ஜெயிலர் 2 – விமர்சனம்

நடிப்பு: ரஜினிகாந்த், எஸ்.ஜே.சூர்யா, மிதுன் சக்ரபோர்த்தி, சூரஜ் வெஞ்சரமூடு, வித்யா பாலன், ரம்யா கிருஷ்ணன், யோகி பாபு, மிர்னா, மாஸ்டர் ரித்விக், ஜதின் சர்னா, நமோ நாராயணா, பிஜோர்ன் சுர்ராவ், அன்னா ராஜன், பி.எல்.தேனப்பன், ஜாபர் சாதிக், பதம் குமார், அபேக்‌ஷா போர்வால், தமிழ், சரவணவேல், பகவதி பெருமாள், கோட்டயம் நசீர், சுனில் சுகதா, சுகித் சங்கர், ஹக்கிம் ஷாஜஹான், வினீத் தட்டில் டேவிட், ராமச்சந்திரன் துரைராஜ், மற்றும் சிறப்புத் தோற்றத்தில் மோகன்லால், சிவராஜ்குமார், ஜாக்கி ஷெராஃப், பூர்ணா, ராஜேஷ் மாதவன், நோரா ஃபதேஹி

கதை, திரைக்கதை, இயக்கம்: நெல்சன்

ஒளிப்பதிவு: விஜய் கார்த்திக் கண்ணன்

படத்தொகுப்பு: ஆர்.நிர்மல்

இசை: அனிருத்

கலை இயக்கம்: டி.ஆர்.கே.கிரண்

சண்டை பயிற்சி: சேத்தன் டி’சோசா

தயாரிப்பு: ‘சன் பிக்சர்ஸ்’ கலாநிதி மாறன்

பத்திரிகை தொடர்பு: ரியாஸ் கே அஹ்மத், பாரஸ் ரியாஸ்

கடந்த 2023ஆம் ஆண்டு சூப்பர் ஸ்டார் ரஜினிகாந்த் – இயக்குநர் நெல்சன் – இசையமைப்பாளர் அனிருத் – தயாரிப்பாளர் ‘சன் பிக்சர்ஸ்’ கலாநிதி மாறன் கூட்டணியில் வெளியாகி மாபெரும் வெற்றி பெற்ற திரைப்படம் ‘ஜெயிலர்’. பணி ஓய்வு பெற்ற ஜெயிலர் ‘டைகர்’ முத்துவேல் பாண்டியன் (ரஜினிகாந்த்), சிலை கடத்தல்காரன் வர்மனையும் (விநாயகன்), அவனுக்கு உடந்தையாக இருந்த போலீஸ் அதிகாரியும் தன் ஒரே மகனுமான அர்ஜுன் பாண்டியனையும் (வசந்த் ரவி) தீர்த்துக் கட்டுவதோடு மேற்கண்ட ‘ஜெயிலர்’ திரைப்படம் முடிவடைந்தது. அந்த படத்தின் மகத்தான வெற்றி தந்த ஊக்கத்தில், அதே கூட்டணி, அதே கதையின் தொடர்ச்சியாக ‘ஜெயிலர் 2’ திரைப்படத்தை உருவாக்கி வெளியிட்டுள்ளது. தற்போது உலகெங்கும் வெளியாகியிருக்கும் இத்திரைப்படம் முதல் பாகம் அளவுக்கு மிகப் பெரிய வெற்றியை அடையுமா? அல்லது அதையும் தாண்டி பிரமாண்ட வெற்றியை சாதிக்குமா? பார்ப்போம்…

முதல் பாகத்தின் இறுதியில் சிலை கடத்தல்காரன் வர்மனையும், அவனுக்கு உடந்தையாக இருந்த தன் மகன் அர்ஜுன் பாண்டியனையும் அழித்தொழித்த ரிட்டயர்டு ஜெயிலர் ‘டைகர்’ முத்துவேல் பாண்டியன், மலையோர சிறுநகரத்தில் உள்ள சூப்பர் மார்க்கெட்டில் சூப்பர்வைசராக வேலை பார்த்துக்கொண்டு, தன் மனைவி விஜி பாண்டியன் (ரம்யா கிருஷ்ணன்), மருமகள் ஸ்வேதா பாண்டியன் (மிர்னா), பேரன் ரித்து பாண்டியன் (மாஸ்டர் ரித்விக்) ஆகியோருடன் அமைதியான வாழ்க்கை வாழ்ந்து வருகிறார். அவர் வீட்டுக் குழாயில் குடிநீர் அழுக்காக வருவது தொடர்பான பிரச்சனையில் அவருக்கும் உள்ளாட்சி அமைப்பு அதிகாரிக்கும் (பகவதி பெருமாள்) இடையில் ஏற்படும் சிறு மோதல், அவரை பழக்கடை மூர்த்தியிடம் ( நமோ நாராயணா) கார் டிரைவராக வேலை பார்க்கும் அளவுக்குக் கொண்டுபோய் விடுகிறது.

