தி கிராண்ட் மாஸ்டர் – விமர்சனம்

நடிப்பு: அபர்ணதி, லிங்கேஷ், மாஸ்டர் அஸ்வின், வெற்றிச்செழியன், சுரேஷ் மேனன், தமிழரசி, அன்பு மற்றும் சிலர்

எழுத்து & இயக்கம்: வெற்றிச்செழியன்

ஒளிப்பதிவு: அர்ஜுன் ரவி, ஞானசேகர் ஆர்.எஸ்

படத்தொகுப்பு: ரஞ்சித் சிகே

இசை: தினேஷ் ஆண்டனி

கலை இயக்கம்: ராகவன் சஞ்சீவி

ஸ்டண்ட்: ராக் பிரபு

தயாரிப்பு: ‘வி6 பிலிம் பிரைவேட் லிமிட்டெட்’ வேலாயுதம்

பத்திரிகை தொடர்பு: சதீஷ் எய்ம், சிவா

கதையின் நாயகி அபர்ணதியும் ( கதையில் பெயர் வெள்ளையம்மா), அவரது கணவர் லிங்கேஷும் (கதையில் பெயர் ஒண்டி வீரன்) கிராமத்து ஏழைகள். தலித் சமூகத்தைச் சேர்ந்தவர்கள். ஆடுபுலி ஆட்டம் சிறப்பாக விளையாடத் தெரிந்த அபர்ணதி, ஊரில் நடக்கும் விளையாட்டுப் போட்டியில் ஆதிக்க சாதி ஆட்களைத் தோற்கடித்து வெற்றி பெறுகிறார். இது பொறுக்காத ஆதிக்க சாதிக் கும்பல், அபர்ணதியின் கணவரான லிங்கேஷை கட்டி வைத்து அடித்து, ரத்தக் காயப்படுத்தி, சித்ரவதை செய்கிறார்கள். அவரை விட்டுவிடும்படி அழுது கொஞ்சும் அபர்ணதியிடம், “நாங்கள் சொல்லும் செஸ் (சதுரங்கம்) விளையாட்டு வீரருடன் நீ செஸ் விளையாடி ஜெயித்தால், உன் கணவரை விட்டு விடுவோம்” என்று சவாலுக்கு அழைக்கிறார்கள். இந்த சவாலை ஏற்றுக்கொள்ளும் அபர்ணதி, வைராக்கியத்துடன் செஸ் விளையாட்டில் இரண்டு நாட்கள் பயிற்சியை மேற்கொண்டு திறமையை வளர்த்துக்கொண்டு, ஆதிக்க சாதியினர் முன்நிறுத்திய செஸ் வீரரைத் தோற்கடித்து, தன் கணவரை மீட்கிறார்.

சாதிக் கொடுமைகள் தலைவிரித்தாடும் கிராமம் வேண்டாம் என்று நகர்ப்புறத்துக்கு குடி பெயருகிறார்கள் அபர்ணதி – லிங்கேஷ் தம்பதி. அங்கு மலம் – சாக்கடை உள்ளிட்ட கழிவுகளை துப்புரவு செய்யும் தூய்மைப் பணியாளர் ஆகும் அபர்ணதி, அங்கும் செஸ் போட்டிகளில் பங்கேற்று வெற்றிவாகை சூடுகிறார். இதுவரை செஸ் விளையாட்டில் சாம்பியனாகத் திகழும் ஒரு பணக்கார இளம்பெண், இறுதி ஆட்டம் ஒன்றில் அபர்ணதியுடன் மோத வேண்டிய நிலை ஏற்படுகிறது. தனது மகள், மலம் அள்ளும் ஒரு பெண்ணிடம் தோற்பதை விரும்பாத அந்த பணக்காரப் பெண்ணின் தந்தையும் ஆதிக்க சாதியைச் சேர்ந்த தொழிலதிபருமான சுரேஷ் மேனன், போட்டியிலிருந்து விலகுமாறு மகளை அறிவுறுத்துகிறார். அதை ஏற்க மறுத்து, பிடிவாதம் செய்கிறார் மகள்.

