”ஜனங்களுக்கு பிடிக்குதுங்குற ஒரே காரணத்தால தான் இப்போ வரைக்கும் நடிச்சிட்டு இருக்கேன்”:‘ஜெயிலர் 2’ படக்குழுவின் சிறப்பு நிகழ்ச்சியில் ரஜினி பேச்சு!

ரஜினிகாந்த் – ‘சன் பிக்சர்ஸ்’ கலாநிதி மாறன் – இயக்குநர் நெல்சன் திலீப் குமார் கூட்டணியில் உருவாகி வெளிவந்த ‘ஜெயிலர்’ படத்தின் மாபெரும் வெற்றியைத் தொடர்ந்து, தற்போது அதே கூட்டணியில் உருவாகியிருக்கும் படம் ‘ஜெயிலர் 2’. இப்படம் வரும் (அக்டோபர்) 15ஆம் தேதி வெளியாக இருப்பதை முன்னிட்டு, இதன் படக்குழுவினர் பங்கேற்ற சிறப்பு நிகழ்ச்சி ‘ஜெயிலர் 2 சூப்பர் ஷோ’ என்ற பெயரில் (அக்டோபர்) 9ஆம் தேதி ‘சன் நெக்ஸ்ட்’ ஓடிடி தளத்தில் வெளியானது.

இந்நிகழ்ச்சியில் கலந்துகொண்டு ரஜினி பேசியதாவது:

ஜெயிலர் படம் பூதாகரமான ஹிட். அதுக்கு சரிசமமா இந்த படத்தை கொடுக்கனும், இல்லனா அதைவிட நல்லா கொடுக்கணும். அப்படி கொடுக்கலைன்னா முதல் பார்ட்டோட கம்பேர் பண்ணிடுவாங்கன்னு யோசிச்சோம். நெல்சனும் அறிமுகக் காட்சி இப்படி இருக்கும், இண்டர்வெல் அதை விட நல்லா இருக்கும்னு சொன்னார். அது எல்லாம் பயங்கர சேலஞ்ச். வாழ்க்கையில சேலஞ் இருக்கனும். சும்மா ஓடிக்கிட்டே இருந்தா ஒன்னுமே பிரயோஜனம் இல்ல. விஷயம் இல்லனா பரவால்ல, விஷயம் இருக்கும்போது முழுசா இறங்கிடனும், போட்டு புளியனும்.

இந்த படத்துல ஒரு கேரக்டர் இருக்கு. அதை ஒரு நடிகர் பண்ணிருக்கார். பொதுவா ஷூட்டிங்ல காமெடி சீன் எடுக்கும்போது கவுண்டமணி இருந்தா நடிக்கவே முடியாது. அவ்ளோ சிரிப்பு வரும். அதே மாதிரி ரொம்ப நாள் கழிச்சு இந்த படத்துல சிரிப்பு அடக்க முடியாம நடிச்சேன். நம்ம சுராஜ், வர்மா கேரக்டருக்கு கொஞ்சம் கூட கம்மியில்ல. வித்யா பாலன் ரொம்ப சூப்பரா நடிச்சிருக்காங்க. அவர் கூட முழுப் படம் பண்ண ஆசையா இருக்கு.

பாலிவுட் நடிகர் மிதுன் சக்ரவர்த்தி இதுல நடிச்சிருக்கார். முதல்ல புரொடக்‌ஷன் சைட்ல அவர்கிட்ட போய் கேட்டப்போ என்ன கேரக்டர்னு கேட்டிருக்கார். வில்லன்னு சொன்னதும் கிட்டயே சேர்க்கல. ரஜினிக்கு நான் வில்லனா, அவர்கிட்ட நான் அடிவாங்கனுமான்னு சொல்லியிருக்கார். அப்புறம் ஒரு நிகழ்ச்சியில அவரை சந்திச்சேன். அப்போ இது பத்தி கேட்டு, நீ சொன்னா நடிக்கிறேன்னு சொன்னார். நான் நல்லாருக்கும் நடிங்கன்னு சொன்னேன், உடனே ஒரு கண்டிஷன் போட்டார். நீ என்னை அடிக்கக்கூடாது, கொலை பண்ணக்கூடாதுன்னு சொன்னார். அது எனக்கு தெரியாது, டைரக்டர் கிட்ட கேக்குறேன்னு சொல்லி நெல்சன் கிட்ட சொன்னேன். வில்லனை அடிக்காம எப்டி சார்னு முதல்ல சொன்னார். அப்புறம் அதுக்கேத்த மாதிரி ரெடி பண்ணிட்டார். இப்படித்தான் மிதுச் சக்ரவர்த்தியை உள்ளே கொண்டு வந்தோம்.

