டோண்ட் ட்ரபிள் தி ட்ரபிள் – விமர்சனம்

நடிப்பு: ஃபஹத் ஃபாசில், பேபி சாரா பாலேகர், மகேஷ் மஞ்ச்ரேகர், சௌரப் சச்தேவா, வெங்கடேஷ் காகுமானு, சுப்பராஜு, திவ்யா பிள்ளை, எஸ்.எஸ்.ஷஷாங்க் மற்றும் சிலர்

எழுத்து & இயக்கம்: ஷஷாங்க் யேலேட்டி

திரைக்கதை மேம்பாடு: எஸ்.எஸ்.காஞ்சி

இணை எழுத்தாளர்: ஹம்சா அலி

ஒளிப்பதிவு: பிராட் பிரான்சிஸ் ஏசிஎஸ்

படத்தொகுப்பு: பிரவீன் ஆண்டனி

இசை: கால பைரவா

கலை இயக்கம்: மோகன் நாத் பிங்கி, சந்தீப் சுவர்ணா

ஆடை வடிவமைப்பு: ரமா ராஜமௌலி

தயாரிப்பு: ஆர்கா மீடியா வொர்க்ஸ், ஷோயிங் பிசினஸ்

தயாரிப்பாளர்: ஷோபு யார்லகட்டா, பிரசாத் தேவினேனி, எஸ்.எஸ். கார்த்திகேயா

வழங்குபவர்: எஸ்.எஸ்.ராஜமௌலி

பத்திரிகை தொடர்பு: யுவராஜ்

‘டோண்ட் டிரபிள் தி டிரபிள்’ என்ற ஆங்கில சொற்றொடருக்கு ‘பிரச்சனையைத் தேடிச் சென்று அதை தூண்டாதீர்கள்’ என்பது பொருள். இத்தலைப்பைக் கொண்டிருக்கும் இப்படத்தில் பிரச்சனை என்ன? அதை தேடிச் சென்று தூண்டுபவர் யார்? அதன் விளைவுகள் என்ன? என்ற கேள்விகளுக்கு படம் என்ன பதில் சொல்லுகிறது? பார்ப்போம்…

இன்றைய சமூகச் சூழலில் பணம் இருந்தால் தான் எதுவும் முடியும் என்பதில் அதீத நம்பிக்கை கொண்டவர் எளிய ஆம்புலன்ஸ் டிரைவரான நாயகன் சூரி (ஃபஹத் ஃபாசில்). இதனால், சவால் விட்டு, பந்தயம் போட்டு, ஆம்புலன்ஸை விரைவாக ஓட்டி, பணம் சம்பாதித்து வருகிறார் அவர். இது போதாதென்று தானொரு மேஜிசியன் (மந்திரவாதி) என்று பொய் சொல்லி, தெருவோரம் தந்திரமாக மாயவித்தை காட்டியும், சிறு சிறு ஏமாற்று வேலைகள் மூலமும் கூட பணம் ஈட்டுகிறார்.

இந்நிலையில், ஒரு ஏமாற்று வேலையின்போது கடத்தல் மன்னனும், தாதாவுமான அஸ்லம் பாயிடம் (மகேஷ் மஞ்ச்ரேகர்) மாட்டிக்கொள்கிறார் சூரி. “இரண்டு நாட்களில் எனக்கு 25 லட்சம் ரூபாய் கொடுக்க வேண்டும். இல்லாவிட்டால் நீ உயிர் வாழ முடியாது” என்று மிரட்டுகிறார் தாதா அஸ்லம் பாய்.

இரண்டே நாட்களில் ரூ.25 லட்சத்தை எப்படி புரட்டுவது? என்ன செய்வது? என்று யோசிக்கும் சூரி, குறுக்கு வழியில் இறங்க முடிவு செய்கிறார். தனது பெற்றோரைத் தொலைத்துவிட்டு அவர்களைத் தேடிக்கொண்டிருக்கும் பணக்கார வீட்டுச் சிறுமியான திவ்யாவை (பேபி சாரா பாலேகர்) நைசாக ஏமாற்றி கடத்துகிறார். திவ்யாவின் மாமா பிரதாப்பிடம் (சௌரப் சச்தேவ்) பிணைப் பணமாக பெரிய தொகையைக் கறக்கும் திட்டத்துடன் அவளை கடத்தும்போது, ‘ஸ்னூபி’ என்ற பெயர் கொண்ட அவளது நாயும் உடன் வருவதால் வேறு வழியின்றி அதையும் தன்னுடன் அழைத்துச் செல்கிறார்.

தனது பெற்றோரைத் தேடி கண்டுபிடிக்க உதவுவதாக சூரி கூறியதால் அவருடன் பயணிக்கும் திவ்யா சாதாரண மனிதச்சிறுமி அல்ல. அவள் ஒரு பேய். இது சூரிக்கு மட்டுமல்ல, திவ்யாவுக்கே கூட தெரியாது என்பது தான் சுவாரஸ்யம்.