இந்நிலையில், ஏற்பட்ட ஒரு வாக்குவாதத்தில், அபர்ணதி தோற்றால் அவரது ஆயுள் முழுக்க சுரேஷ் மேனனின் வீட்டுக் கழிவறைகளை தூய்மை செய்ய வேண்டும்; சுரேஷ் மேனனின் மகள் தோற்றால், அபர்ணதி வசிக்கும் குப்பத்தில் உள்ள சாக்கடையை ஒருநாள் சுரேஷ் மேனன் தூய்மை செய்ய வேண்டும் என்று பந்தயம் முடிவாகிறது. இறுதிப்போட்டியில் அபர்ணதி வெற்றி பெற்றுவிடுவதால், குப்பத்து மக்களெல்லாம் வேடிக்கை பார்க்க, சுரேஷ் மேனன் அங்கு வந்து சாக்கடையில் இறங்கி அதை சுத்தம் செய்கிறார். இது ஏற்படுத்திய அவமானத்தால் ஆத்திரம் அடைந்த சுரேஷ் மேனன், அபர்ணதியின் கணவரான லிங்கேஷை தீர்த்துக் கட்டுகிறார். கணவனை இழந்து விதவையாகும்போது அபர்ணதி ஐந்து மாத ஆண் குழந்தையின் தாய்.

குழந்தை வளர்ந்து, அஸ்வினாக அரசுப் பள்ளியில் படிக்கும்போது, அவனை வழக்கறிஞர் ஆக்க வேண்டும் என்று ஆசைப்படுகிறார் அபர்ணதி. ஆனால், பள்ளியில் உடற்பயிற்சி ஆசிரியரால் சாதிக்கொடுமைக்கு ஆளாகும் அஸ்வினோ, செஸ் விளையாட்டு மீது ஆர்வம் உள்ளவனாக இருக்கிறான். தனது கடந்தகால கசப்பான அனுபவங்கள் காரணமாக, மகனின் செஸ் ஆர்வத்துக்கு தடை போடுகிறார் அபர்ணதி. ஆனால், முற்றும் துறந்த முனிவர் போல் குப்பை மேட்டில் திரியும் ஒரு நபர், அஸ்வினின் செஸ் ஆர்வத்துக்கு ஊக்கம் கொடுக்கிறார்.

ஒரு கட்டத்தில் ‘செஸ் விளையாட்டில் கிராண்ட் மாஸ்டர் ஆக வேண்டும்’ என்ற மகனின் கனவைப் புரிந்துகொள்ளும் அபர்ணதி, மகனோடு இணைந்து, அவனது கனவை நோக்கிப் பயணப்படுகிறார். இந்த பயணத்தில், ஆதிக்க சாதியினர் ஏற்படுத்தும் முட்டுக்கட்டைகள் என்ன? அவற்றை உடைத்தெறிந்து, வலி மிகுந்த போராட்டத்துடன், அபர்ணதி எப்படி தன் மகனை உலகச் சாம்பியன் ஆக்குகிறார்? என்பன போன்ற கேள்விகளுக்கு எமோஷனலாகவும், நம்பிக்கை தரும் விதமாகவும் விடை அளிக்கிறது ‘தி கிராண்ட் மாஸ்டர்’ திரைப்படத்தின் மீதிக்கதை.

கதையின் நாயகியாக, வெள்ளையம்மா என்ற கதாபாத்திரத்தில் நடித்திருக்கிறார் அபர்ணதி. ஒடுக்கப்பட்ட தலித் சமூகத்தைச் சேர்ந்த ஓர் ஏழை தூய்மைப் பணியாளரை, தனது தோற்றம் மற்றும் நடிப்பு மூலம் தத்ரூபமாக திரையில் கொண்டுவ ந்து நிறுத்துவதில் வெற்றி பெற்றுள்ளார். ஆதிக்க சாதியினரின் கொட்டத்தை, ஆணவத்தை ஆங்காங்கே தகர்ப்பதும், மகனின் கனவை தன் கனவாக ஏற்று போராடி நிறைவேற்றுவதுமான கதாபாத்திரத்திற்கு நூறு சதவிகிதம் நியாயம் செய்து, ஒரு சிறந்த நடிகையாக நிகரற்று நிமிர்ந்து நிற்கிறார் அபர்ணதி. அவருக்கு அரசு விருதுகள் உட்பட அனைத்து விருதுகளும் வழங்கப்பட்டே ஆக வேண்டும். வாழ்த்துகள் அபர்ணதி!

