பூக்கி – விமர்சனம்

நடிப்பு: அஜய் தீஷன், ஆர்.கே.தனுஷா, பாண்டியராஜன், சுனில், லட்சுமி மஞ்சு, இந்துமதி மணிகண்டன், ஆதித்யா கதிர், விவேக் பிரசன்னா, பிளாக் பாண்டி, ‘பிக்பாஸ்’ சத்யா, எம்.ஜே.ஸ்ரீராம், ராதா, அஸ்வின் ராம், ஷியாரா ஷர்மி, பிரியங்கா மற்றும் பலர்

இயக்கம் & ஒளிப்பதிவு: கணேஷ் சந்திரா

கதை, திரைக்கதை, வசனம்: புதிய பரிதி

படத்தொகுப்பு & இசை: விஜய் ஆண்டனி

கலை இயக்கம்: பிரகதீஸ்வரன் பன்னீர்செல்வம்

நடன அமைப்பு: ஹரி கிரண்

சண்டை அமைப்பு: பிரபு ஜாக்கி

தயாரிப்பு: விஜய் ஆண்டனி ஃபிலிம் கார்ப்பரேஷன் – பாத்திமா விஜய் ஆண்டனி, மீரா விஜய் ஆண்டனி

பத்திரிகை தொடர்பு: சதீஷ் (எய்ம்), சிவா

”பூக்கி” என்பது ஆங்கிலச் சொல். “டார்லிங்” என்று காதலர்கள் ஒருவரை ஒருவர் அன்போடு அழைத்துக்கொள்வதைப் போல, “பூக்கி” என்று இக்கால இளம் தலைமுறைக் காதலர்கள் ஒருவரை ஒருவர் செல்லமாய் அழைத்துக்கொள்கிறார்கள். இந்த திரைப்படம் இளம் ‘ஜென்சி (Gen Z)’ தலைமுறையினரின் காதல் பற்றிய படம் என்பதால், இதற்கு மிகப் பொருத்தமாக ‘பூக்கி’ என்று பெயர் வைத்திருக்கிறார்கள்.

பரஸ்பரம் ”பூக்கி” என்று செல்லமாய் அழைத்துக்கொள்ளும் ஆறு ஆண்டுகாலக் காதலர்களான நாயகன் கைலாஷ் (அஜய் தீஷன்), நாயகி ஆழி (ஆர்.கே.தனுஷா) ஆகிய இருவரும் ஒரு மழைநாளில் காரில் போகும்போது வார்த்தை முற்றி வாக்குவாதத்தில் ஈடுபடும் காட்சியுடன் படம் ஆரம்பமாகிறது. இருவரும் நடுரோட்டில் இறங்கி ஒருவரை ஒருவர் கன்னத்தில் அறைய, அதை அக்கம்பக்கத்தில் இருந்தவர்கள் தங்கள் ஸ்மார்ட் போன்களில் வீடியோவாக எடுத்து, சமூக வலைத்தளங்களில் போஸ்ட் பண்ணி டிரெண்ட் செய்ய, கைலாஷும், ஆழியும் ‘பிரேக்-அப்’ சொல்லி பிரிந்து போகிறார்கள்.

இந்த பிரேக்-அப் தரும் வலியிலிருந்து விடுபட கைலாஷ் ஜிம்முக்குப் போகிறார். நண்பர்களோடு (விவேக் பிரசன்னா, ஆதித்யா கதிர்) சேர்ந்து குடிக்கிறார். அவர்களிடம் தன் காதலை பிளாஷ்பேக்கில் சொல்லுகிறார். ஆழியோ, ஒரு கார்ப்பரேட் சாமியார் (சுனில்) காட்டும் ஆன்மீகப் பாதைக்குள் நுழைகிறார். ஒரு பெண் மனோதத்துவ நிபுணரிடம் (லட்சுமி மஞ்சு) தன் அவஸ்தையைச் சொல்லி ஆலோசனை கேட்கிறார். எனினும், பிரேக்-அப் வலியிலிருந்து இருவராலும் மீள முடியவில்லை.

