எங்கள் தங்கம் – விமர்சனம்

நடிப்பு: சமந்தா, திகந்த் மஞ்சாலே, கௌதமி, ஆனந்த், ஸ்ரீ லட்சுமி, குல்ஷன் தேவய்யா, மன்ஜூஷா, சைதன்ய கிருஷ்ணா, ஸ்ரீமுகி மற்றும் பலர்

இயக்கம்: பிவி நந்தினி ரெட்டி

எழுத்து: ராஜ் நிடிமொரு, வசந்த் மரிம்கண்டி

ஒளிப்பதிவு: ஓம் பிரகாஷ் ISC

படத்தொகுப்பு: தர்மேந்திரா காகராலா

இசை: சந்தோஷ் நாராயணன்

தயாரிப்பு: டிராலாலா மூவிங் பிக்சர்ஸ்

தயாரிப்பாளர்கள்: ராஜ் நிடிமொரு, சமந்தா, ஹிமான்க் ரெட்டி துவ்வூரு

பத்திரிகை தொடர்பு: யுவராஜ்

ஸ்வர்ணாவும் (சமந்தா), அனிருத்தும் (திகந்த் மஞ்சாலே) வீட்டாருக்குத் தெரியாமல் காதலித்து, உறவினர்களுக்குச் சொல்லாமல் திருமணம் செய்துகொண்டு நகரததில் வாழ்பவர்கள். இத்திருமணம் நடந்த இரண்டாண்டுகளுக்குப் பின், அனிருத்தின் தங்கைக்கு அவரது சொந்த கிராமத்தில் திருமணம் நடைபெற இருப்பதை அறிந்து, அனிருத் தன் மனைவி ஸ்வர்ணாவை முதன்முதலாக தன் ஊருக்கு – தன் பிறந்த வீட்டுக்கு – அழைத்து வருகிறார்.

அனிருத்தின் அப்பா ராமய்யா ராஜு (ஆனந்த்) ஊரில் அரசியல் செல்வாக்குள்ள பெரிய மனிதராக இருக்கிறார். அவரது மனைவி காமாட்சி (கௌதமி). இவர்களது குடும்பம் பழமை வாய்ந்த மரபுக்கு உட்பட்ட கட்டுக்கோப்பான குடும்பமாக இருக்கிறது. இவர்களது வீட்டுக்குள் ஸ்வர்ணா மருமகளாக முதன்முதலாக அடியெடுத்து வைத்தவுடன், அங்கிருந்த அத்தனை பேரும் “இந்த பொண்ணு தானா அது” என்பது போல் வேண்டாவெறுப்பாகப் பார்க்கிறார்கள். மாமியார் காமாட்சி உள்ளிட்டோர் வேறுவழியின்றி சம்பிரதாயமாக ஸ்வர்ணாவை ஏற்றுக்கொள்கிறார்கள். ஆனால் மாமனாரான ராமய்யா ராஜுவோ தன் மகனுடனும், மருமகளுடனும் பேச மறுத்து முகத்தைத் திருப்பிக் கொள்கிறார்.

குடும்பப் பெண்மணி போல் நடந்துகொண்டு தன் கணவரின் குடும்பத்தார் அனைவரையும் தன் பக்கம் இழுக்க வேண்டும் என்று ஸ்வர்ணா ஆசைப்படுகிறார். ஆனால், குடும்பப் பாங்கான பெண்மணியாக எப்படி நடந்துகொள்வது என்று தெரியாமல் அவ்வப்போது கேலி கிண்டலுக்கு ஆளாகிறார். அந்த பெரிய குடும்பத்தின் சமையல், பாரம்பரிய பழக்க வழக்கங்கள், சடங்கு சம்பிரதாயங்கள் எதுவும் தெரியாமல் தடுமாறுகிறார்.

ஒரு கட்டத்தில், அனாதை இல்லத்தில் தன்னோடு வளர்ந்த தன் சினேகிதியான கிரண்மயியை (மன்ஜூஷா) வரவழைத்து, அவர் ரகசியமாக சமைத்துத் தரும் உணவுப் பதார்த்தங்களைப் பரிமாறி, புகுந்த வீட்டாரிடம் நல்ல பெயர் எடுக்கத் தொடங்குகிறார் ஸ்வர்ணா.

