ஹார்ட்டின் – விமர்சனம்

நடிப்பு: சனந்த், மடோனா செபாஸ்டியன், இமயா, வாட்ஸ்ஆப் மணி, டெப்னிதா, உமா பத்மநாபன், பிரகதி மற்றும் பலர்

எழுத்து & இயக்கம்: கிஷோர் குமார்

ஒளிப்பதிவு: முகேஸ்வரன் வி

படத்தொகுப்பு: பரத் விக்ரமன்

இசை: ராஜேஷ் முருகன்

பாடல் வரிகள்: விவேக், மோகன் ராஜன், சாரதி

கலை: ஜி.துரைராஜ்

சண்டை பயிற்சி: ரக்கர் ராம்குமார்

தயாரிப்பு: ’டிரைடண்ட் ஆர்ட்ஸ்’ ஆர்.ரவீந்திரன்

பத்திரிகை தொடர்பு: நிகில் முருகன்

சென்னையைச் சேர்ந்த நாயகன் சிவா (சனந்த்), ராஜஸ்தான் மாநிலம் ஜெய்ப்பூரில், தமிழ்நாட்டு உணவு வகைகள் கிடைக்கக் கூடிய ‘தமிழ் பவன்’ என்ற உணவகத்தை தனது நண்பரான மணி (வாட்ஸ்ஆப் மணி), மணியின் காதல் மனைவியான அங்கிதா (டெப்னிதா) ஆகியோரோடு சேர்ந்து நடத்தி வருகிறார்.

ஜெய்ப்பூரில் ஐ.டி நிறுவனத்தில் பணிபுரியும் சென்னைப் பெண்ணான இமயா (சாதனா), ‘தமிழ் பவன்’ உணவகத்தின் வாடிக்கையாளராகி, சிவாவுடன் நட்பாகிறார். இருவரும் அடிக்கடி சந்தித்து, பேசிப் பழகி, காதல் வரை சென்றபோதிலும், அந்த காதலுக்குள் நுழைய சிவாவுக்கு மனத்தடை ஏற்படுகிறது. காரணம் – அவரது முதல் காதல்.

முன்பு கல்லூரியில் படிக்கும்போது சிவாவும், சாஹித்யா (மடோனா செபாஸ்டியன்) என்ற சக மாணவியும் மூன்று வருடங்களாக காதலித்து வந்திருக்கிறார்கள். கல்லூரிப் படிப்பு முடிந்தபின், ஊட்டியிலுள்ள தன் தந்தையின் எஸ்டேட் தொழிலை கவனிக்க வேண்டியிருப்பதாக சிவாவிடம் சொல்லிவிட்டு ஊட்டிக்குச் செல்கிறார் சாஹித்யா.

ஊட்டிக்குச் சென்று பத்து நாட்களாகியும் சாஹித்யா தொலைபேசியில் கூட பேசாமலிருப்பதால் தவிக்கும் சிவா, சாஹித்யாவை சந்திக்க வேண்டும் என்ற ஏக்கத்தில் ஊட்டிக்குப் புறப்பட்டுப் போகிறார். சாஹித்யாவை சந்திக்கிறார். ஆனால், சாஹித்யாவோ, ”இந்த காதல் நமக்கு செட் ஆகாது” என்று கூறி பிரேக்-அப் சொல்லிவிட, இருவரும் நிரந்தரமாகப் பிரிந்துவிடுகிறார்கள்.

சாஹித்யாவின் பிரிவையும், அதனால் சிவாவுக்கு ஏற்பட்டுள்ள வலியையும் புரிந்துகொண்டு சாதனா ஆறுதல் கூற, தேறுதலடையும் சிவா, சாதனாவின் காதலை ஏற்றுக்கொள்கிறார்.
இவர்களின் காதலை இரு வீட்டாரும் ஏற்றுக்கொண்டு நெருக்கமாக, திருமண ஏற்பாடுகள் நடைபெறுகின்றன.

