மிஸ்டர் எக்ஸ் – விமர்சனம்

நடிப்பு: ஆர்யா, கௌதம் ராம் கார்த்திக், சரத்குமார், மஞ்சு வாரியர், அனகா, அதுல்யா, ரைஸா வில்சன், காளிவெங்கட், ஜெயபிரகாஷ் மற்றும் பலர்

எழுத்து & இயக்கம்: மனு ஆனந்த்

கூடுதல் திரைக்கதை: திவ்யங்கா ஆனந்த் சங்கர், ராம் ஹெச் புத்ரன், பிரவீன் கே

ஒளிப்பதிவு: அருள் வின்செண்ட்

படத்தொகுப்பு: பிரசன்னா ஜிகே

இசை: திபு நினன் தாமஸ்

ஸ்டண்ட்: ஸ்டண்ட் சிவா

கலை: இந்துலால் கவீட், சேகர் பி

ஆடை வடிவமைப்பு: உத்தரா மேனன், தீபாலி நூர்

தயாரிப்பு வடிவமைப்பு: ராஜீவன்

இணை தயாரிப்பு: ஏ.வெங்கடேஷ்

தயாரிப்பு: ஸ்ரீ வினீத் ஜெயின், எஸ்.லக்ஷ்மண் குமார்

பத்திரிகை தொடர்பு: ஏ.ஜான்

2022ஆம் ஆண்டு விஷ்ணு விஷால் நடிப்பில் வெளியான ‘எஃப் ஐ ஆர்’ வெற்றித் திரைப்படம் மூலம் நல்ல விமர்சனங்களையும், பாராட்டுகளையும் பெற்ற இயக்குநர் மனு ஆனந்த், தற்போது ஆர்யா, கௌதம் ராம் கார்த்திக், சரத்குமார், மஞ்சு வாரியர் உள்ளிட்டோரை இணைத்து, ‘மிஸ்டர் எக்ஸ்’ என்ற ’ஸ்பை த்ரில்லர்’ திரைப்படத்தை படைத்தளித்திருக்கிறார். இந்த திரைப்படம் எப்படி இருக்கிறது? பார்ப்போம்…

பல ஆண்டுகளுக்கு முன்பு, இந்தியா – அமெரிக்கா கூட்டாக அணுக்கரு (நியூக்ளியர்) சோதனை செய்வதற்காக, இமயமலைத் தொடரில் உள்ள நந்தாதேவி மலைக்கு கொண்டு செல்லப்பட்ட அணு சாதனம் (நியூக்ளியர் டிவைஸ்), அப்போது ஏற்பட்ட பயங்கர பனிச்சரிவு காரணமாக தொலைந்து போய் விடுகிறது.

அந்தச் சாதனம் இந்தியாவுக்கு மாபெரும் பேரழிவை ஏற்படுத்த வாய்ப்பு இருப்பதாக இந்திய உளவுத்துறைக்கு தகவல் கிடைக்கிறது. அது நம் நாட்டின் எதிரிகள் எவரது கைகளுக்கும் போய்விடக் கூடாது என்பதற்காக, அதனைப் பாதுகாக்க, இந்திய உச்ச உளவு நிறுவனமான ‘ரா’ அமைப்பைச் சேர்ந்த உளவாளி பரமேஷ்வர் பிரதாபை (சரத்குமார்) நியமிக்கிறது இந்திய உளவுத்துறை.

பரமேஷ்வர் அதை பல ஆண்டுகள் விழிப்புடன் கண்காணித்து வந்த போதிலும், அவரையும் மீறி, 2026ஆம் ஆண்டு, அந்த அணு சாதனத்தை ரஷ்ய ராணுவத்தினர் அபகரித்துக்கொள்வதுடன், பரமேஷ்வரை பிணைக் கைதியாக்கி, ரஷ்யாவுக்குக் கொண்டு செல்வதோடு, அவரை பாகிஸ்தானிடம் ஒப்படைக்கவும் திட்டமிடுகிறார்கள்.

பரமேஷ்வர் பாகிஸ்தானிடம் ஒப்படைக்கப்பட்டால், நம் நாட்டு ராணுவ ரகசியங்களை அவரிடமிருந்து எதிரிகள் கறந்துவிடுவார்கள் என்று எண்ணும் ’ரா’ அதிகாரி வாமனமூர்த்தி (ஜெயப்பிரகாஷ்), பரமேஷ்வரை கொன்றுவிட ஒரு குழுவை நியமிக்கிறார்.

இதனை ஏற்க மறுத்து ஆட்சேபிக்கும் மற்றொரு ‘ரா’ அதிகாரியான இந்திரா வர்மா (மஞ்சு வாரியர்), பரமேஷ்வரை உயிருடன் மீட்கவும், பறிபோன அணு சாதனத்தைக் கைப்பற்றவும் தனக்கு விசுவாசமான ’ரா’ ஏஜெண்டான கௌதமிடம் (ஆர்யா) உதவி கேட்கிறார்.

