் ஆப்பிள் ஸ்டுடியோஸ், சினி 1 ஸ்டுடியோஸ் புரொடக்‌ஷன்

தயாரிப்பாளர்கள்: முராத் கெதானி , பிரியா அட்லீ, அலோக் ஜெயின் & அஜித் அந்தாரே

பத்திரிகை தொடர்பு : யுவராஜ்

இப்படக்கதையில் வரும் கதாநாயகனின் பெயர் பக்தவச்சலம். அதை சுருக்கி அவரை ‘பத்தா’ என்று அழைக்கிறார்கள். அதையே இப்படத்துக்குத் தலைப்பாக வைத்துள்ளார்கள்.

1966-ல் ஒரு மர ஆசாரி தரமான, வலுவான மரங்களை இழைத்து கதவுகள் மற்றும் ஜன்னல்கள் செய்யும் காட்சியுடன் படம் தொடங்குகிறது. இம்மர பொருட்களைக் கொண்டு ஒரு பள்ளிக்கூடம் கட்டி முடிக்கப்பட்டிருக்கிறது என்பதை ஒரே ஷாட்டில் காட்டுகிறார்கள்.

அங்கிருந்து கதை 1986ஆம் ஆண்டுக்குத் தாவுகிறது. வடசென்னை பகுதியில் ஈவு இரக்கம் இல்லாத, மூர்க்கமான பத்தா (விஜய் சேதுபதி) என்ற பயங்கரமான ரவுடி இருக்கிறார். தனக்குப் பிடிக்காத பிற ரவுடிகள் சிக்கினால், அவர்களை அடித்து, மிதித்து, துவைத்து, காயப்போட்டு விடுவார். இதனால் தன்னை எதிர்த்து வெல்ல ஏரியாவில் யாருமே இல்லை என்ற அகம்பாவத்துடன் திரிகிறார். அவரை கண்டால் ஏரியாவில் உள்ள அத்தனை வயதினரும் பயப்படுகிறார்கள். அவரது மனைவி கண்ணிமா (லிஜோமோல் ஜோஸ்). கணவர் வீட்டைவிட்டு வெளியே சென்றாலே அவர் உயிரோடு திரும்பி வருவாரா? யாரோடு என்ன வம்பு இழுத்துக்கொண்டு வருவார்? என்று வயிற்றில் நெருப்பைக் கட்டிக்கொண்டு கண்ணிமா அனுதினமும் பதட்டத்துடனேயே காத்துக் கொண்டிருப்பார். மனைவி மீது நிறைய காதல் இருந்தாலும், ‘அடி-தடி, வம்பு-வழக்கு வேண்டாம்’ என்று அவர் கெஞ்சிக் கேட்கும் வேண்டுகோளை மட்டும் பத்தா காதில் போட்டுக்கொள்ள மாட்டார். அவருக்கு பூப்பெய்தும் வயதில் ஒரு மகள். பெயர் தேன்மொழி (சஹஸ்ரா). மகள் மீது உயிரையே வைத்திருக்கிறார் பத்தா.

அதே ஏரியாவில் வசிக்கும் திருநாவுக்கரசு (ஹரி கிருஷ்ணன்) – செல்வி (சாந்தி பாலச்சந்தர்) தம்பதிக்கு எட்டு வயது மகன் இருக்கிறான். அவன் பெயர் சபரி (மாஸ்டர் சாய் பிரித்வி ராஜ்). 1966ஆம் ஆண்டு ஸ்ட்ராங்காக கட்டப்பட்ட பள்ளியில் மூன்றாம் வகுப்பு படிக்கிறான். ஒருநாள் அவன் பெற்றோருடன் கடைத்தெருவுக்குப் போயிருந்தபோது, இரண்டு ஆண்கள் மாறி மாறி அடித்துக்கொள்வது போன்ற விளையாட்டு பொம்மை ஒன்றை பார்க்கிறான். பெற்றோரிடம் அடம் பிடித்து அதை வாங்கும் சபரி, எப்போதும் அந்த விளையாட்டு பொம்மையை விட்டுப் பிரியாமல் தன்னுடன் வைத்துக்கொண்டு விளையாடிக்கொண்டே இருக்கிறான்.

ஒருநாள் தன் பொம்மையுடன் விளையாடியபடி பள்ளி நோக்கி சென்றுகொண்டிருக்கும் சபரி, வழியில் பத்தா ஆக்ரோஷமாக ஜோதி (அர்ஜுன் சிதம்பரம்) என்ற ரவுடியை அடித்து, நொறுக்கி, ரத்தக் காயப்படுத்துவதைப் பார்த்து பயந்துபோகிறான். “பத்தா ஜெயில் கதவைக்கூட எளிதாக உடைத்து விடுவார். அவர் வீட்டில் ஒரு சிங்கம் வளர்க்கிறார். அதை அழைத்துக்கொண்டு அவர் வாக்கிங் போகும்போது, அவரும் சிங்கமும் ஒரு கரண்ட் பெட்டி மேல் ‘மூச்சா’ போவார்கள்” என்றெல்லாம் சபரியின் சக மாணவர்கள் சொல்வதைக் கேட்டு, அவனுக்கு பத்தா மீதான பயம் அதிகரித்துவிடுகிறது.

