லெனின் பாண்டியன் – விமர்சனம்

நடிப்பு: கங்கை அமரன், ரோஜா, தர்ஷன் கணேசன், ஷ்ரித்தா ராவ், ஜார்ஜ் மரியான், ஆடுகளம் நரேன், யுகேந்திரன், போஸ் வெங்கட், சரவண சுப்பையா, சுப்பு பஞ்சு, அர்ச்சனா ரவிச்சந்திரன் மற்றும் சிலர்

எழுத்து & இயக்கம்: டிடி.பாலச்சந்திரன்

ஒளிப்பதிவு: ஏ.எம்.எட்வின் சகாய்

படத்தொகுப்பு: நாகூரான் ராமச்சந்திரன்

இசை: இளையராஜா

பாடல் வரிகள்: கார்த்திக் நேத்தா, இளையராஜா

கலை இயக்கம்: அதூரி ஜெயக்குமார்

ஸ்டண்ட்: தளபதி தினேஷ்

தயாரிப்பு: சத்யஜோதி பிலிம்ஸ்

வழங்குபவர்: டிஜி தியாகராஜன்

தயாரிப்பாளர்: செந்தில் தியாகராஜன், அர்ஜுன் தியாகராஜன்

பத்திரிகை தொடர்பு: சதீஷ் (எய்ம்), சிவா

நேர்மையான போலீஸ் கான்ஸ்டபிள் லெனின். இடதுசாரி சிந்தனை உள்ளவர். ‘போலி என்கவுன்ட்டர்’ போன்ற சட்டத்துக்குப் புறம்பான செயல்களைச் செய்ய மறுப்பவர். அவரது மகன் மாறவர்மன் சுந்தர பாண்டியன் (தர்ஷன் கணேசன்). தந்தையின் பெயரான லெனினையும், மகனது பெயரின் கடைசிப் பகுதியான பாண்டியனையும் இணைத்து, ‘லெனின் பாண்டியன்’ என்று இப்படத்துக்கு பெயர் சூட்டியிருக்கிறார்கள்.

கான்ஸ்டபிள் லெனின் அலுவல் நேரத்தில் பணிபுரிந்து கொண்டிருக்கும்போது இறந்ததால், கருணை அடிப்படையில் அவரது கான்ஸ்டபிள் வேலை அவருடைய மகன் மாறவர்மன் சுந்தர பாண்டியனுக்குக் கிடைக்கிறது. சிவகங்கை நகர போலீஸ் நிலையத்தில் பணிபுரியும் அவர், காக்கி உடையில் இருந்தாலும், போலீஸ் நிலையத்துக்கு உள்ளும் வெளியிலும் மரியாதையாக நடத்தப்படுவதில்லை. ஒரு சம்பவத்தில் குடிகாரன் ஒருவனால் அடித்து சாக்கடையில் தள்ளப்படும் கான்ஸ்டபிள் மாறவர்மனுக்கு, தினமும் போலீஸ் நிலைய வாசலில் நின்று, உயர் அதிகாரிகள் வந்து போகும்போதெல்லாம் அவர்களுக்கு சல்யூட் அடித்துக்கொண்டே இருக்கும்படியான அவமானகரமான பணியைக் கொடுக்கிறார் இன்ஸ்பெக்டர் (சரவண சுப்பையா). இது குறித்து மாறவர்மன் வேதனையுடன் மன்றாட, அதை உதாசீனப்படுத்தும் இன்ஸ்பெக்டர், “துப்பாக்கி பிடிக்கிற வேலை பாக்க ஆசைப்படுறியா? ஒரு நாளும் அந்த வேலையை உனக்குத் தர மாட்டேன். தினமும் நீ வாசலிலேயே நின்னு சல்யூட் அடிச்சிக்கிட்டே இரு” என்று இளக்காரமாகப் பேசுகிறார். சுய மரியாதைக்காகவும், சுய அடையாளத்துக்காகவும் ஏங்குகிறார் மாறவர்மன்.

மறுபுறம், மானாமதுரை அருகே உள்ள கிராமத்தைச் சேர்ந்த ஏழை விவசாயியான துரைராசு (கங்கை அமரன்) என்ற முதியவரும், அவருடைய மனைவி சந்தனமும் (ரோஜா), – குழந்தை பாக்கியம் இல்லாததால் – தங்கள் ஆட்டை மகள் போல் பாவித்து, ‘மீனாட்சி’ என்று பெயர் வைத்து, ஆசையாக வளர்த்து வருகிறார்கள். ஓரிரவு, மணல் கடத்தல் கும்பலின் லாரி ஒன்று மோதி, ‘மீனாட்சி’யைக் கொன்று விடுகிறது. இது தெரிந்து துரைராசும், சந்தனமும் துடித்துப் போகிறார்கள்.