மறுபுறம், முதல் பாகத்தில் கொல்லப்பட்ட சிலை கடத்தல்காரன் வர்மனின் மரணத்துக்குக் காரணமான நபரை கண்டுபிடித்து பழி வாங்குவதற்காக, வர்மனின் கூட்டாளி திலீப்பும் (சுராஜ் வெஞ்சரமூடு), அவர்களது ’பாஸ்’ போதி கல்பக்கும் (எஸ்.ஜே.சூர்யா) வெறிகொண்டு தேடி அலைகின்றனர்.

அதே நேரத்தில் சிலை கடத்தல் கும்பல் நெட்வொர்க்கையும், அதன் ’பாஸை’யும் கண்டுபிடித்து, முழுமையாக அழிக்க வேண்டும் என்ற முனைப்பில் தீவிரமாக இருக்கிறார் முத்துவேல் பாண்டியன். அவர் டிரைவராக வேலை பார்க்கும் பழக்கடை மூர்த்தி வழியே வர்மனின் கூட்டாளி திலீப்பை நெருங்குகிறார். திலீப் மூலம் கோவாவில் இருக்கும் சிலை கடத்தல் கும்பலின் ’பாஸ்’ போதி கல்பக்கையும், அவரது சகோதரி காந்தா கல்பக்கையும் (வித்யா பாலன்), இவர்களது தந்தை சாக்ரி கல்பக்கையும் (மிதுன் சக்ரபோர்த்தி) நெருங்குகிறார்.

அதன்பிறகு என்ன நடந்தது? முத்துவேல் பாண்டியன் எப்படி ‘பாஸ்’ போதி கல்பக்கை அழித்தார்? முதல் பாகத்தில் அவரது மகன் அர்ஜுன் பாண்டியனை அவரே கொன்ற விவரம் அவரது குடும்பத்தினருக்கு எப்படி தெரிய வருகிறது? விளைவு என்ன? முத்துவேல் பாண்டியன் சட்டத்தின் முன் நிறுத்தப்பட்டாரா? என்பன போன்ற கேள்விகளுக்கு அனல் பறக்கும் அதிரடி ஆக்‌ஷன் காட்சிகளோடும், உள்ளத்தை நெகிழ வைக்கும் எமோஷனல் காட்சிகளோடும் விடை அளிக்கிறது ‘ஜெயிலர் 2’ திரைப்படத்தின் மீதிக்கதை.

’ஜெயிலர் முதல் பாகம்’ போலவே இதிலும் நாயகனாக, ஓய்வு பெற்ற ஜெயிலர் ‘டைகர்’ முத்துவேல் பாண்டியனாக ரஜினிகாந்த் நடித்திருக்கிறார். 75 வயதிலும் கம்பீரமான ஸ்டைல், அதே மிடுக்கு, கடைக்கண் பார்வை மூலமாகவே அரங்கை அதிர வைக்கும் மாயாஜாலம், இருந்த இடத்தில் இருந்துகொண்டே தூள் பரத்தும் ஆக்‌ஷன், யோகி பாபு, நமோ நாராயணா ஆகியோருடன் சேர்ந்து கலகலப்பூட்டும் காமெடி என படம் முழுக்க ரஜினிகாந்த் தெறிக்க விட்டிருக்கிறார். ரசிக்க வைத்திருக்கிறார். கிளைமாக்ஸில், “அம்பது வருஷமா நிறைய பேர் நிறைய விதமா என்னை முடிக்கணும்னு எவ்வளவோ ட்ரை பண்ணாங்க. ஆனா…” என்று சொல்லிவிட்டு, சுருட்டை எடுத்து முகர்ந்து பார்த்தபின் அதை பற்ற வைப்பாரே… அர்த்தம் பொதிந்த அந்த ஒரு காட்சி அப்ளாஸை அள்ளுகிறது. அன்றும் இன்றும் என்றும் தான் தான் சூப்பர் ஸ்டார் என்பதை இந்தப் படத்திலும் அவர் நிரூபித்திருக்கிறார்.

பிரதான வில்லனாக படத்தின் முதல் பாதியில் திலீப் என்ற கதாபாத்திரத்தில் சுராஜ் வெஞ்சரமூடுவும், இரண்டாம் பாதியில் போதி கல்பக் என்ற கதாபாத்திரத்தில் எஸ்.ஜே.சூர்யாவும் வருகிறார்கள். சுராஜ் வெஞ்சரமூடு வில்லத்தனத்தோடு காமெடி கலகலப்பையும் சேர்த்து வழங்க, எஸ்.ஜே.சூர்யா ஸ்டைலிஷ்ஷான வில்லனாக சுவாரஸ்யம் சேர்த்திருக்கிறார்.

எந்நேரமும் சிகரெட் புகையும் வாயுமாக காந்தா கல்பக் என்ற கதாபாத்திரத்தில் வரும் வித்யா பாலனும், சக்கர நாற்காலியில் அமர்ந்தபடியே இருக்கும் சாக்ரி கல்பக் என்ற கதாபாத்திரத்தில் வரும் மிதுன் சக்ரபோர்த்தியும் தங்கள் பங்குக்கு வில்லத்தனத்தில் மிரட்டியிருக்கிறார்கள்.

