சாருகேசி – விமர்சனம்

நடிப்பு: ஒய் ஜி மகேந்திரா, சுஹாசினி மணிரத்னம், ராஜ் ஐயப்பா, ரம்யா பாண்டியன், சத்யராஜ், சமுத்திரக்கனி, தலைவாசல் விஜய், மதுவந்தி, தீனா, ரித்விக், பிரித்திகா மற்றும் பலர்

இயக்கம்: சுரேஷ் கிருஷ்ணா

கதை: வெங்கட்

வசனம் & பாடல்கள்: பா விஜய்

ஒளிப்பதிவு: சஞ்சய் பி எல்

படத்தொகுப்பு: ரிச்சர்ட்

இசை: தேவா

கலை: வாசுதேவன்

நடனம்: கலா, அசோக்ராஜ், ஸ்வர்ணா

தயாரிப்பு: ஆர் அருண் ராஜேந்திரன்

பத்திரிகை தொடர்பு: ரியாஸ் கே அஹ்மத், பாரஸ் ரியாஸ்

பிரபல கர்நாடக சங்கீத வித்வானாகத் திகழ்பவர் ஒய் ஜி மகேந்திரா. சென்னையில் வசித்து வருபவர். இவர் தனது மனைவி சுஹாசினி மணிரத்னம் மீது உயிரையே வைத்திருக்கிறார்.

இவர்களின் ஒரே மகன் ராஜ் ஐயப்பா. அப்பா நேசிக்கும் கர்நாடக சங்கீதத்துக்கு மாறாக மாடர்ன் இசையை நேசிப்பவர். மாடர்ன் இசையமைப்பாளராகவும் இருப்பவர். அப்பாவின் புகழ் தன்னுடைய தனித்துவத்தை மறைப்பதாக நினைக்கும் ராஜ் ஐயப்பா, அப்பா மீது அளவு கடந்த வெறுப்பைக் கொண்டிருக்கிறார்.

தன் இசையில் பாடுவதற்கு பாடகியைத் தேர்வு செய்வதில் மும்முரமாக இருக்கிறார் ராஜ் ஐயப்பா. இத்தேர்வில் கலந்துகொள்ள வரும் பாடகி ரம்யா பாண்டியனையும், அவரது குரலையும் ராஜ் ஐயப்பாவுக்குப் பிடித்துப்போகிறது. அதே நேரத்தில் ராஜ் ஐயப்பா பிரபல சங்கீத வித்வான் ஒய் ஜி மகேந்திராவின் மகன் என்பதைத் தெரிந்து கொண்டவுடன், ரம்யா பாண்டியனின் உள்ளுக்குள் ரகசியமாக இருக்கும் பழிவாங்கும் வெறி கனல் விட்டு எரிகிறது. அதை வெளியே காட்டிக்கொள்ளாமல், ராஜ் ஐயப்பாவின் காதலை ஏற்று, அவரது பெற்றோர்களுக்குத் தெரியாமலேயே திருமணமும் செய்துகொண்டு, ஒய் ஜி மகேந்திராவின் மருமகளாக அவரது வீட்டுக்குள் அடியெடுத்து வைக்கிறார் ரம்யா பாண்டியன்.

தங்களுக்குத் தெரியாமலே திருமணம் செய்துகொண்ட போதிலும், ரம்யா பாண்டியனை மருமகளாக உளமார ஏற்றுக் கொள்கிறார்கள் ஒய் ஜி மகேந்திரா – சுஹாசினி தம்பதி. ஆனால் அவர்கள் அதிர்ச்சியாகும் விதத்தில், அவர்களுக்கு மட்டுமே தெரிந்த பரமரகசியம் ஒன்றை – வெளியில் தெரிந்தால் அவமானமாகிவிடும் பழைய விவகாரம் ஒன்றை – ரம்யா பாண்டியன் சொல்லி பிளாக்மெயில் செய்து மிரட்டுவதோடு, தனது தந்தையின் தற்கொலைக்குக் காரணமான ஒய் ஜி மகேந்திராவை பழிவாங்க வந்திருக்கும் தனது நோக்கத்தையும் வெளிப்படுத்துகிறார் ரம்யா பாண்டியன்.