அந்த சட்டவிரோத மணல் கடத்தல் கும்பலைத் தண்டிக்க நினைக்கும் துரைராசு, அவர்களது மணல் கடத்தல் பற்றி உள்ளூர் பெண் கிராம நிர்வாக அலுவலருக்கு (அர்ச்சனா ரவிச்சந்திரன்) தகவல் கொடுக்கிறார். இதன் பேரில் நடவடிக்கை எடுக்க முயலும் அந்த கிராம நிர்வாக அலுவலரைத் தீர்த்துக் கட்டுகிறது மணல் கடத்தல் கும்பல்.

இதனால் அதிர்ச்சியடையும் முதியவர் துரைராசு, தன்னால் உயிரிழந்த அந்த பெண் கிராம நிர்வாக அலுவலருக்கு நீதி கேட்டு நீதிமன்றம் செல்கிறார். இந்த வழக்கு நேர்மையான நீதிபதி பீமாராவ் (ஜார்ஜ் மரியான்) முன் விசாரணைக்கு வருகிறது. சாமானியரான முதியவர் துரைராசுவின் உயிருக்கு மணல் கடத்தல் கும்பலால் ஆபத்து இருப்பதால், 24 மணி நேரமும் அவரை பாதுகாக்க துப்பாக்கியுடன் கூடிய கான்ஸ்டபிளை நியமித்து உத்தரவிடுகிறார் நீதிபதி பீமாராவ். அவர் அப்படி நியமிக்கும் துப்பாக்கியுடன் கூடிய கான்ஸ்டபிள் – மாறவர்மன்!

செல்வமும், செல்வாக்கும், அதிகாரமும் படைத்த மணல் கடத்தல் கும்பலுக்கு எதிராக நடத்திய சட்டப் போராட்டத்தில் சாமானியரான முதியவர் துரைராசு வெற்றி பெற்றாரா, இல்லையா? அக்கும்பலிடமிருந்து துரைராசுவின் உயிரை துப்பாக்கி ஏந்திய மாறவர்மன் பாதுகாத்தாரா, இல்லையா? என்பன போன்ற கேள்விகளுக்கு யதார்த்தத்துக்கு நெருக்கமாக விடை அளித்திருக்கிறது ‘லெனின் பாண்டியன்’ திரைப்படத்தின் மீதிக்கதை.

இப்படத்தில் கதையின் நாயகனாக சிவாஜி கணேசனின் பேரனும், சிவாஜி கணேசனின் மூத்த மகன் ராம்குமாரின் மகனுமான தர்ஷன் கணேசன் அறிமுகமாகியுள்ளார். இது அவரது முதல் படமாக இருந்தபோதிலும், தன் கதாபாத்திரத்தை நன்றாக உள்வாங்கி, ஆரம்பத்தில் பயந்த சுபாவம் கொண்டவராகவும், இறுதியில் வீராவேசம் கொண்டவராகவும் கச்சிதமாக நடிப்பை வெளிப்படுத்தியிருக்கிறார். அவர் அடுத்தடுத்து நல்ல கதை – திரைக்கதை – கதாபாத்திரங்களைத் தேர்ந்தெடுத்து நடித்தால், தமிழ்ச்சினிமாவின் முன்னணி நாயக நடிகர்களில் ஒருவராக விரைவில் ஜொலிக்கலாம்.

கதாநாயகியாக, மாறவர்மனின் மனைவி பிரியாவாக ஷ்ரித்தா ராவ் நடித்துள்ளார். கணவனுக்கு ஆதரவாக இன்ஸ்பெக்டரோடு தகராறு செய்வதும், பின்னர் கணவனுடனே வாக்குவாதம் செய்வதும், அதன்பின்னர் சமாதானம் ஆகி காதலைப் பொழிவதுமாக அவர் சிறப்பாக நடித்திருக்கிறார். எதிர்பாராத திருப்பத்தை ஏற்படுத்தும் மருத்துவமனைக் காட்சிகளில் அபாரமாக நடித்து ஸ்கோர் செய்திருக்கிறார்.