அதற்கு சம்மதிக்கும் கௌதம், தனக்கு இந்திரா வர்மா கொடுத்த பணியைச் செய்து முடிப்பதற்காக ரஷ்யா செல்கிறார். அங்கு அவருக்கு பல அதிர்ச்சிகள் காத்திருக்கின்றன.

அந்த அதிர்ச்சிகள் என்ன? பரமேஷ்வர் காப்பாற்றப்பட்டாரா? அணு சாதனம் எதிரிகளின் ஆதிக்கத்துக்குள் சென்றுவிடாமல் மீட்கப்பட்டதா? இதனிடையே, ‘ரா’ ஏஜெண்ட் கௌதமை கைது செய்ய சென்னை போலீசார் துடிப்பது ஏன்? என்பன போன்ற பல கேள்விகளுக்கு எதிர்பாராத திருப்பங்களுடன் பரபரப்பாக விடை அளிக்கிறது ‘மிஸ்டர் எக்ஸ்’ திரைப்படத்தின் மீதிக்கதை.

‘ரா’ உளவாளி கௌதமாக ஆர்யா நடித்திருக்கிறார். திடகாத்திரமான உடல்வாகுடன் மிடுக்கான தோற்றத்தில் வருகிறார். சண்டைக் காட்சிகளில் தனிக்கவனம் பெறுகிறார். அனகாவுடனான காதல் காட்சிகள் ரசிக்க வைக்கின்றன.

மற்றொரு ‘ரா’ உளவாளி பரமேஷ்வர் பிரதாபாக சரத்குமார் நடித்திருக்கிறார். கதைக்குத் திருப்பம் தரக்கூடிய முக்கிய கதாபாத்திரத்தில் தனது அனுபவ நடிப்பை வெளிப்படுத்தி கலக்கியிருக்கிறார்.

வில்லன் அமரனாக கௌதம் ராம் கார்த்திக் நடித்திருக்கிறார். தன்னைச் சுற்றி நடக்கும் அத்தனை பிரச்னைகளையும் அநாயசமாகக் கையாளும் வில்லனாக நடிப்பில் மாற்றம் காட்டி பாஸ் மார்க் பெறுகிறார் கௌதம் ராம் கார்த்திக்.

’ரா’ அதிகாரி இந்திரா வர்மாவாக மஞ்சு வாரியர் நடித்திருக்கிறார். தீவிர முகபாவத்துடன் நடிப்பிலும், ஆக்‌ஷன் காட்சிகளிலும் பின்னி பெடலெடுத்திருக்கிறார்.

‘ரா’ அதிகாரி வாமனமூர்த்தியாக வரும் ஜெயப்பிரகாஷ், கீர்த்தனாவாக வரும் அனகா, அதிதியாக வரும் அதுல்யா ரவி, நிர்மலாவாக வரும் ரைஸா வில்சன், பொன்னுசாமியாக வரும் காளி வெங்கட் உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

இப்படத்தின் கதையை எழுதியிருக்கும் இயக்குநர் மனு ஆனந்த், திவ்யங்கா ஆனந்த் சங்கர், ராம் ஹெச் புத்ரன், பிரவீன் கே ஆகியோருடன் இணைந்து திரைக்கதை எழுதியிருக்கிறார். திரைக்கதையில் நிறைய ட்விஸ்ட் அண்ட் டர்ன்ஸ் இடம் பெற்றிருப்பது படத்தின் சுவாரஸ்யத்தைக் கூட்டியிருக்கிறது.

படத்தை இயக்கியிருக்கும் இயக்குநர் மனு ஆனந்த், ‘‘மிஷன் இம்பாசிபிள்’ என்ற ஹாலிவுட் திரைப்பட பாணியில் இதை திறம்பட இயக்கியிருக்கிறார். நியூக்ளியர் டிவைஸ், அதை துரத்தும் மற்ற நாடுகள், அந்த நேரத்தில் ஜி-20 மாநாடு, எந்த அசம்பாவிதம் இல்லாமல் நாட்டை காப்பாற்ற வேண்டும் போன்ற பல ஐடியாக்களுடன் விறுவிறுப்பாக படத்தை நகர்த்திச் சென்றுள்ளார்.

திபு நினன் தாமஸின் பின்னணி இசை, அருள் வின்செண்ட்டின் ஒளிப்பதிவு, பிரசன்னா ஜி.கே-யின் படத்தொகுப்பு, ஸ்டண்ட் சில்வாவின் சண்டை அமைப்பு உள்ளிட்ட தொழில்நுட்பங்கள் படத்தின் தரத்துக்கும், நேர்த்திக்கும் உறுதுணையாக இருந்துள்ளன.

‘மிஸ்டர் எக்ஸ்’ – த்ரில்லர் விரும்பிகளுக்கு செம விருந்து!

ரேட்டிங்: 3/5