தி லெஜண்ட் – விமர்சனம்

நடிப்பு: லெஜண்ட் சரவணன், கீத்திகா திவாரி, ஊர்வசி ரவுட்டெலா, விவேக், பிரபு, விஜயகுமார், நாசர் மற்றும் பலர்

இயக்கம்: ஜேடி – ஜெர்ரி

தயாரிப்பு: லெஜண்ட் சரவணன்

இசை: ஹாரிஸ் ஜெயராஜ்

ஒளிப்பதிவு: வேல்ராஜ்

படத்தொகுப்பு: ரூபன்

மக்கள் தொடர்பு: நிகில்

அகில இந்தியாவே… ஏன்… அகில உலகமே… ஏன்… ஒட்டுமொத்த பிரபஞ்சமுமே – சோறு தண்ணி உண்ணாமல், தூக்கம் ஓய்வு இல்லாமல் – எப்போது ரிலீசாகும் என எதிர்பார்த்துக் காத்துக்கிடந்த ‘தி லெஜண்ட்’ திரைப்படம் ரிலீசாகியே விட்டது…!

தனது ‘சரவணா ஸ்டோர்ஸ்’ விளம்பரங்களில் மட்டும் ’கவர்ச்சிக் கதாநாயகி’கள் சகிதம், டான்ஸ் என்ற பெயரில் கையைக் காலை உதறிக்கொண்டு, தொலைக்காட்சி ரசிகர்களை மட்டும் பயங்கரமாக சிரிக்க வைத்துக்கொண்டிருந்தார் ‘சரவணா ஸ்டோர்ஸ்’ உரிமையாளரான தொழிலதிபர் லெஜண்ட் சரவணன். அவரிடம், “நீங்க எம்.ஜி.ஆரையும், சிவாஜியையும் கலந்து செஞ்ச கலவை! ரஜினியையும், கமலையும் சேத்து செஞ்ச மிக்சர், பூந்தி! நீங்க மட்டும் சினிமாவுல எண்ட்ரி ஆனா, விஜய், அஜித் மார்க்கெட் எல்லாம் அவுட்டு” என்று கூச்சமே இல்லாமல் எவனெவனோ கொளுத்திப்போட, அவற்றை உண்மை என்று நம்பி, அவர்  வெள்ளித்திரையில் ரொமாண்டிக் ஆக்சன் ஹீரோவாக அறிமுகமாகியிருக்கும் படம் தான் இந்த ‘தி லெஜண்ட்’.

அமிதாப் பச்சன் தயாரிப்பில், விக்ரம் – அஜீத் இணைந்து நடித்த ‘உல்லாசம்’ போன்ற படங்களை இயக்கித் தோற்று ஓய்ந்தபின், பிழைப்புக்காக ஒரு நிமிட விளம்பரப்படங்களை இயக்கிவந்த ஜேடி – ஜெர்ரியை ‘தி லெஜண்ட்’ படத்தை இயக்க லெஜண்ட் சரவணன் தேர்வு செய்தபோதே, இந்தப்படம் மொக்கையிலும் மொக்கை, கேடுகெட்ட மொக்கையாக இருக்கும் என்பது எதிர்பார்க்கப்பட்ட ஒன்று தான்.

ரஜினிகாந்த் நடிப்பில், ஷங்கர் இயக்கத்தில், ஏ.வி.எம் தயாரிப்பில் உருவான ‘சிவாஜி’ படத்தின் கதை போல் உள்ள ஒரு கதையில் நடிக்க ஆசை என்று லெஜண்ட் சரவணன் சொல்லியிருப்பார் போல. சிவாஜி படக்கதை “போல” என்ன… சிவாஜி படக்கதையையே பட்டி டிங்கரிங் பார்த்து ரெடி பண்ணிவிடுகிறோம் என்று மூளையைக் கசக்கியிருக்கிறார்கள் ஜேடியும், ஜெர்ரியும்! ‘சிவாஜி’ படக்கதையில் ரஜினிக்குப் பதிலாக லெஜண்ட் சரவணன், இலவச கல்விக்குப் பதிலாக சர்க்கரை நோய் குணமடைய இலவச மருந்து, வேட்டி சட்டை அணிந்த வில்லன் சுமனுக்கு பதிலாக கோட் சூட் அணிந்த வில்லன் சுமன்…. ‘தி லெஜண்ட்’ படக்கதை ரெடி!

