பிளாஸ்ட் – விமர்சனம்

நடிப்பு: அர்ஜுன், அபிராமி, ப்ரீத்தி முகுந்தன், விவேக் பிரசன்னா, ஜான் கொக்கன், அர்ஜுன் சிதம்பரம், பவன், பாலா ஹாசன், வினோத் சாகர், திலீபன், பி.எல்.தேனப்பன் மற்றும் பலர்

எழுத்து & இயக்கம்: சுபாஷ் கே ராஜ்

ஒளிப்பதிவு: அருண் ராதாகிருஷ்ணன்

படத்தொகுப்பு: பிரதீப் இ ராகவ்

இசை: ரவி பஸ்ரூர்

ஸ்டண்ட்: பீனிக்ஸ் பிரபு

தயாரிப்பு வடிவமைப்பு: வீரமணி கணேசன்

தயாரிப்பு: ஏஜிஎஸ் எண்டர்டெயின்மெண்ட்

தயாரிப்பாளர்கள்: கல்பாத்தி எஸ் அகோரம், கல்பாத்தி எஸ் கணேஷ், கல்பாத்தி எஸ் சுரேஷ்

கிரியேட்டிவ் தயாரிப்பாளர்: அர்ச்சனா கல்பாத்தி

அசோசியேட் கிரியேட்டிவ் தயாரிப்பாளர்: ஐஸ்வர்யா கல்பாத்தி

பத்திரிகை தொடர்பு: நிகில் முருகன்

சென்னையில் சிறுவர்களுக்கு ‘கராத்தே’ கற்றுக் கொடுக்கும் கராத்தே மாஸ்டராக இருக்கிறார் ராஜாராமன் (அர்ஜுன்). அவருடைய மனைவி நீலவேணி (அபிராமி) வீட்டிலிருந்தே தையல் தொழில் செய்யும் குடும்பத் தலைவி. இவர்களது ஒரே மகள் நிலா (ப்ரீத்தி முகுந்தன்). ஐடி நிறுவனம் ஒன்றில் பணியாற்றுகிறார். இவர்களுடன் ராஜாராமனின் தம்பி இளங்கோவும் (விவேக் பிரசன்னா) வசித்து வருகிறார். அவர் சொந்தமாக மெடிக்கல் ஷாப் ஒன்றை நடத்தி வருகிறார்.

ராஜாராமன் தன்னுடைய மகள் நிலா தைரியமாக அனைத்தையும் எதிர்கொள்ள வேண்டும், ஆபத்து வரும் நேரம் பெற்றோர் உள்பட யாருடைய உதவியையும் எதிர்பார்க்காமல் தன் கையே தனக்கு உதவி என்று துணிச்சலாக நின்று தன்னைத் தானே காத்துக்கொள்ள வேண்டும் என்பதற்காக சிறுவயதிலேயே அவருக்கு கராத்தே கற்றுக் கொடுத்திருக்கிறார். தன் சுற்றத்தாருக்கு மட்டுமின்றி, முன் பின் தெரியாத எவர் ஒருவருக்கு எங்கு ஆபத்து நேர்ந்தாலும், அது பார்வையில் பட்ட மாத்திரத்தில் அவருக்குத் துணையாக நின்று அவரைக் காக்க வேண்டும் என்பதையும் சேர்த்தே சொல்லிக் கொடுத்து நிலாவை வளர்த்திருக்கிறார்.

இதனால், நிலா தன் கண்முன் நடக்கும் அநியாயங்களை அச்சமின்றி தட்டிக் கேட்கிறார். அந்த அநியாயக்காரர்கள் தன்னைத் தாக்க முனைந்தால் எதிர்த்தடித்து நொறுக்கித் தள்ளுகிறார். அப்பாவின் பேச்சைக் கேட்டு இப்படி நடந்துகொள்ளும் மகள், பெரிய பிரச்சனை எதிலும் சிக்கிக் கொள்வாரோ என்று நித்தம் நித்தம் கவலைப்படுகிறார் அம்மா நீலவேணி.

