“70 எலிகளுடன் ஷூட்டிங்; இயக்குநர் ராம் உலகமே தனி”: நடிகர் சூரி கலகல பேச்சு!

தயாரிப்பாளர் சுரேஷ் காமாட்சி தயாரிப்பில், இயக்குநர் ராம் இயக்கத்தில் உருவாகியுள்ள ‘ஏழு கடல் ஏழு மலை’ திரைப்படம் வருகிற அக்டோபர் 1ஆம் தேதி திரையரங்குகளில் ரிலீஸாவதை முன்னிட்டு, இப்படத்தின் ப்ரீ ரிலீஸ் நிகழ்ச்சி சென்னை தரமணியில் உள்ள எம்ஜிஆர் திரைப்பட கல்லூரி வளாகத்தில் நடைபெற்றது. இந்த நிகழ்வில் படக்குழுவினருடன் ஏராளமான திரையுலக பிரபலங்களும் கலந்து கொண்டனர்.

இந்த நிகழ்வில் நடிகர் சூரி பேசியதாவது:

“எல்லோருக்கும் நன்றி! மண்டாடி படத்தின் வெற்றியை தினந்தோறும் கேக் வெட்டி கொண்டாடிக் கொண்டே இருக்கிறேன். அந்த படம் வந்ததிலிருந்து அது ரொம்ப பெருமையா இருக்கு, சந்தோஷமா இருக்கு. அப்படி ஒரு வாய்ப்பு கொடுத்த என்னுடைய இயக்குநர்களுக்கும், இங்கு இருக்கும் மீடியா நண்பர்களுக்கும், என்னுடைய ரசிகர்களுக்கும் நன்றி. நீங்க கொடுத்த இந்த வாய்ப்பையோ, இந்த வெற்றியையோ எதையும் மண்டையில் எடுத்து வச்சுக்கிட்டு விருப்பத்திற்கு ஏற்ற மாதிரி ஆடாமல், அந்த வெற்றியை, அந்த மரியாதையை தலை வணங்கி எடுத்து ஓரமா வச்சுட்டு அடுத்த வேலைக்கு நான் எப்பவுமே ஓடிக்கிட்டே இருப்பேன். நீங்களும் என்னை புஷ் பண்ணிக்கிட்டே இருக்கீங்க.

பொதுவாக முக்கியமான இயக்குநர்கள் வெற்றிமாறன், ராம், பாலா, மிஷ்கின் இவங்க படங்களில் எல்லாம் நடிக்கணும் அப்படிங்கற ஆசை இருந்துச்சு. அதில் எனக்கு வெற்றிமாறன் அண்ணன் கிட்ட வாய்ப்பு கிடைச்சு அந்தப் படம் ஷூட்டிங் ஆரம்பிச்சிட்டோம்னு நினைக்கிறேன். அப்போதுதான் அருண் விஸ்வா மூலமாக எனக்கு ராம் அண்ணன் அறிமுகமானார். அந்த சமயத்தில் தான், ‘இந்த படத்தில் இப்படி ஒரு கதாபாத்திரம் இருக்கு, நீங்கள் பண்றீங்களா?’ என்று என்னை நம்பி கூறினார். எனக்கு ஒரு பக்கம் ஆசையாக இருந்தாலும் கொஞ்சம் பயமாகவும் இருந்தது. ‘ராம் அண்ணா ஏரியா கொஞ்சம் ரிஸ்க்கான ஏரியா’ என்று சிலபேர் சொல்லி கேள்விப்பட்டிருக்கிறேன். ஆனால், அங்கே போனதற்கு பிறகுதான் தெரிந்தது இதைவிட சிறந்த இடம் இருக்க முடியாது என்று!

ஒரு இயக்குநர் இடத்திலிருந்து அவர் பேசாமல், நார்மலாக ஜாலியாக பேச ஆரம்பிச்சாரு; எனக்கு பயங்கர நம்பிக்கை வந்துருச்சு. ‘காமெடி பண்றது சாதாரண விஷயம் இல்லை, ரொம்ப கஷ்டமான வேலை’ அப்படின்னு அவர் பேசப்பேச எனக்கு பயங்கர தைரியம் வந்துச்சு. அப்படித்தான் இந்த படத்துக்குள்ள நான் வந்தேன். வெற்றிமாறனிடம் சொன்னபோது,, ‘தாராளமாக போங்க; இப்ப நம்ம படத்துல ஒன்னு இருக்கு பாத்தீங்களா, அதே மாதிரி அங்க போனீங்கன்னா அங்க ஒன்னு புதுசா கத்துக்கலாம், அது உங்களுக்கு ரொம்ப பெருசா உதவும்’ அப்படின்னு சொன்னாரு.

எப்படா ராம் அண்ணனுடன் சூட்டிங் போகலாம்னு காத்திருந்தேன். முதலில் கூட்டிட்டுப் போனார்கள்; நல்ல ஒரு பெரிய ட்ரெயின் செட், பஞ்சபூதங்களுமே அதை சுத்தி இருந்துச்சு, கூடவே 70 எலியும் இருந்துச்சு! அதுக்குள்ளதான் ஷூட்டிங். இதுல என்ன காமெடினா, அண்ணனே எனக்கு டயலாக் சொல்லிக் கொடுத்ததுக்கு அப்புறம்தான் நான் டயலாக் பேச ஆரம்பிச்சேன். அப்ப என்ன சொன்னாருன்னா: ‘முதல் ஆக்சன், ரெயினுக்கு (மழை); இரண்டாவது, ட்ரெயினுக்கு; மூன்றாவது ஆக்சன், விண்டோ காற்று வருவதற்கு; நான்காவது, ட்ராலிக்கு; ஐந்தாவது ஆக்சன், காற்று அடிப்பதற்கு; ஆறாவது, தண்டருக்கு (இடி); மின்னல் வருது… அண்ணே எனக்கு எப்போ ஆக்சன் வரும்? ‘இருங்க, இதுதான் ஆர்டர்., ரைட்டு கரெக்ட்டா இருங்க’ன்னு சொல்லுவாரு. ஒன்பதாவது ஆக்சன், அது கூட இல்ல, ஒன்பது எலிக்கு! பத்தாவது ஆக்சன், எங்களுக்கு! இப்படி படப்பிடிப்பு முழுவதுமே ஜாலியாகவும் புதுசாகவும் இருந்தது” என்றார்.