பெத்லகேம் குடும்ப யூனிட் – விமர்சனம்

நடிப்பு: நிவின் பாலி, மமிதா பைஜு, சங்கீத் பிரதாப், பிந்து பணிக்கர், சுரேஷ் கிருஷ்ணா, வினய் ஃபோர்ட், ஸ்ரிந்தா, ஷமீர் கான், மீனாட்சி ரவீந்திரன், அயசங்கர் கரிமுட்டம், தங்கம் மோகன், வெட்டுக்கிளி பிரகாஷ் மற்றும் பலர்

இயக்கம்: கிரிஷ் ஏடி

எழுத்து: கிரிஷ் ஏடி, கிரண் ஜோசி

ஒளிப்பதிவு: அஜ்மல் சாபு

படத்தொகுப்பு: ஆகாஷ் ஜோசப் வர்கீஸ்

இசை: விஷ்ணு விஜய்

கலை இயக்கம்: ஆஷிக் எஸ்

ஆடை வடிவமைப்பு: தன்யா பாலகிருஷ்ணன்

ஸ்டண்ட்: சந்தோஷ்

தயாரிப்பு: திலீஷ் போத்தன், ஃபஹத் ஃபாசில், ஷ்யாம் புஷ்கரன்

பத்திரிகை தொடர்பு: யுவராஜ்

கேரள மாநிலம் எர்ணாகுளத்தில் வசிக்கும் நாயகன் ஜஸ்டினின் (நிவின் பாலி) வீட்டுக்கு அருகே தன் அப்பா, அம்மா, தம்பி சகிதம் புதிதாக குடி வருகிறார், கல்லூரியில் படிக்கும் நாயகி ஆஷ்லி (மமிதா பைஜு). அந்த ஊரில், கடந்த காலத்தில் ஏற்பட்ட ஓர் இழப்பு காரணமாக திருமணம் செய்துகொள்ளாமல், கேட்ரிங் தொழில் செய்துவரும் நடுத்தர வயதுக்காரரான ஜஸ்டினை ஊரே மதிக்கிறது. அவருடைய சகோதரர் ஜோயல் (சங்கீத் பிரதாப்), குறும்படம் எடுப்பதாக அலப்பறைகள் கொடுத்துவர, ஜஸ்டினோ பொறுப்புடன் ஊருக்கு உதவுகிறார்.

ஜஸ்டினுடன் ஆஷ்லி பழக நேரும்போது, கொஞ்சம் கொஞ்சமாக ஆஷ்லிக்கு ஜஸ்டினைப் பிடித்துப் போகிறது. இருவருக்கும் இடையே இருக்கும் 12, 13 ஆண்டுகள் வயது வித்தியாசம் முதலில் ஜஸ்டினை யோசிக்க வைக்கிறது. எனினும், ஒரு கட்டத்தில் ஆஷ்லியின் காதலை ஏற்றுக்கொள்கிறார் ஜஸ்டின். ஆனால், ஊர் என்ன நினைக்கும் என்று அஞ்சும் ஜஸ்டின், இது நமக்குள்ளேயே இருக்கட்டும்; வேறு யாருக்கும் தெரியக் கூடாது என்று கேட்டுக் கொள்கிறார்.

ஜஸ்டின் – ஆஷ்லி காதல் எவ்வளவு காலம் ரகசியமாக இருந்தது? எப்போது, எப்படி ஊராருக்குத் தெரிந்தது? அவர்களின் காதலை ஊரார் எப்படி புரிந்துகொண்டார்கள்? அதன்பிறகு என்ன நடந்தது? இளமையில் ஜஸ்டினுக்கு ஏற்பட்ட இழப்பு என்ன? என்பன போன்ற கேள்விகளுக்கு காமெடியும் ஃபீல்-குட் உணர்வும் கலந்து விடை அளிக்கிறது ‘பெத்லகேம் குடும்ப யூனிட்’ திரைப்படத்தின் மீதிக்கதை.