அதே மாதிரி இன்னொரு மெயின் கேரக்டர் நம்ம நடிப்பு அரக்கன் எஸ் ஜே சூர்யா. அவருடைய நடிப்பை படத்துல பார்த்திருக்கேன். ஆனா நேர்ல பார்க்குறப்போதான் என்ன ஒரு டெடிகேஷன்னு தெரிஞ்சிச்சு. நாம எல்லாம் ஷாட் முடிஞ்சா உடனே போய் ஒக்காந்துருவோம். ஆனா அவரு டைரக்டர் விட்டாலும் ஒன்ஸ் மோர் கேட்குறாரு. 12 டேக் மேல போகுது, நான் நிற்கிறேன், ரம்யா கிருஷ்ணன் நிக்கிறாங்க… அட்லீஸ்ட் நாங்கெல்லாம் வயசானவங்க, போய் உட்காருங்கன்னுக் கூட சொல்லல. நிக்க வச்சு பென்டு கழட்டிட்டாங்க.

ரம்யா கிருஷ்ணன் சூப்பரா நடிச்சிருக்காங்க. அவங்க பிரேமில் இருந்தாலே போதும். அவங்க நாளுக்கு நாள் அழகா ஆயிட்டே போறாங்க. மிர்னா ரொம்ப நல்லா பண்ணி இருக்காங்க, யோகி பாபு கேரக்டர் ஃபர்ஸ்ட் பார்ட்டுல கொஞ்சம் கம்மியா இருந்துச்சு. ஆனா இதுல நிறைய இன்ட்ரஸ்டிங்கான விஷயம் இருக்கு.

அதேபோல இந்த படம் ரிலீஸானதுக்கு அப்புறம் நமோ நாராயணாவை பிடிக்க முடியாது. ஷூட்டிங் போது நமோ நாராயணவை பார்த்தாலே யோகி பாபுவுக்கு கோவம் வந்துடும், என்னடா இவன் நம்மள அடிச்சிட்டு போறான்னு நினைப்பார். இது மாதிரி ஒவ்வொருத்தரும் அவ்வளவு நல்லா பண்ணி இருக்காங்க.

இதுல மிஸ் ஆனது தமன்னா தான். நெல்சன் கிட்ட சொன்னேன், 2 பாட்டுல தமன்னாவை ஒரு பாட்டுக்கு ஆட வைங்கன்னு. உங்களுக்கு பிடிக்குங்குறதால வச்சிக்க முடியாது சாருன்னு சொல்லிட்டார். எனக்கு இல்ல சார் ஜனங்களுக்கு பிடிக்கும்னு சொன்னேன், எனக்கு புடிக்கும்னு நினைச்சிருந்தா நான் 40 வருஷத்துக்கு முன்னாடியே பெங்களூருக்கு போய் இருப்பேன். ஜனங்களுக்கு பிடிக்குதுங்குற ஒரே காரணத்தால தான் இப்போ வரைக்கும் நடிச்சிட்டு இருக்கேன்.

கலாநிதி மாதிரி ஒரு புரொடியூசர் கிடைக்க மாட்டாங்க, இதுல வந்து ரொம்ப டென்ஷன் கொடுத்ததுன்னா அது அனிருத் தான். அவர் வெளிநாட்டுல கான்சர்ட்ல பிஸியா இருந்தாரு. அது போக பாரடைஸ்னு ஒரு படம் வச்சிருந்தாரு. அதை முடிச்சிட்டு தான் இதுக்கு வரணும். அதனால நெல்சன் ரொம்ப டென்ஷன் ஆயிட்டாரு. ஆனா ரவிச்சந்திரன் சொன்னாரு, அனிருத் டென்ஷனா இருக்கும்போது தான் நல்ல விஷயங்கள் வரும்னு. அதே மாதிரி பாட்டெல்லாம் நீங்க கேட்டு இருப்பீங்க ஒவ்வொன்னும் மணி மாதிரி.

எனக்கு 76 வயசாகுது; நிறைய பேர் கேக்குறாங்க, இன்னமும் எப்படி ஓடிட்டு இருக்கீங்கன்னு, எல்லாத்துக்கும் காரணம் என்னை வாழ வைக்கும் தெய்வங்களான ரசிக பெருமக்கள் தான். அவங்க இல்லன்னா நான் ஒண்ணுமே கிடையாது. அவங்களுடைய பாதங்களை சாஷ்டாங்கமாக விழுந்து நன்றி சொல்லுறேன்” என்றார்.