ஆல் பாஸ் – விமர்சனம்

நடிப்பு: துஷ்யந்த் ஜெயப்பிரகாஷ், ஜனனி, ஜெயப்பிரகாஷ், செந்திகுமாரி, இயக்குநர் சுப்பிரமணிய சிவா, வினோதினி வைத்தியநாதன், பிரசன்ன பாலச்சந்திரன், மோகனா.ஆர், சத்யா, சஞ்சய், கோகுல், நிகில், சரத் லோகித்ஷவா, ரோஷன் பஷீர், அருவி மதன், இயக்குநர் மூர்த்தி, கலையரசன் கண்ணுசாமி மற்றும் சிலர்

கதை, திரைக்கதை, வசனம் & இயக்கம்: மைதீன்

ஒளிப்பதிவு: தில்ராஜு

படத்தொகுப்பு: எஸ்.பாஸ்கர்

இசை: ஜேம்ஸ் வசந்தன்

பாடல் வரிகள்: மோகன் ராஜன், நிலவை பார்த்திபன், ஜேம்ஸ் வசந்தன்

நடனம்: ஐ.ராதிகா

ஸ்டண்ட்: மெட்ரோ மகேஷ்

கலை இயக்கம்: ஜெயசீலன்.டி

தயாரிப்பு: ‘ஒன் ஸ்டெப் எண்டர்டெயின்மெண்ட்’ மோகனா.ஆர்

பத்திரிகை தொடர்பு: புவன் செல்வராஜ்

வடசென்னை தண்டையார் பேட்டை பகுதியில் உள்ள ’சத்யா நகர்’ என்ற குடிசை மாற்று குடியிருப்பில் வசிக்கும் எளிய உழைப்பாளிகளான அழகர் (ஜெயப்பிரகாஷ்), செல்வம் (சுப்பிரமணிய சிவா), மாணிக்கம் (பிரசன்ன பாலச்சந்திரன்) ஆகிய மூவரும் – ஒற்றுமைக்கு இலக்கணமாக – மிகவும் அன்யோன்யமாகவும், பாசமாகவும் பழகி வருகிறார்கள். அவர்களது மனைவிகளான சாந்தி (செந்திகுமாரி), லட்சுமி (வினோதினி வைத்தியநாதன்), கீதா (மோகனா.ஆர்) ஆகியோரும், அவர்களது மகன்களான பிளஸ் 2 பயிலும் கதிர் (சஞ்சய்), அருண் (கோகுல்), மதன் (நிகில்) ஆகியோரும் ஒற்றுமையாக இருக்கிறார்கள். வயதில் மூத்தவரும் நேர்மையானவருமான அழகரின் வார்த்தைகளை மூன்று குடும்பத்தினரும் மதித்து நடப்பதால் அவர்களுக்கிடையில் மனத்தாங்கலோ, சச்சரவோ ஏற்படுவதே இல்லை.

இந்நிலையில், மேற்கண்ட மூன்று குடும்பத்தினரின் மகன்களான கதிர், அருண், மதன் ஆகிய மூவரும் பிளஸ்-2 பொது தேர்வில் பாஸாகிறார்கள். அடுத்து, தரமான தனியார் கல்லூரியில் சேர்ந்து படிக்க ஆசைப்படுகிறார்கள். ஆனால் பெற்றோர்களின் பொருளாதாரச் சிக்கல், அவர்களது ஆசைக்கு தடையாக நிற்கிறது.

இதனிடையே, அப்பகுதி எம்.எல்.ஏ ஆவுடையப்பன் (சரத் லோகித்ஷவா), கணக்கில் காட்டாத ரூ.5 கோடி கறுப்புப் பணம் உள்ள பெட்டியை, விளையாட்டு மைதானம் அருகில் உள்ள பழைய குடோனில் ரகசியமாக பதுக்கி வைக்கிறார். அந்த விளையாட்டு மைதானத்தில் கதிர், அருண், மதன் கிரிக்கெட் விளையாடும்போது, பந்து அருகிலுள்ள பழைய குடோனுக்குள் விழுந்துவிட, அதை எடுக்கச் சென்ற அந்த மூன்று பையன்களும் ரூ.5 கோடி பணம் இருக்கும் பெட்டியை தற்செயலாகப் பார்த்துவிடுகிறார்கள். குதூகலம் அடையும் அவர்கள் யாருக்கும் தெரியாமல் அந்த பெட்டியை வீட்டுக்குத் தூக்கி வந்து விடுகிறார்கள்.

