நூறு கோடி வானவில் – விமர்சனம்

நடிப்பு: ஹரீஷ் கல்யாண், சித்தி இத்னானி, கோவை சரளா, தம்பி ராமையா, சின்னி ஜெயந்த், சம்பத், எம்.ரினில், விஜே பார்வதி மற்றும் சிலர்

எழுத்து & இயக்கம்: சசி

ஒளிப்பதிவு: பிரசன்னா.எஸ்.குமார்

படத்தொகுப்பு: எம்.சுபாரக்

இசை: சித்து குமார்

பாடல்கள்: மோகன் ராஜன், விக்னேஷ் ராமகிருஷ்ணா

நடன அமைப்பு: சந்தோஷ்

கலை இயக்கம்: இ.தியாகராஜன்

தயாரிப்பு: ’மாதவ் மீடியா’ பாலாஜி கபா & ’அருண் அருணாச்சலம் புரொடக்ஷன்ஸ்’ அருண் அருணாச்சலம்

வெளியாகும் ஓடிடி தளம்: ஜீ 5

பத்திரிகை தொடர்பு: சதீஷ் (எய்ம்), சிவா

சென்னையைச் சேர்ந்த இளைஞர் வினோத் (ஹரீஷ் கல்யாண்). அவரது அப்பா (சம்பத்) கொடுமைக்காரர் என்பதாலும், அவர் தன் அம்மாவை கைவிட்டுவிட்டுப் போய் வேறொரு பெண்ணை மணந்துகொண்டார் என்பதாலும், மணவாழ்வு பாதிக்கப்பட்ட தன் அம்மா மிகவும் சிரமப்பட்டு தன்னை வளர்க்க வேண்டியிருந்தது என்பதாலும் அப்பாவை அடியோடு வெறுக்கிறார் வினோத். அப்பா இரண்டாவதாக திருமணம் செய்துகொண்ட பெண்ணையும் தான். இவர்களது முகங்களைப் பார்ப்பதே பாவம் என்ற எண்ணத்தில் விவேக் இருக்கிறார்.

விவேக்கிற்கு, மும்பையில் தலைமை அலுவலகத்தைக் கொண்டுள்ள சேனல் ஒன்றில் ‘நிகழ்ச்சி இயக்குநர்’ வேலை கிடைக்கிறது. இதற்காக மும்பை செல்லும் வினோத், அந்த சேனலின் ‘ நிகழ்ச்சி இயக்குநர்’ ஆகி பல நிகழ்ச்சிகளை இயக்கிக் கொடுக்கிறார். என்றாலும், அவருக்கு பதவி உயர்வு கொடுக்கப்படவில்லை.

இந்நிலையில், கோவாவில் உள்ள கிளை அலுவலகத்துக்குப் பணியிட மாறுதல் செய்யப்படுகிறார் வினோத். அங்கு வெற்றிகரமான நிகழ்ச்சி இயக்குநராக இருந்தால் தான் அவருக்கு பதவி உயர்வு கிடைக்க வாய்ப்புள்ளது என்ற சூழலில் கோவா போய் சேருகிறார்.

கோவாவில் சுற்றுலாப் பயணிகளுக்கு வழிகாட்டியாக இருக்கும் ஃபென்னி (சித்தி இத்னானி) என்ற இளம்பெண்ணை, அவருடனான தற்செயலான மோதலில் வினோத் சந்திக்கிறார். ஃபென்னியின் அழகும், வசீகரமும் வினோத்துக்குப் பிடித்துப் போகிறது. ஃபென்னி மீது ஒருதலையாக காதல் கொள்ளும் வினோத், தான் இயக்க இருக்கும் தொடர் நிகழ்ச்சியைத் தொகுத்து வழங்க ஃபென்னி தான் பொருத்தமான ஆங்கர் என்று நினைக்கிறார். ஆனால் அவரது நிகழ்ச்சியைத் தொகுத்து வழங்குவதில் தனக்கு ஆர்வம் இல்லை என்று ஃபென்னி மறுத்துவிடுகிறார்.

