மீசைய முறுக்கு 2 – விமர்சனம்

நடிப்பு: ஹிப்ஹாப் தமிழா ஆதி, சைத்ரா ஜே ஆச்சார், கேதிகா ஷர்மா, ரம்யா ரங்கநாதன், ஹர்ஷத் கான், கருணாஸ், நாசர், ஆடுகளம் நரேன், யோகி பாபு, பாபா பாஸ்கர், விஜய் வரதராஜ், பகவதி பெருமாள், ஷாரா, கருணாகரன், சபரீஷ் ராமச்சந்திரன் மற்றும் சிலர்

கதை, திரைக்கதை, வசனம், இயக்கம்: ஹிப்ஹாப் தமிழா ஆதி

கூடுதல் வசனங்கள்: கரண் கார்க்கி, நிதிஷ் டி

ஒளிப்பதிவு: பாலாஜி சுப்ரமணியம்

கூடுதல் ஒளிப்பதிவு: மாதேஷ் மாணிக்கம்

படத்தொகுப்பு: பென்னி ஒலிவர்

இசை: ஹிப்ஹாப் தமிழா ஆதி

கலை இயக்கம்: வி.எஸ்.தினேஷ்குமார்

நடன அமைப்பு: பாபா பாஸ்கர், சந்தோஷ், ரகு தாப்பா

சண்டை பயிற்சி: ஆக்ஷன் சந்தோஷ்

தயாரிப்பு: அவ்னி மூவீஸ் & பென்ஸ் மீடியா பிரைவேட் லிமிடெட்

தயாரிப்பாளர்கள்: குஷ்பூ சுந்தர், ஏ.சி.எஸ்.அருண்குமார்

பத்திரிகை தொடர்பு: ரியாஸ் கே அஹ்மத், பாரஸ் ரியாஸ், சதீஷ் (எஸ்2 மீடியா)

ஹிப்ஹாப் தமிழா ஆதி நாயகனாக நடித்து, இயக்கிய ‘மீசைய முறுக்கு’ திரைப்படம் 2017-ல் வெளியாகி, நல்ல வரவேற்பைப் பெற்றது. அந்த வெற்றி தந்த ஊக்கம் காரணமாக, சுமார் 9 ஆண்டுகளுக்குப் பிறகு, இப்போது ஹிப்ஹாப் தமிழா ஆதி நடித்து, இயக்கியிருக்கும் ‘மீசைய முறுக்கு 2’ திரைப்படம் திரையரங்குகளில் வெளியாகியிருக்கிறது. இந்த படம் முதல் பாகத்தின் தொடர்ச்சியாக அல்லாமல், முற்றிலும் புதிய கதைக்களத்தில் உருவாகியிருக்கிறது.

இசைத் துறையில் சாதிப்பதற்காக ஒரே குடும்பத்தைச் சேர்ந்த மூன்று தலைமுறையினர் அடுத்தடுத்து நடத்தும் போராட்ட வரலாறும், அதன் விளைவுகளும் தான் ‘மீசைய முறுக்கு 2’ திரைப்படத்தின் கதைக்கரு. இக்கதைக்கருவிலேயே இசை இருப்பதால், இசைப்படமாக – மியூசிக்கல் சப்ஜெக்ட்டாக – வடிவம் எடுத்திருக்கும் இந்த ‘மீசைய முறுக்கு 2’ எப்படி இருக்கிறது? பார்க்கலாம்…

1970களில், சென்னை ராயபுரத்தைச் சேர்ந்த தாஸ் (ஹிப்ஹாப் தமிழா ஆதி), கானா பாடகராக இருக்கிறார். சிறிய வட்டத்துக்குள் மட்டும் சுற்றி சுழன்றுகொண்டிருக்கும் ‘கானா பாடல்’ என்னும் கலையை, வெளியே – தன் சமூகத்துக்கும் அப்பால் – பெரிய மேடைகளுக்கும், அரங்கங்களுக்கும் எடுத்துச் சென்று புகழடைய வேண்டும் என்று அவர் விரும்புகிறார். அதற்கான முயற்சிகளில் அவரது மனைவி லட்சுமி (சைத்ரா ஜெ ஆச்சார்) அவருக்கு உற்ற துணையாக இருக்கிறார். ஆனால், கர்நாடக சங்கீதத்துக்குக் கொடுக்கும் முக்கியத்துவத்தை கானா இசைக்குக் கொடுக்க மறுக்கும் மேட்டுக்குடி நபர்களின் முட்டுக்கட்டை காரணமாக, கானா தாஸ் தான் விரும்பியதைச் செய்ய இயலாமல் தோல்வி அடைகிறார். (1970களில் ஹிப்ஹாப் தமிழா ஆதியாக இருந்த கானா தாஸ், பிற்காலத்தில், வயது முதிர்வு காரணமாக கருணாஸாக மாறியிருக்கிறார்.)

