ஹார்வேர்டு பல்கலை கழகத்தில் தமிழ் இருக்கை அமைக்க விஷால் ரூ.10லட்சம் நிதி!
![](http://www.heronewsonline.com/wp-content/uploads/2017/10/0a1d-71.jpg)
ஹார்வேர்டு பல்கலைக்கழக்கத்தில் தமிழ்மொழிக்கு இருக்கை அமைக்க நடிகர் விஷால் ரூ.10லடசம் நிதி அளித்துள்ளார். மொத்தம் சுமார் ரூ.40கோடி தேவைப்படும் நிலையில் இதுவரை சுமார் ரூ.17கோடி சேர்ந்திருப்பதாகவும், மத்திய அரசு உதவ முன்வர வேண்டும் என்றும் விஷால் கூறியுள்ளார்.
இது தொடர்பாக விஷால் வெளியிட்டுள்ள அறிக்கை:
380 ஆண்டுகளாக இயங்கி வரும் உலகின் சிறந்த பல்கலைக்கழகமான ஹார்வேர்டு பல்கலைக்கழகத்தில் தமிழ் மொழிக்காக ஓர் இருக்கை அமைய அமெரிக்கவாழ் தமிழர்களான மருத்துவர்கள் சம்பந்தமும், ஜானகிராமனும் தீவிர முயற்சி எடுத்து வருகிறார்கள். அவர்களுக்கு எனது பாராட்டுகளையும் நன்றிகளையும் தெரிவித்துக்கொள்கிறேன்.
மூன்று கோடி பேர் பேசும் உக்ரைன் மொழிக்கும், ஒன்றரைக் கோடி பேர் பேசும் செல்டிக் மொழிக்கும் ஹார்வேர்டில் இருக்கைகள் உள்ளன. ஹீப்ரூ, சமஸ்கிருதம் ஆகிய மொழிகளுக்கும் இருக்கின்றன. ஆனால் 8 கோடி பேர் பேசும் தமிழுக்கு இல்லை என்பது நாம் கவலைப்பட வேண்டியது. தமிழக அரசு சார்பில் 10 கோடி ரூபாய் ஒதுக்கப்பட்டிருப்பதற்கு நன்றிகள்!
தமிழுக்கு அங்கே ஓர் இருக்கை அமைக்க சுமார் 40 கோடி ரூபாய் தேவைப்படும் நிலையில், இதுவரை சுமார் 17 கோடி ரூபாய் தான் சேர்ந்துள்ளது. எனது சார்பில் 10 லட்சம் ரூபாய் செலுத்துகிறேன். உலகளாவிய தமிழர்கள் ஒன்றுபட்டு இதற்கான நிதி விரைவில் சேர உதவ வேண்டும் என்றும், மத்திய அரசும் இந்த வரலாற்று சிறப்புக்கு உதவ வேண்டும் என்றும் கேட்டுக்கொள்கிறேன்.
இவ்வாறு விஷால் கூறியுள்ளார்