ஸ்வீட்டி நாட்டி கிரேசி – விமர்சனம்

நடிப்பு: த்ரிகுண், ஸ்ரீ ஜீத்தா கோஷ், இனியா, ராதா, ரவி மரியா, தம்பி ராமையா, சத்யன், ஜாவா சுந்தரேசன், மதன் பாபு, விஜய் டிவி தனசேகர், வினோத், ஆலி, ரகு பாபு மற்றும் பலர்

எழுத்து & இயக்கம்: ராஜசேகர் ஜி

ஒளிப்பதிவு: சி.விஜயஸ்ரீ

படத்தொகுப்பு: கே.குமார்

இசை: அருணகிரி

பாடல் வரிகள்: சினேகன், பாஸ்கர் எஸ்.தேவ்

கலை இயக்கம்: ஜெயகுமார்

நடன அமைப்பு: ஐ.ராதிகா

தயாரிப்பு: ’அருண் விஷுவல்ஸ்’ கோவை ரமேஷ்

பத்திரிகை தொடர்பு: புவன் செல்வராஜ்

ஹாஸ்டலில் தங்கி கல்லூரியில் படிக்கும் மாணவர்கள் ஓர் இரவு தங்கள் வார்டனுடன் (ரவி மரியா) சேர்ந்து ஹாஸ்டலின் புல்வெளியில் அமர்ந்து சரக்கடித்து அமர்களம் செய்து கொண்டிருக்கிறார்கள். அப்போது ஹாஸ்டலுக்குள் சிவா (த்ரிகுண்) என்ற மாணவர் தூக்குப்போட்டு தற்கொலை செய்துகொள்ள முயன்றுகொண்டிருக்கிறார். இது தெரிந்து பதறி ஓடிவரும் வார்டனும் சக மாணவர்களும் சிவாவைக் காப்பாற்றி, ஆசுவாசப்படுத்தி, ”என்ன பிரச்சனை?” என்று விசாரிக்கிறார்கள். அவர்களிடம் தன் காதல் லீலைகளை சொல்லத் தொடங்குகிறார் சிவா…

அவை என்னவென்றால், கல்லூரியில் கணக்குப் படிப்பு படிக்கும் சிவாவுக்கும், கணக்குப் பாடத்தில் சந்தேகம் கேட்டு அவரிடம் வரும் அனிதா (ஸ்ரீ ஜீத்தா கோஷ்) என்ற ஜூனியர் மாணவிக்கும் பழக்கம் ஏற்படுகிறது. அந்த பழக்கம் காதலாய் வளர, இருவரும் படுக்கையைப் பகிர்ந்துகொள்கிறார்கள். இன்பம் அனுபவித்து முடிந்ததும், அனிதா மனநிறைவோடு இருக்க, சிவாவோ கதறிக் கதறி அழுகிறார். திகைக்கும் அனிதா காரணம் கேட்க, தான் பள்ளியில் படித்தபோது நந்தினி (இனியா) என்ற டியூஷன் டீச்சரோடு படுக்கையைப் பகிர்ந்து கொண்டதை சிவா அழுதுகொண்டே கன்ஃபெஸ் செய்ய, ஆவேசம் கொள்ளும் அனிதா பிரேக்-அப் சொல்லி பிரிந்துபோய் விடுகிறார்.

சில நாட்களுக்குப்பின், சிவாவின் பள்ளிப்பருவத் தவறை மன்னித்து அவருடனான காதலைப் புதுப்பிக்கிறார் அனிதா. இருவரும் மீண்டும் படுக்கையைப் பகிர்ந்துகொள்கிறார்கள். முடிந்ததும், இப்போதும் கதறிக் கதறி அழுகிறார் சிவா. ஒருமுறை பெங்களூர் சென்றிருந்தபோது தற்செயலாக சைலஜா (’சுந்தரா டிராவல்ஸ்’ ராதா) என்ற ஆண்ட்டியைச் சந்தித்ததாகவும், அவருடனும் படுக்கையைப் பகிர்ந்துகொண்டதாகவும் சிவா சொல்ல, கொந்தளிக்கும் அனிதா மீண்டும் பிரேக்-அப் சொல்லி, பிரிந்து சென்று விடுகிறார்.