உண்மையில், டிவி தொகுப்பாளர் ஆக வேண்டும் என்பது தான் ஃபென்னியின் இலட்சியமாக இருந்தது. ஆனால், அவரது காதலர் ரிச்சிக்கு (எம்.ரினல்) அதில் உடன்பாடு இல்லை. இது தொடர்பாக ஒருநாள் இருசக்கர வாகனத்தில் போகும்போது காதலர்கள் இருவருக்கும் இடையில் காரசார விவாதம் நடக்க, கோபத்தில் ரிச்சி வாகனத்தின் வேகத்தை கண்மூடித்தனமாக அதிகரிக்க, பயங்கர விபத்து ஏற்பட்டு, ரிச்சி மருத்துவமனையில் அனுமதிக்கப்பட்டு, கோமா நிலையில் படுத்த படுக்கையாகக் கிடக்கிறார். அன்று முதல் ஒவ்வொரு நாளும் ரிச்சியின் படுக்கை அருகே இருந்து அவரோடு பேசுவது போல் வீடியோ எடுத்து வருகிறார் ஃபென்னி. ரிச்சிக்கு நினைவு திரும்பியவுடன் அவருக்குப் போட்டுக் காட்ட அந்த வீடியோக்களைப் பத்திரப்படுத்தி வருகிறார். இது தெரிந்து, மேலும் உருகி, ஃபென்னியை இன்னும் ஆழமாகக் காதலிக்கத் தொடங்கி விடுகிறார் வினோத்.

இந்நிலையில் ரிச்சிக்கான சிகிச்சையைத் தொடர நிறைய பணம் தேவைப்படுகிறது. ரிச்சியைக் காப்பாற்ற வேண்டும் என்ற கடமை உணர்வு காரணமாக ஒரு கட்டத்தில் வினோத் இயக்கும் தொடர் நிகழ்ச்சியில் தொகுப்பாளராகப் பணிபுரிய ஃபென்னி சம்மதிக்கிறார்.

வினோத்தும், ஃபென்னியும் நெருங்கிப் பணியாற்றும்போது இருவரது இதயங்களும் நெருங்கி வருகின்றன. எனினும் கோமாவில் இருக்கும் காதலர் ரிச்சியைக் கைவிடவும் முடியாமல், வினோத்தின் நெருக்கத்தைத் தள்ளவும் முடியாமல் ஃபென்னி குழம்பித் தவிக்கிறார்.

இந்நிலையில், ரிச்சிக்கு நினைவு திரும்புகிறது. பூரண குணமடைந்து படுக்கையைவிட்டு எழுந்து விடுகிறார்…

அதன்பின் என்ன நடந்தது? தனக்குப் பிடிக்காத தொகுப்பாளர் பணியை ஃபென்னி செய்வதை அறிந்த ரிச்சியின் மனநிலை என்ன? ரிச்சி மீதான காதலுக்காக தொகுப்பாளர் பணியையும், வினோத் மீதான காதலையும் ஃபென்னி உதறித் தள்ளினாரா? அல்லது தனக்குப் பிடித்த தொழிலையும், வினோத் மீதான காதலையும் தொடர்வதற்காக ரிச்சியை விட்டு விலகினாரா? ஃபென்னி இறுதியில் என்ன முடிவு செய்தார்? என்பன போன்ற கேள்விகளுக்கு முக்கோணக் காதலுக்கே உரிய பிரச்சனைகள் மற்றும் பதட்டங்களுடன் கிளைமாக்ஸை நோக்கி நகர்ந்து, சரியாக விடை அளிக்கிறது ‘நூறு கோடி வானவில்’ திரைப்படத்தின் மீதிக்கதை.

