டிரோன்ஸ் – விமர்சனம்

நடிப்பு: சித்தி இத்னானி, அஞ்சலி நாயர், டிராவிட் செல்வம், தேவதர்ஷினி, குரைஷி, சினிமாவாலா சதீஷ், சசி செல்வராஜ், ஆர்ஜே தீபக்

எழுத்து & இயக்கம்: ஆர்.ராகவ் மிர்தாத்

ஒளிப்பதிவு: ஜெயந்த் சேது மாதவன்

படத்தொகுப்பு: சதீஷ் சூர்யா

இசை: ஹரி எஸ் ஆர்

நடனம்: பாபி ஆண்டனி

ஸ்டண்ட்: பிசி ஸ்டண்ட்ஸ்

தயாரிப்பு வடிவமைப்பு: ஆர்.கிஷோர்

கிரியேட்டிவ் தயாரிப்பு: சினிமாவாலா பிக்சர்ஸ், சினிமாவாலா சதீஷ்

தயாரிப்பு: ‘ஜிஎம் மோர்கன் பிலிம்ஸ்’ ஜிஎம் மோர்கன்

பத்திரிகை தொடர்பு: சதீஷ் எய்ம், சிவா

வாசிக்கத் தெரிந்த நாம் அனைவரும், சிறுவயதில், சித்திரங்களுடன் சித்தரிக்கப்படும் விசித்திரமான, ஆனால் சுவாரஸ்யமான ’காமிஸ்’ கதைகளைப் பார்த்து, படித்து, ரசித்திருப்போம்…

…ஓடியாடி விளையாடிக் கொண்டிருக்கும் சில சிறுவர்கள் தற்செயலாக ஒரு குகைக்குள் அல்லது குழிக்குள் சென்று விடுவார்கள். உள்ளே ஓர் அதிசய உலகம் இருக்கும். அதில் அழகான தேவதைகள், கேட்டதைக் கொண்டுவந்து கொடுக்கும் பறக்கும் தட்டுகள் மட்டுமல்ல, மந்திரசக்தி படைத்த பயங்கரமான சூனியக்காரிகள், அபாயகரமான மனிதர்கள் என பலவித ஜீவராசிகளும் இருப்பார்கள். அவர்களால் சிறுவர்களின் உயிருக்கு ஆபத்து ஏற்படும் சூழ்நிலை உருவாகும். அவர்களிடமிருந்து தப்பியோட முயன்றாலும், அங்கிருந்து வெளியேற வழி தெரியாது…

இப்படிப் போகும் சிறுவர்களுக்கான அந்த ‘காமிக்ஸ்’ படக்கதைகள்!

இதே பாணியில் சிறுவர் – சிறுமிகள் மட்டுமல்ல, பெரியவர்களுக்குள் இருக்கும் குழந்தைகளும் கண்டு களிக்கும் விதத்தில் ஒரு திரைப்படம் எடுத்தால் எப்படி இருக்கும் என்ற கேள்விக்கு விடையாக புதுமையான கற்பனையில் மலர்ந்திருக்கிறது ‘டிரோன்ஸ்’ என்னும் ஃபேண்டஸி திகில் நகைச்சுவைப் படம்!

கல்லூரியில் ’ஆஸ்ட்ரோ பிசிக்ஸ்’ எனப்படும் விண்வெளி இயற்பியல் பயிலும் மாணவர்களான கிஷோர் என்ற கிஷ் (டிராவிட் செல்வம்), ராஷ்மிகா என்ற ரஷ் என்ற கருப்பட்டி (அஞ்சலி நாயர்), தஷ் (ஆர்ஜே தீபக்) ஆகிய மூவரும் நெருங்கிய நண்பர்கள். ஒரு விவகாரத்தில் எக்குத்தப்பாக சிக்கி, போலீஸ் நிலையம் வரை போக நேர்ந்ததால், கிஷ், ரஷ், தஷ் ஆகிய மூவரும் கல்லூரியிலிருந்து சஸ்பெண்ட் செய்யப்படுகிறார்கள்.