பெரிய பிஸ்தா போல் சும்மா உதார் விடும் பழக்கடை மூர்த்தியாக நமோ நாராயணா வருகிறார். அவர் வாழ்நாள் முழுவதும் சொல்லிக் கொள்ளத்தக்க அருமையான வேடம் அது. மனுஷன் பின்னி எடுத்திருக்கிறார். நாயகனை சாமானியனாக நினைத்து முதலில் அலட்சியம் காட்டுவதும், பின்னர் உண்மை தெரிந்து பல்டி அடித்து பம்முவதுமாக அதகளப்படுத்தியிருக்கிறார்.

விமல் என்ற கதாபாத்திரத்தில் வரும் யோகி பாபுவும் சிரிக்க வைக்கிறார்.

முதல் பாகத்தைப் போலவே இதிலும் ரஜினியின் மனைவி விஜி பாண்டியனாக வரும் ரம்யா கிருஷ்ணன், மருமகள் ஸ்வேதா பாண்டியனாக வரும் மிர்னா, பேரன் ரித்து பாண்டியனாக வரும் மாஸ்டர் ரித்விக் ஆகியோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

கேமியோ ஸ்டார்களாக சிவராஜ்குமார், மோகன்லால், ஜாக்கி ஷெராஃப் ஆகியோர் முதல் பாகத்தின் நீட்சியாகவே வந்து ஆக்‌ஷன் காட்சிகளுக்கு பலம் சேர்த்திருக்கிறார்கள். இதில் கூடுதலாக ஹ்ரித்திக் ரோஷனும் கேமியோ ஸ்டாராக வந்து சர்ப்ரைஸ் கொடுத்திருக்கிறார்.

பின்னொரு நாள் எடுக்கப்படலாம் என எதிர்பார்க்கப்படும் ‘ஜெயிலர் 3’ படத்துக்கான ’லீடாக’ விஜய் சேதுபதி வந்து ரஜினியை காரில் அழைத்துச் செல்லும் காட்சியுடன் இந்த இரண்டாம் பாகம் முடிவது ரசிகர்களை பரவசத்திலும், பரபரப்பிலும் ஆழ்த்தியிருக்கிறது.

முதல் பாகத்தைப் போலவே இந்த இரண்டாம் பாகத்தையும் எழுதி இயக்கியிருக்கிறார் இயக்குநர் நெல்சன். ஒருபுறம், ரஜினி ரசிகர்கள் எதையெல்லாம் எதிர்பார்ப்பார்கள் என்பதையும், மறுபுறம் ரஜினியால் என்னவெல்லாம் செய்ய முடியும் என்பதையும் மிகவும் துல்லியமாக புரிந்துகொண்டு, அவற்றிற்கு ஏற்றாற்போல் தன் டிரேட் மார்க் ‘பிளாக் காமெடியை’ உள்ளே புகுத்தி, மாஸான பொழுதுபோக்கு வெற்றிப்படம் கொடுக்கும் வித்தை கைவரப் பெற்றவர் நெல்சன் என்பதை மீண்டும் நிரூபித்திருக்கிறார். முதல் பாதியை ஜாலியாகவும், காமெடியாகவும், இரண்டாம் பாதியை சீரியஸாகவும், எமோஷனலாகவும் கட்டமைத்திருப்பது சிறப்பு. ரஜினி ரசிகர்கள் மட்டுமல்ல, பொதுவான பார்வையாளர்களும் ரசிக்கும்படி இப்படத்தை எடுத்திருப்பதன் மூலம் ரஜினி – நெல்சன் – அனிருத் கூட்டணியில் எதிர்காலத்தில் இன்னும் பல படங்கள் கூட எடுக்கப்படலாம் என்ற நம்பிக்கையை ஏற்படுத்தியிருக்கிறார் இயக்குநர். பாராட்டுகள் நெல்சன்!

இப்படத்தை மேலும் மெருகூட்டும் இசையமைப்பாளர் அனிருத்தின் உயிரோட்டமுள்ள இசை, ஒளிப்பதிவாளர் விஜய் கார்த்திக் கண்ணனின் நேர்த்தியான ஒளிப்பதிவு, படத்தொகுப்பாளர் ஆர்.நிர்மலின் ஷார்ப் கட்டிங், மற்றும் டி.ஆர்.கிரணின் கலை இயக்கம், சேத்தன் டி’சோசாவின் ஸ்டண்ட் வடிவமைப்பு உள்ளிட்ட தரமான தொழில்நுட்பங்கள் இப்படத்தின் வெற்றிக்கு உறுதுணையாக இருந்துள்ளன.

பூர்ணா வரும் பாடலின் நடனமும், நோரா ஃபதேஹி வரும் பாடலின் நடனமும் முன்வரிசை ரசிகர்களை குஷிப்படுத்தி குதூகலிக்கச் செய்கின்றன.

ஜெயிலர் 2 – சாதனை நிகழ்த்தும் பிரமாண்ட வெற்றிப்படம்! அனைவருக்கும் பிடிக்கக்கூடிய சிறந்த பொழுதுபோக்குத் திரைப்படம்! மிஸ் பண்ணிடாதீங்க!

ரேட்டிங்: 4/5