ஒண்டிமுனியும் நல்லபாடனும் – விமர்சனம்

நடிப்பு: ‘பரோட்டா’ முருகேசன், கார்த்திகேசன், முருகன், சேனாபதி, விஜயன், சித்ரா நடராஜன், கௌஷிகா, தமிழினியன், விகடன், வித்யா சக்திவேல் மற்றும் பலர்

எழுத்து & இயக்கம்: சுகவனம்

ஒளிப்பதிவு: ஜே.டி.விமல்

படத்தொகுப்பு: சதீஷ் குரோசோவா

பின்னணி இசை: என்டிஆர் (நடராஜன் சங்கரன்)

கலை: ஜே.கே.அந்தோணி

ஸ்டண்ட்: மாஸ் மோகன்

தயாரிப்பு: ’திருமலை புரொடக்ஷன்ஸ்’ கே.கருப்பசாமி

இணை தயாரிப்பு: அமராவதி

பத்திரிகை தொடர்பு: நிகில் முருகன்

அனுதினமும் அயராது நிலத்தில் கடினமாக பாடுபடும் உழைப்பாளியை ‘நல்லபாடன்’ என்று சொல்வது கொங்குப்பகுதி மக்கள் மரபு. ஒடுக்கப்பட்ட தலித் சமூகத்து ஏழை விவசாயியான அத்தகைய ஒரு நல்லபாடனையும், அவர் வணங்கும் அவரது குலதெய்வமான ஒண்டிமுனியையும் இணைத்து ஒரு நெகிழ்ச்சியான கதையாகவும், அது நிகழும் கொங்குப்பகுதியை கதைக்களமாகவும் வைத்து, ஓர் அச்சு அசலான உலக சினிமாவாக உருவாகியிருக்கிறது இந்த ‘ஒண்டிமுனியும் நல்லபாடனும்’ திரைப்படம். அதை பார்த்துவிட்டு வந்தபின் பல நாட்கள் மனதை விட்டு அகலாத அற்புதப் படைப்பாக நினைவில் நிற்கும் அது தற்போது திரைக்கு வந்திருக்கிறது…

மழையை நம்பி தனக்குச் சொந்தமான சிறு நிலத்தில் உழுது விவசாயம் செய்து எளிய வாழ்க்கை நடத்தி வருபவர் நல்லபாடன் (’பரோட்டா’ முருகேசன்). அவரது ஐந்து வயது மகன் வேலன், விளையாடிக் கொண்டிருக்கும்போது, பெரிய கிணறு ஒன்றில் தவறி விழுந்து விடுகிறான். அக்கம்பக்கத்தில் இருந்தவர்கள் ஓடிவந்து மீட்டு வேலனை கிணற்றுக்கு வெளியே கொண்டு வருகிறார்கள். எனினும், பேச்சு மூச்சில்லாமல் வேலன் உயிருக்குப் போராடுகிறான். இதைப் பார்த்து பரிதவிக்கும் நல்லபாடன், “எப்படியாவது எம்புள்ளையைக் காப்பாத்து. உனக்கு கிடா வெட்டி நேர்த்திக்கடன் செலுத்துறேன்” என்று தனது குலதெய்வமான ஒண்டிமுனியை உருக்கமாக வேண்டி ஒரு கிடாக்குட்டியை நேர்ந்துவிடுகிறார்.

சிறுவன் வேலன் பிழைத்து, வளர்ந்து, இளைஞராக (விஜயன்) மாற, நேர்ந்து விடப்பட்ட கிடாக்குட்டியும் பெரிய கிடாவாக வளர்ந்து நிற்கிறது. இருந்தும், நல்லபாடனால் நேர்ந்து கொண்டபடி கிடாவை ஒண்டிமுனிக்கு காணிக்கையாக்க இயலவில்லை. காரணம், அந்த ஊரிலுள்ள பெரிய பண்ணாடி (கார்த்திகேசன்) மற்றும் சின்ன பண்ணாடி (முருகன்). (பண்ணையாரை ‘பண்ணாடி’ என்று சொல்வது கொங்குப்பகுதி மக்கள் மரபு.)

