99/66 – விமர்சனம்

நடிப்பு: சபரி, ரோகிந்த், ரச்சிதா மகாலட்சுமி, ஸ்வேதா, பவன் கிருஷ்ணா, கே.ஆர்.விஜயா, கே.எஸ்.வெங்கடேஷ், எஸ்.சினேகா, குமாரி கனிஷ்கா, ஸ்ரீலேகா, பி.எல்.தேனப்பன், சிங்கம்புலி, புஜ்ஜிபாபு, சாம்ஸ், அம்பானி சங்கர், முல்லை, கோதண்டம், தயாரிப்பாளர் – இயக்குநர் எம்.எஸ்.மூர்த்தி மற்றும் பலர்

கதை,திரைக்கதை, வசனம், பாடல் வரிகள், பாடலிசை, தயாரிப்பு, இயக்கம்: எம்.எஸ்.மூர்த்தி

ஒளிப்பதிவு: சேவிலோ ராஜா

படத்தொகுப்பு: மீனாட்சி சுந்தரம்

பின்னணி இசை: அமர்கீத்

கலை: ஜெயமுருகன் .

நடன அமைப்பு: ஸ்ரீதர் -அக்ஷயா ஆனந்த்

சண்டை அமைப்பு: ஃபயர் கார்த்திக்

இணை தயாரிப்பு: சுஜாதா மூர்த்தி

பத்திரிகை தொடர்பு: புவன் செல்வராஜ்.

புதுமணத் தம்பதியான சங்கீதாவும் (ரச்சிதா மகாலட்சுமி), குணாவும் (சபரி) அடுக்குமாடி குடியிருப்பு ஒன்றில், 66ஆம் நம்பர் பிளாட்டை விலைக்கு வாங்கி, அதில் குடியேறுகிறார்கள். குணாவுக்கு சங்கீதா மேல் பிரியமெல்லாம் இல்லை. பணத்துக்காக பாசக்கார கணவராக நடிக்கிறார். சங்கீதாவை தீர்த்துக் கட்டினால் கோடிக்கணக்கில் பணம் வரும் என்பதால், அதற்கான முயற்சியில் அவ்வப்போது ரகசியமாக ஈடுபடுகிறார்.

இவர்களது 66ஆம் நம்பர் பிளாட்டுக்கு எதிரே இருக்கும் பிளாக்கில், 99ஆம் நம்பர் பிளாட்டில் ரஞ்சிதா (ஸ்வேதா) வசித்து வருகிறார். அவருடன் சங்கீதாவுக்கு நட்பு ஏற்பட்டு அடிக்கடி இருவரும் சந்தித்துப் பேசுகிறார்கள். இந்நிலையில், ரஞ்சிதாவை தனது கணவர் குணா கொலை செய்ய முயற்சிப்பதாகவும், அவரை காப்பாற்றும்படியும் சங்கீதா அலறியடித்து ஓடி வருகிறார். குடியிருப்புவாசிகள் கூடிவிடுகிறார்கள். அவர்களிடம் சங்கீதா தான் கண்ணால் கண்டதைச் சொல்ல, அவர்களோ, ரஞ்சிதா முன்பே இறந்துவிட்டதாகவும், தற்போது 99ஆம் பிளாட்டில் யாரும் குடியிருக்கவில்லை என்று சொல்ல, சங்கீதா அதிர்ச்சி அடைகிறார்.

எனில், ரஞ்சிதா யார்? அவரது பின்னணி என்ன? கொலை செய்யத் திட்டமிட்டிருக்கும் தன் கணவரிடமிருந்து சங்கீதா தப்பித்தாரா, இல்லையா? என்பன போன்ற கேள்விகளுக்கு திகிலும், அமானுஷ்யமும் நிறைந்த எதிர்பாராத திருப்பங்களுடன் விடை அளிக்கிறது ‘99/66’ திரைப்படத்தின் மீதிக்கதை.

நாயகி சங்கீதாவாக ரச்சிதா மகாலட்சுமி நடித்திருக்கிறார். வசீகரிக்கும் அழகில் வழக்கம் போல் ஈர்க்கிறார். ஆரம்பத்தில் அப்பாவி மனைவியாக வருபவர், உடம்பில் ஆவி புகுந்த பிறகு தப்பானவர்களை தூக்கிப்போட்டு பந்தாடும்போது காட்டும் ஆவேசம் அட்டகாசம்.

இன்னொரு நாயகியாக, ரஞ்சிதாவாக நடித்திருக்கிறார் ஸ்வேதா. புத்தமத ஈர்ப்பை நன்கு வெளிப்படுத்துகிறார்.

இவர்களுடன் குணாவாக வரும் சபரி, கரணாக வரும் ரோகிந்த், விக்கியாக வரும் பவன் கிருஷ்ணா, துர்க்காதேவி அன்னையாக வரும் கே.ஆர்.விஜயா, மற்றும் கே.எஸ்.வெங்கடேஷ், எஸ்.சினேகா, குமாரி கனிஷ்கா, ஸ்ரீலேகா, பி.எல்.தேனப்பன், சிங்கம்புலி, புஜ்ஜிபாபு, சாம்ஸ், அம்பானி சங்கர், முல்லை, கோதண்டம், தயாரிப்பாளர் – இயக்குநர் எம்.எஸ்.மூர்த்தி உள்ளிட்டோர் தத்தமது கதாபாத்திரத்துக்குத் தேவையான நடிப்பை குறைவின்றி நிறைவாக வழங்கியிருக்கிறார்கள்.

கதை, திரைக்கதை, வசனம், பாடல் வரிகள் எழுதி, இசையமைத்து இயக்கி, தயாரித்துள்ள எம்.எஸ். மூர்த்தி, திகில் கதை என்றாலும், அதில் பெண்களுக்கு எதிராக நடக்கும் குற்றங்களைச் சொல்லி, குற்றவாளிகளுக்கு தகுந்த தண்டனை வழங்க வேண்டும் என்று வலியுறுத்தியுள்ளார். மேலும், பேய் படம் என்றாலும் எல்லா உயிர்களிடத்திலும் அன்புகாட்ட வேண்டும் என்ற செய்தியை மனம் நெகிழும் அளவிற்கு திரைக்கதையில் இயக்குநர் சொல்லியிருப்பதையும் பாராட்டலாம்.

தரமாக ஒளிப்பதிவு செய்திருக்கும் சேவிலோ ராஜா, பயமுறுத்தும் பின்னணி இசை அமைத்த அமர்கீத், நறுக்க வேண்டியதை நறுக்கி, தொகுக்க வேண்டியதைத் தொகுத்த படத்தொகுப்பாளர் மீனாட்சி சுந்தரம் உள்ளிட்ட தொழில்நுட்ப கலைஞர்கள், இயக்குநரின் கதை சொல்லலுக்கு பக்க பலமாக இருந்து உதவியிருக்கிறார்கள்.

’99/66’ – திகில் மற்றும் அமானுஷ்யம் விரும்பும் ரசிகர்களுக்கு நிச்சயம் பிடிக்கும்!

ரேட்டிங்: 3/5