ஆகாயத்தில் ஒரு தாரகை – விமர்சனம்
நடிப்பு: துல்கர் சல்மான், சாத்விகா வீரவல்லி, ஸ்ருதி ஹாசன், ருஹானி ஷர்மா, நாசர், கௌதம் வாசுதேவ் மேனன், முரளி ஷர்மா, ஸ்வாசிகா, கோட்டா ஜெயராம், மானசி சுதிர், சின்னி ஜெயந்த், பிரவீன், காசி ரெட்டி, சைதன்யா ஜொன்னலகட்டா, வாசு இன்டூரி மற்றும் சிலர்
இயக்கம்: பவன் சதினேனி
கதை: பவன் சதினேனி, வசந்த் ஜுர்ரு
கதை, திரைக்கதை: குன்னம் கங்கராஜு
ஒளிப்பதிவு: சுஜித் சாரங்
படத்தொகுப்பு: பிரவீன் கே.எல்
இசை: ஜி.வி.பிரகாஷ் குமார்
ஆடை வடிவமைப்பு: பல்லவி சிங்
கலை இயக்கம்: வம்சி கிருஷ்ணா.ஜி
ஒலி வடிவமைப்பு: சின்க் சினிமா
விஎஃப்எக்ஸ்: எக்வைட் விஎஃப்எக்ஸ்
தயாரிப்பு வடிவமைப்பு: ஸ்வேதா சபு சிரில்
தயாரிப்பாளர்கள்: சந்தீப் குன்னம், ரம்யா குன்னம்
தயாரிப்பு நிறுவனங்கள்: கீதா ஆர்ட்ஸ், ஸ்வப்னா சினிமா, லைட்பாக்ஸ் மீடியா
பத்திரிகை தொடர்பு: யுவராஜ்
மலையாள முன்னணி நடிகர் துல்கர் சல்மான் கதாநாயகனாக நடித்த தெலுங்குப் படங்களான ‘மகாநதி’, ‘சீதா ராமம்’, ‘லக்கி பாஸ்கர்’ ஆகிய மூன்றும் மிகப் பெரிய வெற்றியைப் பெற்றன. அதன் தொடர்ச்சியாக, அவரது நான்காவது தெலுங்குப் படமான ‘ஆகாசம்லோ ஒகா தாரா’வும் அதன் தமிழ்ப் பதிப்பான ‘ஆகாயத்தில் ஒரு தாரகை’யும் நேற்று (20-11-2026) திரையரங்குகளில் வெளியாகியிருக்கிறது. இந்த படம் எப்படி இருக்கிறது? பார்ப்போம்…
ஆந்திர மாநிலத்தில், ஒழுங்கான சாலை வசதிகூட இல்லாத சிறிய கிராமம் ஒன்றின் எளிய குடும்பத்தில் பிறந்தவர் கல்பனா (சாத்விகா வீரவல்லி). அவர் சிறுவயதில் பள்ளியில் படிக்கும்போது, வெளியூரிலிருந்து வந்த பாஸ்கர் (நாசர்) என்ற வானியல் அறிஞர், பள்ளி சிறுவர் – சிறுமிகளுக்கு, ’பிரபஞ்சத்தின் தோற்றம்’ பற்றிய தகவல்களை காணொலி மூலம் விளக்கிச் சொன்னார். அப்போது அவரிடம் விண்வெளி தொடர்பான தன் சந்தேகங்களை ஆவலுடன் கேட்டுத் தெரிந்துகொண்ட சிறுமி கல்பனா, கண்களில் கனவு மின்ன, “ஒருநாள் நான் ஆகாயத்துக்குப் போவேன்” என்கிறார். அந்த சிறுமியை வியப்புடன் பார்க்கும் வானியல் அறிஞர், என்ன நினைத்தாரோ, விண்வெளி வீராங்கனை கல்பனா சாவ்லா பற்றி கூறி, சாவ்லாவின் புகைப்படம் ஒன்றைக் கொடுத்துவிட்டுப் போகிறார். அப்போது முதல், கல்பனா சாவ்லா போல் தானும் விண்வெளி வீராங்கனை (’ஆஸ்ட்ரோனாட்’) ஆக வேண்டும் என்ற லட்சியத்தை தனக்குள் வளர்த்து வருகிறார் சிறுமி கல்பனா.
ஆனால், அவர் பத்தாம் வகுப்பு இறுதித் தேர்வை முடித்தவுடன், அவருடைய அப்பா அவரை கிருஷ்ணா (துல்கர் சல்மான்) என்ற டிரைவருக்கு வலுக்கட்டாயமாகத் திருமணம் செய்து வைத்து விடுகிறார். அவர்களின் திருமண நாளன்று இரவில், கல்பனாவின் வயது பதினாறு மட்டுமே என்பதையும், அவர் ஒரு விண்வெளி வீராங்கனையாக வேண்டும் என்ற லட்சியத்துடன் இருந்தவர் என்பதையும் கணவர் கிருஷ்ணா தெரிந்து கொள்கிறார். மனைவியை மேலே படிக்க வைத்து, அவரது கனவை நனவாக்குவதே தனது லட்சியம் என்ற முடிவுக்கு வருகிறார் எளிய கணவரான கிருஷ்ணா.
