அன்பில் அவன் – விமர்சனம்

நடிப்பு: அசோக் செல்வன், பிரீத்தி முகுந்தன், கதிர் பாலு, மகா டெல்லி கணேஷ், சாபுமோன் அப்துல் சமத், ரேவதி மற்றும் சிலர்

இயக்கம்: ஆர்.கார்த்திகேயன்

கதை: விக்னேஷ் ராஜா

திரைக்கதை: விக்னேஷ் ராஜா, ஆர்.கார்த்திகேயன், அசோக் செல்வன்

ஒளிப்பதிவு: கௌதம் ராஜேந்திரன்

படத்தொகுப்பு: செல்வா ஆர்.கே

இசை: கோவிந்த் வசந்தா

கலை இயக்கம்: மணிகண்டன் ஸ்ரீனிவாசன்

நடன காட்சிகள்: லீலாவதி குமார், அனுஷா விஸ்வநாதன்

சண்டை காட்சிகள்: பீட்டர் ஹெய்ன்

தயாரிப்பு: ஐங்கரன் இண்டர்நேஷனல், ஹேப்பி ஹை பிக்சர்ஸ்

தயாரிப்பாளர்: கே.கருணாமூர்த்தி, அசோக் செல்வன், அபிநயா செல்வம்

பத்திரிகை தொடர்பு: யுவராஜ்

சென்னையைச் சேர்ந்த சாதாரண குடும்பத்துப் பையனான சூர்யாவும் (அசோக் செல்வன்), பணக்காரக் குடும்பத்துப் பெண்ணான இயலும் (பிரீத்தி முகுந்தன்) காதலித்து, பெற்றோர்களின் எதிர்ப்பை மீறி திருமணம் செய்துகொள்கிறார்கள். பணத் தேவைக்காக ஒரே நட்சத்திர விடுதியில் இருவரும் வேலை பார்க்கிறார்கள். பரஸ்பரம் காதலிக்கக் கூட நேரம் கிடைக்காமல் வேலைப்பளுவில் திண்டாடுகிறார்கள். என்றாலும், தங்கள் சம்பளம் கைக்கும் வாய்க்கும் போதாமல் சிரமப்படுகிறார்கள்.

இயற்கை அழகு சூழ்ந்த ஒரு கோடை வாசஸ்தலத்தில், ‘ஹோம் ஸ்டே’ எனப்படும் ஒரு தங்கும் விடுதி தொடங்க வேண்டும் என்பது திருமணத்துக்கு முன்பிருந்தே இயலின் கனவு. ”உன் கனவை நிச்சயம் நனவாக்குவேன்” என்று அப்போது வாக்குறுதி கொடுத்திருந்தார் சூர்யா. அதை இப்போது நிறைவேற்ற நினைக்கும் அவர், ஒரு மலைப்பகுதியில் அரச குடும்பத்தைச் சேர்ந்த ராணி பத்மினிக்கு (ரேவதி) சொந்தமான – தற்போது யாரும் வசிக்காத – பெரிய வீட்டை, ராணியிடம் கெஞ்சி மன்றாடி விலைக்கு வாங்குகிறார்.

ஆனால், அங்கு விடுதி நடத்துவதற்கான அனுமதி பெறுவதில் தடங்கல்கள் ஏற்படுகின்றன. சூர்யாவையும், இயலையும் அரசு அலுவலகங்கள் அலைக்கழிக்கின்றன. போதாக்குறைக்கு எம்.எல்.ஏ ராஜநாயகம் (கதிர் பாலு), அவரது வழக்கறிஞர் மார்ட்டின் (சபுமோன்), போலீஸ் இன்ஸ்பெக்டர் தவசி (மகா டெல்லி கணேஷ்) ஆகியோர் முட்டுக்கட்டை போடுகிறார்கள்.

