மூக்குத்தி அம்மன் 2 – விமர்சனம்

நடிப்பு: நயன்தாரா, துனியா விஜய், ரெஜினா கசாண்ட்ரா, ஊர்வசி, யோகி பாபு, மைனா நந்தினி, கருடா ராம், அபிநயா, ஸ்ருதி.எஸ், வி.ஆர்.விஸ்வநாதன், சிவகுமார்.எஸ், சுனில், வர்ஷினி வெங்கட், பழ,கருப்பையா, அனந்த அதிஷ்ட லட்சுமி, நிதின் சத்யா, டெப்லினா சகி, குஷ்பு (சிறப்பு தோற்றம்), சினேகா (சிறப்புத் தோற்றம்) மற்றும் சிலர்

இயக்கம்: சுந்தர்.சி

திரைக்கதை & வசனம்: வெங்கட் ராகவன்

ஒளிப்பதிவு: கோபி அமர்நாத்

படத்தொகுப்பு: ஃபென்னி ஆலிவர்

இசை: ஹிப்ஹாப் தமிழா

ஸ்டண்ட்: ராஜசேகர் கே

இணைத் தயாரிப்பு: குஷ்பு சுந்தர், குஷ்மிதா கணேஷ், விக்னேஷ் சிவன்

தயாரிப்பு: ’வேல்ஸ் பிலிம் இண்டர்நேஷனல் லிமிட்டெட்’ டாக்டர் ஐசரி கே கணேஷ்

பத்திரிகை தொடர்பு: சதீஷ் (எய்ம்), சிவா

‘வேல்ஸ் பிலிம் இண்டர்நேஷனல் லிமிட்டெட்’ டாக்டர் ஐசரி கே கணேஷ் தயாரிப்பில், ஆர்ஜே பாலாஜி இயக்கத்தில், நயன்தாரா நடிப்பில் உருவாகி வெளியான ஃபேண்டஸி – காமெடி திரைப்படமான ‘மூக்குத்தி அம்மன்’, 2020ஆம் ஆண்டு வெளியாகி மிகப் பெரிய வெற்றியைப் பெற்றது. இந்த வெற்றி அளித்த ஊக்கம் காரணமாக, அதே பட நிறுவனம் தயாரித்துள்ள ‘மூக்குத்தி அம்மன் 2’ திரைப்படம், தீபாவளியை முன்னிட்டு, இன்று (நவம்பர் 6ஆம் தேதி) உலகெங்கிலும் திரையரங்குகளில் வெளியாகியிருக்கிறது. இதிலும் நயன்தாரா தான் நாயகியாக நடித்திருக்கிறார். ஆனால் இயக்குநர் சுந்தர்.சி இயக்கியிருக்கிறார். இயக்குநர் மட்டும் வேறு அல்ல; முந்தைய படத்திலிருந்து இப்படத்தின் கதையும் கதைக்களமும் கூட வேறு தான்…

ரசிகர்கள், விமர்சகர்கள், திரைத்துறையினர் என சகலராலும் பெரிதும் எதிர்பார்க்கப்படும் இந்த ‘மூக்குத்தி அம்மன் 2’ எப்படி இருக்கிறது? பார்ப்போம்…

பெண் போலீசாகப் பணிபுரியும் நாயகி சக்திக்கு (நயன்தாரா) இரவில் அதிபயங்கர அமானுஷ்யக் கனவுகள் அடிக்கடி வந்து திடுக்கிடச் செய்து திகைக்க வைக்கின்றன. அந்த கனவுகளில் ஓர் அரக்கன் (அல்லது சாத்தான்) குதிரையிலேறி சக்தியின் படுக்கையறைக்குள் நுழைந்து கடந்து போவது போலவும், அதைத் தொடர்ந்து, குதிரைகளில் அமர்ந்திருக்கும் ஏராளமான போர்வீரர்கள் படையெடுத்து வருவது போலவும் காட்சிகள் வருகின்றன. ஒரு கட்டத்தில், துணைக்குப் படுத்திருக்கும் சக்தியின் அம்மா பாலம்மாவுக்கும் (ஊர்வசி) இந்த காட்சிகள் புலப்பட ஆரம்பிக்கின்றன.

