ரேகை (வெப் சீரிஸ்) – விமர்சனம்

நடிப்பு: பாலஹாசன், பவித்ரா ஜனனி, வினோதினி வைத்தியநாதன், அஞ்சலி ராவ், இ.இந்திரஜித், எம்.ஸ்ரீராம், பூபாளம் பிரகதீஸ்வரன் மற்றும் பலர்

மூலக்கதை: ராஜேஷ்குமார்

எழுத்து & இயக்கம்: எம்.தினகரன்

ஒளிப்பதிவு: மகேந்திரா எம்.ஹென்றி

படத்தொகுப்பு: துரை

இசை: ஆர்.எஸ்.ராஜ் பிரதாப்

தயாரிப்பு: எஸ்.எஸ் குரூப்’ எஸ்.சிங்காரவேலன்

ஓடிடி தளம்: ஜீ 5

பத்திரிகை தொடர்பு: எய்ம் சதீஷ், சிவா

பிரபல கிரைம் கதை எழுத்தாளர் ராஜேஷ்குமார், கிரைம் மற்றும் புலனாய்வு வகைப்பட்ட 1500க்கும் மேற்பட்ட நாவல்களையும், 2000க்கும் மேற்பட்ட சிறுகதைகளையும் எழுதி தமிழ் வாசகர்களை தன் வசப்படுத்திக் கொண்டவர். 1980 – 90களில் தமிழ்நாட்டில் பிரபலமாக இருந்த ‘பாக்கெட் நாவல்’ புத்தகங்களில் ஆயிரக்கணக்கான கதைகள் எழுதி, ஆச்சரியப்படுத்தி, புகழ் பெற்றவர். ‘கிரைம் கதை மன்னன்’ என்று போற்றப்படும் ராஜேஷ்குமார் எழுதிய நாவலில் இருந்து இயக்குநர் எம்.தினகரன் மூலக்கதை எடுத்து, அதை தனது கற்பனையால் கதை, திரைக்கதை, வசனமாக விரித்து, ஆறு எபிசோடுகளாகப் பிரித்து, இயக்கியிருக்கும் வெப் சீரிஸ் தான் ‘ரேகை’. ஜீ 5 ஓடிடி தளத்தில் தற்போது வெளியாகியிருக்கும் இந்த வெப் சீரிஸ், ராஜேஷ்குமாரின் கதைகளை வாசிக்கும்போது வாசகர்களுக்கு ஏற்படும் சுவாரஸ்யத்தையும், விறுவிறுப்பையும் பார்வையாளர்களுக்கு ஏற்படுத்துகிறதா? பார்க்கலாம்…

குற்றாலம் காவல் நிலையத்தில் சப்-இன்ஸ்பெக்டராகப் பணிபுரிகிறார் நாயகன் வெற்றி (பாலஹாசன்). அதே காவல் நிலையத்தில் கான்ஸ்டபிளாக வேலை பார்க்கிறார் நாயகி சந்தியா (பவித்ரா ஜனனி). இவர்கள் இருவருக்கும் இடையில் காதல் மலர்ந்து நிச்சயதார்த்தம் வரை சென்ற பின், சிறிய கருத்து வேறுபாடு ஏற்பட்டு, சந்தியாவுக்கு வேறு ஒருவருடன் திருமணம் நிச்சயமாகிறது. பிரேக்-அப் ஆன ஜோடி என்றபோதிலும், இருவரும் போலீஸ் வேலையை சின்சியராக செய்து வருகிறார்கள்.

இந்நிலையில், வெற்றியால் நேசிக்கப்பட்டு, ஊர்க்காவல் படையில் (ஃபிரண்ட்ஸ் ஆஃப் போலீஸ்) சேர்த்து விடப்பட்ட மாணவர் ஒருவர், அவர் தங்கியிருந்த ‘பாய்ஸ் ஹாஸ்டலில்’ உள்ள குளியலறையில், அதிகாலையில் மூச்சுத் திணறி இறந்து கிடக்கிறார். இந்த வழக்கை வெற்றியும், சந்தியாவும் இணைந்து விசாரிக்கிறார்கள்.

விசாரணையில், இறந்து போனவரின் கைரேகை போன்றே வேறு மூன்று பேருக்கும் கைரேகை இருக்கிறது என்பது தெரிய வருகிறது. ஒட்டிப் பிறந்த இரட்டைக் குழந்தைகளாக இருந்தாலும், அவர்களது கைரேகைகள் ஒன்றுக்கொன்று மாறுபட்டுத்தான் இருக்கும். அப்படியிருக்க, நான்கு பேருக்கும் ஒரே மாதிரி கைரேகை எப்படி சாத்தியம்? என்ற சந்தேகத்தில் விசாரிக்கையில், அந்த நான்கு பேரும் ஒரே நாளில் இறந்திருக்கிறார்கள்; அதிலும், பிரேத பரிசோதனை அறிக்கையின்படி, நான்கு பேரும் எதிர்பாராத விபத்துகளில் சிக்கி உயிரிழந்திருக்கிறார்கள் என்கிற அதிர்ச்சிகரமான விஷயம் வெளிப்படுகிறது.

