ஏழு கடல் ஏழு மலை – விமர்சனம்

நடிப்பு: நிவின் பாலி, அஞ்சலி, சூரி மற்றும் சிலர்

எழுத்து & இயக்கம்: ராம்

ஒளிப்பதிவு: என்.கே.ஏகாம்பரம்

படத்தொகுப்பு: மதி விஎஸ்

இசை: யுவன் சங்கர் ராஜா

கூடுதல் இசை: சந்தோஷ் தயா நிதி

பாடல் வரிகள்: மதன் கார்க்கி, மதி புகழேந்தி (அறிமுகம்)

ஸ்டண்ட்: ஸ்டண்ட் சில்வா

நடனம்: சாண்டி

தயாரிப்பு வடிவமைப்பு: உமேஷ் ஜே குமார்

தயாரிப்பு: ’வி ஹவுஸ் புரொடக்ஷன்ஸ்’ சுரேஷ் காமாட்சி

பத்திரிகை தொடர்பு: ஏ.ஜான்

உங்களுக்கு அல்லது உங்கள் பெற்றோர்களுக்கு சிறு வயதில் ”அம்புலி மாமா கதை” கேட்ட அனுபவம் இருக்கும். “ஏழு கடல் ஏழு மலை தாண்டி ஒரு கிளி இருக்கும். அந்த கிளியிடம் தான் அரசனின் உயிர் இருக்கும்” என்கிற ரீதியில் அந்த கதை போகும். ஃபேண்டஸியான அந்த கற்பனைக் கதையில் லாஜிக்கோ, யதார்த்தமோ இருக்காது. ஆனால் நிச்சயமாக நல்ல நீதி போதனைகள் இருக்கும்.

இயக்குநர் ராம் எழுதி இயக்கியிருக்கும் ‘ஏழு கடல் ஏழு மலை’ திரைப்படக் கதையும் ஃபேண்டஸியான மேற்படி ”அம்புலி மாமா கதை” வடிவத்தை – ஃபார்மேட்டை – சார்ந்தது தான். இப்படத்தில் லாஜிக்கோ, யதார்த்தமோ இருக்காது. ஆனால் நிச்சயமாக நல்ல நீதி போதனைகள் இருக்கும். இந்த தெளிவுடன் – புரிதலுடன் – ‘ஏழு கடல் ஏழு மலை’ படம் பார்த்தால், உங்களுக்கு சிறந்ததொரு அனுபவம் கிடைக்கும் என்பது உறுதி.

”அம்புலி மாமா கதை” பாணியிலேயே இந்தப் படக்கதையை ஆரம்பிக்கிறார் ராம். இருண்ட திரை. அதன் மீது ஒரு குழந்தையின் குரல் ஒலிக்கிறது: எனக்கு ஒரு கதை சொல்லுங்க ஆண்ட்டி.” உடனே ஒரு பெண்மணியின் குரல், “சரி, கதை சொல்றேன், கேளு” என்று ஆரம்பித்து, எட்டாயிரம் ஆண்டுகளாக இறப்பே இல்லாத ‘அமர மனிதர்’ ஒருவரது கதையைச் சொல்லுகிறது…

…எட்டாயிரம் ஆண்டுகளாக இறப்பே இல்லாமல் வாழ்ந்து கொண்டிருக்கும் ‘அமர மனிதர்’ (நிவின் பாலி), ஒரு தீபாவளி இரவில், ஒரு பயணிகூட இல்லாத ரயில் பெட்டி ஒன்றில் காலை நீட்டி ஆழ்ந்து உறங்கிக் கொண்டிருக்கிறார். நீண்ட தலைமுடி, அடர்த்தியான தாடி ஆஜானுபாகுவான உடற்கட்டு சகிதம், பார்ப்பதற்கு முரட்டு ஆளாக இருக்கும் அவர், கடந்த எட்டாயிரம் ஆண்டுகளில் பெரும்பாலும் தூங்கிக் கொண்டே தான் இருந்திருக்கிறார். காரணம், அவர் தேடிக் கொண்டிருக்கும் அவரது காதலி (அஞ்சலி), அவர் தூங்கும்போது தான் அவரது கனவில் காட்சி தருவார். அந்த பெண்ணை தரிசிப்பதற்காகவே அவர் பெரும்பாலான நேரங்களில் தூங்கியபடி இருப்பார்.