அதோடு ”மயிலாஞ்சிக்கு வா” என்று ஒரு அமானுஷ்யம் அடிக்கடி அழைப்பது சக்திக்கு கேட்கிறது. இந்த நிகழ்வுகளுக்கெல்லாம் என்ன பொருள் என்று புரியாமல் குழம்பும் சக்தி, மயிலாஞ்சி என்ற ஊருக்குப் போனால் எல்லாம் தெளிவாகிவிடும் என்று நம்புகிறார். இதற்காக பணியிட மாறுதல் (டிரான்ஸ்ஃபர்) வாங்கிக்கொண்டு, தன் அம்மாவுடன் கிளம்பி, மயிலாஞ்சி ஊர்போய் சேருகிறார். போன இடத்தில் இரண்டாயிரம் ஆண்டுகளாக பூமிக்குள் புதைந்து கிடக்கும் பழமையான மூக்குத்தி அம்மன் கோயில் ஒன்றை கண்டுபிடிக்கிறார்.

அதே சமயம். இரண்டாயிரம் ஆண்டுகளுக்குமுன் ஜீவசமாதி அடைந்த தீய சக்தியான ரெஜினா கசாண்ட்ராவை உயிர்தெழுந்து வரச் செய்கிறார் மந்திரவாதி சுனில். தான் தான் மூக்குத்தி அம்மன் என்ற ஞாபகம் கூட இல்லாமல், சாதாரண போலீசாக இருக்கும் சக்தியை, ஒன்பது கிரகங்களும் ஒரே நேர்கோட்டில் வரும் நாளில் அழித்தொழிக்கத் துடிக்கிறார் ரெஜினா. இதனிடையே, இவராலும், இவரது – 2ஆயிரம் ஆண்டுகளுக்கு முந்தைய – முன்ஜென்மக் காதலர் துனியா விஜய்யாலும் சக்திக்கு பற்பல சிக்கல்கள் ஏற்படுகின்றன.

சக்தி என்ற மூக்குத்தி அம்மனை தீய சக்திகளான ரெஜினா மற்றும் துனியா விஜய் அழிக்க நினைத்து சிக்கல்களை ஏற்படுத்துவது ஏன்? அவர்களுக்கிடையில் என்ன பகை? இரண்டாயிரம் ஆண்டுகளுக்கு முன் நடந்த சம்பவங்கள் என்ன? மூக்குத்தி அம்மனுக்கு தானொரு தெய்வம் என்பதே மறந்துபோகும் அளவுக்கு என்ன நடந்தது? அவருக்கு தன்னைப் பற்றிய தெய்வப் பிரக்ஞை எப்போது ஏற்படுகிறது? அதன்பின் மூக்குத்தி அம்மனுக்கும் ரெஜினா உள்ளிட்ட தீயசக்திகளுக்கும் இடையில் நடைபெறும் யுத்தம் எப்படிப்பட்டது? முடிவு என்ன? என்பன போன்ற கேள்விகளுக்கு மயிர்கூச்செறியும் கிராஃபிக்ஸ் காட்சிகளுடன் விடை அளிக்கிறது ‘மூக்குத்தி அம்மன் 2’ திரைப்படத்தின் மீதிக்கதை.

இப்படத்தில் நாயகியாக நயன்தாரா நடித்திருக்கிறார். முதலில் தான் மூக்குத்தி அம்மன் என்பதையே மறந்துவிட்ட சாதாரண பெண் போலீஸ் சக்தியாக வருகிறார். அப்போது தனக்கு மர்மமான முறையில் ஏற்படும் அமானுஷ்ய அனுபவங்கள் தொடர்பான குழப்பத்தை எளிய பெண்ணுக்குரிய முகபாவனை மற்றும் உடல்மொழியால் வெளிப்படுத்தியிருக்கிறார். பின்னர் அவர் அழகிய மூக்குத்தி அம்மனாக தோன்றி அதகளப்படுத்துகையில் மிகவும் வசீகரிக்கிறார். அவரது அம்மன் அவதாரமும், அதிரடி ஆக்ஷன் காட்சிகளும் கண்கொள்ளாக் காட்சியாக அமைந்திருப்பது இப்படத்துக்கு மிகப்பெரிய பலம்.

