பெரிதும் எதிர்பார்க்கப்படும் சூர்யாவின் ‘விஸ்வநாத் & சன்ஸ்’ திரைப்படத்துக்கான முன்பதிவு விறுவிறுப்பாக தொடங்கியது!

சூர்யா நடிப்பில் வெளியாகி, மாபெரும் வெற்றி பெற்ற ‘கருப்பு’ திரைப்படத்தைத் தொடர்ந்து, அவரது ‘விஸ்வநாத் & சன்ஸ்’ திரைப்படம், மிகுந்த எதிர்பார்ப்புகளுக்கிடையே வருகிற (ஆகஸ்டு) 14ஆம் தேதி உலகெங்கும் திரையரங்குகளில் வெளியாகிறது. இதனை முன்னிட்டு இப்படத்துக்கான முன்பதிவு இன்று விறுவிறுப்பாகத் தொடங்கியது. சூர்யா ரசிகர்கள் உற்சாகமாக முன்பதிவு செய்து வருகிறார்கள்.

சித்தாரா என்டர்டெயின்மென்ட்ஸ் மற்றும் ஃபார்ச்சூன் ஃபோர் சினிமாஸ் ஆகிய நிறுவனங்கள் இணைந்து, பெரும் பொருட்செலவில் பிரமாண்டமாக தயாரித்துள்ள திரைப்படம் ‘விஸ்வநாத் & சன்ஸ்’. சஞ்சய் விஸ்வநாத் என்ற பிரபல சர்வதேச துப்பாக்கி சுடும் வீரரின் வாழ்க்கைக் கதையைத் தழுவி எடுக்கப்படும் இப்படத்தை ‘வாத்தி’, ‘லக்கி பாஸ்கர்’ போன்ற வெற்றிப்படங்களை இயக்கிய வெங்கி அட்லூரி இயக்கியுள்ளார்.

சஞ்சய் விஸ்வநாத் என்ற சாதனை வீரர் கதாபாத்திரத்தில் சூர்யா நடிக்க, அவரை காதலிக்கும் மேடி என்ற இளம்பெண்ணாக மமிதா பைஜு நடித்திருக்கிறார். இவர்களுடன் ராதிகா சரத்குமார், யோகி பாபு, ரவீனா டாண்டன், நாசர், காளி வெங்கட், ஜார்ஜ் மரியான், பவானிஸ்ரீ உள்ளிட்டோர் முக்கிய கதாபாத்திரங்களில் நடித்திருக்கிறார்கள்.

நிமிஷ் ரவி ஒளிப்பதிவு செய்ய, நவீன் நூலி படத்தொகுப்பு செய்கிறார். ஜி.வி.பிரகாஷ் இசையமைப்பில் பாடல்கள் உருவாகி, வெளியாகி, பட்டிதொட்டி எங்கும் பட்டையைக் கிளப்பிக் கொண்டிருக்கின்றன. அதுபோல், சமீபத்தில் வெளியான இப்படத்தின் டிரெய்லரும் எதிர்பார்ப்பை எகிறச் செய்துள்ளன.

சுதந்திர தினத்தை முன்னிட்டு வருகிற (ஆகஸ்டு) 14ஆம் தேதி திரைக்கு வரும் ‘விஸ்வநாத் & சன்ஸ்’ திரைப்படம், சூர்யாவின் ரசிகர்கள் மட்டுமல்ல, அனைத்துத் தரப்பு குடும்ப ரசிகர்களும் பார்த்து, கொண்டாடி மகிழத்தக்க சிறந்த பொழுதுபோக்குத் திரைப்படமாக இருக்கும் என்று எதிர்பார்க்கப்படுகிறது.