ஜான் டோ – விமர்சனம்

நடிப்பு: அர்ஜுன் தாஸ், சஞ்சனா நடராஜன், ஸ்ரிஷ்டி.ஒய், ஜாரா வினீத் சந்தோக், மாஸ்டர் நீரவ் எஸ், அனுபமா குமார், படவா கோபி, அர்ச்சனா சந்தோக், கார்த்திக் குமார், ஜெயப்பிரகாஷ் (சிறப்புத் தோற்றம்) மற்றும் சிலர்

எழுத்து & இயக்கம்: மதுமிதா

கதை, திரைக்கதை: மதுமிதா மற்றும் நிக்கோலஸ் செவாலியே

ஒளிப்பதிவு: பிரீதா ஜெயராமன்

படத்தொகுப்பு: விஜய் வெங்கட்ரமணன்

இசை: முஜீப் மஜீத்

கூடுதல் இசை: தி ஆர்டிஸ்ட் 404

சண்டை பயிற்சி: தினேஷ் சுப்பராயன் & ஆக்ஷன் சந்தோஷ்

தயாரிப்பு வடிவமைப்பு: அஷ்வினி காலே

இணை தயாரிப்பு: கிஷோர் கேதாரி, மதுமிதா

தயாரிப்பு: ‘அர்கா மீடியா ஒர்க்ஸ்’ ஷோபு யார்லகட்டா, பிரசாத் தேவினேனி

பத்திரிகை தொடர்பு: யுவராஜ்

‘ஜான் டோ (John Doe)’ என்ற ஆங்கிலச் சொல்லுக்கு ‘அடையாளம் தெரியாத நபர்’ என்பது பொருள். அதாவது, யார் என்ற அடையாளமோ, விவரமோ தெரியாத நபரைக் குறிப்பிடுவதற்கு, நீதிமன்றங்கள் மற்றும் காவல்துறை அறிக்கைகளில் பயன்படுத்தப்படும் தற்காலிகப் பெயர் ‘ஜான் டோ’. இயக்குநர் மதுமிதா இயக்கியுள்ள இந்த ‘ஜான் டோ’ திரைப்படத்தில் ‘அடையாளம் தெரியாத நபர்’ யார்? அவருக்கு என்ன நேர்ந்தது? அவர் பற்றிய அடையாளத்தை, விவரங்களை கண்டுபிடிக்க முயல்பவர் யார்? பார்ப்போம்…

சிறுவன் சந்துருவுக்கு தன் அப்பா (படவா கோபி) போல போலீசாக வேண்டும் என்று ஆசை. ஆனால், அவனது ஆற்றல் மீது நம்பிக்கையில்லாத அப்பா, “உன்னால போலீசாக முடியாது”, “நீ உருப்பட மாட்டே” என்கிற ரீதியில் சதா கரித்துக்கொட்டி, வெறுப்பை உமிழ்ந்துகொண்டே இருக்கிறார். இதனால் சிறுவன் மனதளவில் பாதிக்கப்படுகிறான். என்றாலும், அம்மாவின் (அர்ச்சனா சந்தோக்) அன்பும், அரவணைப்பும் சிறுவனின் மனக்காயத்துக்கு மருந்தாக இருந்து வருகிறது. ஒருநாள் அந்த அன்பான அம்மாவும் இறந்துபோகிறார்.

காலம் உருண்டோட, சிறுவன் சந்துரு வளர்ந்து இளைஞர் (அர்ஜுன் தாஸ்) ஆகிறார். அப்பாவைப் போலவே இப்போது அவர் காவல்துறையில் பணியாற்றுகிறார்.

கேரள காவல்துறையில் சப்-இன்ஸ்பெக்டராக இருக்கும் சந்துரு, ஒருநாள் கேரளம் – தமிழ்நாடு எல்லையில் உள்ள செக்போஸ்ட்டில், கேரளப்பகுதியில் நின்று டியூட்டி பார்த்துக்கொண்டிருக்கும்போது, அவரது கண்ணெதிரே, அருகிலுள்ள ஓர் ஏரியில், திடீரென கார் ஒன்று விழுந்து மூழ்கிறது. பதட்டத்துடன் ஓடிவந்து, ஏரியில் குதித்து, நீரில் மூழ்கி, காரை நெருங்கிப் பார்க்கிறார் சந்துரு. உள்ளே, அமர்ந்த நிலையில் மூச்சுத்திணறி இறந்துபோயிருக்கிறான் ஒரு சிறுவன். அந்த காரை ஓட்டி வந்த டிரைவரை உள்ளே, வெளியே எங்கும் காணோம். எனவே இது கொலை என்று சந்தேகிக்கிறார் சந்துரு. சிறுவன் கையில் வைத்திருந்த பொம்மையைத் தவிர வேறு தடயம் எதுவும் கிடைக்கவில்லை. எனவே அந்த பொம்மையை வைத்து, அந்த சிறுவன் யார்? காரை ஓட்டி வந்த டிரைவர் யார்? இக்கொலைக்கான பின்னணி என்ன? என்பது குறித்து சந்துரு புலன்விசாரணை செய்யத் தொடங்குகிறார்.