மூக்குத்தி அம்மனின் எதிரியாக, வில்லியாக, சூனியக்காரி வேடத்தில் ரெஜினா கசாண்ட்ரா நடித்திருக்கிறார். கவர்ந்திழுக்கும் கவர்ச்சி உடையில் வரும் அவர், பழிவாங்கும் வெறி பொங்கும் ஆவேச நடிப்பில் மிரட்டியிருக்கிறார். அவரது காதல் கணவராக கட்டுடலுடன் வரும் துனியா விஜய் தன் பங்குக்கு பயமுறுத்தி வில்லத்தனம் செய்திருக்கிறார்.

நாயகியின் அம்மா பாலம்மாவாக வரும் ஊர்வசி தனக்கே உரித்தான பாணியில் அவ்வப்போது காமெடி வசனம் பேசி ரசிக்க வைத்திருக்கிறார். யோகி பாபு, வெங்கட் ராகவன், மைனா நந்தினி, லொள்ளு சபா சாமிநாதன் ஆகியோர் ஆங்காங்கே சிரிப்பு மூட்டியிருக்கிறார்கள்.

மந்திரவாதிகளாக வரும் கருடா ராம், சுனில் ஆகியோர் தங்களுக்குக் கொடுக்கப்பட்ட வேலையைக் குறைவின்றி நிறைவாக செய்திருக்கிறார்கள்.

குஷ்புவும், சினேகாவும் மூக்குத்தி அம்மனின் சகோதரிகளாக சிறப்புத் தோற்றத்தில் வந்து சர்ப்ரைஸ் கொடுத்திருக்கிறார்கள்.

நிதின் சத்யா, அபிநயா, பழ கருப்பையா உள்ளிட்ட ஏனைய நடிப்புக் கலைஞர்கள் அனைவரும் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

இப்படத்தின் திரைக்கதையை அமைத்திருக்கும் வெங்கட் ராகவன், வசனங்களை அருமையாகவும், கூர்மையாகவும் எழுதியிருக்கிறார்.

இயக்குநர் சுந்தர்.சி இப்படத்தை இயக்கியிருக்கிறார். ரம்யா கிருஷ்ணன் அம்மனாக நடித்த ‘அம்மன்’ மற்றும் ‘ராஜகாளியம்மன்’, விஜயசாந்தி அம்மனாக நடித்த ‘ஸ்ரீபண்ணாரி அம்மன்’, ரோஜா அம்மனாக நடித்த ‘கோட்டை மாரியம்மன்’, நயன்தாரா அம்மனாக நடித்த ‘மூக்குத்தி அம்மன் 1’ என தமிழில் ஏகப்பட்ட அம்மன் படங்கள் இதற்குமுன் வந்துள்ளபோதிலும், அவற்றிலிருந்து முற்றிலும் வித்தியாசமாக இந்த மூக்குத்தி அம்மன் 2’ திரைப்படத்தை படைத்திருக்கிறார் இயக்குநர் சுந்தர்.சி. ஏகத்துக்கும் கிராபிக்ஸ் தொழில்நுட்பத்தை தாராளமாக பயன்படுத்தி, பிரமிப்பூட்டும் மாயாஜாலக் காட்சிகளும், அசத்தலான அதிரடி சண்டைக் காட்சிகளும் நிறைந்த விறுவிறுப்பான ஃபேண்டஸி திரைப்படமாக இதை உருவாக்கி, அனைத்துத் தரப்பினருக்கும் – குறிப்பாக பெண்களுக்கு பொழுதுபோக்கோடு பக்தி பரவசத்தை ஏற்படுத்துவதில் வெற்றி பெற்றுள்ளார் இயக்குநர் சுந்தர்.சி.

ஹிப்ஹாப் தமிழாவின் பாடலிசை மற்றும் பின்னணி இசை, கோபி அமர்நாத்தின் ஒளிப்பதிவு, ஃபென்னி ஆலிவரின் படத்தொகுப்பு, ராஜசேகரின் ஸ்டண்ட் வடிவமைப்பு உள்ளிட்ட நேர்த்தியான தொழில்நுட்பங்கள் இப்படத்தின் வெற்றிக்கு உறுதுணையாக இருந்துள்ளன.

‘மூக்குத்தி அம்மன் 2’ – குடும்பத்துடன் கண்டு களிக்கலாம்! ஆனந்தப் பரவசம் அடையலாம்!

ரேட்டிங்: 4/5