இந்த நிலையில், பயங்கரமான விபத்து ஒன்றில் சிக்கும் சிவா, சாதனாவின் காதல் உட்பட சமீபத்தில் நடந்த நிகழ்வுகளை மறந்து, கல்லூரி நாட்களின் நினைவுகளுக்குச் சென்றுவிடுகிறார். சாதனா யார் என்றே தெரியவில்லை என்றும், சாஹித்யா தான் தன் காதலி, அவரை சந்திக்க ஊட்டிக்குச் செல்ல வேண்டும் என்றும் அடம் பிடிக்கிறார்.

தன் காதலரை குணப்படுத்த சாதனா வேறு வழியின்றி, சாஹித்யாவிடம் உதவி கேட்கிறார். இப்படியாக சாஹித்யா மீண்டும் சிவாவின் வாழ்க்கைக்குள் நுழைகிறார்.

அதன்பின் என்ன நடந்தது? முக்கோணக் காதலில் ஏற்படும் குழப்பங்கள் என்ன? சாதனா, சாஹித்யா ஆகிய இருவரில் எவரது காதல் கைகூடியது? என்பன போன்ற கேள்விகளுக்கு காதல் சொட்டச் சொட்ட விடை அளிக்கிறது ‘ஹார்ட்டின்’ திரைப்படத்தின் மீதிக்கதை.

கதையின் நாயகன் சிவாவாக சனந்த் நடித்திருக்கிறார். பல படங்களில் துணை கதாபாத்திரங்களில் மட்டுமே நடித்து வந்த சனந்துக்கு இதில் முழுமையான நாயக வேடம். இந்த வாய்ப்பைக் கச்சிதமாகப் பற்றிக்கொண்டு, காதல் காட்சிகளிலும், எமோஷனல் காட்சிகளிலும் அசத்தலாக நடித்து, தானொரு ஹீரோ மெட்டீரியல் என்பதை நிரூபித்திருக்கிறார்.

நாயகனைக் காதலிக்கும் ஐ.டி நிறுவனப் பணியாளர் சாதனாவாக இமயா நடித்திருக்கிறார். தமிழக முன்னாள் அமைச்சர் தங்கம் தென்னரசுவின் மகளான இமயா, இந்த முதல் படத்திலேயே அனுபவம் வாய்ந்த நடிகை போல் ரொம்ப இயல்பாக நடிப்பை வெளிப்படுத்தி கவனம் ஈர்த்துள்ளார்.

நாயகனின் கல்லூரிக்கால காதலி சாஹித்யாவாக மடோனா செபாஸ்டியன் நடித்திருக்கிறார். வழக்கம் போல் அழகாலும், அளவான நடிப்பாலும் ஸ்கோர் செய்திருக்கிறார்.

நாயகனின் நண்பர் மணியாக வரும் வாட்ஸ்ஆப் மணி, மணியின் காதல் மனைவி அங்கிதாவாக வரும் டெப்னிதா, மற்றும் உமா பத்மநாபன், பிரகதி உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் கிஷோர் குமார். ஒரு முக்கோணக் காதல் கதையை எடுத்துக்கொண்டு, அதன் வழியே தற்கால காதலுறவின் தன்மைகளையும் அதன் சிக்கல்களையும் செயற்கையான நாடகத்தனம் இல்லாமல், அழகாகவும், இயல்பாகவும் சொல்ல முயன்றிருக்கிறார். அந்த முயற்சியில் வெற்றியும் பெற்றுள்ளார்.

வி.முகேஸ்வரனின் வண்ணமயமான ஒளிப்பதிவும், ராஜேஷ் முருகனின் இளமை ததும்பும் பாடலிசையும் படத்துக்கு பலம்.

‘ஹார்ட்டின்’ – இதமான காதல் கதை; பார்த்து மகிழலாம்!

ரேட்டிங்: 3/5