அதே ரயில் பெட்டியில் ஒரு எலியும் இருக்கிறது. அது இப்போது தான் நான்கு குட்டிகளை ஈன்று அவற்றுக்கு தாய்ப்பால் கொடுத்து வருகிறது.

இந்நிலையில், பிழைப்புக்காக, எட்டு ஆண்டுகள் தன் மனைவி, மகனைப் பிரிந்து துபாயில் கட்டிடத் தொழிலாளியாக வேலை பார்த்துவந்த ஒரு ’சாமானியர்’ (சூரி), தன் குடும்பத்தைப் பார்க்கும் பேராவலுடன் தன் சொந்த ஊர் செல்வதற்காக ‘அமர மனிதர்’ இருக்கும் ரயில் பெட்டியில் சூட்கேஸுகளுடன் அவசர அவசரமாக ஏறுகிறார். ரயில் கிளம்புகிறது.

உறங்கிக்கொண்டிருக்கும் அமர மனிதரின் கால் இடிப்பதால், கொஞ்சம் காலை மடக்கித் தூங்குமாறு சொல்வதற்காக அவரை சாமானியர் எழுப்ப, கனவில் காதலியை தரிசித்துக் கொண்டிருந்த அமர மனிதர் உறக்கமும் கனவும் கலைந்து எழுந்து கத்த, அவரது முரட்டுத் தோற்றத்தையும், சுபாவத்தையும் பார்த்து பயப்படுகிறார் சாமானியர். எனினும், அவருக்கும் அமர மனிதருக்கும் இடையே வாக்குவாதம் ஏற்படுகிறது. அது வளர்ந்து கைகலப்பும் நடக்கிறது.

இதனிடையே, அங்குள்ள எலி தன் வசிப்பிடத்தை விட்டு வெளியே வரும்போது, சாமானியர் தெரியாமல் கதவை வைத்து அதை நசுக்கிவிட, அது பயங்கரமாக அலறுகிறது. இதைப் பார்த்து ஆவேசமடையும் அமர மனிதர் அடிப்பதற்கு சாமானியர் மேல் பாய, இருவருக்கும் இடையில் ஏற்பட்ட மோதலில் சாமானியருக்கு ரத்தக்காயங்கள் ஏற்படுகின்றன.

சாமானியர் அங்கிருந்து எப்படியாவது தப்பிவிட வேண்டும் என்று நினைக்கிறார். அதற்கான முயற்சிகளில் அவர் இறங்கும் போதெல்லாம் அமர மனிதர் கடுங்கோபத்துடன் அவரை தடுத்து நிறுத்துகிறார்.

அதன்பின் என்னவெல்லாம் நடந்தன? சாமானியர் உயிருடன் தன் ஊருக்குப் போய் சேர்ந்தாரா, இல்லையா? அமர மனிதருக்கும் அவரது காதலிக்கும் நிஜத்தில் காதல் மலர்ந்தது எப்படி? இருவரும் கடந்த பல்லாயிரம் ஆண்டுகளில் எப்போதெல்லாம் சந்தித்துக் கொண்டார்கள்? அப்போது நடந்த சம்பவங்கள் என்ன? எலியிடம் மட்டுமல்ல, மனிதரல்லாத இதர ஜீவராசிகளிடமும் அமர மனிதர் எந்த அளவுக்கு உயிர்மை நேயம் காட்டுகிறார்? இந்த ஃபேண்டஸியான படக்கதை மூலம் பார்வையாளர்களுக்கு இயக்குநர் ராம் சொல்லும் நீதி போதனைகள் என்ன? என்பன போன்ற கேள்விகளுக்கு வித்தியாசமான பாணியில் விடை அளிக்கிறது ‘ஏழு கடல் ஏழு மலை’ திரைப்படத்தின் மீதிக்கதை.