இவர்களது மரணத்தின் பின்னணியில் ஏதோ மர்மம் இருக்கிறது என்பதை உணர்ந்து, சப்-இன்ஸ்பெக்டர் வெற்றி விசாரணையில் தீவிரம் காட்டும்போது, நான்கு பேரும் கொலை செய்யப்பட்டிருக்கும் உண்மை தெரிய வருகிறது.

எந்தவித தடயங்களும் இல்லாமல், குறிப்பாக பிரேத பரிசோதனையில் கூட எந்தவித சந்தேகமும் ஏற்படாத வகையில் கொலை செய்யப்பட்டிருக்கும் இந்த நான்கு பேர் யார்? அவர்களைக் கொன்றது யார்? எதற்காக? இவர்களின் கைரேகைகள் ஒரே மாதிரியாக இருப்பது எப்படி? என்பன போன்ற கேள்விகளுக்கான விடைகளை விறுவிறுப்பான சம்பவங்கள் மற்றும் எதிர்பாராத திருப்பங்களுடன் விடை அளிக்கிறது ‘ரேகை’ வெப் சீரிஸின் மீதிக்கதை.

கதையின் நாயகனாக, சப்-இன்ஸ்பெக்டர் வெற்றியாக பாலஹாசன் நடித்திருக்கிறார். காக்கி உடை பணிக்கேற்ற மிடுக்கும், துடிப்பும் கொண்டிருக்கிறார். வேகத்தோடு விவேகத்தையும் நடிப்பில் வெளிப்படுத்தி, அந்த வேடத்துக்குப் பலம் சேர்த்திருக்கிறார்.

கதையின் நாயகியாக, கான்ஸ்டபிள் சந்தியாவாக பவித்ரா ஜன்னி நடித்திருக்கிறார். துருதுருப்பு, துடுக்குத்தனமான பேச்சு, ரொமான்ஸ் கலந்த பார்வை என முழு வெப் சீரிஸிலும் குறை ஏதுமின்றி நிறைவான நடிப்பை வெளிப்படுத்தியிருக்கிறார்.

பிரேத பரிசோதனை செய்து அறிக்கை அளிக்கும் அரசு மருத்துவர் புஷ்பவல்லியாக வரும் வினோதினி வைத்தியநாதன், திருப்பத்தை ஏற்படுத்தும் மிக முக்கியமான கதாபாத்திரத்தில் நடித்து கவனம் ஈர்க்கிறார்.

அஞ்சலி ராவ், இ.இந்திரஜித், எம்.ஸ்ரீராம், பூபாளம் பிரகதீஸ்வரன் உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

எழுத்தாளர் ராஜேஷ்குமாரின் மூலக்கதைக்கு கதை, திரைக்கதை, வசனம் எழுதி இயக்கியிருக்கிறார் இயக்குநர் எம்.தினகரன். கொலைக் குற்றப் புலனாய்வு திரில்லர் என்பதற்காக வெட்டு, குத்து, ரத்த ஆறு என கோரமாகக் காட்சிப்படுத்தாமல், அதை உணர வைத்திருக்கிறார் இயக்குநர். ராஜேஷ்குமாரின் கதைகளில் இருக்கும் அதே சுவாரஸ்யத்தையும், விறுவிறுப்பையும் இந்த சீரிஸின் ஆறு எபிசோடுகளிலும் கொண்டு வருவதில் அவர் வெற்றி பெற்றுள்ளார். மொத்த எபிசோடுகளையும் ஒரே மூச்சில் பார்த்துவிட வேண்டும் என்ற பேரார்வத்தை பார்வையாளர்களுக்கு ஏற்படுத்தும் விதத்தில் இயக்கியுள்ளதற்காக இயக்குநர் எம்.தினகரனுக்கு நம் பாராட்டுகள்.

மகேந்திரா எம் ஹென்றியின் விறுவிறுப்பான ஒளிப்பதிவும், கிரைம் திரில்லருக்கு உரிய திகிலூட்டும் ராஜ் பிரதாபின் பின்னணி இசையும், துரையின் கச்சிதமான படத்தொகுப்பும் அனைத்து எபிசோடுகளையும் தொய்வு ஏற்படாமல் பக்கபலமாகத் தாங்கி பிடித்திருக்கின்றன.

‘ரேகை’ (வெப் சீரிஸ்) – ’குற்றப் புலனாய்வு திரில்லர்’ விரும்பிகளுக்கு செம விருந்து!

ரேட்டிங்: 3.75/5