இரண்டு பண்ணாடிகளும் தங்களுக்குள் பகைமை பாராட்டி மோதிக் கொண்டிருப்பதால், பல வருடங்களாக ஒண்டிமுனிக்கு திருவிழா எடுக்கப்படவில்லை. திருவிழாவில் தான் கிடாவை காணிக்கையாக்க முடியும் என்பதால், திருவிழாவை நடத்துமாறு அவர்கள் ஒவ்வொருவரிடமும் போய் மன்றாடுகிறார் நல்லபாடன். அவர்களோ, அவரை வேலை வாங்கி உழைப்பைச் சுரண்டுகிறார்களே தவிர திருவிழாவுக்கு நாள் குறிக்காமல் இழுத்தடிக்கிறார்கள். ஒரு கட்டத்தில் இரு பண்ணாடிகளும் திடீரென சமரசம் செய்துகொள்கிறார்கள். அதனுள் தலித் மக்களுக்கு எதிரான பெரிய சதித்திட்டம் ஒன்று ஒளிந்திருக்கிறது.

ஊர்மக்களின் தண்ணீர்த் தேவையை பூர்த்தி செய்வதற்காக ஒரு பொதுக்குளம் அமைத்துக் கொடுக்க அரசு முன்வருகிறது. அதற்கு 5 ஏக்கர் நிலம் கேட்கிறது. நிறைய நிலம் வைத்திருக்கும் பண்ணாடிகள் அதிலிருந்து 5 ஏக்கர் நிலத்தை ஊர் நன்மைக்காக தானம் செய்ய மனமில்லாமல், ஏழை தலித்துகள் வசிக்கும் பகுதியில் குளத்தை அமைக்க சதித்திட்டம் போடுகிறார்கள். நல்லபாடனின் கோரிக்கையான திருவிழா நடத்துவதற்கு சம்மதம் பெறுவதாக பொய்யாகக் காட்டி, அவர் மூலமே தலித் மக்களிடம் கைரேகை வாங்கி, அவர்கள் நிலத்தை மோசடியாக அபகரிக்கிறார்கள்.

இதனிடையே, நல்லபாடன் பேசியபடி தன் மகள் தங்கத்துக்கு (சித்ரா நடராஜன்) நகை போட இயலாததால், தங்கத்தின் கணவர் (சேனாபதி) வீட்டாரால் விரட்டபட்டு, தன் மகனுடன் பிறந்த வீட்டுக்குத் திரும்பி வந்து விடுகிறார் தங்கம். மட்டுமல்ல, நல்லபாடனின் மகன் வேலன் காதலிக்கும் பெண் (வித்யா சக்திவேல்), சொந்தமாக மோட்டார் சைக்கிள் வைத்திருந்தால் தான் உன்னை காதலிப்பேன் என்று உறுதியாகச் சொல்லிவிடுகிறார். இத்தகைய பணத் தேவைகள் காரணமாக கிடாவை விற்க வேண்டிய நெருக்கடிக்கு ஆளாகிறார் நல்லபாடன்.

அதன்பிறகு என்ன நடந்தது? குளம் அமைப்பதற்காக தங்கள் நிலத்தை பண்ணாடிகள் தந்திரமாக அபகரித்திருக்கிறார்கள் என்ற விவரம் அப்பாவி தலித் மக்களுக்குத் தெரிய வந்ததா? அவர்கள் காட்டிய எதிர்வினை என்ன? கிடாவை நல்லபாடன் விற்றாரா, இல்லையா? அவர் கிடாவை காணிக்கையாக்கி, தனது நேர்த்திக்கடனை நிறைவேற்றினாரா, இல்லையா? என்பன போன்ற கேள்விகளுக்கு, யதார்த்தத்தை மீறாமல், சுவாரஸ்யமாக விடை அளிக்கிறது ‘ஒண்டிமுனியும் நல்லபாடனும்’ திரைப்படத்தின் மீதிக்கதை.

வானம் பார்த்த பூமியில் உழைத்து, விளைவித்துப் பிழைக்கும் சிறு விவசாயி நல்லபாடனாக ‘பரோட்டா’ முருகேசன் நடித்திருக்கிறார். ஏற்கெனவே பல படங்களில் சின்னச் சின்ன வேடங்களில் ஓரிரு காட்சிகளில் வந்து போயிருக்கும் அவர், முதல்முறையாக இந்தப் படத்தில் முதன்மைக் கதாபாத்திரம் ஏற்று நடித்திருக்கிறார். நடித்திருக்கிறார் என்று சொல்வதை விட எளிய கிராமத்து மனிதராகவே திரையில் வாழ்ந்திருக்கிறார் என்று சொல்வதே பொருந்தும். ஒரு காட்சியில் கூட இயல்பை மீறாமல், மிகவும் யதார்த்தமாக, சிறப்பாக நடித்திருக்கிறார். காடுமேடெல்லாம் காலில் செருப்பு இல்லாமல் நடந்து, ஓடி, சுமை சுமந்து, உண்மையிலேயே உயிரைக் கொடுத்து நடித்திருக்கிறார். பாராட்டுகள் ‘பரோட்டா’ முருகேசன். இதில் நடித்ததற்காக நிறைய விருதுகள் வழங்கப்பட்டு, நீங்கள் கௌரவிக்கப்படுவீர்கள் என்று நம்புகிறோம்.