ஏழை விவசாயியாக, முதியவர் துரைராசுவாக நடித்திருக்கும் கங்கை அமரனை இரண்டாவது கதாநாயகன் என்றும், அவரது மனைவி சந்தனமாக நடித்திருக்கும் ரோஜாவை இரண்டாவது கதாநாயகியாகவும் குறிப்பிட்டால் அது சாலப் பொருத்தமாக இருக்கும். இரண்டு கதாபாத்திரங்களுக்கும் இடையில் – ‘முதல் மரியாதை’ சிவாஜி கணேசனுக்கும், ராதாவுக்கும் இடையிலானதைப் போன்ற – ஓர் அழகான காதல் இருக்கிறது. அதை கங்கை அமரனும், ரோஜாவும் கவித்துவமாக திரையில் வாழ்ந்து காட்டி, சபாஷ் பெறுகிறார்கள்.

நேர்மையான நீதிபதி பீமாராவாக ஜார்ஜ் மரியான் நடித்திருக்கிறார். அவர் வரும் காட்சிகளில், பேசும் வசனங்களில், திரையரங்கமே அதிரும் வண்ணம் பார்வையாளர்களின் அப்ளாஸை அள்ளுகிறார். அந்த அளவுக்கு தனது கதாபாத்திரத்தைப் பிரமாதப்படுத்தியிருக்கிறார் ஜார்ஜ் மரியான்.

வில்லன்களாக, மணல் கடத்தல் கொள்ளையர்களாக வரும் யுகேந்திரன், ஆடுகளம் நரேன், போலீஸ் உயர் அதிகாரியாக வரும் போஸ் வெங்கட், இன்ஸ்பெக்டராக வரும் சரவண சுப்பையா, சி.பி.ஐ அதிகாரியாக வரும் சுப்பு பஞ்சு, கிராம நிர்வாக அலுவலராக (வி.ஏ.ஓ) வரும் அர்ச்சனா ரவிச்சத்திரன் உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

இப்படத்தை எழுதி இயக்கியிருக்கிறார் அறிமுக இயக்குநர் டி.டி.பாலச்சந்திரன். மணல் கொள்ளையில் ஈடுபடும் செல்வந்தர்கள், அதற்குத் துணை போகும் போலீஸ் மற்றும் அரசு அதிகாரிகள் என்பதை மையக்கருவாக எடுத்துக்கொண்டு, எளிய சாமானிய மக்களை அதிகாரம் எப்படி வஞ்சிக்கிறது என்பதை பிரசங்கமாக இல்லாமல், உணர்வுபூர்வமான திரைக்கதைக் காட்சிகளாக படம் பிடித்துக் காட்டியிருக்கிறார் இயக்குநர். சமூக அக்கறையுடன், சொல்ல நினைத்ததை முதல் படத்திலேயே தெளிவாகவும், எளிமையாகவும், கலாபூர்வமாகவும் சொல்லி இயக்குநர் ஆச்சரியப்படுத்தியிருக்கிறார். இது போன்ற இன்னும் ஏராளமான தரமான படைப்புகளை இயக்குநர் டி.டி.பாலச்சந்திரனிடம் எதிர்பார்க்கலாம் என்பதற்கான முன்னறிவிப்பாக அமைந்திருக்கிறது இந்தப் படம். வாழ்த்துகள் இயக்குநர் டி.டி.பாலச்சந்திரன்!

ரொம்ப நாளைக்குப் பிறகு இப்படத்தின் அருமையான பாடல்களிலும், அற்புதமான பின்னணி இசையிலும் பழைய இளையராஜாவைக் காண முடிந்ததில் மகிழ்ச்சி.

ஏ.எம்.எட்வின் சகாயின் ஒளிப்பதிவு, நாகூரான் ராமச்சந்திரனின் படத்தொகுப்பு, அதூரி ஜெயக்குமாரின் கலை இயக்கம், தளபதி தினேஷின் ஸ்டண்ட் வடிவமைப்பு உள்ளிட்ட நேர்த்தியான தொழில் நுட்பங்கள் இயக்குநரின் வெற்றிக்கு உறுதுணையாக இருந்துள்ளன.

‘லெனின் பாண்டியன்’ – அவசியம் கண்டு களிக்க வேண்டிய மிகச் சிறந்த திரைப்படம்!

ரேட்டிங்: 4/5