TN 2026 தங்க நட்சத்திரம் – விமர்சனம்

நடிப்பு: நட்டி நட்ராஜ், தம்பி ராமையா, எம்.எஸ்.பாஸ்கர், இளவரசு, ஷ்ரித்தா ராவ், சாந்தினி தமிழரசன், யாஷிகா ஆனந்த், ரெடின் கிங்ஸ்லி மற்றும் பலர்

இயக்கம்: உமாபதி எஸ் ராமையா

ஒளிப்பதிவு: பி.ஜி.முத்தையா

படத்தொகுப்பு: அருள் ஆர் தங்கம்

இசை: தர்புகா சிவா

நடன அமைப்பு: சாண்டி, பிரவீன் ஜி

கலை: என்.கே.ராகுல்

ஸ்டண்ட்: மகேஷ் மேத்யூ

தயாரிப்பு: ‘கண்ணன் ரவி குரூப்ஸ்’ கண்ணன் ரவி

இணைத் தயாரிப்பு: தீபக் ரவி

பத்திரிகை தொடர்பு: சதீஷ் எய்ம், சிவா

‘political satire’ எனப்படும் ‘அரசியல் நையாண்டி’ வகைத் திரைப்படங்கள் தமிழ் சினிமாவுக்குப் புதியது அல்ல. மட்டுமல்ல, அவை தமிழ் திரைப்பட ரசிகர்களால் தலையில் தூக்கி வைத்து கொண்டாடப்பட்டும் இருக்கின்றன. இதற்கு உதாரணமாக சோவின் ‘முகமது பின் துக்ளக்’, மணிவண்ணனின் ‘அமைதிப்படை’ ஆகியவற்றை சொல்லலாம். அந்த வரிசையில் இப்போது திரைக்கு வந்திருக்கிறது ‘TN 2026 தங்க நட்சத்திரம்’ திரைப்படம்.

இதன் டிரைலர் வெளியானபோதே அரசியல் வட்டாரங்களிலும், திரைத்துறையினர் மத்தியிலும் மிகப் பெரிய அதிர்வலை உண்டாகி, மிகப் பெரிய சர்ச்சையும், மிகுந்த எதிர்பார்ப்பும் ஏற்பட்டுவிட்டது. “தேர்தலுக்கு முன் இந்த திரைப்படத்தை வெளியிடக் கூடாது” என்று சில கட்சிகள் போர்க்கொடி தூக்கின. என்றாலும், அதையும் மீறி இதோ… திரையரங்குகளுக்கு படம் வந்தே விட்டது. எப்படி இருக்கிறது இந்த திரைப்படம்? பார்ப்போம்…

எம்.ஜி.ஆர் மறைவுக்குப் பிறகு, வட இந்தியாவிலிருந்து பிழைப்புத் தேடி தமிழ்நாடு வந்த நாயகன் குல்கந்த் குமார் (நட்டி நட்ராஜ்), சந்தர்ப்ப சூழ்நிலையால், தட்டுத்தடுமாறி, ஒரு தமிழ் திரைப்படத்தில் ஹீரோவாக அறிமுகமாகிறார். தமிழ்நாட்டை பூர்வீகமாகக் கொண்டிருந்தாலும் வடநாட்டில் பிறந்து வளர்ந்து வந்துள்ள அவரை தமிழ் ரசிகர்களுக்குப் பிடித்துப்போக, “அடுத்த எம்.ஜி.ஆர் குல்கந்த் குமார் தான்” என்று அவர்கள் கொண்டாட ஆரம்பித்து விடுகிறார்கள்.

பொள்ளாச்சியில் ஆயிரம் ஏக்கர் நிலபுலன்களுக்குச் சொந்தக்காரராக, பெரும் செல்வந்தராகத் திகழும் ஜமீன்தார் மன்றாடியார் (தம்பி ராமையா) தீவிர எம்.ஜி.ஆர் ரசிகர். அவருடைய வேலையாட்கள், “அடுத்த எம்.ஜி.ஆர் நடிகர் குல்கந்த் குமார் தான்” என்று சொல்வதை ஏற்க மனமில்லாத மன்றாடியார், ஒருநாள் கருப்பு – வெள்ளைத் தொலைக்காட்சியின் ‘ஒலியும் ஒளியும்’ நிகழ்ச்சியில் குல்கந்த் குமாரை பார்க்கிறார். அவரை மன்றாடியாருக்கும் பிடித்துப்போய் விடுகிறது.

அந்த சமயம் படப்பிடிப்புக்காக பொள்ளாச்சிக்கு வருகிறார் குல்கந்த் குமார். அவரை சந்தித்துப் பேசி, தன் பங்களாவுக்கு அழைத்துவரும் மன்றாடியார், அவரை எம்.ஜி.ஆர் போல புகழின் உச்சிக்குக் கொண்டு செல்ல விரும்புவதாகவும், அதற்கு எவ்வளவு செலவானாலும் பரவாயில்லை என்றும் சொல்ல, குல்கந்த் குமாருக்கு ஏக சந்தோஷம்.

