பிரபல திரைப்பட இசையமைப்பாளர் தேவா காலமானார்

‘தேனிசைத் தென்றல்’ என்று அன்புடன் அழைக்கப்படும் பிரபல திரைப்பட இசையமைப்பாளர் தேவா இன்று (17-10-2026) சென்னையில் காலமானார். அவருக்கு வயது 76.

தேவாவின் இறப்பு குறித்து தனியார் மருத்துவமனையின் மருத்துவர்கள் செய்தியாளர்கள் மத்தியில் விளக்கியபோது,, “அவர் அழைத்து வரப்பட்டபோதே மயக்க நிலையில்தான் அழைத்து வரப்பட்டார். அவருக்கு நாடித் துடிப்போ, இதயத் துடிப்போ எதுவுமே இல்லை. வரும்போதே மயக்க நிலையில் தான் அழைத்து வரப்பட்டார். வீட்டில் முதலுதவி வழங்கியுள்ளார்கள்” என்று தெரிவித்தார்கள்.

மேலும், “மருத்துவமனைக்கு அழைத்து வந்த பிறகு உடனடியாக வென்டிலேட்டர், சிபிஆர் உள்பட கொடுக்க வேண்டிய சிகிச்சைகளை வழங்கினோம். சர்வதேச தரத்திலான முதலுதவிகளை வழங்கினோம். ஆனால் அவரது உடல் ஒத்துழைக்கவில்லை. சுமார் ஒன்றரை மணிநேரம் வரை முயன்றோம். பலதுறை மருத்துவர்கள் இணைந்து சிகிச்சை அளித்தார்கள். எவ்வளவு முயன்றும் இதயத் துடிப்பை மீட்டு உயிர்ப்பிக்க முடியவில்லை” என்று தெரிவித்தனர்.

அண்ணாமலை, பாட்ஷா உள்பட சுமார் 400க்கும் மேற்பட்ட படங்களுக்கு இசையமைத்து, தமிழ் திரையுலகில் தனக்கென்று தனித்த இடம் பிடித்த இசையமைப்பாளர் தேவா.

கடந்த 1989ஆம் ஆண்டு ‘மனசுக்கேத்த மகாராசா’ படத்தின் மூலம் வெளிச்சம் பெற்ற தேவா, பல்வேறு மொழிப் படங்களுக்கு இசையமைத்துள்ளார்.

கடந்த 90களில் இளையராஜா ஒருபுறம், ஏ.ஆர் ரஹ்மான் மறுபுறம் ஆதிக்கம் செலுத்தி வந்த காலகட்டத்தில் தேவாவின் பாடல்களுக்குத் தனித்த ரசிகர் பட்டாளம் இருந்தது. 2022ஆம் ஆண்டு ‘தேவா தேவாதான்’ இசை நிகழ்ச்சியில் பேசிய நடிகர் ரஜினிகாந்த் இதை சிலாகித்துப் பேசியிருப்பார்.

கானா பாடல்களை திரையுலகில் மைய நீரோட்டப்படுத்தியதில் தேவா முக்கியமானவராக அறியப்படுகிறார். தன்னை கானா பாடல்களோடு முத்திரை குத்துவது பற்றி தேவா பல இடங்களில் பேசியிருந்தாலும் அது தனக்கு மகிழ்ச்சி தருவதாகவும் குறிப்பிட்டுள்ளார்.

தேவாவுக்கு விஜயா என்ற மனைவியும், ஸ்ரீகாந்த் தேவா என்ற மகனும், சங்கீதா, பிரதா என்ற மகள்களும் இருக்கிறார்கள்.

இரங்கல்

இசையமைப்பாளர் தேவாவின் மறைவுக்கு திரைப் பிரபலங்களும் அரசியல் தலைவர்களும் இரங்கல் தெரிவித்து வருகின்றனர்.

தமிழ்நாடு முதலமைச்சர் ச. ஜோசப் விஜய் வெளியிட்ட இரங்கல் பதிவில், “தமிழ், தெலுங்கு, மலையாளம், கன்னடம் ஆகிய மொழிகளில் 400க்கும் மேற்பட்ட திரைப்படங்களுக்கு இசையமைத்ததோடு, பல கானா பாடல்களை எழுதி, அவரே பாடியும் உள்ளார். கலைமாமணி உள்ளிட்ட பல்வேறு விருதுகளைப் பெற்ற தேவா அவர்களின் இசைப் பயணமும், பாடல்களும் திரையிசை வரலாற்றில் என்றும் நிலைத்திருக்கும். அவரது மறைவு தமிழ்த் திரையுலகிற்கு பேரிழப்பாகும்” என்று கூறியுள்ளார்.