தாங்கள் சஸ்பெண்ட் செய்யப்பட்ட விஷயம் தங்கள் பெற்றோர்களுக்குத் தெரிந்தால் பெரிய பிரச்சனையாகி விடும் என்று பயப்படும் இந்த மூவரும், வீட்டுக்குப் போகாமல், பத்மநாபன் (குரைஷி) என்ற ’ரோபோ’ விஞ்ஞானியின் விசித்திரமான ‘பிளாக் ஹோல்’ என்ற அறிவியல் ஆராய்ச்சிக் கூடத்துக்குப்போய் தங்குகிறார்கள். உள்ளே சென்ற பிறகு தான், விஞ்ஞானி அனுமதிக்காமல் இனி வெளியே செல்ல முடியாது என்பதை தெரிந்துகொள்கிறார்கள்.

இந்நிலையில், அங்கிருக்கும் ’பறக்கும் தட்டு’ போன்ற டிரோன் காமிராவை கிஷ் விளையாட்டாக இயக்கும்போது, பக்கத்து மாளிகையில் அழகிய தேவதை போன்ற பிரக்ருதி (சித்தி இத்னானி) என்ற இளம்பெண் இருப்பதைப் பார்க்கிறார். பிரக்ருதியைப் பார்த்த மாத்திரத்தில் அவர் மீது காதலும் கொள்கிறார்.

இதனையடுத்து, கிஷ் பக்கத்து மாளிகைக்குள் நுழைந்து, பிரக்ருதியை சந்தித்து, தன் காதலை புரப்போஸ் செய்கிறார். ஆனால், அவரது காதலை முதலில் ஏற்க மறுக்கிறார் பிரக்ருதி. “எல்லா ஆண்களையும் போல நீயும் என் புற அழகில் மயங்கி இப்போது காதலிக்கிறாய். ஆனால், வயதாகி முடி நரைத்து, தோல் சுருங்கி, நான் முதுமையான தோற்றத்தை அடையும்போது நீ என்னை காதலிக்க மாட்டாய்” என்கிறார். ஆனால் காதல் மயக்கத்திலிருக்கும் கிஷ் கெஞ்சுகிறார். “நான் இப்போது போலவே எப்போதும் உன்னிடம் காதலுடன் இருப்பேன்” என்று உறுதி அளிக்கிறார். இதைக் கேட்டு பிரக்ருதியின் மனம் இளகுகிறது.

இச்சூழலில், அதே மாளிகையில் பிரக்ருதியுடன் வசிக்கும் சூனியக்கார பாட்டி (தேவதர்ஷினி) இவர்களது காதலுக்கு கடும் எதிர்ப்புத் தெரிவிக்கிறார். தனது மந்திரசக்தியால் கிஷ்ஷை சிறைப்படுத்துகிறார்.

இதனிடையே, கிஷ்ஷை தேடிக்கொண்டு அந்த சூனியக்கார பாட்டியின் மர்ம மாளிகைக்குள் வரும் நண்பர் தஷ்ஷும் உள்ளே மாட்டிக்கொண்டு, படாத பாடு படுகிறார்.

கிஷ், தஷ் ஆகிய இரு நண்பர்களும் மாயமானதால் கலக்கமடையும் அவர்களது சினேகிதி ரஷ் என்ற கருப்பட்டி, அவர்களைக் கண்டுபிடிக்க போலீசின் உதவியை நாடுகிறார். ‘டான்சிங் சைக்கோ’ என்ற மர்ம மனிதன் உலவுவதாக புகார் வந்ததையடுத்து அவனைத் தேடுவதில் தீவிரமாக இருக்கும் போலீஸ் இன்ஸ்பெக்டர் கூமாப்பட்டி மாதவன் (சினிமாவாலா சதீஷ்), ரஷ்ஷின் நண்பர்களைக் கண்டுபிடிப்பதற்காக ரஷ்ஷோடு சேர்ந்து சூனியக்கார பாட்டியின் மர்ம மாளிகைக்குள் செல்கிறார். திருமணமாகாத அவருக்கும் அழகிய பிரக்ருதியைக் கண்டதும் காதல் வருகிறது. ஆனால் எந்தப் பெண்ணிடம் காதலைச் சொன்னாலும் உடனே அந்த பெண் இறந்துவிடுவார் என்ற கொடிய சாபத்தை சுமந்துகொண்டிருக்கும் இன்ஸ்பெக்டர் கூமாப்பட்டி மாதவன், எப்படியாவது பிரக்ருதியை திருமணம் செய்துகொள்ள வேண்டும் என்று துடியாய் துடிக்கிறார்.