எம்.ஜி.ஆர் போல நல்ல குணநலன்கள் கொண்ட கதாபாத்திரங்களில் நடிக்கும்படி குல்கந்த் குமாரிடம் சொல்கிறார் மன்றாடியார். ‘எம்.ஜி.ஆர் பார்முலா’ குல்கந்த் குமாருக்கு ஒர்க்-அவுட் ஆகாததால் அத்தகைய படங்கள் ஃபிளாப் ஆகின்றன. இதனால் ரூட்டை மாற்றும் குல்கந்த் குமார், ’ஆண்ட்டி ஹீரோ’ சப்ஜெக்ட் உள்ள படங்களில் நாயகனாக நடித்து, மிகப் பெரிய வெற்றிகளைக் குவித்து ‘உச்ச நட்சத்திரம்’ ஆகிவிடுகிறார்.

இப்படி தன் சொத்துக்களை கொஞ்சம் கொஞ்சமாக விற்று குல்கந்த் குமாரை படிப்படியாக முன்னேற்றிய மன்றாடியார், அடுத்து அரசியல் ஆசையையும் அவருக்குள் ஏற்படுத்துகிறார். அரசியல் பிரவேசத்துக்கு முதல் படியாக தன்னுடைய ’ரசிகர் மன்ற’த்தை ‘மக்கள் இயக்க’மாக மாற்றுகிறார் குல்கந்த் குமார். அவரது அரசியல் பிரவேச முயற்சிக்கு, பழம் தின்று கொட்டை போட்ட பல அரசியல் கட்சிகளிடமிருந்து எதிர்ப்பும் நெருக்கடிகளும் வருகின்றன. இவற்றை எல்லாம் மீறி அரசியல் கட்சி தொடங்கும் குல்கந்த் குமார், முதலமைச்சர் ஆகிவிட வேண்டும் என்ற முடிவில் தீவிரமாக இருக்கிறார். அவருக்கு அல்லக்கைகளாக இருப்போர் (தம்பி ராமையா, எம்.எஸ்.பாஸ்கர், இளவரசு போன்றோர்) “அடுத்த முதல்வர் குல்கந்த் குமார் தான்” என்ற நம்பிக்கையில் ஆட்டமாய் ஆடுகிறார்கள்.

இந்நிலையில், 2026ஆம் ஆண்டு தமிழக சட்டமன்ற தேர்தலுக்கான தேதி அதிகாரப்பூர்வமாக அறிவிக்கப்படுகிறது. சொகுசான சொந்த வாழ்க்கையிலும், போட்டிகள் நிறைந்த அரசியல் களத்திலும் பல பிரச்சனைகளைச் சந்திக்கும் குல்கந்த் குமார், திடீரென்று அதிரடியாக முக்கிய முடிவு ஒன்றை எடுக்கிறார். அந்த முடிவு என்ன? அதன் பின்னணி என்ன? விளைவுகள் என்ன? நடிகர் குல்கந்த் குமார் முதலமைச்சர் ஆனாரா, இல்லையா? என்பன போன்ற கேள்விகளுக்கு எதிர்பாராத திருப்பங்களும், அரசியல் நையாண்டியுமாய் விடை அளிக்கிறது ‘TN 2026 தங்க நட்சத்திரம்’ திரைப்படத்தின் மீதிக்கதை.

கதையின் நாயகன் நடிகர் குல்கந்த் குமாராக நட்டி நட்ராஜ் நடித்திருக்கிறார். சில படங்களில் வில்லனாகவும், சில படங்களில் குணச்சித்திர நடிகராகவும் வந்த நட்டி நட்ராஜா இது என்று வியப்பில் மூக்கின் மேல் விரல் வைக்கும் அளவுக்கு படம் முழுக்க அரசியல் நையாண்டி செய்து பார்வையாளர்களை குலுங்கிக் குலுங்கி சிரிக்க வைத்திருக்கிறார். வடநாட்டு சேட்டுகள் பாணியில் ஆரம்பத்தில் தட்டுத்தடுமாறி தமிழ் பேசுவது, உடன் நடிக்கும் நடிகைகளுக்கு காமவலை விரிப்பது, ‘அமைதிப்படை’யில் அமாவாசை கதாபாத்திரம் நாகராஜ சோழன் எம்.எல்.ஏ ஆனபிறகு தன்னை உயர்த்திவிட்ட மணிவண்ணன் கதாபாத்திரத்தை மட்டம் தட்டுவது போல, தனக்கு நட்சத்திர அந்தஸ்து வந்த பிறகு ஜமீன்தார் மன்றாடியார் தலையைத் தட்டி ஒரு படி கீழே இறக்குவது, அரசியல் ஆசை வந்த பிறகு சாதுர்யமாகவும், சாணக்கியத்தனமாகவும் காய் நகர்த்துவது என அட்டகாசமாக நடித்து தன் கதாபாத்திரத்தை தூக்கி நிறுத்தியிருக்கிறார் நட்டி. அவருடைய கதாபாத்திரத்துக்கு வேறு எந்த நடிகரையும் நினைத்துக்கூட பார்க்க முடியவில்லை என்பது அவரது நடிப்பின் தனிச்சிறப்பு. பாராட்டுகள் நட்டி!

