பீப் – விமர்சனம்

நடிப்பு: ராகவ் ரங்கநாதன், யாமினி லட்சுமணன், பிரேர்னா கண்ணா, ஐடிஐ. ஆச்சார்யா, அருண் மோகன், ஷ்ரவன் ராமகிருஷ்ணன், ஜூஹி சர்மா, நிதிஷ் வீரா, பாலாஜி, ராஜவேல், அதுல், ஜி. சிவகுமார்,வெங்கட் ரமேஷ், கர்னல் ஆர் .கணேசன், எல்.சண்முகசுந்தர் மற்றும் சிலர்

இயக்கம்: எல்.சண்முகசுந்தர்

ஒளிப்பதிவு: பிரதீப் பத்ம குமார்

படத்தொகுப்பு: அபிஷேக், விக்னேஷ் ஆர்

இசை: பிரசாந்த் விஹாரி

கலை இயக்கம்: உமேஷ் குமார்

ஸ்டண்ட்: ராம்குமார்

தயாரிப்பு: M Quest மூவிஸ்

பத்திரிகை தொடர்பு: ஏ.ஜான்

மீடியாக்களில் கெட்ட வார்த்தைகள் வரும் இடங்களில், அவை கேட்காமல் இருக்க பயன்படுத்தப்படும் ஒலியைக் குறிக்கும் சொல் ‘பீப்’. அப்படிப்பட்ட ஒரு சொல்லை தலைப்பாகக் கொண்டிருக்கும் இந்த திரைப்படம் எதைப் பற்றியது? எப்படிப்பட்டது? எப்படி இருக்கிறது? பார்ப்போம்…

எம்.பி.ஏ படிக்கும் கல்லூரி மாணவர் நாயகன் ராகவ் ரங்கநாதன். அவருக்கு ஓர் அதிசய சக்தி இருக்கிறது. அவரிடம் ஒரு புகைப்படத்தைக் காட்டினால், அதை அவர் உற்றுப் பார்த்து, அப்புகைப்படம் எடுக்கும்போதும், அதற்கு முன்பும் பின்பும் என்ன நடந்திருக்கும் என்பதையும், அப்படத்தில் இருப்பவர்களின் குணநலன்கள் எப்படிப்பட்டது என்பதையும் மிகச் சரியாக சொல்லிவிடும் அதிசய சக்தி தான் அது. அதை தெய்வசக்தி என்று நண்பர்கள் கூறினாலும், ராகவ் அதை அறிவியல் சார்ந்தது என்றே நம்புகிறார்.

ஒரு பிரபல திரைப்பட நடிகையின் தீவிர ரசிகராக இருக்கும் ராகவ் அந்த நடிகையை நேரில் சந்திக்க வேண்டும் என்று ஆசைப்படுகிறார். அதற்கான முயற்சிகளை மேற்கொள்கிறார். அப்போது, அந்த நடிகையை அறிமுகப்படுத்துவதாகச் சொல்லும் பாலியல் தொழிலாளி யாமினி லட்சுமணனின் நட்பு ராகவுக்குக் கிடைக்கிறது. யாமினியுடன் ராகவ் நெருக்கமாகவே பழகி வருகிறார்.

இந்நிலையில், ஒருநாள் யாமினி அடுக்குமாடி குடியிருப்பு ஒன்றின் மூன்றாவது தளத்திலிருந்து கீழே விழுந்து, அடிபட்டு, ரத்த வெள்ளத்தில் சடலமாகக் கிடக்கிறார். அது கொலை தான் என்பது உறுதி செய்யப்பட்டாலும், ஆதாரங்கள் கிடைக்காததால், போலீஸ் விசாரணை மந்தமாகி விடுகிறது. . மறுபக்கம், ராகவ் தனது அதிசய சக்தியை பயன்படுத்தி கொலையாளி யார்? கொலைக்கான பின்னணி என்ன? என்பதை கண்டுபிடிக்கும் முயற்சியில் தீவிரமாக இறங்குகிறார். ஒரு கட்டத்தில் காவல்துறையும் விசாரணையைத் தீவிரப்படுத்துகிறது.

