நீண்ட நாள் காதலரை மணந்தார் நடிகை பிரியா பவானி சங்கர்!

நடிகை பிரியா பவானி சங்கர் தான் கல்லூரி காலத்தில் இருந்து காதலித்து வந்த ராஜவேல் ராஜ் என்பவரை மணந்தார். உறவினர்கள், நெருக்கமானவர்கள் முன்னிலையில் இவர்களது திருமணம் நடந்தது. இந்த திருமண வீடியோ இணையத்தில் வைரலாகி வருகிறது.

பத்திரிக்கையாளராக தனது பயணத்தைத் தொடங்கிய பிரியா பவானி சங்கர், பின்பு சினிமாவில் நடிக்கத் தொடங்கினார். ‘மேயாத மான்’, ‘கடைகுட்டி சிங்கம்’, ‘பத்து தல’, ‘டிமாண்டி காலனி 2’ போன்றவை இவரின் நடிப்பில் வந்த குறிப்பிட்டதக்க படங்களாகும்.

சமீபத்தில் ரவிதேஜாவுடன் இணைந்து இவர் நடித்திருந்த ‘இருமுடிகட்டு’ படம் வசூல் ரீதியாக சாதனை படைத்திருந்தது.

பிரியா பவானி சங்கர் தமிழில் கடைசியாக ‘ஹாட்ஸ்பாட் 2 மச்’ என்ற படத்தில் நடித்திருந்தார். அடுத்து இவர் நடித்திருக்கும் ‘டிமாண்டி காலனி 3’ படம் 2027 பொங்கலுக்கு வெளியாக இருக்கிறது.

இவை தவிர, இவர் நடித்திருக்கும் ‘மரகத நாணயம் 2’ படத்தின் படப்பிடிப்பு சமீபத்தில் நிறைவடைந்து இருக்கிறது. ஷங்கர் – கமல்ஹாசன் கூட்டணியில் உருவாக இருக்கும் ‘இந்தியன் 3’ படத்திலும் நடித்திருப்பது குறிப்பிடத்தக்கது.

இந்த நிலையில், காதலரை மணந்த பிரியா பவானி சங்கருக்கு திரையுலகினரும், ரசிகர்களும் சமூக வலைதள பதிவுகளில் வாழ்த்து தெரிவித்து வருகின்றனர்.

தனது திருமணம் குறித்து பிரியா பவானி சங்கர் வெளியிட்டுள்ள செய்தியில்,

“அன்பும் நன்றியும் நிறைந்த மனதுடன் ஒரு மகிழ்ச்சியான செய்தியை உங்களுடன் பகிர்ந்துகொள்கிறேன். நவம்பர் 11ஆம் தேதி(இன்று), எங்கள் குடும்பத்தினர் மற்றும் நெருங்கிய நண்பர்களின் முன்னிலையில், எனக்கும் ராஜ்-க்கும் இனிதே திருமணம் நடைபெற்றது.

இத்தனை ஆண்டுகளாக என் பயணத்தில் அன்பும் ஆதரவும் அளித்து, என் வாழ்வின் முக்கியமான தருணங்களில் மகிழ்ச்சியுடன் பங்கெடுத்துக்கொண்ட பத்திரிகை மற்றும் ஊடக நண்பர்கள் அனைவருக்கும் என் மனமார்ந்த நன்றி.

நெருங்கியவர்கள் சூழ ஒரு சிறிய நிகழ்வாகத் திருமணத்தைக் கொண்டாடியதால், உங்கள் அனைவரையும் நேரில் அழைக்க இயலவில்லை. இந்த மகிழ்ச்சியான தருணத்தில் உங்கள் அன்பையும் வாழ்த்துகளையும் விரும்புகிறோம்.

உங்கள் அன்பு என்றும் எங்களுடன் இருக்கட்டும்” என்று கூறியுள்ளார்.