அதன்பின் என்ன நடந்தது? சூர்யாவும், இயலும் தங்களுக்கு எதிரான முட்டுக்கட்டையைத் தகர்த்து, ‘ஹோம் ஸ்டே’ என்னும் தங்கள் கனவை நனவாக்கினார்களா? அல்லது செல்வமும் செல்வாக்கும் உள்ள பெரிய மனிதர்களோடு மோத முடியாமல் கனவைக் கைவிட்டு சென்னை திரும்பினார்களா? என்பன போன்ற கேள்விகளுக்கு அதிரடி ஆக்ஷனுடன் விடை அளிக்கிறது ‘அன்பில் அவன்’ திரைப்படத்தின் மீதிக்கதை.

கதையின் நாயகன் சூர்யாவாக அசோக் செல்வன் நடித்திருக்கிறார். மனைவியின் கனவை நனவாக்க முயலும் கணவன் கதாபாத்திரத்தில் வரும் அவர், காதலுடன் மனைவியை கொஞ்சும் காட்சிகளிலும், ஆற்றாமையுடன் வெடித்துச் சிதறும் காட்சிகளிலும் சிறப்பான நடிப்பை வெளிப்படுத்தியிருக்கிறார். படத்தின் இரண்டாம் பாதியில் வரும் அதிரடி ஆக்ஷன் காட்சிகளில் கடினமான உடலுழைப்பைக் கொட்டி நடித்திருக்கிறார்.

நாயகனின் காதல் மனைவி இயலாக பிரீத்தி முகுந்தன் நடித்திருக்கிறார். வசீகரிக்கும் தோற்றத்துடனும், கட்டிப்போடும் கண்களுடனும் அழகாய் திரையை அலங்கரிக்கிறார். காதல், கோபம், துணிச்சல் போன்ற வெவ்வேறு மனநிலைகளை நன்றாக வெளிப்படுத்தியிருக்கிறார்.

எம்.எல்.ஏ ராஜநாயகமாக வரும் கதிர் பாலு, அவரது வழக்கறிஞர் மார்ட்டினாக வரும் சபுமோன், போலீஸ் இன்ஸ்பெக்டர் தவசியாக வரும் மகா டெல்லி கணேஷ் ஆகியோர் வில்லத்தனத்தில் மிரட்டியிருக்கிறார்கள்.

மலை வாசஸ்தலத்தில் இருக்கும் பெரிய வீட்டின் உரிமையாளராக – ராணி பத்மினியாக – ரேவதி குறைந்த நேரமே வந்தாலும், கொடுத்த வேலையை குறைவின்றி நிறைவாக செய்திருக்கிறார்.

இப்படத்தின் கதையை விக்னேஷ் ராஜா எழுத, திரைக்கதையை விக்னேஷ் ராஜா, ஆர்.கார்த்திகேயன், அசோக் செல்வன் ஆகியோர் எழுத, இயக்குநர் ஆர்.கார்த்திகேயன் இயக்கியிருக்கிறார். நாயகன் – நாயகி காதலுறவு படத்தின் பலம். இருவருக்கும் இடையிலான சின்னச் சின்ன சீண்டல்களும், வாக்குவாதங்களும் ரசிக்க வைக்கின்றன. படத்தின் இரண்டாம் பாதி, நாயகனின் ஹீரோயிசம் கலந்த ஆக்ஷன் திரில்லராக மாற்றப்பட்டிருப்பது அத்தனை ரசிப்புக்குரியதாக இல்லை. குறிப்பாக அசோக் செல்வனுக்கு கொடுக்கப்பட்டிருக்கும் ஹீரோயிச பில்டப்புகளும், ஏறக்குறைய அரை மணி நேரம் நடக்கும் விடுதி சண்டைக் காட்சியும் அயர்ச்சியை ஏற்படுத்துகின்றன.

பின்னணி இசையும், ஒளிப்பதிவும் காட்சிகளுக்கு கைகொடுத்திருக்கின்றன.

‘அன்பில் அவன்’ – காதலையும், அதிரடி ஆக்ஷனையும் விரும்பும் ரசிகர்கள் பார்த்து மகிழலாம்!

ரேட்டிங்: 3/5