எந்தவொரு உதவியாளரும் இல்லாமல் தனியொரு நபர் உருவாக்கிய சாதனை திரைப்படம் ‘ஒன் மேன்’!

ஒரு திரைப்படத்துக்குத் தேவையான 70-க்கும் மேற்பட்ட துறை சார்ந்த பணிகளை எந்தவித உதவியாளர்களும் இல்லாமல் தொடக்கம் முதல் இறுதிவரை ஒரே ஆளாகச் செய்து ‘ஒன் மேன்’ என்ற படத்தை உருவாக்கி இருக்கிறார் சங்ககிரி ராஜ்குமார். இப்படம் ஆக. 21-ல் திரையரங்குகளில் வெளியாக இருக்கிறது.

இது பற்றி சங்ககிரி ராஜ்குமார் கூறும்போது, “இதில் இடம்பெற்றுள்ள அத்தனை கதாபாத்திரங்களிலும் நானே நடித்திருக்கிறேன். படத்தைப் பார்க்கும்போது ஒவ்வொருவரும் தனித்தனி கதாபாத்திரங்களாகவே தோன்றுவார்கள். இவனிடம் இருந்து அவன் எப்படி தப்பிப்பான், அவனால் இவனுக்கு என்ன பிரச்சினை ஏற்படும் என்பது போன்ற கேள்விகளை எழுப்பும் வகையில் ஒவ்வொரு காட்சியும் அமைந்துள்ளது.

இதில் பரபரப்பான ஹெலிகாப்டர் சேசிங் காட்சி, ரயில் விபத்துக் காட்சி, அமெரிக்காவில் படமாக்கப்பட்ட கார் சேசிங் காட்சி,உள்ளிட்டவை போன்றவை இடம்பெற்றுள்ளன. சிறப்புக் காட்சியில் படத்தைப் பார்த்த திரைத்துறையினர் ஆச்சரியத்துடன் பாராட்டியுள்ளனர்” என்றார்.