நாயகன் ஜஸ்டினாக நிவில் பாலி நடித்திருக்கிறார். மதிப்பும் மரியாதையும் மிக்கவராக வலம் வந்தாலும், ஆங்காங்கே வெளிப்படும் குழந்தைத்தனத்துடன் படம் முழுக்க நிறைந்திருக்கிறார். முதிர்ச்சியான நடிப்பு, கோபத்தின் வெளிப்பாடு, இவற்றைத் தாண்டி அவர் வெட்கப்படும் தருணங்கள்… அருமையிலும் அருமை.

நாயகி ஆஷ்லியாக மமிதா பைஜு நடித்திருக்கிறார். துடிப்பான கதாபாத்திரத்தில் இயல்பாக நடித்து, பார்வையாளர்களின் இதயத்தில் இடம் பிடித்துவிடுகிறார். நாயகனை சீண்டும் இடங்கள், காதலை வெளிப்படுத்தும் காட்சிகள், குடும்பத்தின் பிளாக்மெயிலுக்கு கலங்கும் இடம் போன்றவற்றில் அட்டகாசமாக நடித்திருக்கிறார்.

நாயகனின் சகோதரர் ஜோயலாக சங்கீத் பிரதாப் நடித்திருக்கிறார். தன் வழக்கமான காமெடி கவுன்ட்டர்களாலும் உடல்மொழியாலும் அதகளப்படுத்துகிறார். குறும்பட இயக்குநராக அவர் கூட்டும் அலப்பறைகள் ரகளை!

குஞ்சாண்டியாக வரும் பிந்து பணிக்கர், பைஜுவாக வரும் சுரேஷ் கிருஷ்ணா, அலெக்ஸாக வரும் வினய் ஃபோர்ட், ரேஷ்மாவாக வரும் ஸ்ரிந்தா, பிரிண்டோவாக வரும் ஷமீர்கான், ரியாவாக வரும் மீனாட்சி ரவீந்திரன், ரோசிலியாக வரும் தங்கம் மோகன், டேவிஸாக வரும் வெட்டுக்கிளி பிரகாஷ் உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் இயக்குநர் கிரீஷ் ஏடி. இவருக்கு இயக்குநராக இது ஐந்தாவது படம். எழுத்தாளராக ஆறாவது படம். இதுவரை அதிகம் சொல்லப்படாத ஒரு கோணத்தில், ஒரு ஃபீல்-குட் காதல் கதையை எடுத்து, அதை வெற்றித் திரைப்படமாக மாற்றியிருக்கிறார் இயக்குநர் கிரீஷ் ஏடி. இப்படிப்பட்ட ஒரு மென்மையான காதல் கதையை உணர்வுபூர்வமாகவும் ஆழமாகவும் அதே சமயத்தில் சிரிக்க சிரிக்க திரையில் சொன்னது இயக்குநர் கிரீஷ் ஏடியின் வெற்றியின் ரகசியம்.

விஷ்ணு விஜய்யின் இசையில் பாடல்கள் கதையை முன்நகர்த்துவதோடு, மெலடிகளாக மனதைக் கரைக்க, பின்னணி இசை உணர்வுபூர்வமான காட்சிகளுக்குப் பக்கபலமாக நிற்கிறது.

அஜ்மல் சபுவின் ஒளிப்பதிவு, ஆகாஷ் ஜோசப் வர்க்கீஸின் படத்தொகுப்பு உள்ளிட்ட தரமான மற்றும் நேர்த்தியான தொழில்நுட்பங்கள் இப்படத்தின் வெற்றிக்கு உறுதுணையாக இருந்துள்ளன.

`பெத்லகேம் குடும்ப யூனிட்’ – ஜாலியான பொழுதுபோக்கு திரைப்படம்; அனைத்து தரப்பினரும் அவசியம் கண்டு களிக்கலாம்!

ரேட்டிங்: 4/5