சண்டக்காரி – விமர்சனம்

நடிப்பு: விமல், ஸ்ரேயா சரண், புன்னகை பூ கீதா, சத்யன், பிரபு, கே.ஆர்.விஜயா, ரேகா, தேவ் கில், உமா பத்மநாபன், கிரேன் மனோகர், மகாநதி சங்கர் மற்றும் சிலர்

எழுத்து & இயக்கம்: ஆர்.மாதேஷ்

ஒளிப்பதிவு: ஆர்.பி.குருதேவ்

படத்தொகுப்பு: தினேஷ் பொன்ராஜ்

இசை: அம்ரிஷ்

கலை இயக்கம்: அய்யப்பன்

ஸ்டண்ட் இயக்கம்: கனல் கண்ணன்

தயாரிப்பு: ’பாஸ் புரொடக்ஷன் கார்ப்பரேஷன்’ புன்னகை பூ கீதா

பத்திரிகை தொடர்பு: சதீஷ் (எய்ம்), சிவா

லண்டனில் உள்ள பிரபல பெரிய நிறுவனம் ஒன்றில் ‘சிஎம்ஓ’ என்ற உயர் பதவியில் இருக்கிறார், நாயகியும் அல்ட்ரா மாடர்ன் கார்ப்பரேட் பெண்ணுமான மாயா அழகன் (ஸ்ரேயா சரண்). கண்டிப்பான கறார் பேர்வழி. அதிகாரமும் ஆணவமும் கொண்ட பெரிய ’சண்டக்காரி’. அவரை கண்டாலே அலுவல ஊழியர்கள் மொத்தப் பேரும் பயந்து நடுங்குகிறார்கள். அவரிடம் அடுத்தடுத்து நிர்வாக உதவியாளராக பணியாற்றிய ஐம்பதுக்கு மேற்பட்டோர் பணி நீக்கம் செய்யப்பட்டிருக்கிறார்கள் என்பதால் இப்போது அந்த வேலை காலியாக இருக்கிறது.

தமிழ்நாட்டு கிராமம் ஒன்றைச் சேர்ந்தவர் நாயகன் வெற்றி (விமல்).பொறியியல் படிப்பில் ’கோல்டு மெடல்’ வாங்கியவர். புதிய செயலி ஒன்றைக் கண்டுபிடித்து, பிரபலப்படுத்தி, புகழடைய வேண்டும் என்ற லட்சியம் உள்ளவர். லண்டனுக்கு வரும் அவர், நாயகி மாயா அழகனிடம் நிர்வாக உதவியாளராக வேலைக்கு சேருகிறார். மாயாவின் ஆணவப்போக்கால் வெற்றியும் பாதிக்கப்படுகிறார். எனினும், தன்னுடைய லட்சியத்துக்காக அனைத்தையும் பொறுத்துக்கொண்டு, வேலையில் தொடர்கிறார்.

இந்நிலையில், மாயாவின் லண்டன் விசா முடிவடைகிறது. அவர் அங்கே தொடர்ந்து இருந்தால் தான், கைக்கு எட்டும் தூரத்தில் இருக்கும் உயர் பதவியை அடைய முடியும். நிரந்தர லண்டன் குடியுரிமை உள்ள ஒருவரைத் திருமணம் செய்துகொள்வது போல் நடித்தால், அங்கு தொடர்ந்து இருக்கலாம் என்பதால், நிரந்தர குடியுரிமை உள்ள வெற்றியை திருமணம் செய்துகொள்ள இருப்பதாக சம்பந்தப்பட்ட துறை அதிகாரிகளிடம் பொய் சொல்லுகிறார் மாயா. குடியுரிமைச் சிக்கலைத் தீர்க்க அவரும் வெற்றியும் தம்பதிகளாக நடிக்க வேண்டிய கட்டாயம் ஏற்படுகிறது. அப்படி நடிப்பதற்கு, மாயா தனது குடும்பத்தைச் சந்திக்க தன் மனைவி என்ற பெயரில் தமிழக கிராமத்திற்கு வர வேண்டும் என்று நிபந்தனை விதிக்கிறார் வெற்றி. அதே நேரம் மாயாவை பழி தீர்க்க, அவரது தொழில்முறை எதிரியான மேத்யுவுடன் (தேவ் கில்) சேர்ந்து வெற்றி ஒரு ரகசிய வியூகமும் வகுக்கிறார்.