மறுபுறம், துபாயில் தன் கணவர் விபத்தில் இறந்துவிட, விதவைப் பெண்ணான தர்ஷனா (ஸ்ரிஷ்டி.ஒய்) தன் மகள் லக்கி (ஜாரா வினீத் சந்தோக்), மகன் ஹ்ருதய் (மாஸ்டர் நீரவ் எஸ்) ஆகியோருடன் தமிழ்நாடு – கேரளம் எல்லையில் உள்ள குறிஞ்சிமேடு என்ற தமிழ்நாட்டுப் பகுதியில் இருக்கும் வீட்டுக்கு வந்து சேருகிறார். ஓரிரவு, தன் தம்பி ஹிருதையுடன் வெளியே செல்கிறார் லக்கி. அவர் ஐஸ்கிரீம் வாங்கிக் கொண்டிருந்த நேரத்தில் சிறுவன் ஹ்ருதய் மாயமாகி விடுகிறான். எங்கு தேடியும் அவன் கிடைக்காததால், இது குறித்து குறிஞ்சிமேடு காவல் நிலையத்தில் பெண் போலீஸ் இன்ஸ்பெக்டராக இருக்கும் ஏ.ராவிடம் (சஞ்சனா நடராஜன்) புகார் அளிக்கிறார் தர்ஷனா. மாயமான சிறுவன் ஹ்ருதய்யை தேடும் படலத்தில் இறங்குகிறார் இன்ஸ்பெக்டர் ஏ.ராவ்.

கேரளம் – தமிழ்நாடு எல்லையில் கேரளப் பகுதியிலிருக்கும் ஏரிக்குள் காரோடு மூழ்கடித்துக் கொல்லப்பட்ட சிறுவன் யார்? அவன் கொல்லப்பட என்ன காரணம்? எல்லையின் இந்தப்பக்கம் தமிழ்நாட்டுப் பகுதியில் உள்ள குறிஞ்சிமேட்டில் மாயமான சிறுவன் ஹ்ருதை என்ன ஆனான்? அவன் உயிருடன் மீட்கப்பட்டானா, இல்லையா? இப்படி காணாமல்போன மொத்தம் 17 சிறுவர்கள் பற்றிய மர்மக்கதையாக இது விரிவது எப்படி? என்பன போன்ற கேள்விகளுக்கு ’சைக்கலாஜிக்கல் சஸ்பென்ஸ் க்ரைம் த்ரில்லர்’ ஜானரில் திருப்பங்களுடன் ரொம்ப புதுசாக விடை அளிக்கிறது ‘ஜான் டோ’ திரைப்படத்தின் மீதிக்கதை.

கதையின் நாயகனாக, கேரள காவல்துறையில் சப்-இன்ஸ்பெக்டராகப் பணியாற்றும் தமிழ்நாட்டுக்காரர் சந்துருவாக அர்ஜுன் தாஸ் நடித்திருக்கிறார். முதல்முறையாக காவல்துறை அதிகாரியாக நடித்திருக்கும் அவர், இறுக்கமான முகம், கச்சிதமான உடல்கட்டு, பணிக்குப் பொருத்தமான உடல்மொழி ஆகியவற்றுடன் புலன் விசாரணைக்காக அதிக உழைப்பைப் போடும் கதாபாத்திரத்தில் சிறப்பாக நடிப்பை வெளிப்படுத்தியிருக்கிறார். அவரது தனித்துவமான ‘பேஸ் வாய்ஸ்’ கேட்க நன்றாக இருக்கிறது. சின்ன வசனங்களுக்கு அது அருமையாக ‘சூட்’ ஆகிறது. ஆனால், நீளமான வசனங்களை அடித்தொண்டையில் பேசும்போது சில வார்த்தைகள் தெளிவாக ஒலிக்காததால், புரிய முடியாமல் போகிறது. அடுத்தடுத்த படங்களில் நடிக்கும்போது இதை அவர் கவனத்தில் கொள்வது நல்லது.

