லவ் ஓ லவ் – விமர்சனம்

நடிப்பு: பவிஷ் நாராயணன், நாகதுர்கா, கே.எஸ்.ரவிக்குமார், செல்வராகவன், வனிதா விஜயகுமார், ரம்யா, சௌந்தர்யா, ஆதித்யா கதிர், அஷ்வத் மற்றும் பலர்

எழுத்து & இயக்கம்: மகேஷ் ராஜேந்திரன்

ஒளிப்பதிவு: பி.ஜி.முத்தையா

படத்தொகுப்பு: என்.பி.ஸ்ரீகாந்த்

இசை: ஃபாக்ஸ்ன்

கலை இயக்கம்: ப.மகேந்திரன்

ஸ்டண்ட் வடிவமைப்பு: அபிஷேக் ஸ்ரீனிவாஸ்

தயாரிப்பு: ஜினிமா மீடியா அண்ட் எண்டர்டெயின்மெண்ட் லிமிடெட் & கிரியேட்டிவ் எண்டர்டெயினர்ஸ் அண்ட் டிஸ்ட்ரிபியூஷன்

தயாரிப்பாளர்கள்: தினேஷ் ராஜ், ஜி.தனஞ்செயன்

பத்திரிகை தொடர்பு: ரேகா

இது இன்றைய பொருளாதார நெருக்கடிகளுக்கு மத்தியில் நவீன உறவுகளின் எதார்த்தத்தை அலசும், இளைஞர்களை மையமாகக் கொண்ட ஒரு காதல் மற்றும் நகைச்சுவை கலந்த திரைப்படமாகும்.

சென்னையில் வசிக்கும் நடுத்தர வர்க்க குடும்பத்தைச் சேர்ந்தவர் நாயகன் ரகுவரன் (பவிஷ் நாராயணன்). கார்ப்பரேட் நிறுவனத்தில் பணி புரிபவர். வாங்கும் சம்பளத்தில் தனக்கென ஒரு ரூபாய் கூட எடுத்துக்கொள்ளாமல், அப்படியே தனது தந்தை ராஜேந்திரனிடம் (கே.எஸ்.ரவிக்குமார்) கொடுத்துவிடும் நற்குணம் கொண்டவர்.

இன்னொரு நிறுவனத்தில் பணி புரியும் நவநாகரிக நங்கை நாயகி அவந்திகா ( நாகதுர்கா). ஆடம்பர வாழ்க்கை முறை மீது மிகுந்த நாட்டம் கொண்டவர். அவரை ரகுவரன் அதிக ஈடுபாட்டுடன் காதலிக்கிறார். காதலியின் ஆடம்பர தேவைகளுக்காக தன் சக்தியை மீறி செலவு செய்யும் ரகுவரன், பெரும் கடனாளியாகி அவஸ்தைப்படுகிறார்.

ஒரு நாள் ரகுவரன் வீட்டில் இல்லாத நேரத்தில் கடன் வசூல் செய்யும் ரவுடிகள் அவரது வீட்டிற்குள் புகுந்து, நேர்மையும், கண்ணியமுமான தந்தை ராஜேந்திரனை ஏரியா மக்கள் முன்னிலையில் மிகக் கேவலமாகப் பேசி, அவமானப்படுத்துகிறார்கள். தன் மகனின் இந்த ஊதாரித்தனமான கடன் வலை பற்றித் தெரிந்து அதிர்ச்சியடையும் தந்தையும், தாயும் நிலைகுலைகிறார்கள். வீட்டிற்கு வந்து இந்த விபரீதத்தைக் காணும் ரகுவரன், குற்ற உணர்ச்சியிலும் ஆத்திரத்திலும் உடைகிறார்.

அவந்திகாவின் ஆடம்பர செலவுகளால் தான் தனக்கு இந்த இழிநிலை என்பதை உணரும் ரகுவரன், அவரது காதலே வேண்டாம் என்று அவரை விட்டுப் பிரிய தயாராகிறார். ஆனால் அவந்திகாவோ அவரை விட மறுக்கிறார். இதனால் அவருக்கு ரகுவரன் ஒரு விசித்திர கண்டிஷன் போடுகிறார். ”நான்கு மாதங்களுக்கு தங்கள் உறவில் ‘ஆண்’ பாத்திரத்தை அவந்திகா ஏற்று, தான் அனுபவித்த அழுத்தத்தை அவரும் உணர வேண்டும்” என்பது தான் அந்த கண்டிஷன்.