அழகரைத் தவிர மூன்று குடும்பங்களில் உள்ள ஏனையோர் அனைவரும் அந்த பணத்தை தாங்களே வைத்துக்கொள்ள வேண்டும் என்கிறார்கள். அழகர் அதை ஆதரிக்கவில்லை. பணப்பெட்டியை எடுத்த இடத்திலேயே கொண்டுபோய் வைத்துவிட வேண்டும் என்கிறார். ஆனால், இதுநாள் வரை அவர் பேச்சை மீறாத மற்றவர்கள் இதை ஏற்க மறுக்கிறார்கள். ஐந்து கோடி பணத்தை என்னவெல்லாம் செய்யலாம் என்று கனவுகளுடன் கூடிப்பேசி ரகசியமாக திட்டம் போடுகிறார்கள்.

இந்நிலையில், பணம் களவு போனதை அறிந்து எம்.எல்.ஏ ஆவுடையப்பன் அதிர்ச்சியும், ஆத்திரமும் அடைகிறார். குடிசை மாற்று குடியிருப்பைச் சேர்ந்த யாரோ தான் இந்த பணத்தை அபேஸ் செய்திருக்கிறார்கள் என்று சந்தேகப்படும் அவர், அந்த குடியிருப்பில் உள்ள கவுன்சிலர் கர்ணாவின் (சத்யா) வீட்டில் வந்து தங்கிக்கொண்டு, தன் ஆட்களை காதும் காதும் வைத்தாற்போல் முடுக்கிவிட்டு, தன் பணத்தையும், அதை எடுத்தவர்களையும் கண்டுபிடிப்பதில் தீவிரம் காட்டுகிறார். இது தெரிந்த மூன்று குடும்பத்துப் பெண்களும் பயத்தில் அந்த பணத்தை செலவு செய்ய இயலாமல் திண்டாடுகிறார்கள்.

இந்தச் சூழலில், பல ஆண்டுகளாக ஒற்றுமையாக வாழ்ந்த மூன்று குடும்பங்களுக்குள்ளும் இந்த பணத்தால் பிரச்சினை உருவாகிறது. ஒருவர் மீது மற்றவருக்கு சந்தேகம் எழ, உறவுகளுக்குள் விரிசல் ஏற்படுகிறது. விளைவாக, மூன்று குடும்பங்களின் வாழ்க்கையே முரண்பட்டு, தலைகீழாக மாறிப்போகிறது.

இறுதியில் எம்.எல்.ஏ தன் பணத்தை கண்டுபிடித்து மீட்டாரா, இல்லையா? அல்லது எளிய மூன்று குடும்பங்களைச் சேர்ந்தவர்களும் தங்களுக்கு கிடைத்த பணத்தை அனுபவித்தார்களா, இல்லையா? என்பன போன்ற கேள்விகளுக்கு யதார்த்தமும், நகைச்சுவையும் கலந்து, சுவாரஸ்யமாக விடை அளிக்கிறது ‘ஆல் பாஸ்’ திரைப்படத்தின் மீதிக்கதை.

இந்த படக்கதையில் அழகர், செல்வம், மாணிக்கம் ஆகிய முதன்மை கதாபாத்திரங்களில் நடித்திருக்கும் ஜெயப்பிரகாஷ், சுப்பிரமணிய சிவா, பிரசன்ன பாலச்சந்திரன் ஆகியோர் யதார்த்தமான நடிப்பை வெளிப்படுத்தி, வடசென்னையில் வாழும் எளிய மக்களின் மனஇயல்பை பிரதிபலித்திருக்கிறார்கள். குறிப்பாக, அடுத்தவரின் பணத்துக்கு ஆசைப்படாத, நேர்மையாளராக வரும் ஜெயப்பிரகாஷின் அழகர் கதாபாத்திரம், போதை தலைக்கேறி விட்டால் உண்மையை உளறத் துடிக்கும் சுப்பிரமணிய சிவாவின் செல்வம் கதாபாத்திரம் ஆகியவற்றின் வடிவமைப்பு அருமை.

