எப்படி இருக்கிறது தனுஷின் ‘ஓ.ம்’ திரைப்பட டிரெய்லர்?
‘அமரன்’ பட இயக்குநர் ராஜ்குமார் பெரியசாமி இயக்கத்தில் தனுஷ் நடிப்பில் உருவாகியுள்ள படம் ‘ஓ.ம்’. இப்படத்தில் மம்முட்டி முக்கிய கதாபாத்திரத்தில் நடித்துள்ளார். இவர்களுடன் சாய் பல்லவி, ஸ்ரீலீலா, பாலிவுட் நடிகர் நஸ்ருதீன் ஷா உள்ளிட்டோரும் நடித்துள்ளனர். சாய் அபயங்கர் இசையமைத்துள்ளார். இவரின் இசையில் வெளியான ‘அலாக்கா லூவா’ மற்றும் ‘வீழா வீரா’ பாடல்கள் நல்ல வரவேற்பை பெற்றது.
இப்படத்தின் முன்னோட்டம் கடந்த ஜூனில் வெளியாகியிருந்தது. அதில் இடம் பெற்ற காட்சிகளை வைத்து இப்படம் 2015ஆம் ஆண்டு தமிழ்நாட்டைச் சேர்ந்த செம்மரம் வெட்டும் தொழிலாளர்கள் 20 பேரை ஆந்திர காவல் துறையினர் என்கவுண்டர் செய்த சம்பவத்தை அடிப்படையாகக் கொண்டு உருவாகுவதாக தகவல் வெளியானது. ஆனால் அப்படி இல்லை என்றும் அதே போல் இன்னும் சில உண்மை சம்பவங்களின் அடிப்படையில் புனையப்பட்ட ஒரு கதை என்றும் இயக்குநர் ராஜ்குமார் பெரியசாமி கூறியிருந்தார்.
இப்படம் வரும் 20ஆம் தேதி வெளியாகவுள்ளது. இந்த நிலையில் படத்தின் டிரெய்லர் வெளியாகியுள்ளது. அதில் தமிழ்நாடு காவல் துறையின் பிரத்யேக ஸ்பெஷல் யூனிட்டில் தனுஷ் இடம் பெறுவதாகத் தெரிவிக்கப்படுகிறது. அவர் செம்மரக் கடத்தலில் பெரிய கிரைம் நெட்வொர்க்கான மம்மூட்டியிடம் சேர்ந்து வேலை பார்ப்பது போலவும் இன்னொரு பக்கம் ஆந்திரா போலீஸாக வரும் சாய் பல்லவி ‘ஆபரேஷன் மோல்’ என்ற பெயரில் அவர்களை பிடிக்க முற்படுவது போலவும் காட்சிகள் வருகிறது. இறுதியில் தனுஷ் எதற்காக மம்மூட்டியிடம் வேலைக்கு சேர்ந்தார், சாய் பல்லவியின் ஆபரேஷன் நிறைவேறியதா என்ற பல்வேறு கேள்விகளுடன் டிரெய்லர் நிறைவடைகிறது. டிரெய்லரின் ஹைலைட்டாக ‘இனிமே இப்படித்தான்’ என தனுஷ் பேசும் வசனம் அமைந்துள்ளது.