நல்லபாடனின் மகன் வேலனாக விஜயன் நடித்திருக்கிறார். சொந்த வீட்டுக் கோழியையே திருடி விற்று, நண்பர்களுடன் செலவு செய்து, ஜாலியாக ஊர் சுற்றும் ஊதாரி வேடத்தில் அருமையாக நடித்திருக்கிறார். அவரது காதலியாக கிராமத்து அழகுடன் கூடிய வித்யா சக்திவேல் நடித்திருக்கிறார்.

நல்லபாடனின் மகள் தங்கமாக வரும் சித்ரா நடராஜன், தங்கத்தின் கணவராக வரும் சேனாபதி, இவர்களின் மகனாக வரும் ஒரு சிறுவன், பெரிய பண்ணாடியாக வரும் கார்த்திகேசன், சின்ன பண்ணாடியாக வரும் முருகன், பங்காளியாக வரும் விகடன், மற்றும் கெளசிகா, தமிழினியன் என படத்தில் நடித்துள்ள ஏனைய கலைஞர்களும் அந்தந்தக் கதாபாத்திரங்களாக மாறி, நிஜ கிராமத்து மனிதர்களைப் பிரதிபலித்திருக்கிறார்கள்.

எழுதி இயக்கியிருக்கிறார் இயக்குநர் சுகவனம். ’ஒண்டிமுனியும் நல்லபாடனும்’ என்ற தலைப்பிலேயே கவனத்தை ஈர்த்துவிட்டார் இயக்குநர். தமிழ்நாட்டின் தவிர்க்க முடியாத நிலப்பரப்பான கொங்குப் பகுதியின் பின்னணியில், இதுவரை சொல்லப்படாத ஒரு கதையை, மிக இயல்பாகச் சொல்லியிருக்கிறார். படம் முழுவதும் கொங்குத் தமிழை அருமையாக பயன்படுத்தியிருக்கிறார். முதல் காட்சியில் இருந்து கிளைமாக்ஸ் வரை கொங்குத் தமிழ் விளையாடியிருக்கிறது.

கொங்குப் பகுதி மக்களின் வாழ்வியில் முறை, சிறு தெய்வ வழிபாடு, கடவுள் நம்பிக்கை, நேர்த்திக் கடன் செலுத்துதல், கிடா விருந்தும் அதன் மீதான மக்களின் ஆர்வமும் என பல விஷயங்களையும் மிக நெருக்கமாகச் சொல்லியிருக்கிறார் இயக்குநர். பணக்காரர்களின் அதிகாரப் போட்டி, அவர்கள் ஒடுக்கப்பட்ட மக்கள் மீது நடத்தும் உழைப்பு மற்றும் சாதியச் சுரண்டல்கள் போன்றவற்றையும், அதிகாரம் செலுத்தும் நபர்கள் அதை எப்படி நயவஞ்சமாகச் செய்கிறார்கள் என்பதையும் மிக நுட்பமாகப் பதிவு செய்திருக்கிறார். பாராட்டுகள் சுகவனம்.

கொங்குப்பகுதி கிராமங்களின் அழகை, மனிதர்களின் இயல்பை கேமராவில் அள்ளிக் கொண்டுவந்து, ரசிக்கத் தக்க விதத்தில் கண்களுக்கு விருந்து படைத்திருக்கிறார் ஒளிப்பதிவாளர் ஜே.டி.விமல்.

யதார்த்தமான இந்த படத்தில் பாடல்கள் தவிர்க்கப்பட்டிருப்பது பாராட்டுக்குரியது. நடராஜன் சங்கரனின் அளவான பின்னணி இசை அருமை. சதீஷ் குரோசோவாவின் படத்தொகுப்பு ஷார்ப்.

‘ஒண்டிமுனியும் நல்லபாடனும்’ – வித்தியாசமான நல்ல படம். உலகத் தரத்தில் ஒரு தமிழ் சினிமா என்ற வகையில் அனைவரும் அவசியம் ஆதரிக்க வேண்டிய படம். கமர்ஷியல் மற்றும் மசாலா அம்சங்களை எதிர்பார்க்காமல் திறந்த மனதுடன் போனால், நிச்சயம் ரசித்து மனநிறைவு கொள்ளலாம்!

ரேட்டிங்: 4.25/5