வடம் – விமர்சனம்

நடிப்பு: விமல், நட்டி (எ) நடராஜ், சன்ஷ்கா ஸ்ரீ, முனீஷ்காந்த், நரேன், இந்துமதி, பாலசரவணன், மதுசூதனராவ், தீபா சங்கர் மற்றும் பலர்

எழுத்து & இயக்கம்: கேந்திரன்.வி

ஒளிப்பதிவு: பிரசன்னா எஸ் குமார்

படத்தொகுப்பு: சாபு ஜோசப் வி ஜே

இசை: டி.இமான்

கலை: வி.சசிகுமார்

சண்டை அமைப்பு: ஜி.என்.முருகன்

நடன அமைப்பு: தினேஷ், தீனா & சந்தோஷ்

தயாரிப்பு: ’மாசானி பிக்சர்ஸ்’ ராஜசேகர்.ஆர்

பத்திரிகை தொடர்பு: சதீஷ் எஸ்2 மீடியா

’ஏறு தழுவுதல்’ என்பது தமிழர்களின் 5ஆயிரம் ஆண்டு பழமை வாய்ந்த, பாரம்பரிய வீர விளையாட்டாகும். இந்த வீர விளையாட்டு, ‘ஜல்லிக்கட்டு’, ‘வட மஞ்சு மிரட்டு’ என பல பெயர்களில், பல தினுசுகளாக விளையாடப்படுகின்றன.

வாடிவாசலிலிருந்து அவிழ்த்துவிடப்படும் கோபாவேசக் காளையும், அதை அடக்க நினைத்து துணிச்சலுடன் களத்தில் நிற்கும் இளம் காளையர்களும் தத்தமது வீரத்தை வெளிக்காட்டும் விளையாட்டு போட்டியையே ‘ஜல்லிக்கட்டு’ என்கிறோம். இந்த ’ஜல்லிக்கட்டு’ போட்டியை மையமாக வைத்து தமிழ்சினிமாவில் எக்கச்சக்கமான திரைப்படங்கள் வந்திருக்கின்றன.

ஆனால், இந்த ஜல்லிக்கட்டிலிருந்து ‘வட மஞ்சு விரட்டு’ சற்று வித்தியாசமானது. பெரிய மைதானத்தில் சுமார் 20 அடி நீள கயிற்றில் (வடத்தில்) முரட்டுக்காளை கட்டப்பட்டிருக்கும். அந்த எல்லைக்குள் (அதன் வட்டத்துக்குள்) புகுந்து காளையை அடக்க முயலும் காளையர்களுக்கும், அவர்களை நெருங்க விடாமல் சிதைக்க முயலும் காளைக்கும் இடையே நடக்கும் வீர விளையாட்டுப் போட்டியையே ‘வட மஞ்சு விரட்டு’ என்கிறோம். இந்த ‘வட மஞ்சு விரட்டு’ போட்டியை மையமாக வைத்து தமிழ் சினிமாவில் திரைப்படங்கள் அநேகமாக வந்ததில்லை எனலாம். அந்த குறையைப் போக்கும் வகையில் தற்போது திரைக்கு வந்திருக்கிறது ‘வடம்’ திரைப்படம்.

சிவகங்கை மாவட்டம் சிங்கம்புணரியில் ஊர்த்தலைவராக இருக்கிறார் சந்தனவேல் ( நரேன்). உயிர்நேயரான அவர், அடிமாடாக கொண்டு செல்லப்படும் மாடுகளைக் காப்பாற்றி, தனது கோசாலையில் வைத்துப் பராமரிக்கிறார். இவரது மனைவி இந்து (இந்துமதி). இத்தம்பதியரின் மகன் தான் இக்கதையின் நாயகன் வெற்றிவேல் (விமல்).

அப்பா சந்தனவேலைப் போல கருணை உள்ளம் கொண்டவரான வெற்றிவேல், உடல்கோளாறு காரணமாக கைவிடப்பட்டு, அடிமாடாக கொண்டு செல்லப்பட்ட ஓர் இளம் கன்றுக்குட்டியைக் காப்பாற்றி, கோசாலையில் விடாமல் தன் வீட்டுக்கு அழைத்துச் சென்று, ‘பாண்டிமுனி’ என்று பெயரிட்டு, பாசத்துடன் வளர்த்து வருகிறார்.