அதன்பிறகு என்ன நடந்தது? ரகுவரனின் கண்டிஷனை அவந்திகா ஏற்றுக் கொண்டாரா? அதன் விளைவுகள் என்ன? ஆடம்பர வாழ்க்கை முறை தவறானது என்பதை அவந்திகா உணர்ந்தாரா? இருவரும் பரஸ்பரம் உண்மையான காதலை கண்டறிந்தார்களா? என்பன போன்ற கேள்விகளுக்கு விடை அளிக்கிறது ‘லவ் ஓ லவ்’ திரைப்படத்தின் மீதிக்கதை.

நாயகன் ரகுவரனாக பவிஷ் நாராயணன் நடித்திருக்கிறார். நடிகர் தனுஷ், இயக்குநர் செல்வராகவன் ஆகியோரின் சகோதரியின் மகனான இவர் ஏற்கெனவே ‘நிலவுக்கு என்மேல் என்னடி கோபம்’ திரைப்படத்தில் நாயகனாக அறிமுகமானவர். அவர் நாயகனாக நடிக்கும் இரண்டாவது படம் இந்த ‘லவ் ஓ லவ்’. முதல் படத்தைக் காட்டிலும் இதில் நடிப்பில் நல்ல முன்னேற்றம் அடைந்திருக்கிறார். யதார்த்தமான நடிப்பை சிறப்பாக வெளிப்படுத்தியிருக்கிறார். நடனம் மற்றும் சண்டைக் காட்சிகளில் அசத்தியுள்ளார்.

நாயகி அவந்திகாவாக நாகதுர்கா நடித்திருக்கிறார். தெலுங்கு யூடியூப் பிரபலமான இவருக்கு முதல் தமிழ்ப்படம் இது. அழகாக இருக்கிறார். துருதுருவென நடித்திருக்கிறார். முதலில் காதலனை விரட்டும்போதும், பிறகு காதலனுக்காக மாறும்போதும் நடிப்பில் வித்தியாசம் காட்டியுள்ளார்.

நாயகனின் தந்தை ராஜேந்திரனாக வரும் கே.எஸ்.ரவிக்குமார், போலீஸ் இன்ஸ்பெக்டர் ஹரிசரணாக வரும் செல்வராகவன், நாயகியின் தாய் ராதிகாவாக வரும் ரம்யா, மாதர் சங்கத் தலைவி லேகாவாக வரும் வனிதா விஜயகுமார் மற்றும் சாந்தியாக வரும் சௌந்தர்யா, மாறனாக வரும் ஆதித்யா கதிர், டாட்டூவாக வரும் அஷ்வத் உள்ளிட்டோரும் நிறைவான நடிப்பை வழங்கியிருக்கிறார்கள்.

இப்படத்தை எழுதி இயக்கியிருக்கிறார் மகேஷ் ராஜேந்திரன். இன்றைய இளம்தலைமுறையின் மிக முக்கியப் பிரச்சினையான ‘கிரெடிட் கார்டு கடன் வலை’யை இப்படத்தின் கதைக்கருவாக கையில் எடுத்திருக்கிறார். காதலின் பெயரால் இளைஞர்கள் சுமக்கும் கடன் சுமையையும், அதன் தொடர் பிரச்சனையையும் அழுத்தமாக சொல்லியிருக்கிறார். 135 நிமிட திரைப்படத்தை போரடிக்காமல் விறுவிறுப்பாக நகர்த்திச் சென்றிருப்பது இயக்குநரின் சாமர்த்தியத்தைக் காட்டுகிறது.

நேர்த்தியான தொழில்நுட்பங்கள் படத்துக்கு பலம் சேர்த்திருக்கின்றன.

‘லவ் ஓ லவ்’ – பார்த்து, ரசித்து, மகிழலாம்!

ரேட்டிங்: 3.5/5