அதன்பின் என்ன நடந்தது? மனைவியின் கனவுக்கு ஒரு கணவன் நிபந்தனையற்ற ஆதரவளிக்கும்போது என்ன நடக்கும்? அக்கனவை தன் கனவாகவும் ஏற்றுக்கொள்ளும் கணவன் எத்தகைய கஷ்டங்களை எல்லாம் மகிழ்வுடன் எதிர்கொண்டு சமாளிக்க நேரிடும்? சாத்தியமற்றதாகத் தோன்றும் தனது கனவை அடைய அந்த பெண் விடாமுயற்சியுடன் எவ்வளவு உழைப்பைப் போடுவாள்? இறுதியில், அவள் கனவு நனவாவதை கண்குளிரப் பார்த்து நாடு எப்படி கொண்டாடும்? என்பன போன்ற கேள்விகளுக்கு சுவாரஸ்யமாகவும், விறுவிறுப்பாகவும், எமோஷனலாகவும் விடை அளிக்கிறது ‘ஆகாயத்தில் ஒரு தாரகை’ திரைப்படத்தின் மீதிக்கதை.

கதையின் நாயகன் கிருஷ்ணாவாக துல்கர் சல்மான் நடித்திருக்கிறார். நாயகியைப் பிரதானமாக சுற்றிச் சுழலும் கதை என்ற போதிலும், அக்கதை மீதும், அது சொல்லும் நற்செய்தி மீதும் மிகுந்த நம்பிக்கை கொண்டு, இதில் நடிக்க சம்மதித்ததோடு, பாராட்டும்படி அட்டகாசமாக நடிப்பை வெளிப்படுத்தியும் இருக்கிறார். கிருஷ்ணாவைப் போல் ஒரு கணவன் தனக்கு அமைய வேண்டும் என்று ஒவ்வொரு பெண்ணும் ஏங்கும் அளவுக்கு அவரது பாத்திரமும், நடிப்பும் மிகச் சிறப்பாக அமைந்திருக்கிறது.
நாயகியாக, விண்வெளி வீராங்கனை ஆக வேண்டும் என்ற லட்சியத்தை நெஞ்சில் சுமக்கும் கல்பனாவாக சாத்விகா வீரவல்லி நடித்திருக்கிறார். பார்ப்பதற்கு அமைதியான, நிறைவான அழகுடன் இருக்கிறார். கிடைத்தற்கரிய வலுவான இக்கதாபாத்திரத்தை நன்றாக உள்வாங்கி, ஒரு புதுமுக நடிகை போல் இல்லாமல், அனுபவம் வாய்ந்த திறமையான நடிகை போல் அற்புதமான உடல்மொழியுடன் நடிப்பை வெளிப்படுத்தியிருக்கிறார். அடுத்தடுத்து ஏகப்பட்ட பட வாய்ப்புகள் அவரைத் தேடி வந்து குவியும் என்பது நிச்சயம்.
ரோகிணி காரியப்பாவாக வரும் ஸ்ருதி ஹாசன், பிஜிலியாக வரும் ருஹானி ஷர்மா, வானியல் அறிஞர் பாஸ்கராக வரும் நாசர், டீன் விஸ்வநாத்தாக வரும் கௌதம் வாசுதேவ் மேனன், சங்கர நாராயணனாக வரும் முரளி ஷர்மா, நாயகனின் அக்கா சரஸ்வதியாக வரும் ஸ்வாசிகா, சிவய்யாவாக வரும் கோட்டா ஜெயராம், கங்கம்மாவாக வரும் மானசி சுதிர், பேராசிரியர் பிரகாஷாக வரும் சின்னி ஜெயந்த், ரமேஷாக வரும் பிரவீன், வாசுவாக வரும் காசி ரெட்டி, மாதவனாக வரும் சைதன்யா ஜொன்னலகட்டா, சித்தேஸ்வர ராவாக வரும் வாசு இண்டூரி உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.
ஜி.வி.பிரகாஷ் குமாரின் பின்னணி இசைதான் இந்தப் படத்தின் உயிர்நாடி. படம் முழுவதும் மனதை நெகிழ வைக்கும் இசையை வழங்கியுள்ள அவர், பார்வையாளர்களை உணர்ச்சிகளை உணர வைத்துள்ளார். அவர் இசையமைத்த பாடல்கள், கதையோட்டத்துடன் நன்றாகப் பொருந்தியிருக்கின்றன.
சுஜித் சாரங்கின் ஒளிப்பதிவு தரமானதாக இருக்கிறது. ஆந்திரப் பிரதேசத்தின் கிராமப்புறங்களின் எழில்மிகு இடங்களையும், குஜராத்தின் கிராமியக் காட்சிகளையும் அவர் தனது கேமரா மூலம் மிகச் சிறப்பாகப் படம்பிடித்திருக்கிறார்.
பிரவீன் கே.எல்-இன் படத்தொகுப்பு சிறப்பு.
ஒரு எழுச்சியூட்டும் கதையை உருவாக்கி, அதை மிகுந்த நேர்மையுடன் விவரித்ததற்காக இயக்குநர் பவன் சடினேனி பாராட்டப்பட வேண்டும். குன்னம் கங்கராஜு மற்றும் வசந்த் ஜுர்ருவின் திரைக்கதை பெருமளவுக்கு சுவாரஸ்யமாக இருக்கிறது. சில சமயங்களில் அது யூகிக்கக் கூடியதாக இருக்கிறது.
கதையின் மீது நம்பிக்கை வைத்து, இயக்குநரின் பார்வையைத் திரையில் கொண்டுவரத் தேவையான வளங்களை வழங்கிய தயாரிப்பாளர்களான சந்தீப் குன்னம் மற்றும் ரம்யா குன்னம் பாராட்டுக்குரியவர்கள்.
‘ஆகாயத்தில் ஒரு தாரகை’ – கண்டு களிப்பதற்கும், விருதுகள் வழங்கி கௌரவிப்பதற்கும் மிகச் சிறந்த திரைப்படம்; அவசியம் குடும்பத்துடன் பார்த்து மகிழுங்கள்!
ரேட்டிங்: 4.25/5