அதன்பிறகு என்னவெல்லாம் நடந்தன? சூனியக்கார பாட்டியின் மர்ம மாளிகைக்குள் மாட்டிக்கொண்ட கிஷ், அவரது நண்பர்கள், மற்றும் இன்ஸ்பெக்டர் ஆகியோர் அனைவரும் இறுதியில் அங்கிருந்து உயிருடன் மீண்டார்களா, இல்லையா? அந்த மாளிகைக்குள் வசிக்கும் பிரக்ருதியும், சூனியக்கார பாட்டியும் என்ன ஆனார்கள்? என்பன போன்ற கேள்விகளுக்கு யூகிக்கவே முடியாத எதிர்பாராத திருப்பங்களுடன் சுவாரஸ்யமாக, விறுவிறுப்பாக விடை அளிக்கிறது ஃபேண்டஸி திகில் நகைச்சுவை திரைப்படமான ‘டிரோன்ஸ்’ படத்தின் மீதிக்கதை.

கதையின் முதன்மை நாயகியாக, சூன்யக்கார பாட்டியின் மர்ம மாளிகையில் வசிக்கும் அழகிய பிரக்ருதியாக சித்தி இத்னானி நடித்திருக்கிறார். கதாபாத்திர வடிவமைப்புக்குப் பொருத்தமாக வட்ட முகத்தையும், சிரிக்கும்போது குழி விழும் கன்னங்களையும் இயற்கையாகவே பெற்றிருப்பது இவருக்கு பெரிய பலம். காதலிக்கத் தூண்டும் அழகைப் பெற்றிருப்பதோடு, பார்வையாளர்களின் இதயங்களில் இடம் பிடிக்கும் வண்ணம் சிறப்பாக நடிக்கவும் செய்திருக்கிறார். அழகு தேவதையாக வரும் அவர் திடீரென்று வேறொரு தோற்றத்தில் வந்து பயங்கரமாக மிரட்டியிருப்பது, எவரும் எதிர்பாராத, அதிர்ச்சியூட்டும் சர்ப்ரைஸ்!

கதையின் இரண்டாவது நாயகியாக, கல்லூரி மாணவி ராஷ்மிகா என்ற ரஷ்ஷாக அஞ்சலி நாயர் நடித்திருக்கிறார். சிவப்பு / வெளுப்பு நிறம் இல்லாமல் மாநிறம் கொண்டவர்; அதனால் நண்பர்களால் நக்கலாக ‘கருப்பட்டி’ என்று அழைக்கப்படுபவர் என்ற கதாபாத்திர வடிவமைப்புக்குப் பொருத்தமாக வரும் இவர், கதை வெளிப்படுத்த விரும்பும் அழுத்தமான ‘ நிறப் பாகுபாட்டு அரசியலை’ பிரதிபலித்திருக்கிறார். வெளியில் நட்புடனும், உள்ளுக்குள் காதலுடனும் நண்பர் கிஷ்ஷுடன் பழகும் இவரது காதல் டிராக், தனுஷ் – நித்யா மேனன் நடித்த ‘திருச்சிற்றம்பலம்’ படத்தை நினைவூட்டினாலும், தனது தனித்துவமான நடிப்பை வெளிப்படுத்தி ஸ்கோர் செய்திருக்கிறார்.

கதையின் நாயகனாக, கல்லூரி மாணவர் கிஷோர் என்ற கிஷ்ஷாக டிராவிட் செல்வம் நடித்திருக்கிறார். சுதாகர் – கோபியின் ‘பரிதாபங்கள்’ என்ற யூடியூப் சேனலின் நையாண்டி எபிசோடுகளிலும், ஒரு முக்கிய கதாபாத்திரத்தில் ‘இதயம் முரளி’ திரைப்படத்திலும் நடித்து ஏற்கெனவே பிரபலமாக இருக்கும் இவர், இந்த படத்தில் ஹீரோவாக அறிமுகமாகும் நல்வாய்ப்பை பயன்படுத்தி, காமெடியோடு நடிப்பு, நடனம் என எல்லா அம்சங்களையும் வெளிப்படுத்தி, குறையில்லாமல் நிறைவாக நடித்து தன்னை நிலை நிறுத்திக் கொண்டுள்ளார்.

கல்லூரி மாணவர் தஷ்ஷாக ஆர்ஜே தீபக் நடித்திருக்கிறார். நண்பர் கிஷ்ஷை தேடிப் போய், சூனியக்கார பாட்டியின் மர்ம மாளிகைக்குள் சிக்கிச் சீரழிந்து நம்மை நன்றாகவே சிரிக்க வைத்திருக்கிறார்.

