ஐ ஆம் கேம் – விமர்சனம்

நடிப்பு: துல்கர் சல்மான், கயாடு லோஹர், மிஷ்கின், ஆண்டனி வர்கீஸ், சம்யுக்தா விஸ்வநாதன், வினய் ஃபோர்ட், கதிர், ஜெயசுதா, யோகி பாபு மற்றும் சிலர்

கதை, இயக்கம்: நஹாஸ் ஹிதாயத்

திரைக்கதை: சஜீர் பாபா, பிலால் மொய்து, இஸ்மாயில் அபூபக்கர்

ஒளிப்பதிவு: ஜிம்ஷி காலித்

படத்தொகுப்பு: சாமன் சாக்கோ

இசை: ஜேக்ஸ் பிஜாய்

நடன அமைப்பு: சாண்டி

தயாரிப்பு: துல்கர் சல்மான் & ஜோம் வர்கீஸ்

மக்கள் தொடர்பு: யுவராஜ்

பெரிய செல்வந்தர் வீட்டுப் பிள்ளையான நாயகன் டான் ஜான் (துல்கர் சல்மான்) சூதாட்டத்துக்கு அடிமையானவர். எந்நேரமும் குடி, சூதாட்டம் என்று பொழுதைக் கழிப்பவர். இதனால் பணம் அனைத்தையும் இழந்து பெரிய கடனாளியாகி விடுகிறார்.

இந்நிலையில், சூதாட்ட விடுதியில் ஏற்படும் பிரச்சனையில் சிக்கும் டான் ஜான், அங்கிருந்து தப்பிக்கும்போது விபத்தில் சிக்கி வலது கையை இழக்கிறார். இதனால், உயிரிழந்த வேறொருவரின் வலது கை, மாற்று அறுவை சிகிச்சை மூலம் டான் ஜானுக்கு பொருத்தப்படுகிறது.

இப்படி பொருத்தப்பட்ட கை டான் ஜானுக்கு அதிர்ஷ்டத்தைக் கொடுக்கிறது. எந்த சூதாட்டத்தில் தோல்வி அடைந்தாரோ, அதே சூதாட்டத்தில் வெற்றி மேல் வெற்றிகளைக் குவித்து பணத்தை அள்ளுகிறார்.

அதேவேளை, தனது வலது கை தன் கட்டுப்பாட்டை மீறி சில விஷயங்களைச் செய்வதை டான் ஜான் உணருகிறார். அதை கட்டுப்படுத்த முடியாமல் தவிக்கிறார். குறிப்பாக தொழிலதிபர் டேவிட் ஆபிரகாமை (மிஷ்கின்) கொலை செய்ய தனது வலது கரம் துடிப்பதை உணரும் டான் ஜான், அதற்கான உண்மையான காரணம் தெரிய வர, அதிர்ச்சியில் உறைந்துபோகிறார்.

டான் ஜானுக்கு பொருத்தப்பட்ட அந்த கை யாருடையது? அது ஏன் தொழிலதிபர் டேவிட் ஆபிரகாமை கொல்லத் துடிக்கிறது? இதன் பின்னணி என்ன? இறுதியில் அந்த கை டேவிட் ஆபிரகாமை கொன்றதா, இல்லையா? என்பன போன்ற கேள்விகளுக்கு எதிர்பாராத திருப்பங்களுடன் விடை அளிக்கிறது ‘ஐ ஆம் கேம்’ திரைப்படத்தின் மீதிக்கதை.

நாயகன் டான் ஜானாக துல்கர் சல்மான் நடித்திருக்கிறார். ஆரம்பத்தில் குடியும் சூதாட்டமுமாய் பொழுதைக் கழிக்கும் நாட்களில் ரொம்ப ஸ்டைலாக இருக்கிறார். மாற்று அறுவை சிகிச்சை மூலம் பொருத்தப்பட்ட கை தனது கட்டுப்பாட்டை மீறி செயல்படும் சவாலான காட்சிகளில் சாமர்த்தியமான நடிப்பை வெளிப்படுத்தியிருக்கிறார். அவர் தொழிலதிபர் டேவிட் ஆபிரகாமை பழிவாங்கும் காட்சிகள் விறுவிறுப்பாக இருக்கிறது.

நாயகியாக, பிசியோதெரபிஸ்ட் ஈஷாவாக கயாடு லோஹர் நடித்திருக்கிறார். அவரது கதாபாத்திரம் அழுத்தமானதாக இல்லை. என்ற போதிலும், அழகாலும், அளவான நடிப்பாலும் கவனம் ஈர்க்கிறார்.

வில்லனாக, தொழிலதிபர் டேவிட் ஆபிரகாமாக மிஷ்கின் நடித்திருக்கிறார். வழக்கமான மசாலா சினிமா வில்லன் பாத்திரம் அவருக்கு. அத்தகைய பாத்திரத்தில் நடிக்கும்போது வழக்கமாக மிகையாக, சைக்கோத்தனமாக நடந்துகொள்வாரே… அதையே இப்படத்திலும் நடிப்பாக வெளிப்படுத்தியிருக்கிறார்.

இரண்டாவது நாயகனாக, கிரிக்கெட் விளையாட்டை தனது உயிருக்கு மேலாகக் கருதும் விக்கியாக வரும் ஆண்டனி வர்கீஸும், அவரது காதலி தாரணியாக வரும் சம்யுக்தா விஸ்வநாதனும் கதையில் திருப்பங்களை ஏற்படுத்தி ஸ்கோர் செய்திருக்கிறார்கள்.

ஃப்ரெட்டியாக வரும் வினய் ஃபோர்ட், ஜேசன் ஆண்டனியாக வரும் கதிர் மற்றும் ஜெயசுதா, யோகி பாபு உள்ளிட்ட ஏனைய நடிப்புக் கலைஞர்களும் தத்தமது கதாபாத்திரத்துக்குத் தேவையான நடிப்பை நிறைவாக வழங்கியிருக்கிறார்கள்.

இப்படத்தின் கதையை எழுதி இயக்கியிருக்கிறார் நஹாஸ் ஹிதாயத். சஜீர் பாபா, பிலால் மொய்து, இஸ்மாயில் அபூபக்கர் ஆகியோர் திரைக்கதை எழுதியிருக்கிறார்கள். கதைக்கரு ‘பீச்சாங்கை’ என்ற தமிழ்ப்படத்தை நினைவூட்டுவதாக இருந்தாலும், புதுமையான காட்சிகள் படத்துக்கு பலம். திரைக்கதையை இன்னும் கூட மெருகேற்றி மசாலாத்தனங்களைக் குறைத்திருக்கலாம். மெடிக்கல் ஃபிக்‌ஷனாகத் தொடங்கி, பேய்க்கதையாக நகர்ந்து, வழக்கமான பழிவாங்கும் கதையாக முடிந்ததில் ஏமாற்றமே.

‘ஐ ஆம் கேம்’ – காதல், சஸ்பென்ஸ், ஆக்‌ஷன், திரில்லர் என அனைத்து அம்சங்களும் கொண்ட கமர்ஷியல் படம்; பார்த்து ரசிக்கலாம்!

ரேட்டிங்: 3/5