1990களில், கானா தாஸின் மகனான டைகர் ரவி (இரண்டாவது ஹிப்ஹாப் தமிழா ஆதி), மேடைகளில் தன் திறமையை நிரூபிக்கத் துடிக்கும் இசைக் கலைஞராக இருக்கிறார். “கானா இசையாக இருந்தாலும் சரி, கர்நாடக சங்கீதமாக இருந்தாலும் சரி… கலையில் உயர்ந்தது – தாழ்ந்தது கிடையாது” என்று நம்பும் பிராமணப் பெண்ணான வாணி (ரம்யாரங்கநாதன்), டைகர் ரவியின் மனைவியாகி, அவரது இசை முயற்சிகளுக்கு ஊக்கம் கொடுக்கிறார். ஆனால், மனைவி வாணியின் எதிர்பாராத இறப்புக்குப் பின், குடும்பச்சூழல் மற்றும் இசைத்துறை உள் அரசியல் காரணமாக, டைகர் ரவி தன் இசை லட்சியத்தைத் தியாகம் செய்துவிட்டு வேறு வேலைக்குப் போக நேரிடுகிறது. (1990களில் இரண்டாவது ஹிப்ஹாப் தமிழா ஆதியாக இருந்த டைகர் ரவி, பிற்காலத்தில் பாபா பாஸ்கராக மாறியிருக்கிறார்.)

இப்போது நிகழ்காலத்தில் (2026-ல்), கானா தாஸின் பேரனும், டைகர் ரவியின் மகனும், ’ஜென் சி’ தலைமுறையைச் சேர்ந்தவருமான ஜீவா (மூன்றாவது ஹிப்ஹாப் தமிழா ஆதி), டிஜே-வாக வேலை பார்த்துக்கொண்டே, சுயாதீன இசைக் கலைஞர் ஆக வேண்டும் என்ற கனவில் இருக்கிறார். தன் தாத்தா கானா தாஸ், அப்பா டைகர் ரவி ஆகியோரின் நிறைவேறாத லட்சியத்தை ஜீவா நிறைவேற்ற முயலுகையில், நெப்போட்டிசம், கார்ப்பரேட் ஆதிக்கம், இசைத்துறையின் உள் அரசியல் போன்றவை அவருக்குத் தடையாக உயர்ந்தோங்கி நிற்கின்றன. நடன ஆசிரியர் லைலாவைக் காதலிக்கும் ஜீவா, தயாரிப்பாளரின் (பகவதி பெருமாள்) மகன் சஞ்சய் (சபரீஷ் ராமச்சந்திரன்) உடன் ஏற்படும் மோதலால் தன் குடும்பத்தின் இசைப் பின்னணி பற்றி தெரிந்துகொள்கிறார்.

இசைத்துறையில் சாதிக்க வேண்டும் என்ற கனவுடன் ஜீவா மேற்கொள்ளும் போராட்டப் பயணத்தில் தன் தாத்தா மற்றும் அப்பா போல் தோல்வியடைந்தாரா? அல்லது தாத்தாவையும் அப்பாவையும் சேர்த்துக்கொண்டு, தடைகளைத் தகர்த்து, மூவருமாக வெற்றி அடைந்தார்களா? என்பன போன்ற கேள்விகளுக்கு இசையும், காமெடியும், எமோஷனும் கலந்து சுவாரஸ்யமாக விடை அளிக்கிறது ‘மீசைய முறுக்கு 2’ திரைப்படத்தின் மீதிக்கதை.

மூன்று வெவ்வேறு காலகட்டங்களைச் சேர்ந்த கானா தாஸ், டைகர் ரவி, டிஜே ஜீவா ஆகிய மூன்று தோற்றங்களில் வருகிறார் ஹிப்ஹாப் தமிழா ஆதி. ஒன்றுக்கொன்று வித்தியாசமான வாழ்க்கைச் சூழலுடன் மாறுபட்ட குணநலன்கள் கொண்ட மூன்று கதாபாத்திரங்களிலும் அவர் சிறப்பான பங்களிப்பைக் கொடுத்திருக்கிறார். ஒரே படத்தில் மூன்று பரிமாணங்களில் வெவ்வேறு மனிதர்களாக வாழ்ந்து, உணர்ச்சிப்பூர்வமான காட்சிகளிலும் சரி, கொண்டாட்டமான தருணங்களிலும் சரி, பார்வையாளர்களை தன்பால் ஈர்த்து தனது கலைப் பயணத்தின் ஆகச் சிறந்த நடிப்பை இதில் பதிவு செய்துள்ளார்.