சூனியக்கார பாட்டியாக தேவதர்ஷினி நடித்திருக்கிறார். நரைத்த தலையும், சுருங்கிய தோலுமாய் வயோதிக தோற்றத்தில் வந்து நாயகன் – நாயகி காதலுக்கு எதிராக வில்லத்தனத்தில் மிரட்டுவது, அதே நேரத்தில் நாயகன் மீது ஒருதலையாய் காதல் கொண்டு உள்ளுக்குள் கரைந்து உருகுவது, கடந்த ஆறாயிரம் ஆண்டுகளில் எந்த ஆணும் தன்னை உண்மையாகக் காதலிக்கவில்லை என்று கிளைமாக்ஸில் மனம் நொந்து அழுது கண்ணீர் சிந்துவது என தனது நடிப்புத் திறமைகள் மொத்தத்தையும் இப்படத்தில் வெளிப்படுத்தி பிரகாசித்திருக்கிறார் தேவதர்ஷினி.

முதலில் ‘டான்சிங் சைக்கோ’வைத் தேடுபவராகவும், பின்னர் கிளைமாக்ஸில் புதிய திருப்பத்தை ஏற்படுத்தி கதையை முடித்து வைப்பவராகவும் போலீஸ் இன்ஸ்பெக்டர் கூமாப்பட்டி மாதவன் என்ற கதாபாத்திரத்தில் வரும் சினிமாவாலா சதீஷ், அவருடன் பயணிக்கும் ‘துப்பறிவாளர்’ செர்லாக்காக வரும் சசி செல்வராஜ், விஞ்ஞானி ‘பிளாக் ஹோல்’ பத்மநாபனாக வரும் குரைஷி ஆகியோர் தத்தமது கதாபாத்திரத்துக்கு சிறப்பான பங்களிப்பை வழங்கியிருக்கிறார்கள்.

‘பன் பட்டர் ஜாம்’ என்ற படத்தை இயக்கி ஏற்கெனவே கவனம் ஈர்த்துள்ள இயக்குநர் ஆர்.ராகவ் மிர்தாத் இந்த ‘டிரோன்ஸ்’ திரைப்படத்தை எழுதி இயக்கியிருக்கிறார். புத்தம் புதிதாக சிந்தித்து, ‘காமிக்ஸ்’ பாணியில் ஃபேண்டஸி, திகில், நகைச்சுவை ஆகியவற்றை திறம்பட உள்ளடக்கி நேர்த்தியாக திரைக்கதை அமைத்து, பொருத்தமான நடிப்புக் கலைஞர்களைத் தேர்வு செய்து, அவர்களிடமிருந்து சிறப்பான நடிப்பை வாங்கி, சிறுவர் –சிறுமிகள் மட்டுமல்ல, பெரியவர்களும் பார்த்து ரசிக்கக் கூடிய விதத்தில் சுவாரஸ்யமாகவும் விறுவிறுப்பாகவும் இப்படத்தை நகர்த்திச் செல்வதில் வெற்றி பெற்றுள்ளார் இயக்குநர். ‘வெளுப்பு – கருப்பு’ என்ற நிறப் பாகுபாட்டு அரசியலை நாசூக்காக உள்ளே புகுத்தி, தன் சார்புநிலையை ஓங்கி ஒலித்ததற்காக இயக்குநருக்கு நமது பாராட்டுகள்.

எஸ்.ஆர்.ஹரியின் இசை, ஜெயந்த் சேது மாதவனின் ஒளிப்பதிவு, சதீஷ் சூர்யாவின் படத்தொகுப்பு, பாபி ஆண்டனியின் நடன அமைப்பு, பிசி ஸ்டண்ட்ஸின் ஸ்டண்ட் அமைப்பு, ஆர்.கிஷோரின் கலை இயக்கம் உள்ளிட்ட தரமான தொழில்நுட்பங்கள் இப்படத்தின் வெற்றிக்கு உறுதுணையாக இருந்துள்ளன.

’டிரோன்ஸ்’ – 13 வயதுக்கு மேற்பட்ட அனைத்துத் தரப்பினரும் கண்டு களிக்கத் தக்க சிறந்த பொழுதுபோக்குத் திரைப்படம்!

ரேட்டிங்: 4/5.