இந்நிலையில், ஸ்வர்ணாவின் முன்கதை பார்வையாளர்களுக்கு வெளிப்படுகிறது. காட்டுக்குள் வாழும் ஒரு புரட்சிகரக் குழுவில் ‘ஜான்சி’ என்ற பெயரில் ஸ்வர்ணா உறுப்பினராக இருந்தபோது, அக்குழுவின் தலைவரான கருணா (குல்ஷன் தேவய்யா) அவரை ஒருதலையாக காதலித்ததோடு, இப்போதும் அவரை கைப்பற்ற தேடிக்கொண்டிருக்கிறார் என்ற விவரங்கள் தெரிய வருகின்றன.

கருணாவால் தனக்கும், ஊர் பெரிய மனிதரான தன் மாமனாரைப் பிடிக்காதவர்களால் தன் புகுந்த வீட்டாருக்கும் ஆபத்துகள் ஏற்பட இருப்பதை உணருகிறார் ஸ்வர்ணா. இதுவரை சாதுவாக, அப்பாவியாக இருந்த ஸ்வர்ணா, வெகுண்டெழுந்து விஸ்வரூபம் எடுத்து, எதிரிகளை அடித்துத் துவைத்து, துவம்சம் செய்து, அந்த ஆபத்துகளை எப்படி முறியடிக்கிறார்? என்பது ‘எங்கள் தங்கம்’ படத்தின் மீதிக்கதை.

கதையின் நாயகி ஸ்வர்ணாவாக சமந்தா நடித்திருக்கிறார். வழக்கமான நாயகி போல் இல்லாமல், அதிரடி நாயகியாக ஆக்‌ஷன் காட்சிகளை அதகலப்படுத்தி இருக்கிறார். அதே நேரம் குடும்பப் பாங்கான பெண்மணி போல் செயற்கையாக நடித்து, நம் மனதைக் கவர்கிறார். சமந்தாவின் திரை இருப்பும், நடிப்பும் இந்த படத்துக்கு மிகப் பெரிய பிளஸ்.

ஸ்வர்ணாவின் கணவர் அனிருத்தாக திகந்த் மஞ்சாலே நடித்திருக்கிறார். கொடுத்த வேலையை குறை இல்லாமல் செய்திருக்கிறார்.

புரட்சிகரக் குழுவின் தலைவர் கருணாவாக வரும் குல்ஷன் தேவய்யா வில்லத்தனத்தில் மிரட்டியிருக்கிறார்.

ஸ்வர்ணாவின் மாமனார் ராமய்யா ராஜுவாக வரும் ஆனந்த், மாமியார் காமாட்சியாக வரும் கௌதமி, சிறுவயது சினேகிதி கிரண்மயியாக வரும் மன்ஜூஷா, பாம்மாவாக வரும் ஸ்ரீலட்சுமி, சரத்தாக வரும் சைதன்ய கிருஷ்ணா, அனசூயாவாக வரும் ஸ்ரீமுகி உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

சமந்தாவின் கணவர் ராஜ் நிடிமொரு எழுதிய கதை அமைப்பில் உருவாகி இருக்கும் இத்திரைப்படத்தை நந்தினி ரெட்டி இயக்கியிருக்கிறார். தனது கடந்த கால வாழ்வில் போராளியாக இருக்கும் சமந்தா அதையெல்லாம் விட்டுவிட்டு ஒரு அமைதியான வாழ்வைத் தேடி குடும்பப் பெண்ணாக ஒரு குடும்பத்துக்குள் செல்கிறார்; அந்த சமயம் அவர் விட்டுச் சென்ற சில பகைகள் சமந்தாவை துரத்த அதை எப்படி சமந்தா சமாளித்தார் என்பதை மையக்கருவாக வைத்துக்கொண்டு அதை அனைத்து தரப்பு ரசிகர்களும் ரசிக்கும்படி ஒரு திரில்லர் கலந்த குடும்பப் படமாக கொடுத்து ரசிக்க வைத்திருக்கிறார் நந்தினி ரெட்டி. படம் ஆரம்பித்து இறுதிவரை எந்த ஒரு இடத்திலும் தொய்வில்லாமல் விறுவிறுப்பாக படத்தை நகர்த்திச் சென்றிருப்பது படத்திற்கு மிகப்பெரிய பிளஸ்.

சந்தோஷ் நாராயணனின் இசை, ஓம் பிரகாஷின் ஒளிப்பதிவு, தர்மேந்திரா காகராலாவின் படத்தொகுப்பு உள்ளிட்ட தொழில் நுட்பங்கள் படத்துக்கு பலம்.

‘எங்கள் தங்கம்’ – சமந்தாவின் அதிரடி ஆக்‌ஷனுக்காகப் பார்த்து ரசிக்கலாம்!

ரேட்டிங்: 3/5