ஜெயப்பிரகாஷின் மனைவி சாந்தியாக வரும் செந்திகுமாரி, சுப்பிரமணிய சிவாவின் மனைவி லட்சுமியாக வரும் வினோதினி வைத்தியநாதன், பிரசன்ன பாலச்சந்திரனின் மனைவி கீதாவாக வரும் மோகனா.ஆர் ஆகியோர் எளிய குடும்பங்களின் தலைவிகளாக பிரமாதமாக நடித்திருக்கிறார்கள். கட்டுக்கட்டாக பணத்தைப் பார்த்ததும் நாவில் எச்சில் ஊற ஆசை ஆசையாய் திட்டங்கள் போடுவதென்ன, பின்னர் பரஸ்பரம் சந்தேகப்பட்டு ஒற்றுமைக்கு உலை வைப்பதென்ன… அட்டகாசமான நடிப்பை வெளிப்படுத்தியிருக்கிறார்கள்.

மேற்கண்டோரின் மகன்களாக, பிளஸ்-2 முடித்த மாணவர்கள் கதிர், அருண், மதன் ஆகியோராக வரும் சஞ்சய், கோகுல், நிகில் ஆகியோர், கதையில் முக்கியத் திருப்பத்தை ஏற்படுத்தும் தங்கள் கதாபாத்திரங்களை குறைவின்றி நிறைவாக செய்துள்ளனர்.

எம்.எல்.ஏ ஆவுடையப்பனாக வரும் சரத் லோகித்ஷவா, வழக்கம் போல் கண்களை உருட்டி, ஆக்ரோஷமாகக் கத்தி, வில்லத்தனத்தில் மிரட்டியிருக்கிறார்.

கவுன்சிலர் கர்ணாவாக வரும் சத்யாவும், அவரது மனைவியாக வருபவரும் நிறையவே சிரிக்க வைக்கிறார்கள்.

இளம் காதல் ஜோடி கார்த்திக் – பிரியாவாக வரும் துஷ்யந்த் ஜெயப்பிரகாஷ் – ஜனனி ஆகியோரின் தோற்றமும், நடிப்பும் ரசிக்க வைக்கின்றன.

போலீஸ் இன்ஸ்பெக்டர் வேலுவாக வரும் அருவி மதன், பார்த்திபனாக வரும் ரோஷன் பஷீர், லோகுவாக வரும் இயக்குநர் மூர்த்தி, கோபாலாக வரும் கலையரசன் கண்ணுசாமி உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

எழுதி இயக்கியிருக்கிறார் இயக்குநர் மைதீன். வடசென்னை என்றாலே கத்தி, ரத்தச்சேறு என்று வன்முறைக் காடாக காட்டிவரும் மசாலா தமிழ்ச் சினிமாவின் வரையறையிலிருந்து முற்றிலும் விலகி, வன்முறை இல்லாத வடசென்னைக் கதையாக இதை படைத்திருக்கும் இயக்குநருக்கு நம் பாராட்டுகள். எம்.எல்.ஏ-வின் கருப்பு பணத்தையும், எளியவர்களின் வாழ்வியலையும் வைத்து புதுவிதமான திரில்லர் கதையை சொல்லியிருப்பதோடு, கையில் பணம் இருந்தும் அதை செலவு செய்ய முடியாமல் எளியவர்கள் தவிப்பதையும் திரைக்கதையில் காமெடியாகவும் சுவாரஸ்யமாகவும் சொல்லி படத்தை விறுவிறுப்பாக நகர்த்தி சென்றிருக்கிறார் இயக்குநர். கதை, திரைக்கதையை மட்டும் நம்பி, சிறிய பட்ஜெட்டில் இத்தனை தரமான திரைப்படம் கொடுத்ததற்காக இயக்குநர் மைதீனுக்கு வாழ்த்துகள்.

ஒளிப்பதிவாளர் தில் ராஜு, வடசென்னை மண்ணையும், மக்களையும் அவற்றின் இயல்பு கெடாமல் சிறப்பாக காட்சிப்படுத்தி இருக்கிறார்.

ஜேம்ஸ் வசந்தன் இசையில் பாடல்கள் கேட்கும் ரகம். பின்னணி இசை காட்சிகளின் உணர்வுகளை மேம்படுத்த உறுதுணையாக இருந்துள்ளது.

படத்தை தொய்வில்லாமல் நகர்த்திச் சென்றிருக்கும் படத்தொகுப்பாளர் எஸ்.பாஸ்கர், படத்தின் இரண்டாம் பாதியில் இன்னும் கொஞ்சம் கூடுதல் கவனம் செலுத்தியிருக்கலாம்.

‘ஆல் பாஸ்’ – குடும்பத்தோடு கொண்டாட்டமாக பார்த்து மகிழலாம்!

ரேட்டிங்: 3.75/5