கானா தாஸின் மனைவி லட்சுமியாக வரும் சைத்ரா ஜே ஆச்சார், டைகர் ரவியின் மனைவி வாணியாக வரும் ரம்யா ரங்கநாதன், ஜீவாவின் காதலி லைலாவாக வரும் கேதிகா ஷர்மா என ஒவ்வொரு காலகட்டத்திற்கும் ஒரு நாயகி என்று வரும் மூன்று நாயகிகளும் தங்களுக்கு கொடுக்கப்பட்ட வேலையை குறையில்லாமல் நிறைவாக செய்திருக்கிறார்கள்.

முதுமைக்கால கானா தாஸாக வரும் கருணாஸ், நடுத்தர வயது டைகர் ரவியாக வரும் பாபா பாஸ்கர், பாரம்பரிய இசையின் அதிகாரத்தைப் பிரதிபலிப்பவராக வரும் நாசர், கலைத்துறையில் உள்ள ஆதிக்க சிந்தனை கொண்ட தயாரிப்பாளராக வரும் பகவதி பெருமாள், அவரது மகன் சஞ்சய்யாக வரும் சபரீஷ் ராமச்சந்திரன் நாயகனின் நண்பராக வந்து சிரிக்க வைக்கும் ஹர்ஷத் கான், மற்றும் யோகி பாபு, ஷா ரா, கருணாகரன், ஆடுகளம் நரேன், விஜய் வரதராஜ் உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

நாயகனாக நடித்திருக்கும் ஹிப்ஹாப் தமிழா ஆதியே இப்படத்தின் கதை, திரைக்கதை, வசனம் எழுதி இயக்கியிருக்கிறார். கானா கலை வடிவத்திற்கு சமூகத்தில் உரிய அங்கீகாரம் கிடைக்க வேண்டும் என்ற கருத்தை மையமாக வைத்து, ஒரே குடும்பத்தின் மூன்று தலைமுறையினரின் இசையைப் பின்னணியாகக் கொண்டு இப்படக்கதையை சிறப்பாக எழுதியிருக்கிறார் ஆதி. தனது கருத்தை பிரசாரமாகவோ வறட்டுத்தனமாகவோ சொல்லாமல், நகைச்சுவை, காதல், பாசப்போராட்டம் உள்ளிட்ட கமர்ஷியல் அம்சங்களைத் திரைக்கதையில் கலந்து, படத்தை சுவாரஸ்யமாக நகர்த்திச் சென்று, அருமையான பொழுதுபோக்குத் திரைப்படமாக படைத்தளித்திருக்கிறார் இயக்குநர்.

ஹிப்ஹாப் தமிழா ஆதியின் இசையில் ‘ஆரா 10/10’, ‘கோயிந்தம்மா’, ‘பப்பாளி பழமே’, ‘அடி போடி’, ‘போடா படிச்சிருக்கேன்’ உள்ளிட்ட பாடல்கள் ஹிட் ரகம். பின்னணி இசையும் காட்சிகள் மற்றும் கதாபாத்திரங்களின் தன்மைக்கேற்ப பொருத்தமாக பயணித்திருக்கிறது.

பாலாஜி சுப்ரமணியம் மற்றும் மாதேஷ் மாணிக்கத்தின் ஒளிப்பதிவு, பென்னி ஒலிவரின் படத்தொகுப்பு, வி.எஸ்.தினேஷ்குமாரின் கலை இயக்கம், பாபா பாஸ்கர், சந்தோஷ் ரகு தாப்பா ஆகியோரின் நடன அமைப்பு, ஆக்‌ஷன் சந்தோஷின் சண்டை பயிற்சி உள்ளிட்ட நேர்த்தியான தொழில்நுட்பங்கள் படத்துக்கு பலம்.

‘மீசைய முறுக்கு 2’ – ரசனையான சிறந்த பொழுதுபோக்குத் திரைப்படம்; பார்த்து ரசிக்கலாம்!

ரேட்டிங்: 3.75/5