பின்னர் ஒரு தோழியின் அறிவுரையை ஏற்று மனம் மாறும் அனிதா, மீண்டும் சிவாவை ஏற்றுக்கொள்வதோடு, அவரை திடீரென அழைத்துச் சென்று பதிவுத் திருமணம் செய்துகொண்டு, கோத்தகிரியில் உள்ள தன் பங்களாவுக்கு அழைத்துச் செல்கிறார். அங்கே அனிதாவின் அக்காவாக டியூஷன் டீச்சர் நந்தினியும், அனிதாவின் அம்மாவாக சைலஜா ஆண்ட்டியும் இருப்பதைப் பார்த்து சிவா அதிர்ச்சி அடைகிறார்.

அதன்பின் என்ன நடந்தது? எத்தகைய சிக்கல்கள் எழுந்தன? இறுதி முடிவு என்ன? என்பன போன்ற கேள்விகளுக்கு நகைச்சுவையும், காமச்சுவையும் ததும்பத் ததும்ப விடை அளிக்கிறது ‘ஸ்வீட்டி நாட்டி கிரேசி’ திரைப்படத்தின் மீதிக்கதை.

இப்படத்தை எழுதி இயக்கியிருக்கிறார் ராஜசேகர் ஜி. ‘ஏ’ சான்றிதழ் தான் இந்த அடல்ட் காமெடிப்படத்துக்குக் கிடைக்கும் என்பதில் முன்கூட்டியே தெளிவாக இருந்துள்ள இயக்குநர், இரட்டை அர்த்த வசனங்களையும், பல சமயம் ஒரே ஆபாச அர்த்தம் வரும் வசனங்களையும், வரைமுறை இல்லாமல், நடிகைகளின் உடல்களை சற்று தாராளமாகவே திரையில் காட்டும் கிளாமர் காட்சிகளையும் படம் முழுக்க அள்ளித் தெளித்து, வயது வந்தோருக்கு திகட்டத் திகட்ட காமெடி விருந்து படைத்திருக்கிறார்.

கதையின் நாயகன் சிவாவாக வரும் த்ரிகுண், நாயகி அனிதாவாக வரும் ஸ்ரீ ஜீத்தா கோஷ், நாயகியின் அக்கா நந்தினியாக வரும் இனியா, அவரது கணவர் பாலுவாக வரும் சத்யன், நாயகியின் அம்மா சைலஜாவாக வரும் ‘சுந்தரா டிராவல்ஸ்’ ராதா, அவரது கணவர் அழகேசனாக வரும் தம்பி ராமையா, ஹாஸ்டல் வார்டனாக வரும் ரவி மரியா, கல்லூரி மாணவர்களாக வரும் விஜய் டிவி தனசேகர், வினோத் டாக்டராக வரும் மதன் பாபு, மற்றும் ஜாவா சுந்தரேசன், தெலுங்கு நடிகர் ஆவி, ரகு பாபு உள்ளிட்டோர் இயக்குநரின் விருப்பப்படி சரளமாக பச்சை பச்சையாக வசனம் பேசியும், தாராளமாக கிளாமர் காட்டியும் வயதுவந்த பார்வையாளர்களுக்கு தீனி போட்டுள்ளார்கள்.

சி.விஜயஸ்ரீயின் ஒளிப்பதிவும், அருணகிரியின் இசையும், கே.குமாரின் படத்தொகுப்பும் இயக்குநருக்கு உறுதுணையாக இருந்து ஒத்துழைத்துள்ளன.

‘ஸ்வீட்டி நாட்டி கிரேசி’ – வயதுவந்த பார்வையாளர்களை மகிழ்விப்பதற்காக எடுக்கப்பட்டுள்ள அடல்ட் காமெடி படம்; வயது வராதோர் இப்படத்தை தவிர்க்கவும்!

ரேட்டிங்: 2.5/5