இந்த சமயத்தில் முழு ஆண்டுத் தேர்வு நடக்கிறது. தேர்வின் கடைசி நாள் சபரி தேர்வறையில் தனது விளையாட்டு பொம்மையுடன் விளையாடிக் கொண்டிருக்கும்போது ஆசிரியையிடம் மாட்டிக்கொள்கிறான். ஆசிரியை அந்த விளையாட்டு பொம்மையைக் கைப்பற்றி, ஸ்டாஃப் ரூமில் உள்ள அலமாரியில் கொண்டுபோய் வைத்துவிடுகிறார். அதை சபரி பார்க்கிறான். அன்றோடு தேர்வுகள் முடிந்து விடுவதால், கோடை விடுமுறை விடப்பட்டு, பள்ளியின் மெயின்கேட் பூட்டுப்போட்டு பூட்டப்பட்டு விடுகிறது.

விளையாட்டு பொம்மையை பறிகொடுத்த துக்கத்தில் சபரிக்கு இரவு முழுவதும் தூக்கம் வரவில்லை. விடிந்தும் விடியாத அதிகாலைப் பொழுதில் படுக்கையைவிட்டு எழுந்து, பள்ளிக்கூட காம்பவுண்டு சுவரேறி குதித்து, ஸ்டாஃப் ரூம் ஜன்னல் வழியே உள்ளே நுழைந்து, அங்குள்ள அலமாரியில் இருந்த தனது விளையாட்டு பொம்மையை எடுத்துக்கொள்கிறான். மகிழ்ச்சியுடன் கிளம்பும்போது, அவனுக்கு வயிற்றை கலக்கியதால், வெளிப்புறம் தாழ்ப்பாள் மட்டும் போடப்பட்டிருக்கும் பள்ளிக்கூட கழிப்பறைக் கதவைத் திறந்து காலைக் கடனை முடிக்கிறான். அப்போது அதே காரணத்துக்காக ரவுடி பத்தாவும் அந்த கழிவறைக்குள் வந்தது சிறுவன் சபரிக்குத் தெரியவில்லை. அவன் கழிப்பறை கதவின் வெளித் தாழ்ப்பாளைப் போட்டு பூட்டிவிட்டுச் செல்லும்போது, கழிவறைக்கு உள்ளே இருந்து கதவைத் தட்டும் சத்தம் கேட்கிறது. கதவைத் திறந்துவிட சபரி வரும்போது, “எவண்டா கதவை மூடுனது? நான் பத்தாடா! வெளியே வந்தேன்னா சாகடிச்சிருவேன்” என்று பத்தா ஆக்ரோஷமாக கத்துவதைக் கேட்டு திடுக்கிடும் சபரி, பயத்தில் கதவைத் திறந்துவிடாமல் சென்று விடுகிறான். கதவைத் திறக்க முடியாமல் தவிக்கிறார் பத்தா.

அதன்பிறகு என்ன நடந்தது? கோடை விடுமுறை என்பதால் யாருமே பள்ளிக்கு வரவோ, உதவவோ முடியாது என்ற நிலையில், கழிப்பறைக்குள் மாட்டிக்கொண்ட பத்தா என்ன ஆனார்? அவர் வெளியே வர முடிந்ததா, இல்லையா? அவர் ஏன் பூட்டிக்கிடக்கும் பள்ளிக்கூடத்துக்குள் வந்தார்? அதன் பின்னணி என்ன? பயத்தில் அங்கிருந்து சென்றுவிட்ட சிறுவன் சபரியின் மனநிலை என்ன? அதன்பின் அவன் என்னவெல்லாம் செய்தான்? என்பன போன்ற சரமாரியான கேள்விகளுக்கு நிமிடத்துக்கு நிமிடம் நகைச்சுவையையும், ’பக் பக்’ திரில்லிங்கையும் கலந்து கொடுத்து சுவாரஸ்யமாக விடை அளிக்கிறது ‘பத்தா’ திரைப்படத்தின் மீதிக்கதை.

பயங்கர ரவுடி பத்தாவாக விஜய் சேதுபதி நடித்திருக்கிறார். கொஞ்சம் முரட்டுத்தனம், கொஞ்சம் காமெடி, கொஞ்சம் செண்டிமென்ட் கலந்த இது போன்ற கதாபாத்திரம் என்றால் விஜய் சேதுபதிக்கு அல்வா சாப்பிடுவது மாதிரி. பிற முன்னணி ஹீரோக்கள் எவரும் ஏற்கத் துணிய மாட்டார்கள் என்று உறுதியாக சொல்லும்படியான இக்கதாபாத்திரத்தில் மிகச் சிறப்பாக நடித்து, பிரித்து மேய்ந்திருக்கிறார். நக்கலான உடல்மொழி, தனித்துவமான வசன உச்சரிப்பு, சீரியஸான நேரத்தில் கூட தெறிக்கவிடும் நகைச்சுவை என தனது பாணியில் அசால்ட்டாக நடித்து, பல காட்சிகளில் பார்வையாளர்களின் அப்ளாஸை அள்ளுகிறார்.