இதற்கு பிரயாச்சித்தம் இன்னொரு காதலுக்கு மூவ் பண்ணுவது தான் என்ற முடிவுக்கு வரும் இருவரும் வேறு வேறு காதல் நோக்கி நகரத் தொடங்குகிறார்கள். இறுதியில், பழைய காதல் மற்றும் அது தரும் வலியிலிருந்து மீண்டு புதிய காதலில் பயணப்பட்டார்களா? அல்லது பழைய காதலைப் புதுப்பித்தார்களா? என்பதை உள்ளத்தைத் தொடும் வகையில் உணர்வுப்பூர்வமாக விவரிக்கிறது ‘பூக்கி’ திரைப்படத்தின் மீதிக்கதை.

கதையின் நாயகன் கைலாஷாக அஜய் தீஷன் நடித்திருக்கிறார். அவர் அறிமுகமான – அவரது முந்தைய படமான – ‘மார்கன்’ திரைப்படத்தை விட இந்த படத்தில் அவரது நடிப்பில் நல்ல முன்னேற்றம் தெரிகிறது. பதட்டம் இல்லாமல் துடிப்பு மிக்க நடிப்பால் கவருகிறார். தோற்றம், நடை, உடை, பாவனை, உடல்மொழி, வசன உச்சரிப்பு என சகலத்திலும் இன்றைய ‘ஜென்சி’ இளைஞனைக் கச்சிதமாக பிரதிபலித்திருக்கிறார். தமிழ் சினிமாவில் அவருக்கு நிச்சயம் பிரகாசமான எதிர்காலம் உண்டு.

நாயகனின் பூக்கியாக, நாயகி ஆழியாக ஆர்.கே.தனுஷா நடித்திருக்கிறார். காதல் கதைக்கு ஏற்ற அழகுடன் இருக்கிறார். கிடைத்த வாய்ப்பை சரியாகப் பயன்படுத்தி அருமையாக நடித்திருக்கிறார். இன்றைய ‘ஜென்சி’ யுவதியை தத்ரூபமாகப் பிரதிபலித்து, பார்வையாளர்களை படத்துடன் ஒன்ற உதவுகிறார்.

நாயகனின் அப்பாவாக வரும் பாண்டியராஜன், அம்மாவாக வரும் இந்துமதி மணிகண்டன், நண்பர்களாக வரும் விவேக் பிரசன்னா, ஆதித்யா கதிர், ஜிம் மாஸ்டராக வரும் ‘பிக்பாஸ்’ சத்யா, நாயகியின் அப்பாவாக வரும் எம்.ஜே.ஸ்ரீராம், அம்மாவாக வரும் ராதா, கார்ப்பரேட் சாமியாராக வரும் சுனில், மனோதத்துவ நிபுணராக வரும் லட்சுமி மஞ்சு, காவியாவாக வரும் ஷியாரா ஷர்மி, ராகுலாக வரும் அஸ்வின் ராம் மற்றும் பிளாக் பாண்டி, பிரியங்கா உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

இப்படத்தின் கதை, திரைக்கதை, வசனத்தை புதிய பரிதி எழுத, கணேஷ் சந்திரா இயக்கி, ஒளிப்பதிவு செய்திருக்கிறார். இந்த இரண்டு படைப்பாளிகளும் இணைந்து ஜென்சி தலைமுறையினரின் காதல், கோபம், பிரிவு, மற்றும் அவர்களது போதைப் பழக்கம் உள்ளிட்ட வாழ்வியலை ஓரளவுக்குத் துல்லியமாகவும், ரசிக்கும்படியும் சொல்லியிருக்கிறார்கள். படத்தின் முதல் காட்சியிலேயே நாயகனும் நாயகியும் பிரேக்-அப் சொல்லிவிடுவதால், இறுதியில் கிளைமாக்ஸ் என்னவாக இருக்கும் என்பதை முன்கூட்டியே யூகிக்க முடிந்தாலும், கிளைமாக்ஸை நோக்கிய முழு நகர்வையும் சுவாரஸ்யமாகவும், விறுவிறுப்பாகவும் அமைத்திருப்பது சிறப்பு.

இசையமைப்பையும், படத்தொகுப்பையும் விஜய் ஆண்டனி கையாண்டிருக்கிறார். இரண்டும் படத்துக்கு பலம் சேர்த்திருக்கின்றன.

‘பூக்கி’ – வித்தியாசமான காதல் கதை; இளைஞர்கள் மட்டுமல்ல, அனைத்துத் தரப்பினரும் பார்த்து ரசிக்கலாம்!

ரேட்டிங்: 3/5.