எட்டாயிரம் ஆண்டுகளாக இறப்பில்லாமல் வாழ்ந்து கொண்டிருக்கும் அமர மனிதராக நிவின் பாலி நடித்திருக்கிறார். அச்சமூட்டும் முரட்டுத் தோற்றமும், உள்ளே ’பிறப்பொக்கும் எல்லா உயிர்க்கும்’ என்ற உயிர்மை நேயத்துடன் சகல ஜீவராசிகள் மீதும் பேரன்பு கொள்ளும் நல்லிதயமும் கொண்ட அபூர்வமான கதாபாத்திரத்தில் முழுமையாக தன்னைப் பொருத்திக் கொண்டு, அதற்கு அருமையாக உயிர் கொடுத்திருக்கிறார் நிவின் பாலி. அன்பு, காதல், கோபம், ஆக்ரோஷம், நையாண்டி, தத்துவம் என சகலத்தையும் துல்லியமாக பார்வையாளர்களுக்குக் கடத்துவதில் வெற்றி பெற்றுள்ளார்.

வெளி நாட்டிலிருந்து எட்டு ஆண்டுகளுக்குப் பிறகு சொந்த ஊர் திரும்பும் சாமானியராக சூரி நடித்திருக்கிறார். நிவின் பாலிக்கு இணையாக அவர் நடிப்பில் கலக்கியிருக்கிறார். அப்பாவித்தனம், ஆற்றாமை, குறும்பு, அழுகை, ஆத்திரம் போன்ற உணர்ச்சிகளைத் தேவையான இடங்களில் தேவையான அளவு வெளிப்படுத்தி ஸ்கோர் செய்திருக்கிறார்.

அமர மனிதரின் காதலியாக அஞ்சலி நடித்திருக்கிறார். கொடுத்த வேலையை குறைவில்லாமல் செய்து, கொஞ்சம் மர்மம் கலந்த கதாபாத்திரத்தை தன் நடிப்பால் உயர்த்திப் பிடித்திருக்கிறார்.

இப்படத்தை எழுதி இயக்கியிருக்கிறார் இயக்குநர் ராம். தனது திரைப்பட இயக்குநர் வாழ்க்கையில் 20ஆம் ஆண்டில் அடி எடுத்து வைத்திருக்கும் அவர் ஏற்கெனவே ‘கற்றது தமிழ்’ (2007), ‘தங்கமீன்கள்’ (2013), ‘தரமணி’ (2017), ’பேரன்பு’ (2019), ‘பறந்து போ’ (2025) ஆகிய ஐந்தே படங்களை இயக்கியிருக்கிறார். மசாலா திரைப்படங்கள் கோலோச்சும் தமிழ் சினிமாவில், அவற்றிலிருந்து விலகி நின்று, வித்தியாசமாக சிந்தித்து, வித்தியாசமான படைப்புகளைத் தருபவர் இயக்குநர் ராம் என்பது அவரது ஐந்து படங்களையும் பார்த்தவர்களுக்குத் தெரியும். அவரது ஆறாவது படமான ‘ஏழு கடல் ஏழு மலை’ (2026) திரைப்படமும் இதற்கு விதிவிலக்கல்ல. இதில் உயிர்மை நேயம், அன்பு, காதல் ஆகியவற்றை மையமாக வைத்து, அவருடைய பாணியில் சிறப்பாக இப்படத்தை இயக்கியிருக்கிறார் ராம். இந்த படத்தை ஒருமுறைக்கு பல முறை பார்த்தால் தான் அதில் பொதிந்திருக்கும் விஷயங்களைப் புரிந்து ரசிக்க முடியும் என்று சொல்லுமளவுக்கு உயர்ந்த நோக்கம், உயர்ந்த வடிவம், உயர்ந்த உள்ளடக்கம் ஆகியவற்றுடன் இதை உயர்வான படைப்பாக படைத்திருக்கிறார் இயக்குநர். வாழ்த்துகள் இயக்குநர் ராம்!

என்.கே.ஏகாம்பரத்தின் ஒளிப்பதிவும், யுவன் சங்கர் ராஜா – சந்தோஷ் தயாநிதி ஆகியோரின் இசையும் படத்துக்கு பலம்.

‘ஏழு கடல் ஏழு மலை’ – வித்தியாசமான திரைப்படங்களை விரும்புகிறவர்கள் மட்டுமல்ல, அனைத்துத் தரப்பினரும் பார்த்து ரசிக்கலாம்!

ரேட்டிங்: 3.75/5