இறுதியில் கொலையாளியைக் கண்டுபிடித்தது யார் – ராகவா? காவல் துறையா? கொலையாளி யார்? அவர் ஏன் யாமினியைக் கொலை செய்தார்? அதன் பின்னணி என்ன? என்பன போன்ற கேள்விகளுக்கு எதிர்பாராத திருப்பங்களுடன் கிரைம் சஸ்பென்ஸ் புலனாய்வுத் திரில்லர் ஜானரில் விடை அளிக்கிறது ‘பீப்’ திரைப்படத்தின் மீதிக்கதை.

கதையின் நாயகனாக நடித்திருக்கும் ராகவ், அதீத புத்திசாலி மற்றும் நம்ப முடியாத அறிவியல் சக்தி படைத்த மனிதர் என்ற கதாபாத்திரத்திற்கு கச்சிதமாக பொருந்தியிருக்கிறார். காவல்துறையையே மிஞ்சும் அளவுக்கு புலன்விசாரணை மேற்கொள்ளும் ராகவ், தன் கதாபாத்திரத்திற்கு நியாயம் சேர்க்கும்படி நடித்திருக்கிறார்.

பாலியல் தொழிலாளி சுனைனா கதாபாத்திரத்தில் நடித்திருக்கும் யாமினி லக்‌ஷ்மணன், அரை பாவாடை, குட்டை டவுசர் என்று அரைகுறை ஆடைகளில் மட்டும் இன்றி புடவையிலும் கவர்ச்சி காட்டி பார்வையாளர்களை கிறங்கடித்திருக்கிறார். நடிப்பிலும் எந்தவித குறையும் இன்றி பயணித்திருக்கிறார்.

பேராசிரியர் சிதம்பரம் கதாபாத்திரத்தில் நடித்திருக்கும் இப்படத்தின் இயக்குநர் எல்.சண்முக சுந்தர், அப்பாவியாக முகத்தை வைத்துக்கொண்டு, அதற்கு நேர்மாறாக வெளிப்படுத்தும் நடிப்பு, அவரது கதாபாத்திரத்திற்கும், படத்திற்கும் பலம் சேர்த்திருக்கிறது.

நடிகை நயனா கபூராக நடித்திருக்கும் ஐடிஐ ஆச்சார்யா, நாயகனின் நண்பர்களாக நடித்திருக்கும் பிரேர்னா கண்ணா, அருண் மோகன், ஷ்ரவண் ராமகிருஷ்ணன், ஜுஹி சர்மா, போலீஸ் இன்ஸ்பெக்டராக நடித்திருக்கும் நித்திஷ் வீரா, சப் இன்ஸ்பெக்டராக நடித்திருக்கும் பாலாஜி உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் இயக்குநர் எல்.சண்முகசுந்தர். நம்ப முடியாத ஒரு விசயத்தை அறிவியல் பூர்வமானது என்று சொல்லி நம்ப வைத்து, நாயகனின் சக்தியை விளக்கியிருக்கும் இயக்குநர் எல்.சண்முக சுந்தர், அதனுடன் கிரைம் திரில்லர் சப்ஜக்ட்டை இணைத்துச் சொல்லிய விதம் படத்திற்கு சுவாரஸ்யம் சேர்த்திருக்கிறது. கொலையாளியை எப்படி கண்டுபிடிக்கப் போகிறார்கள்? என்ற எதிர்பார்ப்புடனும், குற்றவாளி யார் என்பது தெரிந்த பிறகும், ஆதாரத்துடன் அவரை எப்படி நெருங்கப் போகிறார்கள், அவருக்கு எத்தகைய தண்டனை பெற்றுத்தர போகிறார்கள் என்ற பரபரப்புடனும் படத்தை விறுவிறுப்பாக நகர்த்திச் சென்று, சுவாரஸ்யமான படைப்பாக இதை படைத்திருக்கிறார் இயக்குநர்.

பிரசாந்த் விஹாரியின் இசை, பிரதீப் பதம குமாரின் ஒளிப்பதிவு, அபிஷேக் – விக்னேஷ் ஆகியோரின் படத்தொகுப்பு, உமேஷ் குமாரின் கலை இயக்கம், ராம்குமாரின் ஸ்டண்ட் வடிவமைப்பு உள்ளிட்ட தரமான தொழில்நுட்பங்கள் படத்துக்கு பலம்.

‘பீப்’ – வித்தியாசமான கிரைம் சஸ்பென்ஸ் புலனாய்வுத் திரில்லர்; பார்த்து ரசிக்கலாம்!

ரேட்டிங்: 3/5