ஏற்கெனவே மகனின் போக்குப் பிடிக்காமல் வேதனையில் வாழும் ஒய் ஜி மகேந்திரா, இந்த திடீர் மருமகளின் பழிவாங்கும் நோக்கம் அறிந்து மேலும் வேதனையில் துடிக்கிறார். இந்நிலையில், வயோதிகம் காரணமாக அவருக்கு அல்சைமர் (Alzheimer) என்னும் ஞாபக மறதி நோய் பாதிப்பு ஏற்படுகிறது. இதனால் தன் இசை, குடும்பம், தான் யார் என்கிற விவரம் உட்பட அனைத்தையும் அவர் மறந்துவிடுகிறார்.

இதன்பிறகு என்ன நடந்தது? ஞாபக மறதி நோயிலிருந்து ஒய் ஜி மகேந்திரா குணமானாரா, இல்லையா? அவரது மகன் ராஜ் ஐயப்பா அவரை புரிந்து திருந்தி வந்தாரா, இல்லையா? பழிவாங்கும் நோக்கத்துடன் அவரது வீட்டுக்குள் புகுந்த மருமகள் ரம்யா பாண்டியன் மனம் மாறினாரா, இல்லையா? ஒய் ஜி மகேந்திரா தம்பதி ஒளித்து வைத்திருக்கும் அந்த பரம ரகசியம் தான் என்ன? என்பன போன்ற அடுக்கடுக்கான கேள்விகளுக்கு எமோஷனலாக விடை அளிக்கிறது ‘சாருகேசி’ திரைப்படத்தின் மீதிக்கதை.

பிரபல கர்நாடக வித்வானாக ‘சாருகேசி’ என்ற கதாபாத்திரத்தில் நடித்திருக்கிறார் ஒய் ஜி மகேந்திரா. பல்லாண்டு கால நடிப்பு அனுபவத்தை முழுமையாக வெளிப்படுத்தி, சாட்சாத் சாருகேசியாகவே திரையில் வாழ்ந்து காட்டியிருக்கிறார்.

அவர் மிகவும் நேசிக்கும் மனைவியாக ‘பாக்யம்’ என்ற கதாபாத்திரத்தில் சுஹாசினி மணிரத்னம் நடித்திருக்கிறார். தனக்குக் கொடுக்கப்பட்ட வேலையை கச்சிதமாகச் செய்திருக்கிறார்.

இவர்களது மகனாக சஞ்சய் என்ற கதாபாத்திரத்தில் ராஜ் ஐயப்பா நடித்திருக்கிறார். அவரது காதல் மனைவியாக ’நெகடிவ் ஷேட்’ உள்ள கதாபாத்திரத்தில் ரம்யா பாண்டியன் நடித்திருக்கிறார். முதியோர் பிரச்சனையை மையமாகக் கொண்ட இப்படத்திற்கு இருவரும் இளமை வனப்பு சேர்த்திருக்கிறார்கள்.

இவர்களுடன் முக்கிய கதாபாத்திரங்களில் சத்யராஜ், சமுத்திரக்கனி, தலைவாசல் விஜய், மதுவந்தி, தீனா, ரித்விக், பிரித்திகா உள்ளிட்டோர் நிறைவான நடிப்பை வழங்கியிருக்கிறார்கள்.

வெங்கட் எழுதியுள்ள இப்படக்கதைக்கு பா விஜய்யின் பாடல்களும் வசனமும் உயிரோட்டமாக அமைந்துள்ளன. வெற்றிகரமாக நடைபெற்று வந்த ‘சாருகேசி’ என்ற மேடை நாடகத்தை சிறப்பான முறையில் திரைவடிவத்துக்கு மாற்றி, போரடிக்காமல் சுவாரஸ்யமாகவும் விறுவிறுப்பாகவும் படத்தை நகர்த்திச் சென்றுள்ளார் இயக்குநர் சுரேஷ் கிருஷ்ணா.

தேவாவின் இசை, சஞ்சய் பி எல் ஒளிப்பதிவு, ரிச்சர்ட் படத்தொகுப்பு, வாசுதேவன் கலை இயக்கம், கலா, அசோக்ராஜ், ஸ்வர்ணா ஆகியோரின் நடன அமைப்பு உள்ளிட்டவை இப்படத்துக்கு பலம்.

’சாருகேசி’ – இசைப் பிரியர்கள் மட்டுமல்ல, அனைத்துத் தரப்பினரும் குடும்பத்துடன் பார்த்து ரசிக்கலாம்!

ரேட்டிங்: 3/5