தமிழக காவல்துறையின் கறாரான பெண் போலீஸ் இன்ஸ்பெக்டர் ஏ.ராவ்வாக சஞ்சனா நடராஜன் நடித்திருக்கிறார். முகத்திலும், உடல்மொழியிலும் அதிகாரம் பீறிட கேரள காவல்துறை சப்-இன்ஸ்பெக்டரான நாயகனிடம் முதலில் இளக்காரமாக எடுத்தெறிந்து பேசுவது, பின்னர் நாயகனின் சின்ஸியாரிட்டியையும் திறமையையும் புரிந்துகொண்டு அவரிடம் மென்மையாக நடந்துகொள்வது, அதன்பின்னர் தன் மீது நாயகனுக்கு காதல் இருப்பது தெரிந்து இணக்கமாக புன்னகைப்பது என வெவ்வேறு பரிமாணங்களில் நடிப்பை வெளிப்படுத்தி தன் கதாபாத்திரத்துக்கு நியாயம் செய்திருக்கிறார் சஞ்சனா நடராஜன்.

துபாயில் விபத்தில் கணவனை பறிகொடுத்துவிட்டு தமிழ்நாடு திரும்பியிருக்கும் தர்ஷனாவாக வரும் ஸ்ரிஷ்டி.ஒய், அவரது மகள் லக்கியாக வரும் ஜாரா வினீத் சந்தோக், காணாமல் போகும் மகன் ஹ்ருதய்யாக வரும் மாஸ்டர் நீரவ்.எஸ் ஆகியோர் இப்படத்துக்கு மிக முக்கியமான பங்களிப்பைச் செய்திருக்கிறார்கள்.

லதாவாக வரும் அனுபமா குமார், அவரது கணவர் சாஷியாக சிறப்புத் தோற்றத்தில் வரும் ஜெயப்பிரகாஷ் ஆகியோர் வழக்கத்துக்கு மாறான கதாபாத்திரங்களில் வந்து திகைக்க வைக்கிறார்கள்.

உளவியல் மருத்துவர் ரஞ்சனாக வரும் கார்த்திக் குமார், நாயகனின் சிறுவயதில் அம்மாவாக வரும் அர்ச்சனா சந்தோக், அப்பாவாக வரும் படவா கோபி உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

’வல்லமை தாராயோ’, ’கொல கொலையா முந்திரிகா’, ‘கேடி’ போன்ற திரைப்படங்களை தனித்துவ பாணியில் இயக்கி கவனம் ஈர்த்தவரான இயக்குநர் மதுமிதா, இந்த ‘ஜான் டோ’ திரைப்படத்தை எழுதி இயக்கியிருக்கிறார். தொடர் கொலைகள் செய்யும் ‘சைக்கோ’ கொலையாளி பற்றிய கதையாக இருந்தாலும், ரத்தம் கொப்பளிக்கும் அருவருவருப்பான வன்முறைக் காட்சிகள் இல்லாமல், (வயது வரம்புக்குட்பட்ட) அனைத்துத் தரப்பினரும் பார்த்து ரசிக்கத் தக்க விதத்தில் இந்த சைக்கலாஜிக்கல் சஸ்பென்ஸ் க்ரைம் த்ரில்லர் திரைப்படத்தை சுவாரஸ்யமாகவும், விறுவிறுப்பாகவும் நகர்த்திச் சென்றிருக்கும் இயக்குநர் மதுமிதா பாராட்டுக்குரியவர். என்றாலும், ‘சைக்கோ’ கொலையாளி 17 சிறுவர்களைக் கொல்வதற்கு இயக்குநர் சொல்லும் காரணம் ஏற்புடையதாக இல்லை. மேலும், வெகுஜனங்களை ஈர்க்கும் வகையில் படத்துக்கு எளிய தலைப்பு வைக்காதது இரண்டாவது குறை.

முஜீப் மஜீத் இசை மற்றும் தி ஆர்டிஸ்ட் 404-ன் கூடுதல் இசை, ப்ரீதா ஜெயராமனின் ஒளிப்பதிவு, விஜய் வெங்கட்ரமணனின் படத்தொகுப்பு, தினேஷ் சுப்பராயன் மற்றும் ஆக்ஷன் சந்தோஷ் ஆகியோரின் ஸ்டண்ட் வடிவமைப்பு உள்ளிட்ட தரமான, நேர்த்தியான தொழில்நுட்பங்கள் இப்படத்துக்கு பலம்.

‘ஜான் டோ’ – அனைத்துத் தரப்பினருக்கும் பிடிக்கும்!

ரேட்டிங்: 3.5/5