நாயகனின் வளர்ச்சிக்கு உறுதுணையாக இருக்கும் பொள்ளாச்சி ஜமீன்தார் மன்றாடியாராக தம்பி ராமையா நடித்திருக்கிறார். நடிப்பில் பன்முகத் தன்மையை வெளிப்படுத்தும் அபார திறமை கொண்ட தம்பி ராமையா, கதையில் திருப்பங்களை ஏற்படுத்தும் தன் கதாபாத்திரம் மூலம் பார்வையாளர்களை சிரிக்கவும், சிந்திக்கவும் வைத்து கவனம் ஈர்க்கிறார்.

நாயகனின் ரசிகர் மன்றத்து நபராக ரெடின் கிங்ஸ்லி நடித்திருக்கிறார். பரவலாக படம் முழுக்க வரும் அவர், தனது வழக்கமான உடல்மொழி, வசன உச்சரிப்பு மாறாமல் அப்படியே நடித்துள்ள போதிலும், கதையின் திருப்பத்துக்கு உதவியுள்ளார்.

நாயகனுடன் பயணிக்கும் அரசியல்வாதிகளாக எம்.எஸ்.பாஸ்கர், இளவரசு ஆகியோர் நடித்திருக்கிறார்கள். எம்.எஸ்.பாஸ்கர் அவ்வப்போது சிரிக்க வைத்தாலும், இருவருக்கும் இன்னும் கொஞ்சம் கூடுதலாக வாய்ப்பு கொடுத்து பயன்படுத்தியிருக்கலாம்.

நாயகனின் மனைவியாக வரும் ஷ்ரித்தா ராவ், நாயகனுடன் நெருக்கம் காட்டும் சினிமா நடிகைகளாக வரும் சாந்தினி தமிழரசன், யாஷிகா ஆனந்த், மற்றும் தலைவாசல் விஜய், விஜி சந்திரசேகர், இந்திரஜா ரோபோ சங்கர் உள்ளிட்டோர் தத்தமது கதாபாத்திரத்துக்குத் தேவையான நடிப்பை வழங்கியிருக்கிறார்கள்.

ஜமீன்தார் மன்றாடியாராக நடித்திருக்கும் தம்பி ராமையா இப்படத்தின் கதை – வசனத்தை எழுதியிருக்கிறார். ரஜினிகாந்த், விஜய் போன்ற முன்னணி நாயக நடிகர்களின் வாழ்க்கையில் நடந்த சில சம்பவங்களை எடுத்துக்கொண்டு, அவற்றோடு கற்பனையாகப் புனைந்த சில சம்பவங்களைச் சேர்த்து, எவருடைய மனதையும் புண்படுத்தாதவாறு – கத்தி மேல் நடப்பதைப் போல் – மிகுந்த எச்சரிக்கையுடன் நையாண்டி செய்யும் வகையில் இக்கதை வசனத்தை அவர் எழுதியிருப்பது பாராட்டத்தக்கது.

தம்பி ராமையாவின் மகன் உமாபதி எஸ் ராமையா இப்படத்துக்கு திரைக்கதை எழுதி, இயக்கியிருக்கிறார். அரசியல் ஆசை கொண்ட சமகால உச்ச நட்சத்திரங்களின் அரைவேக்காட்டு அமெச்சூர்தனங்களை நையாண்டி செய்யும் வகையில் அவற்றை பொழுதுபோக்கு கதைக்களத்தில் புகுத்தி, சிரிக்கவும், ரசிக்கவும், அதே நேரத்தில் பார்வையாளர்களுக்கு விழிப்புணர்வை ஏற்படுத்தவும் செய்திருக்கிறார் இயக்குநர். வாழ்த்துகள்! எனினும், திரைக்கதையிலும், ஸ்டேஜிங்கிலும் துருத்திக்கொண்டு தெரியும் நாடகத்தனத்தை குறைத்திருந்தால் படத்தை இன்னும் நன்றாக ரசித்திருக்கலாம்.

பி.ஜி.முத்தையாவின் ஒளிப்பதிவு, தர்புகா சிவாவின் பின்னணி இசை, அருள் ஆர் தங்கத்தின் படத்தொகுப்பு உள்ளிட்ட தொழில்நுட்பங்கள் படத்துக்கு பலம்.

’TN 2026 தங்க நட்சத்திரம்’ – அனைத்துத் தரப்பினரும் பார்த்து, ரசித்து, வயிறு வலிக்கச் சிரித்து, மகிழலாம்!

ரேட்டிங்: 4/5