திவ்யா கோபப்படும்போதெல்லாம் அவளிடமிருந்து மிகவும் சக்தி வாய்ந்த அமானுஷ்ய ஆற்றல்கள் வெளிப்படுவதைக் கண்டு, அவள் ஒரு பேய் என்பது தெரிந்து சூரி திகைக்கிறார். தான் ஒரு சிறுமியைக் கடத்தவில்லை; தன்னைத் தான் சிறுமி வடிவிலிருக்கும் பேய் கடத்தியிருக்கிறது என்ற உண்மை புரிந்து அதிர்ச்சி அடைகிறார்.

அதன்பின் என்ன நடந்தது? சிறுமி திவ்யாவின் பிடியிலிருந்து சூரி தப்பித்தாரா, இல்லையா? திவ்யாவின் குடும்பப் பின்னணி என்ன? அவள் பேய் ஆனது எப்படி? தொலைந்துபோன தனது பெற்றோர்களை சூரி உதவியுடன் அவள் கண்டுபிடித்தாளா, இல்லையா? என்பன போன்ற கேள்விகளுக்கு ஃபேண்டஸி காமெடி ஜானரில் பயணித்து, உருக்கமாக முடிகிறது ‘டோண்ட் டிரபிள் தி டிரபிள்’ திரைப்படத்தின் மீதிக்கதை.

கதையின் நாயகன் சூரியாக ஃபகத் ஃபாசில் நடித்திருக்கிறார். எப்படிப்பட்ட கதாபாத்திரம் கொடுத்தாலும் அதை திறம்பட செய்து, பார்வையாளர்களை திருப்திபடுத்தும் வல்லமை கொண்டவர் ஃபகத் ஃபாசில் என்பதை இந்த படத்திலும் நிரூபித்திருக்கிறார். தனது இயல்பான, நேர்த்தியான நடிப்பு மற்றும் காமெடி டைமிங் போன்றவற்றால் பாராட்டும்படி படத்தை தூக்கி நிறுத்தியிருக்கிறார்.

சிறுமி திவ்யாவாக பேபி சாரா பாலேகர் நடித்திருக்கிறார். தானொரு பேய் என்பதே தெரியாத குழந்தைத்தனமும், தனக்கே தெரியாமல் தன்னிலிருந்து வெளிப்படும் அமானுஷ்ய ஆற்றல்களும் கலந்த ஒரு வித்தியாசமான கதாபாத்திரத்தில் சிறப்பாக நடித்து, ஃபகத் ஃபாசில் நடிப்புக்கு ஈடு கொடுத்துள்ளார்.

தாதா அஸ்லம் பாயாக வரும் மகேஷ் மஞ்ச்ரேகர், சிறுமி திவ்யாவின் மாமா பிரதாப்பாக வரும் சௌரப் சச்தேவா, மற்றும் மல்லேஷாக வரும் வெங்கடேஷ் காகுமானு, கிருஷ்ணாவாக வரும் சுப்பராஜு, பல்லவியாக வரும் திவ்யா பிள்ளை, சஞ்சய்யாக வரும் எஸ்.எஸ்.ஷஷாங்க் உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் இயக்குநர் ஷஷாங்க் யேலேட்டி. ஒரு வழக்கமான கடத்தல் கதையுடன் ஃபேன்டஸி மற்றும் அமானுஷ்யக் கூறுகளை இணைத்து, அதை நகைச்சுவை பாணியில் சிறப்பாக சொல்லியிருக்கிறார் இயக்குநர். ஒரு ஆம்புலன்ஸ் டிரைவர், அமானுஷ்ய சக்திகள் கொண்ட ஒரு சிறுமி மற்றும் அவளது நாய்க்குட்டி ஆகிய மூன்று கதாபாத்திரங்களை முதன்மையாக வைத்துக்கொண்டு, ஒரு நிமிடம் கூட போரடிக்காமல் சுவாரஸ்யமாக படத்தை நகர்த்திச் சென்றுள்ளார். இறுதியில் பார்வையாளர்களை கண் கலங்க வைத்திருப்பது இயக்குநரின் டச்!

கால பைரவாவின் பின்னணி இசை, பிராட் பிரான்சிஸின் ஒளிப்பதிவு, பிரவீன் ஆண்டனியின் படத்தொகுப்பு உள்ளிட்ட தொழில்நுட்பங்கள் படத்தின் தரத்துக்கும், நேர்த்திக்கும் உறுதுணையாக இருந்துள்ளன.

‘டோண்ட் டிரபிள் தி டிரபிள்’ – பேய் படம் என்ற அச்சமே இல்லாமல், குழந்தைகளுடன் சேர்ந்து குதூகலமாய் பார்த்து மகிழலாம்!

ரேட்டிங்: 3.5/5