இப்படத்தில் வினோத் என்ற கதாபாத்திரத்தில் ஹரீஷ் கல்யாண் நடித்திருக்கிறார். ‘லவ்வர் பாய்’க்கு உரிய சப்ஜெக்ட் என்பதால், இயற்கையாகவே அதற்குரிய முகபாவனை மற்றும் உடல்மொழியைப் பெற்றிருக்கும் அவர், அலட்டி கொள்ளாமல் அளவாக நடித்து கரை சேர்ந்திருக்கிறார்.

ஃபென்னி என்ற கதாபாத்திரத்தில் சித்தி இத்னானி நடித்திருக்கிறார். இருதலைக் கொள்ளி எறும்பு போல் சிக்கித் தவிக்கும் உணர்ச்சிமயமான பாத்திரத்தை சிறப்பாகச் செய்து, இப்படத்தைத் தாங்கிப் பிடித்திருக்கிறார்.

ரிச்சி என்ற கதாபாத்திரத்தில் எம்.ரினல் நடித்திருக்கிறார். அவர் கோமாவிலிருந்து எழுந்தவுடனே படம் இப்படித் தான் போய் முடியும் என்று முன்கூட்டியே யூகிக்க முடிவது இக்கதையில் பெரிய பலவீனம்.

கேமரா உமனாக வரும் விஜே பார்வதி தன்னுடைய காமெடி வசனங்களால் கவனம் ஈர்க்கிறார்.

கோவை சரளா, தம்பி ராமையா, சின்னி ஜெயந்த், சம்பத் உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

2015ஆம் ஆண்டு வெளியான ‘எவ்ரி டே ஐ லவ் யூ’ என்ற பிலிப்பைன்ஸ் நாட்டு திரைப்படத்தின் உரிமையை வாங்கி, (அது குறித்து டைட்டிலில் முறையாகத் தெரிவித்துவிட்டு), அப்படத்திலிருந்து மூலக்கதையை எடுத்து, தமிழ் ரசிகர்கள் ஏற்கும் வகையில் சிற்சில மாற்றங்கள் செய்து திரைக்கதை அமைத்து, வசனம் எழுதி, இயக்கியிருக்கிறார் இயக்குநர் சசி. ’காதல் என்ற பெயரில் தடுமாறாமல், தன் சுயவளர்ச்சிக்கு உறுதுணையாக இருக்கும் ஓர் ஆணையே ஒரு பெண் வாழ்க்கைத் துணையாகத் தேர்வு செய்ய வேண்டும்’ என்ற அருமையான கருத்தை – போதனையாக இல்லாமல் – கதை மற்றும் காட்சிகளினூடே இப்படத்தில் வலியுறுத்தியிருக்கிறார் இயக்குநர் சசி. அதே நேரம் மனித உணர்வுகளை நுட்பமாகக் கையாளுவதில் வல்லவரான இயக்குநர் சசி, அதை இந்தப் படத்திலும் நேர்த்தியாக செய்திருப்பது பாராட்டுக்கு உரியது.

எனினும், இப்படம் 2019ஆம் ஆண்டு எடுக்கப்பட்டு, சுமார் 7 ஆண்டுகள் வெளியாகாமல் கிடப்பில் கிடந்ததன் எதிர்மறை விளைவு, ஆங்காங்கே உறுத்தவே செய்கிறது.

சித்து குமார் இசையில் பாடல்களும், பின்னணி இசையும் ஓ.கே ரகம்.

பிரசன்னா.எஸ்.குமாரின் ஒளிப்பதிவு, காட்சிகளை வண்ணமயமாக திரையில் தீட்டியிருக்கிறது.

நூறு கோடி வானவில் – கருத்தாழம் மிக்க அழகிய காதல் கதை! காதலிப்பவர்கள் மட்டுமல்ல, காதலிக்காதவர்களும் ஜீ 5 ஓடிடி தளத்தில் பார்த்து மகிழலாம்!

ரேட்டிங்: 3/5