மற்றொரு பக்கம், ஒரு மலையை பல நூறடி ஆழம் குடைந்து சுரங்கம் தோண்டி, உள்ளே இருக்கும் விலையுயர்ந்த கனிமவளங்களைக் கைப்பற்ற திட்டம் போடுகிறார் கார்ப்பரேட் பெருமுதலாளியான வருண் தயாளன் (ஜான் கொக்கன்). இத்திட்டத்தை செயல்படுத்தினால் நிலச்சரிவு ஏற்பட்டு மலையடிவாரத்தில் உள்ள கிராமம் முழுமையாக அழிந்துபோகும்; அதில் வசிக்கும் 1200 அப்பாவி மக்கள் மடிந்துபோவார்கள் என்று தெரிந்தும், அது பற்றி துளியும் கவலைப்படாத வருண், அமைச்சரை (பி.எல்.தேனப்பன்) சந்தித்து அனுமதி கேட்கிறார்.

“இந்த திட்டத்தின் முழு மதிப்பு ரூ.7000 கோடி. அதில் எனக்கு 1000 கோடியை கமிஷனாகக் கொடுத்து விடுங்கள்” என்று பேரம் பேசுகிறார் அமைச்சர். இதற்கு சம்மதம் தெரிவிக்கும் வருண், அமைச்சருக்கு உரிய பணத்தை அவரிடம் கொண்டுபோய் சேர்க்கும் பொறுப்பை, தனது நம்பிக்கைக்குரிய நபரான ஆபிரகாமிடம் (அர்ஜுன் சிதம்பரம்) ஒப்படைக்கிறார். ஆனால் ஆபிரகாம் எதிர்பாராத விதமாக போலீசில் சிக்கிக் கொள்கிறார்.

இதனிடையே, இந்த பல்லாயிரம் கோடி ரூபாய் விவகாரத்திற்குள் கராத்தே மாஸ்டர் ராஜாராமன், அவரது மனைவி நீலவேணி, மகள் நிலா, தம்பி இளங்கோ ஆகியோர் எப்படி உள்ளே வருகிறார்கள்? அவர்கள் வருண் – ஆபிரகாம் கும்பலை ’பிளாஸ்ட்’ செய்து நிர்மூலமாக்கி, மலைகிராமத்தையும், அதில் வசிக்கும் 1200 அப்பாவி மக்களையும் எப்படி காப்பாற்றுகிறார்கள்? என்பன போன்ற கேள்விகளுக்கு தொடர்ச்சியான அதிரடி ஆக்‌ஷன்களுடன் சுவாரஸ்யமாக விடை அளிக்கிறது ‘பிளாஸ்ட்’ திரைப்படத்தின் மீதிக்கதை.

கராத்தே மாஸ்டர் ராஜாராமனாக அர்ஜுன் நடித்திருக்கிறார். பொறுப்புள்ள குடும்பத் தலைவராக ஆர்ப்பாட்டமில்லாத நடிப்பை குறையின்றி அள்ளிக் கொடுத்திருக்கிறார். அதே நேரத்தில் அதிரடி ஆக்‌ஷன் காட்சிகள் என்று வரும்போது, தனது 46 ஆண்டுகால திரைவாழ்க்கையின் மொத்த ஸ்டண்ட் அனுபவத்தையும், முழு உழைப்பையும் கொட்டி, ‘ஆக்‌ஷன் கிங்’ என்ற தனது பட்டப்பெயருக்கு பொருத்தமாக எதிரிகளைப் பந்தாடி பின்னி பெடலெடுத்திருக்கிறார்.