பாண்டி முனிக்கு தகுந்த பயிற்சி அளித்து, வீரமிக்க காளையாக மாற்றி, வட மஞ்சு போட்டியில் தோல்வியையே சந்திக்காத ரத்னவேலின் ( நட்டி என்ற நடராஜ்) காளைக்குப் போட்டியாக களம் இறக்கி வெற்றிகளைக் குவிக்கிறார் வெற்றிவேல். இதனால் தோல்வியடை ந்து அவமானப்படும் ரத்னவேல், பாண்டி முனி காளையையும், வெற்றிவேலையும், அவரது குடும்பத்தையும் பழிவாங்கப் புறப்படுகிறார். அவரது கொடிய எண்ணம் நிறைவேறியதா, இல்லையா? என்பது ‘வடம்’ திரைப்படத்தின் மீதிக்கதை.

கதையின் நாயகன் வெற்றிவேலாக விமல் நடித்திருக்கிறார். முறுக்கு மீசை, வீராப்பு என படம் முழுக்க மிரட்டுகிறார். காளைக்காக உருகுவது, நாயகியின் காதலுக்கு ஏங்குவது சுவாரஸ்யம். சண்டைக் காட்சிகளில் இறங்கி அடித்திருக்கிறார்.

நாயகி தேவகியாக சன்ஷ்கா ஸ்ரீ நடித்திருக்கிறார். கிராமத்து அழகியாக வந்து இயல்பான நடிப்பைக் கொடுத்திருக்கும் அவரே பின்னர் கதையின் மிகப் பெரிய திருப்புமுனையாகவும் மாறி நம்மைத் திடுக்கிட வைக்கிறார்.

வில்லன் ரத்னவேலாக நட்டி என்ற நடராஜ் நடித்திருக்கிறார். எந்த அலட்டலும் இல்லாமல் முகத்தில் கோபத்தையும் வெறுப்பையும் அவர் தெறிக்கவிடுகிறார்.

முனீஷ்காந்த் ஐமன்னன் என்ற கதாபாத்திரத்தில் வருகிறார். அவரை வெறும் நகைச்சுவை நடிகராகப் பார்த்துவந்த நம்மை இந்தப் படத்தில் குணச்சித்திர கலைஞராக வெளிப்பட்டு ஆச்சரியப்படுத்துகிறார்.

நாயகனின் அப்பா சந்தனவேலாக வரும் நரேனின் அனுபவம், அவரது நடிப்பில் தெரிகிறது.

நாயகனின் அம்மா இந்துவாக வரும் இந்துமதி, நாயகனின் அத்தையாக வரும் தீபா சங்கர், கர்ணனாக வரும் மதுசூதனராவ், பாலாவாக வரும் பாலசரவணன் உள்ளிட்டோரும் தத்தமது கதாபாத்திரத்துக்குத் தேவையான நடிப்பை நிறைவாக வழங்கியிருக்கிறார்கள்.

எழுதி இயக்கியிருக்கிறார் இயக்குநர் கேந்திரன் வி. காதல், பகை, பழிவாங்கல் என்ற அம்சங்கள் கொண்ட வழக்கமான, சாதாரண கதையில், வட மஞ்சு விரட்டு என்னும் பாரம்பரிய வீரவிளையாட்டைப் புகுத்தி, பொழுதுபோக்கு அம்சங்களைக் கலந்து ரசிக்கத்தக்க விதத்தில் படத்தை நகர்த்திச் சென்றுள்ளார் இயக்குநர். திரைக்கதையில் இன்னும் அழுத்தம் கொடுத்திருக்கலாம்.

பிரசன்னா எஸ்.குமாரின் ஒளிப்பதிவில் வட மஞ்சு விரட்டு காட்சிகள் சிலிர்ப்பூட்டுகின்றன.

டி.இமான் இசையில் பாடல்கள் ஓ.கே ரகம். பின்னணி இசை திரைக்கதையுடன் பயணித்திருக்கிறது.

‘வடம்’ – வட மஞ்சு விரட்டு விளையாட்டை நேரில் பார்த்து ரசித்த அனுபவம் பெறுவதற்காக பார்க்கலாம்!

ரேட்டிங் – 3/5