ஐபிஎல் போட்டிகளில் இருந்து எம்.எஸ்.தோனி ஓய்வு பெறுவதாக அதிகாரப்பூர்வமாக அறிவிப்பு!
ஐபிஎல் போட்டிகளில் இருந்து ஓய்வு பெறுவதாக எம்.எஸ்.தோனி தரப்பில் அதிகாரப்பூர்வமாக அறிவிக்கப்பட்டுள்ளது. 2027 ஐபிஎல் சீசனுக்கான சென்னை சூப்பர் கிங்ஸ் அணியின் ஆலோசகராக தோனி செயல்படுவார் என்பதை அந்த அணி நிர்வாகம் உறுதிப்படுத்தியது.
இது குறித்து சென்னை சூப்பர் கிங்ஸ் அணி வெளியிட்ட சமூக வலைதளப் பதிவில், ‘வாழ்நாளில் ஒருமுறை மட்டுமே கிடைக்கக்கூடிய வீரர். ஒரு புதிய பொறுப்பு, என்றென்றும் நீடிக்கும் பிணைப்பு. மகேந்திர சிங் தோனி, சென்னை சூப்பர் கிங்ஸ் அணியின் ‘ஆலோசகர்’ (Team Mentor) பொறுப்பை ஏற்கிறார்.
எண்ணற்ற வெற்றிகள், சவாலான காலங்கள் மற்றும் நம் இதயங்களில் என்றும் நிலைத்திருக்கும் நினைவுகள் என நமது பயணத்தின் தொடக்கத்தில் இருந்தே எம்.எஸ்.தோனி சிஎஸ்கே அணியின் மையப்புள்ளியாக இருந்து வருகிறார்.
அணியை வெற்றியை நோக்கி அழைத்துச் சென்றது முதல், அடுத்த தலைமுறை சூப்பர் கிங்ஸ் வீரர்களுக்கு வழிகாட்டுவது வரை, ‘தல’ எப்போதும் நமது அடையாளத்தின் ஓர் அங்கமாகவே இருப்பார். மேலும், சென்னை எப்போதும் அவருக்கு இல்லமாகவே இருக்கும்’ எனத் தெரிவிக்கப்பட்டுள்ளது.
இந்திய கிரிக்கெட் அணியின் முன்னாள் கேப்டனான தோனி (45), அனைத்து வடிவ கிரிக்கெட்டில் இருந்தும் ஏற்கெனவே ஓய்வு பெற்ற நிலையில், தற்போது ஐபிஎல் போட்டிகளில் இருந்தும் ஓய்வை அறிவித்துள்ளார்.
அவர் தனது நீண்ட ஐபிஎல் பயணத்தில் ஐந்து முறை சென்னை அணிக்கு சாம்பியன் பட்டத்தை வென்று கொடுத்து, ரசிகர்களின் இதயங்களையும் வென்றுள்ளார்.
சிஎஸ்கே அணியின் முகமாக தொடக்கம் முதலே திகழ்ந்த தோனி, தனது ஐபிஎல் வாழ்க்கையை முடிவுக்குக் கொண்டு வந்து, 2027 சீசன் முதல் அணியின் ஆலோசகராக (Team Mentor) புதிய பொறுப்பை ஏற்கிறார்.
ஜாகீர் கானை தலைமைப் பயிற்சியாளராக நியமித்த சில வாரங்களுக்குப் பிறகு, 2027 ஐபிஎல் போட்டிகளுக்காக வீரர்களைத் தக்கவைக்கும் காலக்கெடு முடிவடையும் நாளில், இந்த முக்கிய மாற்றத்தை சிஎஸ்கே உறுதிப்படுத்தியுள்ளது.