திரைக்கதை – வசனம்…? எம்.ஜி.ஆர். – சிவாஜி காலத்துப் படங்களிலிருந்து காட்சிகளையும், வசனங்களையும் உருவி, இந்த திருத்தப்பட்ட ‘சிவாஜி’ கதையில் சேர்த்தால் ‘தி லெஜண்ட்’ திரைக்கதை ரெடி!

படத்தின் நாயகன் லெஜண்ட் சரவணன், நடிப்பு என்றால் கிலோ என்ன விலை என்று கேட்கும் ரகம். முகத்தில் எந்த உணர்ச்சியையும் காட்டத் தெரியாமல், முகத்தை ஒரே மாதிரி வைத்துக்கொண்டு, ரோபோ போல கையை, காலை வீசி நடந்துகொண்டு படம் முழுக்க கடுப்பைக் கிளப்புகிறார். இவர் அழுதால் பார்வையாளர்கள் சிரிக்கிறார்கள். இவர் சிரித்தால் பார்வையாளர்கள் கொட்டாவி விடுகிறார்கள். இவர் போடும் ஆட்டத்தையும், சண்டையையும் பார்க்கச் சகிக்கவில்லை.

இவரது குறைகளை மறைக்க கீத்திகா திவாரி, ஊர்வசி ரவுட்டெலா என இரண்டு கவர்ச்சிக் கதாநாயகிகள். இவர்கள் போதாதென்று தலா ஒரு பாடலுக்கு இவருடன் கிளாமராக ஆட லட்சுமிராய், யாஷிகா ஆனந்த்!

மேலும், விஜயகுமார், சச்சு, விவேக், ரோபோ ஷங்கர், மயில்சாமி, யோகி பாபு, முனிஸ்காந்த், தீபா, தம்பி ராமையா, தேவதர்ஷினி, பிரபு, நாசர், ஹரிஷ் பேரடி, வம்சி கிருஷ்ணா, லிவிங்ஸ்டன், லதா, சிங்கம்புலி, மன்சூர் அலிகான், அஷ்வத் குமார், மானஸ்வி, அமுதவாணன் என மிகப் பெரிய நட்சத்திர பட்டாளமே வந்து போகிறது. இவர்களில் விவேக், ரோபோ ஷங்கர் தவிர மீதி எல்லாமே வேஸ்ட்!

’பணம் பத்தும் செய்யும்’ என்பார்கள். பணக்கொழுப்பு பதினொண்ணாவதும் செய்யும். அந்த பதினொண்ணாவது என்னவென்றால், நடிக்கத் தெரியாத, நடிக்கத் தெரிந்துகொள்ளவும் விரும்பாத நபரை ஹீரோ ஆக்கி, கூலியாட்களைக் கொண்டு குதூகலமாய் துதிபாடச் செய்து, தான் விரும்புகிற நாட்கள் வரை திரையரங்குகளில் படம் ஓடுவதாய் மாய்மாலம் காட்டுவது. நேற்று – ஜே.கே.ரித்திஷ், ஆர்.கே, பவர்ஸ்டார் சீனிவாசன்! இன்று லெஜண்ட் சரவணன்!!

‘தி லெஜண்ட்’ – பணக்கொழுப்பு!

 

Read previous post:
0a1i
பிருந்தா மாஸ்டர் இயக்கத்தில் தயாராகும் ‘தக்ஸ்’ படத்தின் படபிடிப்பு நிறைவு

நடன இயக்குநரும், இயக்குநருமான பிருந்தா மாஸ்டர் இயக்கத்தில் தயாராகி வரும் ஆக்சன் எண்டர்டெய்னர் திரைப்படமான ‘தக்ஸ்’ எனும் படத்தின் படபிடிப்பு முழுமையாக நிறைவடைந்தது என படக்குழுவினர் அதிகாரப்பூர்வமாக

Close