பத்தாவின் மனைவி கண்ணிமாவாக லிஜோமோல் ஜோஸ் நடித்திருக்கிறார். அனுதினமும் அடி-தடி என்றிருக்கும் கணவர் வாய்த்தால், அவரது மனைவி எத்தகைய அழுத்தத்துக்கும், நெருக்கடிக்கும் ஆளாவார் என்பதை தத்ரூபமாக நடித்துக்காட்டி, ஸ்கோர் செய்திருக்கிறார் லிஜோமோல் ஜோஸ்.

மூன்றாம் வகுப்பு படிக்கும் எட்டு வயது சிறுவன் சபரியாக மாஸ்டர் சாய் பிரித்வி ராஜ் நடித்திருக்கிறார். இப்படத்தில் பேரதிசயம் என்ன என்றால், அது மாஸ்டர் சாய் பிரித்வி ராஜின் பிரமாதமான நடிப்பு தான். அச்சம், பயம், அப்பாவித்தனம், குற்றவுணர்வு, உறுத்தும் மனசாட்சி, உதவும் நல்லியல்பு என பலவித உணர்ச்சிகளை உள்ளடக்கிய கதாபாத்திரத்தை ஏற்று, மிகவும் இயல்பாக நடித்து அனைத்துப் பார்வையாளர்களையும் தனது ரசிகர் பட்டாளமாக மாற்றிவிட்டார் மாஸ்டர் சாய் பிரித்வி ராஜ். ஒரு கட்டத்தில் அச்சமும் அழுகையுமாய் விம்மலுடன் பத்தாவிடம் உண்மையைச் சொல்லும் காட்சியில் கண் கலங்க வைத்து விடுகிறார். வாழ்த்துகள் மாஸ்டர் சாய் பிரித்வி ராஜ்!

பத்தாவின் மகள் தேன்மொழியாக வரும் சஹஸ்ரா, சிறுவன் சபரியின் அப்பா திருநாவுக்கரசாக வரும் ஹரி கிருஷ்ணன், அம்மா செல்வியாக வரும் சாந்தி பாலச்சந்தர், ரவுடி ஜோதியாக வரும் அர்ஜுன் சிதம்பரம், தில்லியாக வரும் விஷ்ணு கோவிந்த், துரையாக வரும் பாலமுருகன் உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

இப்படத்தை எழுதி இயக்கியிருக்கிறார் பாலாஜி தரணிதரன். இவர் முன்பு எழுதி இயக்கிய ‘நடுவுல கொஞ்சம் பக்கத்த காணோம்’ என்ற மகத்தான வெற்றிப்படத்துக்கு நிகராக இந்தப் படத்தையும் பிரமாதமாக படைத்திருக்கிறார். ‘யாருக்கும் அடங்காத ஒரு முரட்டு ரவுடியை எட்டு வயது சிறுவன் ஒருவன் கழிப்பறைக்குள் வைத்துப் பூட்டி கதறடிக்கிறான்’ என்ற அருமையான, புதுமையான கதைக் கருவை கையிலெடுத்து, அதில் நகைச்சுவையையும் எமோஷனையும் கலந்து, சுவாரஸ்யமாக திரைக்கதை அமைத்து படத்தை விறுவிறுப்பாக நகர்த்திச் சென்றுள்ளார் இயக்குநர். படம் பார்த்த அனைவரும் விஜய் சேதுபதி மற்றும் மாஸ்டர் சாய் பிரித்வி ராஜுக்கு இணையாக இயக்குநரையும் போற்றிப் புகழ்வார்கள் என்பது நிச்சயம். பாராட்டுகள் இயக்குநர் பாலாஜி தரணிதரன்!

இசையமைப்பாளர் சாய் அபயங்கர், ஒளிப்பதிவாளர் செல்வகுமார் எஸ்.கே, படத்தொகுப்பாளர் ஆர் கலைவாணன், கலை இயக்குநர் கண்ணன் எஸ், தயாரிப்பு வடிவமைப்பாளர் டி.முத்துராஜ் உள்ளிட்டோரின் தரமான, நேர்த்தியான தொழில்நுட்பங்கள் இயக்குநரின் வெற்றிக்கும், கதை சொல்லலுக்கும் உறுதுணையாக இருந்துள்ளன.

‘பத்தா’ – குழந்தைகள் முதல் பெரியவர்கள் வரை அனைத்துத் தரப்பினரும் பார்த்து, சிரித்து மகிழ்ந்து, குதூகலிக்கத் தக்க சிறந்த பொழுது போக்குத் திரைப்படம்; தவறாமல் கண்டு களியுங்கள்!

ரேட்டிங்: 4/5.