அதன்பிறகு என்ன நடந்தது? தமிழக கிராமத்துக்கு மாயா வந்து வெற்றியின் குடும்பத்தைச் சந்தித்தாரா? அல்ட்ரா மாடர்ன் கார்ப்பரேட் பெண்ணான அவரால் கிராமத்து மருமகளாக நடக்கவும் நடிக்கவும் முடிந்ததா? இவர்களது நாடகத்தை – போலி மணவாழ்க்கையை – வெற்றியின் பெற்றோர்கள் (பிரபு – உமா பத்மநாபன்) கண்டுபிடித்தார்களா, இல்லையா? வெற்றி – மேத்யூ ரகசிய வியூகப்படி, உயர் பதவியை அடைய முடியாமல் மாயாவை தடுக்க முடிந்ததா, இல்லையா? இப்படி கீரியும் பாம்பும் போல் இருந்த வெற்றியும், மாயாவும் நிஜ மணவாழ்க்கையில் இணைந்தார்களா, இல்லையா? என்பன போன்ற கேள்விகளுக்கு கமர்ஷியல் மசாலா கலந்து விடை அளிக்கிறது ‘சண்டக்காரி’ திரைப்படத்தின் மீதிக்கதை.

நாயகியாக, லண்டன் வாழ் அல்ட்ரா மாடர்ன் கார்ப்பரேட் பெண் மாயா அழகனாக ஸ்ரேயா சரண் நடித்திருக்கிறார். படத்தின் தலைப்புக்கு ஏற்ப ’சண்டக்காரி’யாக, திமிர் பிடித்த உயர் அதிகாரியாக அசத்தியிருக்கிறார். ஸ்டைலான தோற்றத்தாலும், லண்டனில் பப் டான்ஸாலும், கிராமத்தில் லுங்கி டான்ஸாலும் கவர்ச்சியில் கவருகிறார்.

நாயகனாக, தமிழக கிராமத்திலிருந்து லண்டன் சென்று பணிபுரியும் வெற்றியாக விமல் நடித்திருக்கிறார். அவரது வழக்கமான யதார்த்த நடிப்பு கவனம் ஈர்க்கிறது. டைமிங் காமெடியும் கைகொடுத்துள்ளது.

வில்லனாக, நாயகியின் தொழில்முறை எதிரி மாத்யூவாக நடித்திருக்கும் தேவ் கில், தனது வில்லத்தனத்தின் மூலம் கதையில் முக்கிய திருப்பங்கள் ஏற்படுத்தியிருக்கிறார்.

நாயகனின் அப்பாவாக பிரபு, அம்மாவாக உமா பத்மநாபன், பாட்டியாக கே.ஆர்.விஜயா நடித்திருக்கிறார்கள். தங்களது அனுபவ நடிப்பு மூலம் கதைக்குத் தேவையான குடும்ப உணர்வை வெளிப்படுத்தியிருக்கிறார்கள்.

லண்டனில் சத்யனும், நாயகனின் கிராமத்தில் கிரேன் மனோகரும் எப்போதாவது சிரிக்க வைக்கிறார்கள்.

புன்னகை பூ கீதா, ரேகா, மகாநதி சங்கர் உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

எழுதி இயக்கியிருக்கிறார் ஆர்.மாதேஷ். லண்டனில் இருக்கும் அல்ட்ரா மாடர்ன் கார்ப்பரேட் பெண், மருமகள் என்று சொல்லிக்கொண்டு தமிழக கிராமத்துக்கு வந்தால் எப்படியிருக்கும் என்ற நகைச்சுவை சிந்தனையை கதைக்கருவாக எடுத்துக்கொண்டு, ரஜினிகாந்த் நடித்த ’மன்னன்’ திரைப்படத்தையும், மாதவன் நடித்த ‘நளன் தமயந்தி’ திரைப்படத்தையும் நினைவூட்டும் வகையில் திரைக்கதை அமைத்து, கமர்ஷியல் மசாலாவாக படத்தை நகர்த்திச் சென்றுள்ளார் இயக்குநர். படத்தில் புதுமைகள் எதுவும் இல்லாதது குறை.

அம்ரிஷின் இசை, ஆர்.பி.குருதேவின் ஒளிப்பதிவு, தினேஷ் பொன்ராஜின் படத்தொகுப்பு படத்துக்கு பலம்.

‘சண்டக்காரி’ – கமர்ஷியல் எண்டர்டெயினர்; பொழுதுபோக்காக பார்த்து ரசிக்கலாம்!

ரேட்டிங்: 3/5