கதையின் நாயகியாக, ஐ.டி நிறுவன ஊழியராக, ராஜாராமனின் மகள் நிலாவாக ப்ரீத்தி முகுந்தன் நடித்திருக்கிறார். ஆக்‌ஷன் காட்சிகளில் அர்ஜுனுக்கு நிகராக மிரட்டியிருக்கிறார். “ஆக்‌ஷன் பிரின்ஸஸ்” என்று பட்டம் சூட்டி பாராட்டுமளவுக்கு கராத்தே பயின்று அவர் செலுத்தியிருக்கும் உழைப்பு பிரமாதம். பாராட்டுகள் ப்ரீத்தி முகுந்தன்!

ராஜாராமனின் மனைவி நீலவேணியாக அபிராமியும், ராஜாராமனின் தம்பி இளங்கோவாக விவேக் பிரசன்னாவும் நடித்திருக்கிறார்கள். இருவரும் ஆக்‌ஷன், நடிப்பு ஆகிய இரு அம்சங்களிலும் ரவுண்டு கட்டி அடித்து ஸ்கோர் செய்திருக்கிறார்கள்.

முதன்மை வில்லன் வருண் தயாளனாக ஜான் கொக்கன் நடித்திருக்கிறார். அவரை இன்னும் சிறப்பாக பயன்படுத்தியிருக்கலாம். ஆபிரகாமாக வரும் அர்ஜுன் சிதம்பரம், கிருபாகரனாக வரும் பவன் ஆகியோர் வில்லத்தனத்தில் மிரட்டியிருக்கிறார்கள்.

போலீஸ் அதிகாரியாக வரும் திலீபன், சிவாவாக வரும் பாலா ஹாசன், டோபியாக வரும் வினோத் சாகர், அமைச்சராக வரும் பி.எல்.தேனப்பன் உள்ளிட்டோர் தத்தமது கதாபாத்திரத்துக்குத் தேவையான நடிப்பை நிறைவாக வழங்கியிருக்கிறார்கள்.

இப்படத்தை எழுதி இயக்கியிருக்கிறார் அறிமுக இயக்குநரான சுபாஷ் கே ராஜ். ‘ஃபேமிலி ஆக்‌ஷன் ட்ராமா’ ஜானரில் கதைக்கருவைத் தேர்ந்தெடுத்து, கதாபாத்திரங்களைத் தனித்தன்மையோடு வடிவமைத்து, கதையோடு சேர்ந்து வருகிற மாதிரி படத்தின் ஆரம்பம் முதல் இறுதி வரை சண்டைக் காட்சிகளை ஒன்றன்பின் ஒன்றாக வரிசையாக அடுக்கி திரைக்கதை அமைத்து, படத்தை சுவாரஸ்யமாகவும், விறுவிறுப்பாகவும் போரடிக்காமல் நகர்த்திச் சென்றுள்ளார். அதோடு, ஒவ்வொரு பெண்ணும் யாரையும் சார்ந்திருக்காமல் தன் பலத்தில் தானே நிற்க வேண்டும் என்ற கருத்தையும் படத்தில் அழுத்தம் திருத்தமாகக் கூறியிருக்கிறார். பாராட்டுகள் இயக்குநர் சுபாஷ் கே ராஜ்.

ஸ்டண்ட் மாஸ்டர் பீனிக்ஸ் பிரபுவின் அதிரடி ஆக்‌ஷன் வடிவமைப்பு, ரவி பஸ்ரூரின் பட்டையைக் கிளப்பும் பின்னணி இசை, அருண் ராதாகிருஷ்ணனின் ஆக்‌ஷன் படத்துக்குரிய அட்டகாசமான ஒளிப்பதிவு, பிரதீப் இ ராகவின் விறுவிறுப்பைக் கூட்டும் படத்தொகுப்பு உள்ளிட்ட தொழில்நுட்பங்கள் படத்துக்கு பலம்.

‘பிளாஸ்ட்’ – அதிரடி ஆக்‌ஷன் விரும்பிகளுக்கு செம விருந்து.

ரேட்டிங்: 4/5