தமிழகத்தில் வரைவு வாக்காளர் பட்டியல் வெளியீடு: 97.37 லட்சம் பேர் நீக்கம்!

தமிழகத்தில் வாக்காளர் பட்டியல் சிறப்பு தீவிர திருத்தப் பணியில், கணக்கெடுப்பு பணி நிறைவுற்று வரைவு வாக்காளர் பட்டியல் வெளியிடப்பட்டுள்ளது. அனைத்து வாக்குச்சாவடி மையங்கள், சிறப்பு முகாம்களில் மக்கள் பார்வைக்காக இந்தப் பட்டியல் வைக்கப்பட்டுள்ளது.

www.elections.tn.gov.in என்ற இணையதளத்திலும் வெளியிடப்பட்டுள்ளது. இதில் மக்கள் தங்களது பெயர் மற்றும் குடும்பத்தில் உள்ள வாக்காளர்களின் பெயர் விவரங்களை சரிபார்த்துக் கொள்ளலாம்.

இருப்பும், நீக்கமும்:

தமிழகத்தில், கடந்த அக்டோபர் 27ஆம் தேதி நிலவரப்படி, வாக்காளர் பட்டியலில், 6 கோடியே 41 லட்சத்து 14 ஆயிரத்து 587 வாக்காளர்களின் பெயர்கள் இடம்பெற்றிருந்தன. நடந்து முடிந்த எஸ்ஐஆர் திருத்தத்தின் முதல் கட்டத்தின்படி, மொத்தம் 5 கோடியே 43,76,756 வாக்காளர்களின் பெயர்கள் வரைவு வாக்காளர் பட்டியலில் இடம் பெற்றுள்ளன.

உயிரிழந்த வாக்காளர்கள் 26,94,672 பேர், இடம்பெயர்ந்தோர் மற்றும் குறிப்பிட்ட முகவரியில் வசிக்காதோர் 66,44,881 பேர், இரட்டை பதிவு வாக்காளர்கள் 3,98,278 பேர் என மொத்தம் 97,37, 831 வாக்காளர்களின் பெயர்கள் நீக்கப்பட்டுள்ளன என்பது குறிப்பிடத்தக்கது.

அதாவது,

#வரைவு வாக்காளர் பட்டியல் (19-12-2025 அன்று) வெளியிடுவதற்கு முன்பு இருந்த தமிழக வாக்காளர்களின் எண்ணிக்கை – 6,41,14,587.

#தமிழ்நாடு தலைமை தேர்தல் அதிகாரியின் இணையதளத்தில், 19-12-2025ஆம் தேதி வெளியிடப்பட்ட ‘District Wise Electors as per Draft Roll (19-12-2025)’ என்ற பக்கத்தில் உள்ள விவரங்களின்படி, வரைவு வாக்காளர் பட்டியலில் உள்ள தமிழக வாக்காளர்களின் எண்ணிக்கை – 5,43,76,756.

#எனில், நீக்கப்பட்ட வாக்காளர்களின் எண்ணிக்கை – 97,37,831.

#மேற்படி தமிழ்நாடு தலைமை தேர்தல் அதிகாரியின் இணையதளத்தில், 19-12-2025ஆம் தேதி வெளியிடப்பட்ட ‘Absent / Shifted / Dead Electors – SIR 2026’ என்ற பக்கத்தில் உள்ள விவரங்களின்படி,

i.இறந்தோர் – 26,94,672.

ii.இடம் மாறியோர் / கண்டறிய முடியாதோர் – 66,44,881.

iii.ஒன்றுக்கு மேற்பட்ட இடங்களில் பதிவு செய்துள்ளோர் – 3,98,278.

ஆக மொத்தம் நீக்கப்பட்ட வாக்காளர்களின் எண்ணிக்கை = 97,37,831.

விடுபட்ட தகுதியுள்ளோர்:

இந்த வரைவு வாக்காளர் பட்டியலின் அடிப்படையில், தகுதியுள்ள வாக்காளர்களை புதிதாக சேர்க்க அல்லது தகுதியற்ற வாக்காளர்களை நீக்க எந்த ஒரு வாக்காளரும், அரசியல் கட்சியும் தங்கள் ஆட்சேபனைகளை ஜனவரி 18-ம் தேதி வரை தாக்கல் செய்யலாம். இதை ஆய்வு செய்ய 234 வாக்காளர் பதிவு அலுவலர்கள், 1,776 உதவி வாக்காளர் பதிவு அலுவலர்கள் பணியில் உள்ளனர்.

இந்தக் காலகட்டத்தில், வரைவு வாக்காளர் பட்டியலில் இடம் பெறாதவர்கள், வரும் ஜனவரி 1-ம் தேதி 18 வயது பூர்த்தி அடைந்த இளம் வாக்காளர்கள் ஆகியோர் படிவம் 6-ஐ பூர்த்தி செய்து வழங்கலாம்.

வாக்காளர் பட்டியலில் நிரந்தர இடமாற்ற பதிவுகள், உயிரிழந்தோர் உள்ளிட்ட ஆட்சேபனை தொடர்பாக படிவம் 7-ஐ பூர்த்தி செய்தும், தொகுதியிலேயே ஒரு இடத்தில் இருந்து மற்றொரு இடத்துக்கு குடிபெயர்ந்து புதிய வசிப்பிடத்தில் உள்ளவர்களும், வேறு தொகுதிக்கு குடிபெயர்ந்தவர்களும் படிவம் 8-ஐ பூர்த்தி செய்தும், அதற்கான ஆவண ஆதார நகல்களை இணைத்து சம்பந்தப்பட்ட சட்டப்பேரவை தொகுதிக்கு உட்பட்ட, தொடர்புடைய பகுதிக்கான வாக்காளர் பதிவு அலுவலரிடம் சமர்ப்பிக்கலாம்.

அனைத்து வாக்குச்சாவடி மையங்களில் சிறப்பு முகாம் நடைபெறும்போது உரிய படிவங்களை பிஎல்ஓ-க்களிடமும் சமர்ப்பிக்கலாம். www.elections.tn.gov.in என்ற இணையதளம் மூலமாகவும், பெயர் சேர்த்தல், நீக்கம், திருத்தங்கள் மேற்கொள்ளலாம் எனத் தெரிவிக்கப்பட்டுள்ளது.

தேர்தல் ஆணையம் சார்பில் வரும் ஜனவரி 18-ம் தேதி வரை பெறப்படும் படிவங்கள் பரிசீலிக்கப்பட்டு, வரும் பிப்ரவரி மாதம் இறுதி வாக்காளர் பட்டியல் வெளியிடப்பட உள்ளது.