அபர்ணதியின் மகனாக மாஸ்டர் அஸ்வின் நடித்திருக்கிறார். கொடுக்கப்பட்ட கதாபாத்திரத்தை நன்றாக உள்வாங்கி, கருமமே கண்ணாக, சிரத்தையுடன் அருமையாக நடித்திருக்கிறார். அவருக்கும் விருதுகள் வழங்கினால், விருதுகள் பெருமை பெறும்!

அபர்ணதியின் கணவர் ஒண்டி வீரனாக லிங்கேஷ் நடித்திருக்கிறார். ஹீரோயிசம் இல்லாத யதார்த்தமான கதாபாத்திரத்தில், முழு அர்ப்பணிப்புடன் நடித்து, பார்வையாளர்களை கண் கலங்க வைத்திருக்கிறார்.

ஆதிக்க சாதியைச் சேர்ந்த தொழிலதிபராக சுரேஷ் மேனன் நடித்திருக்கிறார். சாதி வெறியும், பணக்காரத் திமிரும் கொண்ட ஸ்டைலிஷ் வில்லனாக வில்லத்தனத்தில் மிரட்டியிருக்கிறார்.

வெற்றிச்செழியன், தமிழரசி, அன்பு உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

இப்படத்தை எழுதி இயக்கியிருக்கிறார் இயக்குநர் வெற்றிச்செழியன். செஸ் விளையாட்டினூடாக, நம் சமூகத்தில் ஆண்டாண்டு காலமாக நிலவும் சாதி ஏற்றத் தாழ்வுகளையும், சாதிக் கொடுமைகளையும் அழுத்தமாக சித்தரித்துள்ளார் இயக்குநர். எத்தகைய ஒடுக்குமுறை இருந்தாலும், அதை எதிர்த்து தீரமுடனும், துணிச்சலுடனும் போராடினால் வெற்றி நிச்சயம் என்ற நம்பிக்கையை இப்படத்தின் மூலம் விதைத்துள்ளார். இதனை பிரசாரம் போல் இல்லாமல், கலை அம்சங்களுடன் தரமான கதையாகச் சொல்லியிருக்கிறார். மேலும் தாய் – மகன் பாசத்தையும், மகனின் கனவு நிறைவேற தாய் காட்டும் ஒத்துழைப்பையும், உறுதியையும் எமோஷனலாகவும் சித்தரித்துள்ளார். காலத்தின் தேவையறிந்து, கூர்மையான வசனங்களுடன் இந்த வித்தியாசமான ’ஸ்போர்ட்ஸ் டிராமா’வை படைத்தளித்திருக்கும் இயக்குநர் வெற்றிச்செழியனுக்கு மனமார்ந்த பாராட்டுகள்!

ஒளிப்பதிவாளர்கள் அர்ஜுன் ரவி, ஞானசேகர் ஆர் எஸ், தங்கள் கேமரா மூலம் குடிசைப் பகுதியையும், அங்கு வாழும் ஏழை மக்களின் வாழ்நிலையையும் இயல்பு மாறாமல் காட்சிப்படுத்தி இருக்கிறார்கள்.

இசையமைப்பாளர் தினேஷ் ஆண்டனியின் பின்னணி இசை, காட்சிகளுக்கும் கதாபாத்திரங்களின் உணர்வுகளுக்கும் பலம் சேர்க்கும் வண்ணம் திரைக்கதையுடன் இணைந்து பயணித்திருக்கிறது.

’தி கிராண்ட் மாஸ்டர்’ – வித்தியாசமான படங்களை விரும்பும் ரசிகர்கள் அவசியம் பார்த்து மகிழத்தக்க திரைப்படம்!

ரேட்டிங்: 4/5