திமுக தலைவர் மு.க.ஸ்டாலின் தனது இரங்கல் பதிவில், “தமிழ் வெகுசன இசை வரலாற்றை தேவா அவர்களை விடுத்துவிட்டு எவராலும் எழுத முடியாது. பல அத்தியாயங்களை அவருக்கென ஒதுக்கியாக வேண்டும். பொறாமை, வஞ்சகம், சூது வாது ஏதுமறியாத வெள்ளை மனம் கொண்டவர் தேவா. கானா வகைமைப் பாடல்களைத் திரையிசையில் பெரிய அளவில் புகுத்தி, கானா என்றாலே தேவாதான் என அறியப்பட்டவர்” எனத் தெரிவித்துள்ளார்.

“எளிமையான கிராமத்துப் பின்னணியில் இருந்து சென்னைக்கு வந்து, தென்னிந்திய திரையுலகின் முன்னணி இசையமைப்பாளராக உயர்ந்து எத்தனையோ பேருக்கு ஆதர்சமாகத் திகழ்ந்தவர்” எனப் பாராட்டிய மு.க.ஸ்டாலின், “உச்ச நட்சத்திரங்கள் அனைவரது படங்களுக்கும் இசையமைத்து, அவற்றின் வெற்றிக்கு உறுதுணையாக இருந்தவர்” என்று கூறியுள்ளார்.

நடிகர் ரஜினிகாந்த் தனது இரங்கல் செய்தியில், “என் அருமை நண்பர், தேவாவின் திடீர் மறைவு அதிர்ச்சியும் வேதனையும் அளிக்கிறது. அவர் என்னுடைய ‘அண்ணாமலை’, ‘பாட்ஷா’, ‘அருணாச்சலம்’ படங்களுக்கு இசை அமைச்சிருக்கார். கள்ளம் கபடம், பொய், வஞ்சகம் இல்லாத ஒரு சொக்கத் தங்கம்.

இரண்டரை வருஷம் முன்னால ‘எல்லோரும் இசை நிகழ்ச்சி பண்றாங்க, நானும் பண்ணப் போறேன், நீங்கதான் தொடங்கி வைக்கணும்’னு சொன்னார். சந்தோஷமாக நான் கலந்து கொண்டேன். அது மிகப்பெரிய வெற்றி. வெளிநாடுகளுக்கு போய் சுற்றுப் பயணம் செய்து விட்டு என்னைச் சந்தித்தார்.
‘எனக்கே ஆச்சரியமா இருக்கு. இளைஞர்கள் பாடலை நல்லா வரவேற்கிறாங்க. இதே சந்தோஷத்துல இன்னும் 10, 15 வருஷம் வாழ்ந்துட்டு போயிருவேன்’னு சொன்னார். ஆண்டவன், ‘நீ ரொம்ப நல்லவம்பா. சந்தோஷமா இருக்கும்போதே வந்துடு’ன்னு கூட்டிட்டு போயிட்டான் போலிருக்கு. அவர் குடும்பத்துக்கு என் ஆழ்ந்த அனுதாபங்கள்’ என்று கூறியுள்ளார்.

நடிகர் விஜய் சேதுபதி, “தமிழ் திரையுலகின் இசை உலகில் தனக்கென ஒரு முத்திரை பதித்த இசையமைப்பாளர் தேவாவின் மறைவு மிகுந்த வேதனை அளிக்கிறது. அவரது இசையும், பாடல்களும் என்றும் நம் நினைவுகளில் வாழும்” என்று பதிவிட்டு இரங்கல் தெரிவித்துள்ளார்.

அரசு மரியாதை

இசை அமைப்பாளர் தேவா, இசை உலகுக்கு ஆற்றிய சேவையைக் கவுரவிக்கும் வகையில் அரசு மரியாதையுடன் அவருக்கு இறுதி மரியாதை வழங்கப்படும் என தமிழ்நாடு அரசு அறிவித்துள்ளது.